Bang tan bandh henkol a tang ding i hia?
By Ginza Vualzong

Eiloi a kuakua bandh bawl sek hang a. Bandh bawl khit chiang a i ngetna/demand government in hon hih buchin sak le hituan khollou hi. Dawr kikhak a, gari tai a om kei leh bandh lohching kisa mahmah in, lungkim mai te i hi uh hi.

Mipi nautang subuai thouthou i hih leh i demand bek mu kihi leh bandh hih thaman om deuh di hi a. Tua huchi hilou ahih chiang a, bandh i bawl uh phatuam hi na hiam chih kingaihtuah thak poimoh sak in om hi.

I om dan uh ka et chiang in bandh kha "strength show" na leh "lungkimlouh etsakna" a kibawl bang ahi. Area teng a dawr kikhak chih bang thupina a la i hi uh.

Demand mutuan lou a, strength show na leh lungkimlouhna show na di maimai ahih thouthou leh minautang - nektawm zong, school naupangte leh a dangdang sukbuai sang in Rally khong, Sit In Protest khong leh Office picketing khong hih zaw leng pil huai dia, minautang support leng kimuzaw ding ahi.

Hichi a eisung bandh i kibawl khumkhum chiang un kimuhdahna chii i lak ah tuhtuh kihi zawmah lai a, phatuam hetlou ahi. Khat in bandh hon bawl leh khat in oppose zel. Bandh oppose te sih huat a hua ki hi zomah lai. A bandh bawl ten la bandh a bawl di ziak uh a pansan uh, a cause uh mipite leh organization dang kiang a theisiamsak masa chih om tuan lou. Mipi leh organization dangte'n gen tam om selou a support a piak ding uh kilamen vek ki hi zomah lai hi. Support lou a om leh namvai a ki etsawina om toutou zomah lai. Phatuam hetlou tuh eive! Demand bek mu kihi leh i bandh bawl uh phatuam chih theih di hiven.

Ka mite, a kua a kua, sak leh khang a omte lungkimlouhna latsakna lampi tuam zong theita leng ut huai mahmah ta e. Mi dang nam dang ten bandh khong pong hih nawn lou ua, a gam uh khangtou deuhdeuh uh eive. Eiloi bandh bawl khawng a ki el mawk hang a, khangtou theilou i hi. I tha leh zungte, i khuakte uh i gam khantouhna dingin zang zaw leng nak phattuam in chia!

Khatvei bek hun paisa a bandh i bawlte uh enkik in phattuamna hon tun leh louh bukkaak leng i chi ahi.

Bang tan hichi a bandh culture henkol a tang den lai di i hia?