LAIGELH KONG KIPATDAN SAULOU.
Biak S Tawmbing.

Ka lungsim ah Pathian honpi dante ka ngaihtuah chiang kei leltak hiai tan hing leh dam a ka om thupi kasa hi. Mi khenkhat ten bang chi dan a laigelh na hon pat a? Bang chi dan a na mel tawh na thugelh hichibang thute hon gelh khe thei kei le chin hon chi zel uhi... Ka dawng keia ka nui himhem zel hi.

Mite bang a laigelh siam ka hi hetkei hi. Delhi a damlou a ki enkol sak a ka om lai, huai hun lai in school/college ki kai theilou banah innsung haksatna tampitak kana tuaktou hi. Huchi kawmkawm in nikhat Delhi ah ( Esther Communication PCO, Munirka ) a sun khat kei a tu customer lah omlouh laitak ahi a, ka hinkhua ka ngaihtuah chiangin vangtah ka kisa mahmah hi. Huai hun in ka ma a table nuai a om paper khat la in, Gentheihna hinkhua chih tangthu gelh ka hon pan a, mittui pawt zenin ka gelh a, ka na kep hoih khak louh ziak ka sumang kha hi. Poi mahmah.

Midang laigelh khawng, laa phuah khawng kana sim zela, ka na ngai zela, a tangpi a kana muhdan in thiltuah hau leh haksatna gentheihna tampi tuakte hi mahmah ahi.

Mi bang a pil ka hi kei, laisiam mahmah leng ka hi samkei hi. Himahleh atung a ka gen bang in tangthu khat kon gelh khiak apan nuam ka sa mahmah a, ka sim thak chiangin leng nuam ka sa mahmah hi. Ka tuailai pih kei bang a haksatna ana tuak a, kingaise mahmah ana om kha te khat leh nih hiam in phattuamna ana neih khak ua leh chih ngaihtuah na lianpi nei in kon gelh zel hi.

Tuni Pathian ni (16/2/2020) nitaklam dak 2:45 veelin Pastor khatin na thugelhte kana sim zel a, ken leng kana phattuam pih a, banah ka thugenna ah leng kana gen kha zel chi in kei a ding thumna hon neisak a, hampha ka kisa mahmah hi.