Singnahte huih in muut ging hiau hiau in, khaw omdan mahmah leng lungzuang hileh kilawm in meipi sah sim hi. June kha a hi a khosung dai sipsip a, thom nei lua cih leng omlou a, kholak ah volunteer te loungal mawk muh ding awmlou hi. Huai hun in thau nei khat bek a ki omkei, tupi thau bawltawm, gophel gui a kang, thal, gophel cih khawng a hi lel hi. Zingkal bel sim in inkong ah ka dingkhia a, khopi veng, vengkhung lam a ka awmlai uh a hi. Kuki ten hon luhdek uh' ci’n ka Usuan ka inn-sak ua pan hong taisuak a, himahleh volunteer khat in naupang mawkpau lou chi in a gawlmek hi. A hi a, a dikmah ahi. Paungaihna in Kuki ten hon luh dek uh a hihdan hongpuang petmah ua, mipite Biakin sung a kibu dia thupiak in ka om uhi. Dak 7am khawng a hi ta. Kei leng ka Ute toh ka puanpi te uh leh van te sel din ka pokhia ua, ka innkhangte uh huan lianpi mau khawng tampi pou, huai a kokhuk, vansel na dia kibawl ah kava koih uhi. Hucih’n kinohtak in kakisa ua, akua akua, ka nu koi ah, ka pa koi ah chi pawl toh buai vengvung in Biakinn lam ka manoh suk uhi. Biakinn ahihleh kholai lak a awm a hi a, teklei a baang sahtak a kibawl ahi. Thanlon mi kia hilou in Suangpek, Leizangphai leh mun tuamtuam apat a galtai a hong awm tamkhop leng a om. Volunteer te khosung venbit sawm in panmun ding kihawm ua, paungaihna tungtawn in pan na mun di khawng hong puang uhi. Biakinn sung kalut a, mi ana tampetmah. Ki teirol pan ahihna ah lauhna di leng kithei nailou in, lawmte khawng toh thau a gin leh hicia bok di khawng ci a ka kimawl uh leh upa ten hon tai uhi. Adik a gen in kuki te tampi galvan hoipipi tawi a hong kuan a hi uh. Genzual le, ei buai ma a Naga te bang ana doukhin ahihna uah ei thaukhatbek neilouh leh namsepaihnei nailou te a din huphulh huai pi a suak hi. Himahleh lam etdang awmlou a hihna ah pantheihdan teng a khosung humbit ngai ahi maimah. Dai sipsip in biakin sung ah Thaugin ngak hileh kilawm in nau nen toh aneu alian, atek leh volunteer bang zah hiam ki awm a, akong a pangpawl leng awm hi. Biakin sung ah atamzaw a kitai a, akhente bel Farm lam khawng leh unau simte te inkhoh a kibu uhi.  Paungaihna khawllou hial in kam a kukite nohkik sawm hileh kilawm in a pauzot zot mai hi. Bangcik hun in thau hongging dia cih ngak a ki awm a hita.

Zinglam dak 9 bang hong gingta, thau lah ging nailou, kikhem na maimai a hi de o ci a ka awmlai tak un thak khat in hon hawt dodot mai uh. Biakin apat gamlalou khosung mah, mualvum singpi huan apat LMG in dawmlou hial in biakin tuh kap ci tak in hon kap petmah ta uh. Gintak a bang kei, akap toh amau toh thau ging toh, buai in kibuai vengvung hi. Gophel, thal leh thau bawltawm toh pantheih dandan in kipang a, kinang hi. A buai huai mahmah leh poi mahmah bel thau bawltawm toi ten akap dek ciang ua a kep kia ging sek, amau adia danger lehlam a hihman in a zangthei taktak kei uhi. Vengkhunglam a lut sawm masa ua himahleh,suangtoh,gophel toh,akhenten Langva peuh a khen ging ciang un kuki te a lut tou ngam kei ua,simtete ten na lak apat free tak leh baihlam takin hon lut phei uhi. Hun bangtanhiam a kinang tuah tak un biakin bang hon opkhum ta ua,a buai huai khopmai, volunteer ten vanjat ginatak a neihlouh ziak un kihemkhia a hi ngei di ua,hong lut zou petmah uhi. Huai lai a van zat kikhiak dan cu kikhe pet mah. Volunteer ten 'pung' a cih leh kuki ten 'dododododot' ci mai, a ngaihna awmlou. A hi a a deih bang un bel a gamtang thei tuan veve kei uh. Amasa pen ding in Convention English School hon hal pan uh,huci a banban in hon hal phei uhi. Kuki te hai lou hi le uh paite te inteng a kangtum ding. Aziakbel,unau gangte,simte cih te khawng in hiai in simte a a h,gangte a a hi,ci a a khem zoh ziak un in hoih tata bang humbit in a awm a, bazar dungteng khat mah leng a hal ngam kei uhi. Hucia in hal a a buai lai un kou leng kap leh mau in biakin sung ah ka kiphu noinoi ta uh. Biakin kong tual ah mi 2 apang ua,akim vel ah bang zah hiam a awm uh. Biakin main door pen a kapsia ua, hucin hong lut thei di din mun in a awmta uh. Haksa sa deuh a hi ngei ding ua, kongkhak bel a hong theipah kei uh. Hong a honglut dek hi jen2 leh bel khetlup a awm dia mansa a pang awm a hihziak in,balcony apat kap theihdandan in akapzel ua,a tawp in zaw thaltang lah bei,beidot huai petmah ta hi,sun nung dak 1 leh dak 2 kal ding khawng hi in ka thei,biakin kia hon target a hita uh. A theihtawp uh asuah hang un a hon luhsuah zou tuan kei uhi.Hiai a nupi khat hangsan kasak mahmah cu, kuki ten a kong hon soi uh a kitheih in lau in a taikhe vek uh,himahleh huai nupi nu a pa khopmai,singtawn toh a kongkhak bul ah ana pangtop a kongkhak a lentang top. Kaphat mahmah hi. Kukite le lutzou dia a kigintak louh ziak un kongkhak leh tohlet te kalhkhiak theihtheih hon kalh khe panta uh. Fron door toh a saklam window hon kalhkhe ta uh. Ut dan dan a hon kap thei a hi mai ta uhi. Thauging sang in kap a khut lik a Pathian mai a thum ging a ngaih zaw hi. Kerosene tohlet apat hon kitheh lut ta,a sung ah kicing phial in a kawt suak,lungkham leh beidot tawpkhawk ah ki awm.LAUH di dan a le kikoih thei manglou,ki am hai gawp hi.

Tung thianmang lou ngal belh ding a om nawnkei, asaklam apat thaulong, AK-56 a hong dawk a, a mong ah khausan akikhih hi. Huci in saklam baangzul kinaih noinoi zel a, front door lam a pat a hon kap dek ciang un front wall lam a kinaih noi2 nawn jel hi. Hucin dak kal bangzahiam ka awm nilouh uhi. Hiai a hong hi ta, saklam tohlet lam ka manoh laitak un, thakhat in thau a hong gingta,ka ma a katanau te Leizangphai te tangval khat a lu ah hon kapdalh phut mawk,akhuak nengkhawng in hontheh kha hyal hi. Lamdang lamdang cih louh gending a vang tel.  A tung in muhmuh kaplup d a ci ua, himahleh numei leh naupangte khoihlouh di a ci thak ua hucin,numei teng leh naupang teng pawt din hon sawl uhi. Himahleh kuamah kapawt ut kei uh.Aziakbel,numei leh naupangteng pawt le ung ka pasal picing leh tangval te ud dan2 a kap d a hi uh a cih ziak un a pawt nuam kei uhi,a saklam kongkhak a hong kuang mawk,meikuang ka muh in kakap thei pan,tangval bangzah hiam in hun bangtan hyam zoh nung in zun a pekmit thei vanglak uh. Hal a sawmsawm ua a hal kuangzou kei uhi. Chau thou uh mw.a sung ah lah khawnvaktui a kicing mai mah, hucia front door lam ka manohtak un kei ka dawk dingtou kha a, asaklam ka etleh thau in hon ki ngim a,keile mipi kawm a ka tum sawm leh ka ta kei. Hucin numei khat in hon hentum suk,huaizoh in huailam mah ah kataikha nawn ua keikia katuam awmkha,himahleh a sunglam khuam pang sahthou hiven a pang a ka din leh hon mukei hi. PATHIAN lemgel hia, bangziak ahia cih kathei kei, ka Nu Khawnvaktui lak ah sisan kainiuniau in ana lum mawk, akhut taklam a tonglak a thau tanglut a hi a,a vunkia in a oh tang lel hi. Denlam a tangval a kap pa a apailet pen in kanu thumna nei a akhut vanlam a alik laitak a kapkhak a awm a hi. Kanun nau a pua a,ka nautum pen uh a puakpen ka u in apuak a ngaita,lungkham mangbang in ka awmta uh. Ka nu sih leh hin kal a awm a hi ta, nitaklam khomui kuan di khawng a hong hih in, honglut ngeingei di ua gintakna a awm ziakin khatkhat in aki gel khia uhi. Pasal ten a zite uh nik teng in numeidan a kisiam ua, naupom in a taikhethei zel uh, kouleng awl awl in kon pawt ta ua,a kong i hon tung cu,khawmpi nei biakin kaitawp mah kibang,mi a tam khop. Huai a ka muh ka nuihzat cu,ka gang in ka nau pom kawm a,a zi nik teng in,a lupuan in a tuam a,atai leh gamla sim a tun takin a nik a kitol a underpant toh a taisuak hi. Kuki pan kap sawm mah leh nau a pom ziakin a kap ngamkei hi. Ka nu kapkawm leh a veilam khut a a kapkhak nalam len in ka u toh a hongpawt ua,kahlouhna ngaihna a awmkei, a gen ka theician kei na a,a kong a kuki te a pangpan a kapkhak a h. Nu nu..ei ngaidam in cin a kahkhum mawk a,akisikthu a gen a ngaihdam ngen in biakin baang khawng a tum ek hi. Himahleh Ka nu dawn na ka mangnglh thei kei...”PATHIAN KIANGAH NGAIHDAM NGEN ZAW IN, KEN KON NGAIDAM KHIN” a cih in kalungsim a khoih mah mah hi. Ka pawt in inkong ah mi 5 maituam sa, khut nunghensa in a boksak uh. Bangthuthei ka diam ah, kavapai a akal uah kava bok mawk! Ka kiang a kuki pa thautoi bang kinak muh utlua, akapzel a, ka engu zel a, mu ngeilou mah i hih cia maw haha… Huci’n lamdangtak in ka lu ah hon khoih a, nau na nun honsam, vapai in hon ci hi.hucin ka thou a kanu te painalam ah katai phei hi..kim teng ah lah meikang,paina di lam theih a haksa khopmai,lamlian ah ka kumsuk ua,ka nu lah a liamna nasa in a mau den,ka u in ka nautum uh a pom a,a khat ahihleh ka gang in a tonpih hi,ka pa a hihleh a awm na ka thei kei. Meikuang husa lah ngaih, lamlian khang a guam a kapai dek uh leh a kiang a in hong kangzel a, kakik ua, community hall lamzuan in ka pai phei nawn uhi.

Huci’n kapai phei ua, public groud lam ah kapai tou uhi. Mi muhding a awm kei, ka paisuak ua field sak a Hansip veng khung gamlak ah kapai uhi. Vangphat huaitakin huai ah volunteer te 3 ana awm ua ka nu jawng in mun dai ah a koih ua, kou akianglak ah ka lum uhi. A gentheih huaitel, tanai, miksi, thoukang lak ah kilumkha, huai hun in khua a mial philhphelhta a bangmah ciangtakin a kimu kei, zing an nelou akihihman in tha a chau mahmah hi. Biakin lam ah bel kuki te a lut thei ta ua, a sung ah bangzah hiam a man uhi, himahleh mi 2 (pulpit nuai a kibu leh balcony a kibu) te a mu kei ua a suakta uhi. Lamdang kasak bel, Biakin sunga, labu leh Bible a khawm ua,biakin mual ah a lem ua a tung ah a sappa lukhu dal a koih ua, NA PATHIAN SANG UN KEI KA LIANZAW,ci in a haal uhi (Toupa ngaidam in). Khuamial a hita, A mi matte uh kaplup ding a hita,a kaplum mah uh, bangziak a cih kathei kei, tangval khat akam a thaulawng muam sak a a kap ciang un a thau a ging thei kei, a test ciang unlah a gingzel, huci’n amau le i lak ua pang din tonpihle hoi d ci a tonpih a hi uhi. Kapalian le amat uh a hi a,hausa te in a anhuan din a sawl uhi, huai hunlemtang a la in nahtangteh ladia kigen in dialkhailam manoh in a kuan a ,ko hohdek a cihciang un 'na annek na di uh nahtangteh la dek a ci zel a, apaisuak thei hi. Sinzawl tan a taisuak a,tutan inleng a tempawng a neilai a ci hi. Nungkik zual le, nalh kasak mahmah khat,tangval khat biakin kong a a khud a hen uh ana guk tai a,akong a duty pan khol dia thu a piak leh lawmpa khawl malak ah koitai ngeungeu.haha. Hucin a kap a culvert ah a tawmkhe suk hi. Tha a chauhluat ziak in bangmah le kiphawk mang nawnlou a hi d,thauging cu a dai deuhta hi. Solkar sepaihte a hun dia hongkuan a awm ua,himahleh volunteer ten thanlon apat Km 3 kho gamla ah singluang lianpipi ana phuk ziak un hong tungpah thei kei uhi. Hucilou hileh kukite a suakta kei ding ua,thamlou in inn leng tam a halman keiding uh,sepaihten singluang te sing atna a hong tan malam ana hi ua,atanjoh un hong lud dia a kisak uhleh forest gate a duty volunteer ten a thaupi bawltawm un a na hawt uh. Bangtan hiam akinan tuahnung un solkar sepaih a pang khat eimi a hi a, huaipan kikou in honkapnawnkei un honhun dek ka hi uh a cihtakin a kitheituah pan uh. Duty te a awmlai mawk ua na ci kha dia,hicidan a hi, a duty na uh khua apat km kimkhat kho gamla a hi a, kuki te khoto lam apat a honglud jiak ua kimaikha lou uh a hi. Himahleh reinforcement hongkuan ualeh ambush dia pangden ahi uh.  Huci’n mialzul khawng in gari ging khawng kiza a, govt. sepaihte hongtung maimah uh a, lungmuan om mahmah hi. Nitak dak 6, khua cu a mialta, unau simte ten aliamte leh a si te hon kaihkhop sak uhi. Kou kibukna ah leng hongpai ua, ka nu a zawng suk ua, kei pasal khat in hon liangkhokhak h(kineucitho). Hucin kapaisuk ua, koilak a kipai a ko ki awm a cih ka thei kei, himahleh Community hall a hihlam bel ka thei hi. O maizen misiluang a kizan phei jengjung, misi taksa kamuhpatna leng a h. Hall sung ah kanu glucose khawng akhai ua ,unau simte ten olmoh citakin hon olmoh ua pahtak huai kasa hi.

Huciin an toh bawngnawi khawng honpia ua vahtek in ka ne hi,an nezou giahna di lam ah kapai tou uh hi. Akang bang thanlon jingkhua vak in hon vaak a, ni bel a dawk kei, sepaihte leng awmta a hi ua, duty ten khat ana kapliam khak ziak un huai podia lenna hong leng pen ah kanu leng a tuang sak ngal ua,IMPHAL ah etkol in a awm hi. Hampha na e helicopter a tuangkha.he2. Hiai buaina kawmkal ah thukhonung atam mahmah. Kukite ahihleh akiklam un tongkham ah a giak ua,hausa pa teh a jintung uhi. Tongkham hausapa katheih luat a hi a, hicin hon gen, unau kuki ten Thanlon te gumdan a gengen uh a ci hi. Thauhoih khatbek neile uh honthat gam vek di uh a hi cin hon gen hi. Huai ban ah, nupi khat a ci ua,akapkhak uh a kisikdan uh a hah gen diak uh a ci hi. Huai ni in katanau te uh ka nu tel in 2 aliam a,khat in hon beisan hi. Ka nu toh Leizangphai a awmpen toh Ka nuhoih tanu a hi. Ka nuhoih tanu a hihleh numei naupang a hi a,thautang them a mitjul ah a khuak sukha lou deuh in a lut hi. Aman a kap khak tung un a nukiah,nu lingkho in hon deh a ci hi,khophawklou a awm pah in operation dia puak in a awm hi. Azinglam in Mizoram zuan in ki galtai a hi ta mai. Huai nung ven ma, thanlon tanchin kitheipha nawnlou a hihziakin poimahmah. Mimbung ah buaisungteng ka awm ua, galven tak in kakik nawn uhi. Kakik un ka inkimkhoh d uh a sahpetmah, loupa field a awmte dan khuktan2 in asah betbot.

Hiai thu ahihleh kitheihsakna jiak hiam a kon post a hi kei a, kei sang a thei zaw tampi a awm ding, a diklou deuh isakna te kikum khawm a, khangthak buailai a ana thei nailou ten history a a hontheih uh ngimna ahi. Kei mimal in kidounaphual ah 4 vei kana awm khata, huaite keimah adia le sinlai hoihtak a hi mai hi. Hiai post sim kha peuh mah in buaina di hyam, kiselna di hiam a la mailou a, i nam masa ten na anasep dan uh theihna dia i lak theih leh hoih mahmah ding hi. Unau kuki te a simkha na awm zenzen tak uh leh a dikmah a hi cimai le,i na ki melhaih kha ua hi maw cithei ciat din mansa in awm ni, Pathian in i gam a thiltungte a mawk tungsak a hikei a, i khanna ding,gahsuahna din,i hoihna ding hi a a theihziak a hi cih phawk kawm in mailam hun ah ki unau na,kipumkhatsem na leh ki itna a hihjawk na ding in panla thak ni cih kon ngen hi. Lungdam!