BUKIM LOUNA KHAWVEL!
By. Ginneithang Taithul

Ka mangthei huehiau nalai a, kum 12 vel kahi deh aw kachi hi. Singngat Zoveng (Venglui tun shalom veng chia heng ahita hi) ka tenglai uh ahi hi. Ka inn uapat in 300 mater vel a gam lalou a Singngat bazaar um hi. Inn Mai lampi pucca road ahia, lawi-le-pai tawh giitphi, kidangte, milongpi, Kaang, kidangte, balongphengpheng etc te kimawl in, hinkhuo bang ahia? Hinkhuo in bang hing puoh ding ahia?! chite nangawn gelphah jong na hilou hi. Mimel piangsual simkhat imuleh kichepte in, inn a inkote Kung a na kigen in kitut jeel. Tuohun lai a, Ka nu-le-pa'n kasilbol leh chiin lahlah a a jaahda mama khat a kathei khu "Mipiangsual dem leh mihina a koute" ahi hi. Nikhat ka khuote , a pianken a neh(lips)soi khat um a, a neh(lips) umdan kalawite masang a ka tut/chiing laitah in, Ka nu'n hing na mu in hing phoh in Ka neh hing matpieh in hing thuhil hi. Aman, melsiet kikhel lou a, mihina a koukhu eitung a jong tungthei ahi hing na chi hi. Tuojieh in mihina mimitmaw na, hoilouna leh chitlou Nate a vadem/vakou ding hilou hi hing na chi hi. Kapa'n jong mi dem-le-kou na jada mama a, mihing khat in itung a thunei na neilou leh I Tahsa na ngawn a thunei loute ihidan hing na gen pieh hi. Mi umdan hoilou na mute demlou in, thumpi jaw in,tuoleh tuobang umdan na neilou na ding in thum in hing na chikha ngai hi. Leitung a koima musit ding umlou a, vakoi sangseng ding umlou hi chiin hing na genkhat ngai uhi.

Mihingte'n hoilou nate kisui a kidem ding hilei isui masang in kimu ding a, peidan, mit-hah, aw-suo, khut-vai, kicheidan etc mai a jong kidem theite na kihi hi. Mi ngaisang leh mite thupi mu hina ding in I code of conduct a kingah tangpi na hi a, nanleh khenkhat in tuobang na enkhawl lou in a physical expression leh first conversation a judgement bawl in, ngaidan saupi nei a peisuohpi tampi na um hi. Tuoleh mikhenkhat ten, ama ngaidan ngaidan Mai a la a, peipi tentun ki um a, khenkhat mihoi mama ding bang hina jenpi amel toh kituoh louviau a gam tang ki um a, khenkhat ham siamlou, amel etmai a jauhuoi ahilah lungsim a humble mama ki umjel hi. Tuojieh a diei mah Saap the Thupil in "Don't judge a book by its cover" na chi hi. Tuojieh a silhimhim pen, bangjieh a hichi e? Bang chidan ahia? chite I Sui detdet lou leh a mawh na tawh lamkhiel thei Jing na hi hi.

Leitung a pen koima perfect umlou a, leitung damsung in koima bawl khial lou ki umlou hi. Bible a mipil pen pa bawl khiel na jieh in Israel kehnii na suoh a, Pasian na ngawn in Ka lawm achipa tatkhiel na jieh in, a innsung a namsau lenglaw hi. Tuo umdan pen, mipil pen pa Jong Pasian umlou in bang ma ahisih a, gitlou na jieh in Pasian in a lawmte Jong a diam tuan sih china suoh hi. Tuojieh in , Pasian theikhu pilna bulpi na hi a, Ama muangkhu kulpi or thautang sang in hiam jaw na hi chi muthei in um hi. Leitung a Hoi bukim or hoi pumluum kichi na umlou a, bawl khiel na tawh kidimte na kihi hi. Ahin, a bawl khiel na kithei a, Ama bel a, thupha tawite kilepsan ngailou a, lungsim tahtawh kisie mite jala in koi ngailou na hi hi. Mihing hingkhuo pen, hoina leh hoilou na kikumkal leh paltou na khawvel na hi hi.

Mihingte'n physical appearance a mite na ki enkha leng a mihausa, melhoi, lekhasiam etc te na kithupi ngai hi. Kumpi Saul khu amel ahoi a, a duang ching hi. Mihing ett mai in a muanhuai a, hinanleh Pasian in lungtang en hi chi hi. Mihing te pen, I lungtang puohdan in kikal suan a, ikhut, ikam, ikeng etc te bawl ding khu lungtang apat hingpawt masa na hi hi. Lunggel ngaituo na ang pusuo khu inun dan in ensah na hi hi. I lunggel khu I kamsuo jong na hi dan ahi hi. Leng David khu leng ahi masang apat in leng ding a sathau nu in um a, Leng Saul in thading in na del hi. Nanleh joulou a, ama thatsawmpa a khut a pieh a a umlai in, Pasian sathaunu tung a khut ha uttlou hi. Pasian hun ngah ahiman in, ama bawl theina sang a hoijaw ding in, Ajatat Pasian silbol theina in nuajui in, kumpi Saul innsung a khut ahing hah ahi tahchiang in, David phomtuu ding umlou khop hial in koi hi. Tuokhu ahi sillam dang tah khu. Mihing te pilna, hatna,bawltheina tung a na sem leh vaihawm or vaisaitu Pasian na hi hi. Aman hun a chi chiang in a deisahte Tawi sang a, Hun Achi chiang in a deilou mite kaingiam jel na hi hi. Tuoleh, mihing te khu eitawh kituoh ding in lamkai hing pie jel na hi hi.

Leitung a mihoipen ichi miten jong bawl khiel nei a, Bible a kigen minthang jousia ten Jong bawl khiel na nei uhi. Tuoleh bawl khiel na nei lou, ittna jaal a hing thuoh Jesu Christ bawn Migiloupen a tuot in Migiloupen te thana mun a tha in um jawsop hi. Tuojieh in bukim louna khawvel a, mihing te pen kitheisiam na, ittna, kingaidam na bawm iletsah lou leh leitung a pen lemna kichi umlou ding hingsuoh hi. Hoi ikisah jaja a hoilou na kihi a, dih ikisah jaja a dihlou theite na kihi hi. Tuojieh in leitung hinkhuo hoitah a ing ngai tuo detdet leh pen, kihoi sahna ding, kithupi sahna ding leh kisiam tansah na ding lawm2 umlou hi.

Mihing ten nei-le-gou, sum-le-pai, thupina, lalnate leh tahsa uttnate , Pasian sang a ing ngaithupi jawt chiang in Ama lungthah na in juijel hi. Mihing kipilsah na ang sang a,Pasian jaulou khophial a kipilsah na atun chiang in, hunkhat a Pasian in tuobang te gawt a, mawh ettliam ngailou hi. Tuobang position na tung hiding a ngaituo thei khat chu Noah hun leh Soddom-le-Gomorrah hun hikha ding hi. Sietna a sangseng a, Pasian thupina liamang ahi Chiang in suhngaim in umjel hi. Leitung pen, ahoina thupina tengtawh na beimang jel mai hi. Ahi Jong in Pasian thupina pie mite pen beimang lou in detdeudeu uhi chipen huntam jaw a Bible a muthei in um hi. Thudihlou chu hunkhat a gualjou bang nanleh guallel teitei hi ichi utt sawnsawn hi. Eima dih kisah jieh a dih na kihilou a, Aman dih angchi jieh a dih na kihi jawsop hi.

Dihna, hoina,chitna etc tawh Pasian muding kihileh pianken a dihlou/hoilou/chitlou kihita a, Pasian muding ki umlou hi. Tuo sisan vanglian thupina in dihlou Nate, hoilou nate, chitlou Nate a liamang jieh na hijawsop a, tuo sisan jieh a ngaidam tangte na kihi hi. Gitlouna leh bawl khiel na letna jaja a, a ittna Lian in a ngaidamna Jong Lian na hi hi. Tuojieh in leitung peijieh ing khual thuh semsem leh midem ngamhuoi ahilou dan, mitung a judgement bawl ngamhuoi ahilou dan atha a ngaituo tuah ahidan muthei in um hi. Atung bang bang pomsiam na leh ittna jieh a kingaidam na poimaw ahidan leh ittna manphat Dan thei thei in um hi. Aw mihing, kipilsah na jieh in mimawsah sin, a tung bang bang Pasian a aaplei, Ama Muang lei silpen hing peihoi ding a, Ama lemchite hing hiding a, Ama lemchi loute hilou ding hi. Pasian in s tungding mite, Aman a bawl dih a a deisah mite dehleh demkhate pen genthei in gim mama uhi. Genkhial genval a um leh Mangpan hing ngaidamta uhen...