KA INN MUN SANGIN, UNAU SANGGAM KITUAHNA LEH ITNA KA POIMAWH ZAW.
By Biak S Tawmbing
(Laigelhtu apan; I gamsung ah hichibang thil tampi ana omta hi. Unau ki thak ding lai kituak theilou, ki it dinglai ki it theilou i gam ah a tam mahaan ta)
Khawvel ah ka len sungin ka tungah ahong tungte nang apan a sawl hihen, nopna dahna ka tuah hun in, ka khitui nang hon sawl hihen. Khawvel khualzinna gam lel ahi i ten detna ding mun ahi kei, Lei gou te zaw van a ken theih ding leng ahi kei. Leitung hinkhua ah zaw haksatna michih in ki tuak chiat hi. Lam chi tuamtuam ah i tuak a, I tuah dan kibang lou chiat kituak chiat hi.
Mihing gamah Toupa hoihna mu kei leng ka bah ta ding hi. Ittu leh deihsak tu ding ka neih louh lai in Pathian in hon ittu ding ta hon pia a, Pathian hoihna leh chitna te ka suut chiang bang mah hilou niam chik petmah ka hi uhi. Lungkham haksatna ten hon tuam a, ka kim ka kiangah hon kiangtu ding neilou himahleng khattang a hon nuselou Pathian om hi.
Ka hinkhua lampi tuh a haksa mahmah hi. Naupang chik ka hih lai in ka nu'n honna omlouh san a, ka nu a damlai in, school ka kai ut ngeikei a, school kai ding chiangin a dak a chin dek chiang in, daileng buuk ah daileng ding in ka kuan zel hi. A khen chiangin school kailou lawi khawng, bawng khawng khih dingin ka kuan gu zel. A tawpin ka nun a hon thei khia a, khat vei tuh ka bawng khihna mun ua pan hon mu in Bawi nang ka thu manglou di maw...chi kawm in ka sambu ching a hon man in school ah gate tan hon kha hi. School na kai diam na kai kei diam ahon chi a, ka kai ut kei ka chi a huchiin, kon paisan ta ding, na suahsuah suak ta in chin in hon paisanta hi.
Huai nituh vuahpi zu petmah hi. Ken leng ka nu pai vengveng ahimanin delh in ka delh a ka phaktak in ka nu kiang ah Nu, tuni apan school hoihtak in ka kaita ding, kap kawmin kha se mahmah in ka nu khut lenin ka chi a, ka nun leng vuahpi lakah khut din in hon Ngawng kawi a, Bawi kei maw laisiam lou hinga kei bang bang a lou na non sep ding phal mahmah lou ka hi kap kawmin hon chi hi... Ka nu ziak a tua ka tunna tan tung ka hi. Tu hun in leng vuahpi a zuk a van a gin chiangin ka Nu ngaihna a uang petmah hi.
Lai ka hon simtou a Pathian ziak in kei tahgah himahleh leng hon itna hon langsak zel a, lawmte lakah zahlaak na school kailai apan in simmawhna zahlakna kana tuak tou den hi. Huai hun chiangin gillou gilou in thuk ken. Hehna thangpaihnate hoihna in zou zaw in chih hong lang gige hi.
Mun tuam ah om gige ka hihna ah innlam ka pai chiangin sanggamte simmawhna tengteng thuak in pangtou zel in ka om hi. Ka hong piching chiat ua, zi leh tate nei in sepna ziak in mun tuamtuam a kikhen in ka om uhi. Sepna a sum tamlou lou pawh sam ka hihna ah inn mun lei in inn kon bawl hi. Huai in ka bawl tuh tu hun in ka tang nawn kei. Tungleng vasa in bel bu anei a himahleh Pathian tapa in bel lungak na ding a neikei.
Lungkham nate ka tuah hun chiang kipahna te a hong bei chiang Pathian leh ka tate kiang ah ka tun zel hi... Ka tate hon itna thupi kasa hi. Bang zahta a lungkham in puakgik pua in om mah le uh.. Ka lungkham ding ka lungngaih ding phallou uhi..
Sanggamte ka itna ziakin piak theih bang mah ka nei kei himahleh ka pan hon nawt siat tuh ka it ka sanggamte a min kim ua khen sip sip in sit neilou in ka pekhe vekta hi.