SETAN TAWH KIBUANNA
~Biak S Tawmbing

Laigelh tu apan: Hiai gelh mi khat hinkhua a thiltung ahi a, a taktak mah leng ahi. Hiai tanchin neitu kiangah na tanchin mite sim theih ding in gelh khe le chi a ngetna ka bawl dung zui a phaltak a hon piak ziak in kipahthu ka gen hi. A thu khek lamdang omlou in na tuah sawn thei ding.

Hichibang ana tuak ei lak mahmah a leng a tam tak ziak in hiai hong kigelh khia hi. A sau mahmah ding ziakin hichibang a hon gelh ahi.

1. HUIHPI HATTAK IN HON DOMKANG :-

Zan ihmut lim mah2 laitak dak 1:15 vel hi in kathei, hong kipatna lam theihlouh huihpi hattak leh athawm ging ngaih mahmah hong nung huhu in thakhat in kalupna nuai apan hon nuaitou in naktak in hon muttou huhu a, kapum ah hon domkang touta mai a, pan theihtawp a kapan nung in ka khetul leh kadek bel kalupna toh kikhenlou hamham lel hi.
Huchi in thakhat in kakhanglou a thumna kaneihkhak louh lam kaphawk khia hi. Huai hun a ka lungsim a hong om tuh kumpipa Saul lungsim setan in a sukbuai chiang a David in tumging tum a hawlkhe zel ahihdan kaphawk a, huchi in tumging guitar tum a thumna nei in nuamtak in ka ihmuta hi.

2. NUPI SIA KHAT IN HON BUAN :-

Kumkim lai vel hi in kathei, dak 1 leh dak 2 kikal vel ahi ding, ihmut sip laitak in mikhat kalupna kim ah hongpai in awlkha in kathou leen (net) sung ah hong lut khiankhian in, katung ah hong tuta mai a, ka awm lak a hong tutou in a khut in hon mantang in hon buanta mai hi.

A mel latdan amial ziak in chiantak in kamutheikei hi. Ft.5 vel ding a ahi a, vom mahmah, sam zun louh kai nemnom in khuh nepnuap a, puanja lui ngemngumpi silh, a mai ding muh theihlouh in vom in mial hi.

Huchibang tuak mun simta kahihman in kagim toh kathangpai lua ahihman in tha neih tengteng la in hiai mawngmawng kakhah takleh chikawm in theihtawp in kakhut taklam in kavaitouta mai a, vaitou kawm a kamat leh a khutpek ngawng a kamankha a, vom mahmah, vot dekduk a thakhat in kakhanglou hi.

Kakhanlawh leh thumna kaneihkhak louhlam kaphawk khia a, huchi in thumna nei in kalum a, nuamtak in ka ihmuta hi.

3. SETAN PAWLTE TOH KIBUANNA :-

September 2005 vel hi in kathei, ka lupbaih ziak in ihmusip pah kahi di, dak 12 leh dak 1 kikal vel ding in Setan hon pawl in thakhat in kaban ah hon man ua kawkhuk thuk a thuk ataw kimulou mial ngemngum liantak khat ah hon kaihlut sawm tamai uhi. Kamuh dan in tua setan pawlte mi 5 sang a tawmzawlou ahi ua, kakal uh gamla khop kihal a amau leng kagalmuh phak na chiangtan a gamla kuamkuam a kihal in kivualphei uhi.

Tua kawkhuk a hon kaihlut zawh ngeingei ualeh kahinna beiding ahihdan chiantak a katheihman in keileng Pathian panpihna ngen in Toupa hon panpih in chi in kathum a, ka thaneih tengteng toh ka aw neih tengteng suah in "Praise the Lord, Halelui ah amen" chih thusam toh kapangta hi.

Ka hong bah chiang in hon kai zou dek zulzul ua, hon kailut zou petmah ding in kisa ua, kenle thathak la in ka thusam ngeimah sam in theihtawp suah in ka pang non a huchi in kakhangl outa hi.

4. VAN A PAN AW KAZAK :-

2013 February kha vel hi in kathei, natna thuak a gimtak a ka omlai in thakhat in munkhat lamlian zatak, laam thum vel a lian vangam kulh kongkhak paina lampi bul ah kanading hi.
Huchia ka gal et touh leh kamuh dan in gammaang sing lian taktak omna mual sang tak tunglam ah tua lamlian kikhungtou hi a, kulhpi pen ahihleh sah mahmah in din thum khawng vel a sang ahi a, akiim leh asung ah angelte kivialleh in leng uhi.

Khaw omdan ahihleh khim zing ding bang a, khawniim bang in om hi.

Ka paitouh leh lampi ah mi lian mahmah nih akhut ua teipi tawi, adawn a sahang lu thum kisuang khattuak tawi ua, khatpen kulh kongpi bul ah ding a khatpen lamkim ah ding hi. Lamkim a dingpen in hon tonpih tou in kulh kongpi katun tak a kulh sung kagal et leh gamla kuamtak galmuh phakna ah mangtut phah hileh kilawm kamu a, huchi in Van apan aw khat hong ging kaza hi.

"Kha mangthang khat bek, kha mangthang khat bek" chi a aw ging kazak tak in thakhat in kakhanglou hi.

5. SAZU/ZUSA BANGBANG THAGUI AH :-

Phalbilai 2017 hi in kathei, zinglam dak 2-3 kikal vel, ihmut lim mah2 lai in kathagui tengteng, ka khemuk apan kalusiptan ah sazu/zusa hon hileh kilawm hong vak tultul in hon phu kulkul tamai hi. Huchi in setan hawlkhiak ding chih kalungsim ah hong om a, Pathian kiang a panpihna ngen in kathumta hi. Toupa, hon panpih in, nanglou in bangmah kahikei, non panpihkei leh kei ah bangmah hihtheihna a omkei, hon panpih in chi a kathum zawh in setan hawlna kanei hi.

Huchi a kahawl tak in alanglang ah a vialtai ua, akhen chiang in ka nak bang, ka kam bang, ka bil bang a pawt khiak tum uh hileh kilawm un kathei hi. Pawt tum in a langlang a vialtai in hon phukulkul mai ua, ahihhang in pawtkhe zou mahmah lou uh ahihman in kakiang a katupapa tangvalnou lum kiang ah na pi (ka nu) vasam in chi in kasamsak a, amah toh kabeih nung un na pu
(ka pa) vasam non in chi in ka samsak non a, kathum un kapangta uhi, atawp in kathate hong nem in kong halh khiak in zing khua vak philphialta hi.

Huchi in Pathian kiang a kipahthu genna kaneih zawh un khua vakhoih mahmah ta hi.

6. MEIKUANG LAK AH SETAN/SETAN IN AHA HON GAWIKHUM.

2019 february vel hi in kathei, Lawmvual Lungtuakte toh group chat nuamtak a kihoulim, zan bang hong sawt dek simta dak 12 bang ging dia hong kisaktak in ihmu dia kisa, kalup leh thakhat in gammaang singkung sang taktak leh lian taktak, ahiangte kibubtuah nuai a sing lianpi khat bul ah azung pha mahmah, anuai kawhawm liantak kua bul ah kana ding hi.

Ka mailam ka gal et leh suahlam ana hi a, sing teh kalte ah nisa zung eng singseng in gamnuai hon tanvak philphial hi. Ka dinna mun apan in lampi nopchitak liankhop om zinzen a, sing teh nahpa in khuhdim phihphiah hi. Ka nunglam kawhawm sung kanung et leh dawi pitek hileh kilawm, mihing ngeina banglou mel setak leh khuk tan khawng ding kamu a awl in a kikhiin mang a kamailam suahlam ah awl in kapaita hi. Huchi a kapailai in ka malam ah mihing ngeina banglou, et a leng chizau huaithei ding khuktan sang a neuzaw pitek sia leh putek sia gamla kihallou in na om non ua, amel uh etdan in melhem mai langkhat chauh nei khawng leh melhem mahmah ahi ua, lauhna khattak hon nei uh hileh kilawm in a kikhin mang zel uhi. Huchia mailam manoh a muangtak a kapai hiauhiau lai in kamalam gamla kuamtak galmuh phaknatan ah setan in keilam hon ngakawm in nungkin in anapaipai a, achang in aha hon gawi khum in a chang in a khutzung laita hong tungkhum zel in hehmel tak in hon en a keile kapai ngeingei in mailam suan in kapai hiauhiau hi. Huchi a keile khollou a malam zuan a kapaipai lai in huai setan tuh ahat pai deuhdeuh a atawp in kagalmuh phak tawp ah meikuang hileh kilawm am phephua, taangpha tak mai lak a tum mang hi.

Huchi in kathou a ka lawmpa Biak S.Tawmbing kiang ah setan pawlte dou a zouzel ding in nathumna ah hon naphawk in aw chi in msg khakhak hi. Tua zoh in thumna nei in nuamtak in ka ihmuta hi.