Kanu ahihleh mit thuah nop mahmah leh lawm-le-gual thuahdan siam ahih kialeng hilou in inn sung khosathei simtak a nakhang khia ahi hi. Laisiam nalam ah leng sit huailou in BA Shillong St. Edmund ah anazou ahihban ah pianken a mi fel himhim ahihziak in saptuam ah kizang mahmah khat a hi hi. Khristian innsung a khangkhia ahihna a Pathian a limsak a kuapeuh pahtak a hi a, numei pawl ah alupen in apang gige hi. Huaikia leng hilou in numeipawl kikhop na athugen amah tuk a siam omlou kialou in mun tuamtuam ah hotdamna Chialpi nei in a kuan khezel hi.
Ka pa leng kanubang mah a fel leh laisiam nalam ah BA nazou sam mahleh tualsung suak ahihziak in kanu phazoulou deuh a hiding a englis a phonetic lam azang nalh kholkei a achang in kanuihsan zel ua,amah lah adik pen zang kahi chi in a pangzel a kisel in innsung sunuamtu in kazang thei ua anopna tak a om hi. Khosung kanlou a atangval hunteng khosung vai akidiah ahìhman in vengsung kia hilou in Nambing a pawlpi tamkuam tak ah a lubawk in apang a mite thudot mahmah khat a hisam hi. Kanu Pathian a dia theihpatawp a akizat lai in Kapa society a ding in atheih phatawp mah in anakizang sam a mite muhdan in azahtak huai innsung kahi uhi.
A small famaly is a happy famaly chihdan in kanu le kapa toh ka u numei Chingnu,kei sang akum 3 lel a upazaw toh kahi ua ka innsung uh a zangkhai mahmah hi. Khosakna lam ah bel mibng in kanei khol keina ua kapa Nam ading a lubawk khat ahihna zal in miliante deihsakna ziak in contract Nnasep ding nei gige ahih man in kadeih uh kaneizou thou uhi. Ka nuleng Saptuam a fulltime in semkei mahleh satpuam sawldung zui a kuankhezel ahihna ah ka innsung uh etkolna ding aphatuam tham ahon mukhe zel a nuamsa khat kahimai uhi.
Kaneulai hinkhu bang chizat kahiam chih kathei saukei na a pawl 4 kasim apat intuh kathei chiang mahmah ta hi. Ka nu lah igamsung a khelhna galdou ding hongtam petmah ahih ziak in atha it thei mahmah mai a.. Inn taisan a khual gam pawtna ding hau in akhenchiang in akal a sim ahong khualtam zel a huaihun chiang in ka ngaih vungvung hun atam theimahmah hi. Kanu omlouh hun in kapa toh nitak hun kazang zel ua akhenchiang in Committee ding, ministerpu vaidawn ding, vengkhanglam te nupa kina vathuhilh ding,vengsak lamte tapa khamtheih hih vatai ding, vengpamlam te inn kiluh a vasui ding in ahong kisam khemun mahmah a,ka Uching toh thawmhau tak in ka innsung uah nitak hun kazang mun mahmah uhi. Naupang lel kahihman un inntung a zusa tai ging lel khawng in a hon suklauh hun atam mahmah a huailou vuahzuk hun leh huihpi hat hun diakdiak in lau in ka Uching ang a belh a ka ihmut suak hun atam mahmah hi.
Kalauh dan uh ka nu le pa kiang a kagen munluat tak un singtang khua ateng ka papi tanu milaipen ka Uman kou hon ompih ding in kanun akhua ua hotdamna chialpi nei hongkik lam in ahon tonpih a huainung tuh kathawm hauna a nuamtuam mahmah ta hi. Ahihziak kanu din munluah thei taktak lou ahihman in akhenchiang in kanu ngai in kakap theizel a huaihun chiang in ka Uman in hon pua in hon awi ihmu zel hi. Ka nulah khamang thangmat dingtam lua ahìhman in septheih lailai chi in atha it mahmah mai a,hun aneitawm mahmah mai hi.
Ka nukha mit dan thupi kasa mahmah mai a nipini zing annkuang kikhopna neizou ann ne in Biak in kazuan ua,sandes sikul tawp in Numei pawl committe in kanu ahong zekai a kou ka unau 3 un inn apai in ka utegel in ann ahuan ua keibel lawmding neilou kahihman in ka chimziak in ka ute ann huan kava subuai khanak a vapawt a lawm vathuah ding in honsawl zel ua keilah innsung a ka ute, ka nu kapa toh kithuah kan a nuam kasak omlou ahihman in pawt ut lou in achang in 'non ngaikei uh,ipa kiang a hon gen di kahi' chin kakap zel a huaichian in ka uChing hiam ka uMan hiam in ahon kithuah pihzel uhi. Pasal naupang utna numei ading a nuamsa khol lou uh ahiding a ka pawtkhiat mah deìh zaw in lawmte toh ka nektheih leina ding uh chi in teng 1/2 toh hönsawl zel ua,pawt ut keimahleng kanek theihduh ziak in a sumtawi in ka innkhangte uh nau keivual ding Thangpu zawn in NuLian pan dukan ah nektheìh lei in kapawt zel sam hi.
Nitak (nipini) ann nek hun in kanu committee zou a hong tung a gim kisamah leh nitak kikhop hunpah ding ahihman in tawldam manlou in ann ne in kikhawm ding in kakuan ua, akhenchiang in kikhop tawpchia Numei pawl lapawl zil in kanu hong zekai zel hi. Seppatni nitak in thumna kikop athum din kanu akuanzel a, nilaini in mipi kikhop a kikhawm ding in ka kuanzel ua, ningani Tuailai kikhop ah a chang in kanu thugen/ report pedia chial in a omzel a,Sintawpni lah Numeipawl kikhopna a hihman in akikhawm sawtthei zezen ua,kiginni chiah mipi kikhop kikhawm ding in kakuan zel uhi. Ka nu ading in nitak hun awl a om ngeikei hi. Sepnawn ni kikhop a omhet louh ninasan in damlou thumsak ding akitat satkei a,huchih louh hun in kikhopna a thugen ding, Chialpi na a thugending leh a mahmimal a dedication na in kanun hun azang zel a achang in kanu toh kakithuah ut ziak in alawmte Piniang,Nu khawl, Nu Siam chihte kanu hongtawn mundeuhte kana hehsan guthei mahmah hi. Akhenchiang in kanu phal lou in ka kahzel a huaihun chiang in 'na huchihleh a Nna iseplouh ziak a Pathian heh a hön gawtding ahi, lai honsiam saklou ding ahi, Pathian in na gari leina ding hon pelou ding ahi' chihte genkhum kahizel hi. Pathian thei innsung akhangkhia kahihziak in a hehna ding a ka omkhak ding kalauh mahmah ziak in ka nu ngai vungvung in kakap ngamkei zel hi.
Huaidan a pathian Nnasem a kanu 'alround the whole year' a abuailai in kapa bel Pawlpi a ding a pang in nitak hun nasan kazang khawm vang mahmah uhi. Amah contract natoh kisai a abuailouh kal in pawlpi Nna in abuai den a nitak tengphial a ka innsaklam ua ka paJam toh akizuih khiat gige uh lamdang kasa a khatvei tuh kapa kiang ah konzui ding chi in kakiphin a kapan khintung a chingpum akoih lakhia in 'migilou te zepding kahi uh,nangle nathuman keileh hon kizep ding ahi' hon chi a kalauh luatziak in kakah ngam nawn kei hi. Ahìhziak in khovel a mihoìhpen leh mitoh kina ngeilou dia kakoih kapa mivo ding a chingpum toh pawt kamuh in kalung sim akilamdang petmah a kagingta theikei zezen hi. Kapa hongtun kal ka ngaklah petmah a honkhem hia,kapan mivaw taktak adiam chih kathei ut petmah hi. Kanu lazil a hongtung a kapa hohna kadong a kanu'n leng vengkhang lamte khamtheih hihkhat in a innsakte uh Radio gu zepdek uh ahi hon chi a poikasa mahmah hi. Kapa mihoih petmah a mivaw ngeiding aka gintak louh mizep dia akuan in kalungsim a paikhial sakphial hi. Ka zahtak mahmah kapa lauhna in kadim a akiang a giahding kalit tha asuak a 'kei ka uman kiang agiak ding' kachikhe phut a kanu'n hon nuihsan lel a Numei pawl kikhopna a athugen ding kisa mannai mahmah lou ahìhdan gentoh hon subuai ken chihthuah in room sung alut athuah hi. Ka nu'n hon houlim pih henla kapa mizepte lak atel lou ahihdan hon genpih keile leng kapa lauh huailou ahihdan hon genpih leh ka ut mahmah hi. Ahihziak in Pathian thu a buai di ahihman in bangmah kagen ngamkei hi. Huchi in kapa kiang a giak ngamlou in ka Uman leh ka Ching kal ah kagiak hi.
Huaini apan in kapa kamuh sangna kimkhat phial in a niam a nidang aka nelbang in kaneel thei nawn taktak keihi. Akhenchiang in kamang in kapa'n hon zep ek ek in kamangmat a kakap khekhazel a aziak hon dot chiang un kapa hehkhak dinglau in ka genkhe ngamkei hi. Nidang hileh gen khia in kapa kahehsan ngamding a tu inbel kapa'n hon vuak taktak khakding kalauh ziak in kagen khe ngamkei hi. Kahinkhua a kapaipih ding kalungsim ding kibawl huntak in lauhna in kalungtang suk lau in ka om a katheih ut keile kei ka kidot a adawnna katheìh zohlouh dawnna honpetu ding kanu le kapa'n kapoi moh hontheihpih hile uh ahoihding dan kakhonung ngaihtuah hi. A langkhat ah lah kathuah ding kanu'n kei adia hun neilou a kapa'n atapa a ding a hun neilou a mipi adia a hahpan mahmah lai in kei atapa uh lamdik thei ut a giautau mahmah thawmhau tak in hunkazang a kalawm ding omsun ka Uman leh ka Uching te'n lah kasuk buaiding a ut louhziak un sum tamlou in honkhem khia ua nidang in teng 1/2 a lungkim himahleng a kha hongtam dungzui in sumzat nopdan thei kahihman in tawmka honsa ta hi.
Huchibang kahun zatdan a hong hi a kum hongpai a pawl 8 bang kahong hita hi. Kitangval sakna riau kahon neita a,ka aw ginte hong thel in ka nawi a hong hutbawk a,mihing ngeina dan a mulpou nading munteng ah mulpou ding in ahong kisata a,katheinop mahmah ahihziak a midot ding a kazum mahmah thutheih ut kahon hau mahmah a,kalung sim in kadot louh a hon hilh omleh chih ka ut petmah hi. Adiak in ka pasalna tog kisai lambang kadot louh a hon gen omleh chih ka ut a,ka nu omlouh kal a kanubang a kazat ka Uman leh ka Uching kadot dinglah numei ahihna uah theidia gingta lou leh zahmohlua honsak khakding uh kalau a kadong ngamkei hi. Ka maingap pen kanu bel dong ngamding himahleng huaibang thu kikupna om masalou a kidot theihpah a hikei a kikup masakna ding inlah Pathian Nna a sep tha itlua ahìhman in hun aneikeizel hi. Kapa lah huaibang thudot dingkhop in ka maingal theinawn kei hi.
Huchi in Pathian theitak insung ah taksa toh kisai a theih noptampi thei ut in kathawmhau mahmah hi. Tangval dingkuan theih ut tuamtuam kahon hau mahmah mai a Tv leh film a kamuh tuamtuam theih ut na leh chep ut in kadim ahimai hi. Kathei ut te kam adot ngamding neilou bang kahihman in adawn nading keile kei a kimuh suahlouh adang ding omlou ahihman in kahong kizonta hi. Film leh TV a kamuh mun mahmah a gunda boss pan a tepkhut luailuai laizial khudik lengbang a chihiam chih dawnna ding kahon zong a amautep bangbang mupah keileng mahleng Pajam in zomi zial atep baang ka intual ua apaih inchi khat lel ding kamu a laukawm pipi atawm in ka ekbuk sung uah chiling zen in kava tep a akhu in kagawl tawng hong kaap hileh kilawm in kathei a sihloh phial leng kilawm khop in kathalh a huainung ka sim vengveng hi.
Huchibang in thil tuamtuam te keile kei kahong kizon lai in ka class ua kalawmte uh khat birthday lopna ah nitak khat kalawmte utoh kava hoh uhi. Film aka muhdan in party taktak mah anabang a kouleng kalawmta teng un table khat kava luah uhi. Zu a zu nana nalah singpi hawm akihawm ahi a lawmten bel mitheih ma in chi hileh kilawm in a dawn pah ua keibel zudawn louhding chih thupi anei innsung a pan kahihman in kadawn ngamkei hi. Kalung simkhat ah bel bang a chi de aw chih kathei ut mahmah a chep ut na kanei a lawmte hönsawl paulam in kamkhat kadawn a limbel a lim hetkei hi. Asawt lounung in ka bil ahongsa a kalu hong himulmul a anopna tak om in kathei hi. Dawnbeh ut na kaneih lai in kalawmpa uh pa hongpai in 'tuni kipahni kuamah anou dim a nuselou ding' ahon chi a thumu kisa in kanou ateng kadawn khin a khasalua in kalaw dek phial hi. Anung sawtlou in kapai ua kham petmah kahi ding a kagen ngam ngeilouh tampi genkhia in in katung hi. Paihak lou kahihman in kanu lazil painailou dia kapa Jobcard meeting tungnailou ding chih theilua ka hihman in lauthawng hetlou in inn kalut a ka lupna ah kalum ngal hi. Kaki ngaìhtuah a khelhna chia kanu'n ahahgen mahmah kahih teitei ziak in kisiam tanlouhna kanei a lah anopna mahmah khat om in kathei a,poikei ka nu le kapa'n hon theih keinakleh' ka chilung sim hi. Nitak hun a kanu biakna toh buai a kapa khosung vai a abuai gige ziak a inn sung maitam zinglam a kanei gige uh nidang in ningsim mahleng huainitak in tuh zinglam a neihzel hamphat huai kasa lua hi.
Akhonung lam kalkhat nung in kalawm Lian toh apapi tapa Muan ka inn uah ahöng hoh ua pawt ding in ahonzawn uhi. Muan pen ahihleh katheìh ngeiluat ahikei na a migawng tawsa thep dikdek, amah ading a lianlua hileh kilawm tak tolhkhe pahthei ding Jeans khekoi a kawng a chain om lemlam teng apai dekdek kamu munsim hi. Bajar lam a innkikal ah hon lutpih ua Muan in damdawi tang gapkhat nupi khatkiang ah avalei a hotel khat ah singpi dawn kawm in tang 3 honpia uhi. Bang damdawi hiam chia kadot leh kalawm Lian in zanlam nitak a 'ka chiam ut' na chihte ahi ahon chi a kanesuk ek mawk hi. Atung in bangmah kathei tuankei a inn katun nung in ka himelmual a ka ngaihtuah lamlam lamzang mahmah in ka ngaihtuah a kadang hul in kalei keuding abang a tui kadawn zel a sawt daihlou in ahul zel hi. Chil khawmthei ding tuamtuam lunggulh in ka voksa hou uh kava ne a lim sapet mah in akim khat phial kane gubei phial hi.
Kalung simkhat ah kaki siamtan theikei, kanu Pathian Nnasem a innsung le enkol manlou phial a,kapa khosung a mihoihlou te bawlhoihna ding buaipih a nitak kikhop nale neithei louzen a siatna hua ua tuaken khamtheih kava chep ka kisiamtan hetkei hi. Kanu zing kathohma kei adia thum a 'Toupa ka it mahmah ka tapa leng enkol manlou in nang Nna kasem a ka omlouh hun inleng nang apoimoh bang in na enkol inla,khelhna chituamtuam te apan nahum bit in' a chìhzel te kabil kha in kaza a kisikna in kapum dim hi. Aban hihnawn lou ding in thtpukna kabawl hi.
Nibang zah hiam nung in Muan toh kholai ah ka kimu ua sum tasamlua ahih dan gen in tang sawm bek leisak ding in ahon ngen a nial mahleng akamsiam na in honzou a kavalei sak kha hi. Tangthum mah ahön hawm a nenawn lou ding kahih dan kagen hang in kanial zoukei a kane khanawn hi. Huchin ka hihtam khop leh nop kasakna a lian hiaihiai a 'khatvei lai awle, a tawpna din awle' ka chihchih nalam in a omlou a hitheilou ka hita hi.Tu in kuamah sawl kangai nawnkei a nikhat a khatvei ka neklouh chiang in ka omthei kei hi. Ka innsung ua sum mang ngeilou ahihman in sumzat ding katasam ngeikei,a chang a kapa sakhau a teng 100 kalak inle theih khiat kahi kei a kadeih zahzah kalei thei a kalawm te ading leng ka leikep zou gige hi. Ani ni in kanek zah sang atamzaw zek kanethak zel a,ani ni in ka ann duhna bei hiaihiai hi. Ka omdan nidang bang nawnlou ahihman in ka Uman leh ka Uching in a hon enkhe zel ua hon theimah le uh ka nu le kapa lungkham dingdan atheihman un hon genkhe ngamlou in ka puak guk damdawi tangte hon napaihsak zel ua tawp san ding in ahon ngen zel uhi.
Tawp ka ut mahmah a himahleh tawp kasawm zohkhop leh tam hihdeuh kabang hi. Sikul kaidia kuan a kailou a damdawi ne a gamlak khawng a lawmte toh hunzat nuam kasak lam a hong hita a kalkhat a khatvei bek kaidia kuan kailou in kavak thap zel uhi. Huchia kahong thuk lut tak in a sum posuah theipen kahihziak in numei pasal chih omlou in lawmte ngaihpen kahi a luck kahi pen mai hi. Niteng chihphial in lawmthak kahon nei a khovel noptalna ah kabual taktak ta hi. Huchibang a sikul kaidia kuan kailou a dainawl a ka paina uah nungak melhoih tak Grace kichi khat a hongtel a khamtheih hihding in pam maih kasa mahmah hi. Ka hong kimel theih ua kingainatna thupitak in kakal uah vai ahon hawm a kakikhah nawn kei uh ahimai hi. Muntuam deuh ah kapai ua ken ka kick beidek akatheih man in nekbeh din kalakhia a Grace in "Ukhual, kei ate nuamzaw tham eive, ken hiaite kahih apat atang nenuam nawnlou" ci in a Bra kawm apat in bawl theihpah dia avan kimdiam in honla khia a zeitak in ahon bawl a kakhut hon man a dawt ding in a hong kisa a keibel kikap ngeilou kahihman in kalau a ka ut kei hi. Hon nuihsan in "anopdan theile chin nalau nawnkei ding" chikawm a kakhut langkhat hon laksak in a angbawk hon khoihsak a "hiai nabuai pih lechin kazoupah ding" ahon chi a numei angbawk khoihkhak patna ahih toh pakta deuh kahi dia ka et kal in anazou man ngut hi. Abeilam leng kaphawk kei a athil kabuaipih kal in amah ading leng ana bawlzou a "kon kikap phot di aw" hon chih tak in kahalh kheguih zezen hi.
Agen bang in anopdan anatuam ngei a khotang tuitang phawklou in kougel kia in hinkhua kahon zang ua kakham ziak in bangteng hìh kahi ua chih leng kathei kei a ka virgin naka mansuah lamleng theilou phial in kakham hi. Bngmah phawk lou hial a hun kahon zat uleh hun pailam phawk lou kahiding ua nitaklam dak 3 anapelta a sikul tawp hun kikhel ta ahihman inn paiding kalin mahmah hi. Pailouh theihlouh ahih a paulam ding ngaihtuah kawmkawm in kahong pai a vangphat huaitak in kanu le kapa ana omkei ua,ka Uching leh ka Uman in innkuun ah lungkhamtak in ahon nangak uhi. Ahon muhtak un ka uniform ninte apat ka omdan hon manpah ua gending theilou in ahon kah khum uhi. Keileng kalungsim a kisiamtan hetlou kahihman in kisikna in kadim a kisik in kakap a kapuak damdawitang teng lakhia in ka ute kiang ah hìhnawn louding in kakichiam hi.
Kakisik ziak in ka kham leng veng zouphial ahi ding a ka room ah kingaìh tuahna in hun kazang a ka nuthum na bangdia Pathian in lohching saklou adiam? A tha in alelh luatchiang aleng khawlsawmlou glucose kikhai zen a kuankhia a bangziak a kei tapa ahon neihsun khelhna chep utna lungtang neilou dia honbawl mailou ahi ding..chih khawng ngaihtuah in khitui luanghial in ka om hi. Kakham a honveng deuhdeuh a ka kisikna alian deuhdeuh a siding hial hilengle hihnawn hetlou ding in thupukna kabawl a kanu le kapa kiang a ngaihdam nget ding thupukna ka hon bawl hi. Ka Uching leh ka Uman kasam a amaute gel in it mahmah a mohsakna thugen hetlou a ahon kahpih hialna un kisikna honpia ahihziak in kipahthu kagen a kanu le pa hongtung masa dan a ngaihdam ngending ka hihdan kagen in hon kipahpih mahmah mai uhi. Thumna toh pangle ngawlzou ding nahi hön chi ua akipak mahmah ua hon muan na un ngolhzoh teitei utna tha hong guan mahmah hi.
Ka Ute gel tuh ka ngolhsawm ziak akipak in kapan lak dingdan hon gen pihpih ua kipahziak in khitui kanul hun uh om in kanuih hun uh a tam hi. Nitak khuamui ta chih in kapa ahong tung a kongkhak hong lut toh kiton in "Thangkhankhual, nangbang kisa a omdan hoihlou a om a hiai innsung a hong lut ngam e.." chihleh a chingpum lak khiat hönthuah in zep chihtak in hon zep a, ngaihdam ngetna ding hun omhet lou in konglam ah hon sawn pawt hi. "innsung omdan theilou maw, na nu Pathian adia misiangthou leh kei khotang a mite kouhpen suminse dia maw nong kipat, innsung nahong siknawn keiding,tuni apat katapa na hi nawnkei" ahon chi a ka uching leh ka uman in ka kisikdan, akiang ngaihdam nget kasawm dan agen un kapa'n hon samkik ding kasa a himahleh "kisik kenteh,hiaibang te kisik ngeikei uh, kum hiaizah kasep hoihteng suse ud hi" chi in a chiangtawi toh hondelh dek kamuh in hon ngaidam louding ahi chih kathei ziak in zotna ding theilou in katai hi.
Ka biang a mit tuiluang akitat sat kei a kazotna ding lah kathei kei a,ka tanaute uh kiang zot ding leng kapian napa hial in hon deihlouh amauleng hon deih uh kagingta kei a mangbang tak in koilam zuan kahiam chih lengtheilou in kapaipai hi. Huchia mit hak gegu a bangmah mulou a kapai lai in mikhat ka phukha a kiguih zot zezen a kamit tuinul a ka etleh Grace ana hi a "ukhual,koilam pha dek e" ahon chi a kenle lamnawl a kaiphei in ka inn ua kathil tuahteng hilh in zotna ding theilou kahih dan kagen hi. Lungkham louding kahihdan ahon hilh a kapam ua sikul hulliap a meivak nuai ah kalung nopna ding in khat vei ahonkap a sawtlou nung in kalung nuam ahiding a ka innsung ua om a ka nu le pa'n hon ngaidam bang in kathei a nuam kasa petmah hi.
Khosung mi hontuah khak ding uh kalauh ziak un sawt ka omkei ua Grace in koilam hon zotpih a chitheilou in kakizui uhi. Keibang akhamtheih hihtamkuam toh kakimu ua kamuh masaksak kiang uah Grace in innsung apat nohkhiak kahihdan agen zel a kuamah in lungkham huai in alahet kei uhi. Huchi in inkawm kal ah ahon paikawi pihpih ua inn se nepnuap abang munkhat mi kithol theihna ding vangkhat ah ahon lutpih uhi. Meivak ginatak omlou in akil khat ah meivak luichitak khat a om a huai in tanvak zou hetlou in mial chihtak in a mial hi. Ana omlui ten bel hon muthei a hiding ua mithak kahihna ziak in hon na chibai sasauh uhi.
Grace in katan chin gen in mellahna chihdan a honbawl a khenkhat in 'keitoh kibang neive,kibawl thak ut tak a pan ilak chiang ale hon muanglou ua ipai nateng hon ching ua, mi ngeina dan a hon houpi lou zawmah uh, innsung leh khotang ban a saptuam sung a "Kel,Belam vun silh mah kibang gige mitak bang a pomtheih nawnlouh di thouthou chi a ut leh ut louh a hawl lut a ki om hi. Kongpua kan a kholak vakding lah hong kiphal lou, Kuva haikhat manding ngenle lah na damdawi man ding hi hong kichi a piak malak a hong ki khel hou.. Ei ut dan a sumthaloh sawm lelah sum nabang ding a? ann nanek nakleh hun hilou maw, innsung thu kigen na a kup khat vaneile thulak a ki omlou mihai bang a nuihsan a ki om..innkong a vok annbel sia ikhut in vakhoih khale gukzuak ding a gintak a ki om... Innsung ah van mang omlelah ei muhlouh dia asel nasan uh eiguk zuak a hön ngoh uh... Inn sung a asep noplouh teng uh vok ann huan a kipang,vok an pia a vok kul a ngaklai a vok hong kipeh ham leh eimat dia kigingta.. Kamhoih zaak chih om ngeilou, ei hon kibawl dan in mihoih kichite bawl le uh le eisang in sezaw unteh" mikhat in hon ci a..
Ka kiang a ding nidang a tuailai a kizang mahmah khat in hichin hong gen hi. "Innsung a tuahte zaw nidang a i guk munluat ziak a hon muangzoulou a hi ua theihsiam huai kasa a, khovel mite'n hon mudah mahleh van tung a Pa in hong it a hi chia hong chialpi te nasan in saptuam sung a ihong kihel leh minautang te nuai a dia hon koih uh, lapawl ah kihel dek le pawlpi suniam a hon ngai uh, nipoimoh hun a thugen hoihtak a ngai ut in amailam zuan le Usher te'n a nungvual a hon sawl uh, saptuam vanzat guiter,piano,keyboard chihte toh Pathian phat ut sam chin va kisin dek le eikhoihsa a Pathian phat theìh nawnlouh ding hileh kilawm... Pulpit a lah Pathian in mikhialte a itdan kihah gen mahmah,atak a mikhialsa te nasan agenten le hon itlou uh... A lak ua ki om a nidang a ithil hihkhelh te pulpit a hong ki gengen chiang azaw hotkhiatna hilou a hawlkhiatna himai ahi.. Jesu mahmah hong kumsuk a hihkei le zaw mihing lak ah khelh ngaihdam na omlou hi" ahon chi hi.
Huchia kakha siatna thu uh kagen gen uleh zan ahong sawt gawp a ka om namun uah puanphah chihleng omlou in ihmut kahon sawm ua,keibel huchi bang a kalup patna ding a hihziak in ka om alemthei kei hi. Grace in honthei siam in apuanten ahon phah sak a kanih un kalum uhi. Grace tuh a na senior sa chihmah tak a ihmupah a keibel ihmulou in ka it mahmah kanu ngai in ka kapkap hi. Ka ip a kalaikung puak leh ka dista paper dal khat puak lakhia in meivak pha hetlou zang in ka nu laithon ding ka hon gelh hi.
Ka nu it tak,
Hiai kalaithon namuh chiang in kei natapa hiai leitung ah a om nawn keimaithei... Himahleh nakiang a genlou theilou a ka kingaih ziak in na it mahmah zingkal teng a Pathian don ding a non piakkhiat himahleng ka gitlouh ziak a hondon zoulou ahi ding a tu'n ka ut louh lamtak in ka om hi.
Nu ei.. Pathian a nakipiak zohna ah dem nading kahon neikei..nangtuk a Pathian a kinga zou leh Pathian zahtak Nu omding in kagingta kei hi. Mitampi in ahon kipahpih bang un kenleng kahon kipahpih hi... Himahleh kahinkhu saulou paisa a katuahte'n kei a ding a nu hilou a,midang khalam nu hi in kahon thei hi. Midangte kha amangthang maiding hotkhiat na ut bang in kei natapa neihsun kakha mangthang ding hotkhiat ding ut hilechin tua kakha lungmuangtak a paimai ding hi a... Nu kon mohsakna ahikei na a pianthakna thu bangdia khatveibek hon nagenpih lou nahia? Ka omdan ding nagen te'n kei adia pianthakna hon tun ding adiam? A nnasem muanhuai tapa kahìhziak a omdan hoih ziak a van gam kaithei ding kadiam?
Nu ei.. Zu dawnlouh ding,damdawi khamtheih hihlouh ding nagen khit in a hoihlouh dan hon kikup pih ding in hun awl nei hile chin zaw.. Nu bangziak a zudawn hoihlou a chih hon dong ut a na Bible simlai kahong lut in " pathian toh kithuah lai kahi hon subuai ken hon chilou in, bang a bawi?" hon chilechin natapa in tua hon suzahlak het lou ding hi'ng a... Pathian kia awlmoh lou a keina tapa a ding nikhat a dakal khat lel hun nei hilechin tua tangtawn gawtmun lut louhial ding hing a...
Na theihlouh kal in natapa in theihnop ka hon hau a nanglou kuamah dot leh kuppih ngam kanei kei hi. Nanglah zing devotion hun aka om dingdan nagenteng i kihou nalel ahi a..kei apan a theinop nakiang a kantheìhna hun neizek bek le chin zaw..keilekei kikhut dot ngailou ding hi a..ka kikhut dot a kathei ut te dawnna kakizom ziak a hiaitan natung kha ka hi... Bangteng genleng leng kikhel ding ahihtak man in ka tawpna ding in hiai kon genlai ding.. Pathian amuanhuai a a belhtak a himahleh mìhingte mohpuakna a hong kigolh ngeilou a hichih kei apan in zil ding om in kathei, zingkal teng in "Toupa ka tapa it tak nakhut ah kon kemsak" chi in nathum khial kei a huai in nagen tuh TOUPA NA NNA KASEP SUNG IN HONGKUM SUK INLA KATAPA HON NADON SAK IN chihna toh kibang in kathei..
Nu ei, ka pa it tak kiang ah khotang hoihna ding mahni innsung chiat a kipan ahih dan hon nagen sak teitei in aw... Kei noute gel mark hon peding hileng midang awlmoh na ah fullmark na mu ua mahni innsung awlmoh na ah zero na mutuak uhi...
Midang siding honkhia a van a lal lukhu tampi namuh ding in hon ngak lai in kei na tapa nagil a gah goutan in meidil apan in lal lukhu tampi a kizen ka tun nu mit tui tampi toh kon na ending hi. Huai hunchiang in keilam hong en ken aw nu.. Na mittui tampi toh nalal lukhu in kilawm na neilou ding ahi...
Ka tawpna ding in ka neulai a non lazil kön sa ding aw nu..
"Nu aw naupang neu kahih lai in,
Tangtawn hin nathu hong hilh le chin:
Kei tuabang in omkei ning nu aw..
Na ta paiding hita ing,
Gawtmun lamzuan in.."
Nu aw mangpha..
Na tapa
.