JESU NEIH KA UT ZAW FACEBOOK LEH WHATSAPP IN A NIH VEINA THUGELH KIDEMNA A KHATNA
"PA, NA IIT HUAI DAN"
-Ginlun Hangshing
Leitung ah hinna nei khempeuh, mihingte leh ganhingte tanpha in, iitna nei chiat vek uh a, iitna nengchik bek neilou khat lel leng om ding in gintak huai lou hi. A khen chiang bang in, mihingte sang mah in ganhingte aki iitna uh thuukzaw leh etton huai zawk hun uh om zeuhzeuh hi. Ahihziakin, mihingte toh ganhingte tehkak theih ding vual bel ahi kei uhi. Mihing chiatchiat leng iitna ki piak dan leh ki iit tuah dan kibang kim veklou a, ami a tuamdan dungzui in iitna hawmdan leng ki bang veklou lai hi. Pate' iitdan tuam, Nute' iitdan tuam leh i pianpih sanggam laizomte leng avek un iitdan ki banglou a, iitdan tuam vek chiat hi.
Ei Khristiante'n Pa nih kinei a, Amau te ahihleh Khalam Pa leh Salam Pa in khen theih hi. Khalam Pa i chih chiang in van a i Pathian (muh theihlouh) ahi a, Salam Pa pen ahihleh leitung a i Pa (muhtheih), Pathian in ahon piak mah ahi. Amau gel aki khen theilou ahi ua ahon iitdan uleng kibang leh tehkaak theih vual ding hilou hi. Khalam Pa (Pathian) in a hon iit mahmah ziak in a tapa tang neihsun Jesu Khrist eite' tan ding in van apan in ahon sawl a (Johan 3:16), Salam Pa in hiai thu theisiam thei ding leh Jesu Krist gingta a ahon tatna pom ding in hon sinsak hi. Kalam Pa in eite tunga a mohpuakna (tatkhiatna nna) zoukhin tham a, Salam Pa in bel a mohpuakna a zoh leh zohlouh ei (a tate) tungtawn in Pathian in teh hi. Huaiziakin, tate'n Pate mohpuakna lian mahmah ahih man in, i panpih theihna uh omsun tuh, Pathian lauh ding leh Pa hon thupiakte zuih ding ahi. Huai hileh, i khalam a bit ding a, i Salam Pa a kipak ding a, i Salam Pa a kipah lebel van a om i Pa Pathian leng kipak mahmah ding chihna ahi. Khalam Pa (Pathian) in ahon iit bang a i Salam Pa in leng hon iit mahmah ahi chih thei ni.
Khovel a teng lai ihih man in Pathian pen i kiang ah hong om leh hon makaih ding pen thil hitheilou ahi , huaiziak in mi tengteng a ding in i leitung Pathian ding un Pa (Salam Pa) ahon pechiat hi (Ephesate 6:1-3). Ahihziakin, mi tamtak in i leitung Pathian ahih lam uh manghilh in i Pate bang simmoh in ki thusimlou sek hi. Huai kia leng hilou, Pate'n leng tate a ding a leitung Pathian ahih lam uh manghilh in ut-le-dah in om uh a,tate' etton theihlouh ding khop in om uhi. Ahihziakin, Pate pen bang chituk in hoih lou in om mah le uh i simmoh a i thusim kei leh Pathian simmoh leh Pathian thusimlou kisuak ding ahih man in pilvang ngai mahmah hi. Pathian in ahon piak bangbang kipak tak a sangthei mi te mi hampha pen hi uhi. Pate a hoih leh hoihlouh in a tate ahon iitna uh kiamsak tuanlou a, a hoih lampi hon kawkmuh thei thouthou uhi. Pa hoihlou na neihkhak a ahih leh nang mohna ahi kei a, Pa hoih na neih khak a ahih leh nang ziak leng hi tuanlou ahi chih thei in. Pa hoihlou na neih khak a ahihleh sinlai lakding tampi a om ding a, Pa hoih nei kha na hih leh leng sinlai lak ding tampi om veve ding hi .Thil bangkim hongtung khempeuh Pathian in a sehsa leh ei hoihna ding a hon tungsak ahi zaw chih i manghilh louh ding ahi (Romte 8:28).
Pa in innsung mite ading in Pathian kiang ah thu ngetsak gige a, a biiktak in a tate a ding in tawplou hial in ngetsak gige hi. Hiai tuh a mohpuakna khat leng ahi. Ahihziakin, tate'n leng Pa mohpuak ahi chi mailou a, Pa ading a i ngetsak leh thumna i neihsak poimoh veve hi. Pate leng mihing mah ahih man un a bah thei ua, setan khemnate, lungkiatnate leh khovel siatnate in a tuam louh nading a panpih poimoh gige uh ahih lam manghilh louh ding ahi. Ahon thuhilh nate theihsiam sawm a, zuih ding leh hindan kilawm a om sawm gige ding tuh tate mohpuak pipen himai ahi (Paunakte 4:1-2). Sepna lianpi leh thupi tak naneih louh hang in, na Pa thuhilhnate na zuih peuh leh na lohsam kei hial ding hi. Pa kipahna tuh van a Pathian kipahna ahi chih thei in Pate suk khasiat louh teitei sawm ding ahi.
Pate'n tate khentuam nei hetlou in ahon iit dan uleh ahon huai dan uh ki bang vek hi. Pa in huaipen iit deuh ahihkeileh huaipen ngainadeuh i chih sekte uh zaw mihing lungsim bawltawm hilel ahi. Pathian in khentuam neilou a mihing tengteng ahon iit mah bang a Pa in leng a tate khentuam neilou a hon iit vek ahi. Pathian akipan Goumanpha ahon muh ahih man in hon deihthoh leh hon iit vek chiat hi (Sam 127:3). Neulai hun in, Neilou pipi in milak ah zum leh zah donlou in, a tate' maban ding khualna leh lawm-leh-vual lak ah tan bang kim theih na ding in alang alang ah vial vaakvaak hi. Unau lak ah a siamzaw deuh hiam a pilzaw deuh om pen Pate'n theisiam mahmah ua, hiaite ziak a kuamah tuam bawl tuanlou in, ki tuak diamdiam a omkhawm ding ahihdan, Laisiangthou pansan leh mi lohching etton ding tampite pansan in, tawlnga lou in hon hilh den uhi. Pichin' nung natawm in leng, a nuamsa lua leh a genthei lua omlouh na ding in, teek nung vuai nung chilou in kilemna thu gen in a tate kiang ah vial vaakvaak lai hi.
Khovel ah mi tengteng in ineu apat a i muanpen uleh i zahtak pente uh kuadang hilou in i Pate' chiat mah uh ahi. Banah, innsung mi a dangte sang in leng ki iitdiak a, a om chiang in i lungmuang tuan mahmah hi. Ahihziakin, hiai thei gegu a i sepkhiat ngeilouh uleh ngaihtuah khak aleng i neih ngeilouh uh khat om hi. Huaituh, Pate' pen a damlai ua,' Pa kon iitlua' chih kammal a hou/gen ahi. Pate' damlai a hiai kammal pate kianga a genkha mi vaang mahmah ding in gintak huai hi. Ahon omlouhsan/sihsan chiang un a iit huai dan thu kia gen in leh Amau ahon iit dan thu kia leng genkhop ki phasak chiat mahleh a kikhel khit zoh nung a gen pen omzia neilou khat suak hi. Hiai pen Pate' tung a akua akua in i hih khelh uleh tawpsan dia hoih mahmah khat ahi. A omlouh nung ua va gengen pen omzia omlou ahih man in a damlai mah un gen thei chiat leng hoih mahmah ding a, Pa leh Ta kikal a kizopna leng hoihzaw leh detzaw ding ahi.
Hichibang a 'Pa' in ahon khotuahna leh hon awlmoh nate ki manghilh sak mai lou a, a hat nonlouh nung tanpha ua i iit thuk ding uh ahi. Nang leng khatveitei Pa hong hi ding nahih man in, tua nang napa na bol dandan a na tate'n hon bol ding uh hileh na lungkim diam?. Hiai dotna ngaihtuah detdet kawm in maban ah panla thak thei chiat leng i chi ahi. Huaiziakin, a kikhel ma in, "PA, NA IIT HUAI DAN" chi chi in ahon iitna thute leh i iitna thute gengen leng a khonung a kisiikna omlou pen ding ahi.
Simtute tengteng Pathian in theisiam thei ding leh zuithei chiat ding in hon vualzawl chiat ta hen.
Kipak.