KHAWVEL AH I TUH GAH MAH KI AAT HI.
(A mual liamsa hunte lakik thei hi leng)
Muanching Emcies
(Hiai tanchin real life story gelhthei dia phalna hon pia chanchin neitu tung ah kipahthu ka gen masa hi.)
Lakik thei leng maw...mual liamsa hunte lakik thei leng maw
Ka hinkhua paisa ngaihtuah a ka hunte zangbei thei mai ka hih nawnlouh dan ka ki phok leh ka mit a pan khitui khamzoh vuallouh in hong luangkhia hi pasal pha ki pasal sakpi himah leng tuzet in zaw ka tuaigai vek.
Ka ngaihtuahna zaw apai sau tel abul in pan kik theimai leng ka chi ngei e...tangval tei huntawk ka hi a nungak melhoih ka sak mahmah leh ka it toh ki deihtuah takmai in kong ki teng ua...
Nupa nuamsa tak a khosa lel a ka omlai tak un ka lungsim ah setan hong lutguih mai a ka zi ittak mai kha virgin lou ahih lam ka theihsa leh sit hetlou a ka neih himahleh kon sit khonung mok ta hi.
Mi’n a utdan dan a ahihsa chihna lungsim hong lut in ka musit mahmah tamai hi
Kei lam khelhna khat le phokpha lou, kei le amah dandan a tangval lai a ana ki zangkhin ka hihlam ki thei selou in ka zi hoihlouhna kia ka muta hi.
Ka it zi a nei hi nawnta lou in ka luppih di numei zi a nei in ka hong ki koihta hi, zanchiang a zi te luppih di leh pasal te zah a lauh di na mohpuak ahi numei chih kha ka thupi hong hita.
Utlou pipi leh peih hetlou in ka zi ka nuai ah bangzah vei aki doh de aw chih khong ka ngaihtuah chiang ka zi it lupna tung a sihna liamguam tawn a pai dekdek ka en zel a ka hehpih tel....lah aki khelta a hon muhlouh kal in ka kapkap maita hi.
Huchia ki phasak tak leh ki pa sak deuh a hinkhua zangtou ka ki chihlai in kei sang a pa zaw leh thu nei zaw tung a pan hon awi mahmah lou ahi ngei dia nikhat ka zi a nawi na chia a ava ki etsak leh cancer ana hi mai mah hi.
Ka tate ka en a ka zi ka thusel ngeilou leh gin-awm tak a hon na zah a hon lau gige in hon sihsan guih leh ka ta neu chikchik te tagah di himai hia chih kon ngaihtuah khiak leh aw....apoi ngei ka gitlouh man mu ka hita ve..athuaktu ka zi hilou in amah zaw a ittu toupan a la dia kei genthei tak leh khongai tak a zi bei a leitung hinkhua zang di ka hita chih kon phok khe ta hi.
Kahlouh ngal adi dan dang ka thei kei ka pasal na teh leh ka ki phatsakna te lakmang in a omta ka biang zah vuallelhna mittui khamzoh ding ahi nawn kei.
Toupa a khelhman a paap hon musak na hi lel ve maw...chih kan ka genthei non kei ka zi ka en a ka it khonung a ka hehpih khonung a lah sawt a daih kei di chih theihsa ngoihngoih lah ahi ngal a.
A it hunlai a it hi leng...
A hehpih hunlai a hehpih hi leng...tua ka tuah teng uh tuaklou maithei hi ung a..chih khong ka ngaihtuah a ka khase lou thei kei
Aki khel nungchia ki it a ki hehpih sang in ahun laimah in ki it leng tua ka ki sikna teng leh ka puaknat teng pona lou a kisik lou di hi’ng a..chih ka ngaituah laitak in ka tate aneu pen in papa ka nunu in tuiduh hong chih leh ka hakkhe kuau zawzen a taiphei zawk in tui suak in ka zi it leh hehpih huai lupna tung a lum phongtou in tui ka dawn sak hi.