Laigelhtu - Biak S Tawmbing

 

Laigelhtu apan: Hiai tanchin a taktak ahi a, hiai tanchin phalna la a hon kigelh khia ahi. Phaltaka gelh khiak dia honpia sanggamnu tungah kipahthu ka gen ahi.

 

Kum 17 mi ka hi a, Ka min Meme ahi a. Unau 5(nga) ka pha ua, kei numei a aneupen ka hi. Innkuan nuamsa leh khawsa thei ka hi kei uhi. School kaina lam class X(ten) tan ka na zousam hi. Inn sung khawsakna haksatnate ziakin Aizawl a om dingin ka zinkhia hi. Mi inn a om neilou ka hih ziakin ka nu’n a hon phalkei a himahleh kei ka bel ka chih ngal chi mikhat ka hi ziakin Aizawl a pai ka sawm teitei a, ka nu thei louh in ka zinkhia hi.

 

AIZAWL A OMNA

Mi inn a om ngeilou tua omta ding chih ka ngaihtuah chiangin ka lin a, kikuan ta lawlaw ahihmanin nungkik/paikik mai ding chihte ka ngaihdan ahikei hi. Mi inn om ichih a nop hun leng om, a haksat mahmah hun leng om i theih chiatsa vek uh ahi. Nasep ding ka neih te leh sep ding omte kuhkal leh taima takin ka sem tou zel hi

 

adult beach beautiful beauty

Photo by Pixabay on Pexels.com

Hun awl ka neih hun leh nitak lup chiang in WhatsApp leh Facebook ah ka online thei zel sam hi. Nitak khat gim sim, chi kham lupna a kilek kilek ihmu thei pah lou ka hihman in facebook leh WhatsApp kong online zual di ka chi a ka hong online hi. Sawtlou nungin ka friend list a om te (a min ka hong gen khe dah ding) khat in hon chat hi. Min leh omna khawng hoihtak a gen in zinglam dak 1 ging phial mahmah tan ka ihmut theilouh tawh ka kihoupih uhi. Facebook a pan ki nel tou in kong kihou jel uhi.

 

Sun hun in ei mi in a om a ki hihmanin Phone khoih khoih le na kisem theilou ding ahihman in ka phone tuh lupna ah ka nawse zel a, nitak chiang in bel message tam pipi ana om in, dawng theih dandan in ka dong zel hi. Nitak chiangin ka kihou zel ua Amah leng innlam a om himahleh innlam(Lamka) apan Aizawl a na hi hi. Ka omna uh a kigamla a, banah kei mi inn a om ka hi a, amah leng atanau te inn ah om kawm a sep theihtheih sem ahih manin ki muh ahaksa a, ka kimuh chiangun leng nitak kia in ka kimu thei uhi.

 

LUNGGIMNA ZANMIAL

Kei sanga piching zaw ahihmanin kinel a zan teng a kihou nana tuh ka muanga naupang chik ka hihna tawh ka haksatna te ka lungkhamna te ka hilh zel a, aman leng panpih theih dandan in hon panpih zel hi. Numei lungsim tuh pasal sanga nem zaw hiven ka haksatna ka lunggimna ka buaina ka tut theihna tuh hon it taktak ahi chi in ken leng ka itna amah ading in ka peta hi.

 

Ka lawmpa innlam(Lamka) pai dek ahihman in, hon phone a, kong hoh di tuzan hon chi a, i ngaihzawng masa pen ahih na tawh ngailua ka hihman in ken le awle hong hoh in aw ka chi hi.  Huai nitak in ka inn uah( ka omte inn) ah atanaute uh mundang apan hong tung tawh om vengvung ka hihman un ka omna nun room lam ah na lawm toh na va houlim di uam khat vei sunsun na lawmte hong pot hia ei ana ki om vengvung kha hon chi a huchi in kou leng ka lawmpa tawh ka room ah pai phei in, room ah ka kihou lim uhi.

 

Huchia ka kihoulim lai un, ka lawmpa’n non iit hia hon chi a, ken leng kon it chi in ka dawng a, non it taktak hia hon chi nawn a ken leng kon it taktak bang ziak a non dot thakthak chih tawh ka thuah hi. Aman ‘non it taktak leh na siangthou na hon pia in‘ hon chita hi. Ka lungsim a buai mahmah a hichiin ka chi hi. I kiteen ma zaw sex i zang kei phot ding chi in ka dawng a himahleh Aman non it a non ngaih taktak leh na it kei ding hon chi a huai hun in amah lah ka ngai a ka it a lah sex zat lah hoih lou chih ka thei ngala ka lungsim a buai mahmah mai. Ka it luat ziak leh ka ngaih luat ziak in ki ngaihna khelhna ah ka puk ta a, ka siangthou na tuh a tangta hi.

 

A zing in innlam (Lamka) ah hon paisan ta a, hon paisan nung kal khat hiam nung in ka phone hoihlou ahi hon houpih theilou ding na hi, ken kon houpih zel mai ding aw hon chi hi. Ngai leh it mahmah ka hihmanin a thugen ka gingta thei mahmah mai hun hong pai zel in kei bel numei lam problem nei ka hih manin kha thum khawng numei te’n a neih te uh neilou a om sek ka hi man in huai dingin ka gingta a, himahleh naupai chu ka na hi ta mai hi. Ka naupai lam ka theih khiak toh kiton ka sung a nau hon paisaktu pen in dan siangthou in zi anei chih thu ka za ta hi. Et na di le ka thei kei ka khawvel a tawp ta in ka thei mai hi. I ngaihzawng masa pen ei a dia banah taksa mahmah a leng itna ka na piak ahihman in ka lungsim ana mahmah mai kam a gen khiat theih mai ahi kei hi.

 

Naupai ka hihmanin ka naupai na pa zi neita ahi chih thei mah leng ka hilh himhim di ka chi hi. Huchi in nitak khat ka call a, ka gen ta hi. Nau su ke ding in hon sawl a himah leh ka ut kei hi.

 

Hun hong pai zelin nitak ka ihmu thei ngei kei, ka hih khelhna ka ki thei a lah bawl thei ahi kei. Ka nun hon phallouh pipi a Aizawl lam a omdia ka kuan ziak khawng a hiai teng tung ahi ka chi a. Ka nu leh pa ten lah ka naupai lam athei kei ngal ua. Aizawl a hoh dia ka ngetlai a hon phallouh a ka pai teitei lai khawng ka mit kha ah a lang dundun hi.

 

Zua aw na von lung mawl vangin, zahna kon piak ding kon piak louh, zua nunnem hon ngaidam aw, ka leitung Pathian na hi. Na ngaidam na kon ngen lai hi. Zan tengin ka mittui a luang ahi mai hi. Huchi a beidong tak leh mangbangtak a ka omlai in, facebook apan ka thu post te tungtawn in Umang  tawh ka kihou kha uhi. Aman kei sanga muanhuai zaw leh piching haksatna te hon panpih thei ding, Cousellor sum le piak ngailou, na hinkhua tengteng im selou a na gen ngamna ding khat om ahi hon chi a, a number hon pia in ka kihou ua, ka puakgik te tengteng leh haksatnate tengteng (ka kihou dan uh saulau ahi man in ka gen seng kei) nu leh pa kianga thil tengteng tut ding ahihdan, nu leh pa te’n bang zah ta in sia in hoih kei lengle hon it uh ahi dan Pathian in hon it dan leh tua ka gen khiat ngamlouh ka sung a naungek om ahi chih ka nulehpa hilh dingin hon gen hi.

 

Hangsantak a masuan in ken leng ka nulehpa te ka hilhta hi. Ka nun gen ding a theikei mittui luang in a om ahi mai. Ka pa’n leng gen ding a thei tuan kei a phone hon koih khum uhi. Huai ni tuh kei leng ka dai dide ahi mai. Gen ding le ka theikei Pathian in hon itna a letdan ka theichianta a ka kipak veve hi. Himahleh innlam a pai leng ka nu leh pa bang a chi di ua aw chih ngaihtuahna in a ka lungtang a dim hi.

 

Ka hun paisa a thil ka tuahte bawlkik theih nawnlou himahleh hun hongtung ding te hun hoih ka neilai man in ka kipak lua hi.

 

Na hinkhua ah haksatnaten,

Lauhnaten kha hon zak a.

Na poimoh pen lawm ginom ka om e…

Na lampite hong mial/ziing mahleh,

Tawpsan thei nawnkei mahle chin

Na poimohpen lawm ginom ka om e.

 

Pathian lawmhoih pen ka neita, ka haksatna ka lungkhamna hon panpih ding lawm muan huai Toupa ka neita miten hon musit in hon panpaih zong Toupan ahon sangta. Hiai ahi Lungkhamna apan kipahna.

 

Tangthu neitu apan:

 

I lungkham a mangbangna tawp khawk i tuah hun in Pathian in honna mu gige a hon panpih dingin mansa in a om gige. I lungtang khauhtak hih nem na dingin Pathian in zillai honpe zel hi. Ka sung a om ka ta dam a ka neihna ding in hiai ka tanchin hon na simkha leh za kha te’n hon na thumpih un, ka ta ahia ka kep ding ahi. Ka kep zawhna dingin Pathian apan hatna hon ngen sak un. Ka tanchin simkha tengteng in banghiam khat bek sinlai na lak theih uh ka lamen ahi. Innlam ka pai ding a ka tuah ding ka thei naikei huaite tengteng leng hangsan tak a ka tuah theihna dingin hon na thumpih un.

 

Hichi bang a ki ngaisia leh lamet bei a om, lametna thak hon pia Toupa Jesu Khrist leh Biak S Tawmbing tungah a bikin kipahthu ka gen ahi.