LAWM GIN OM
By Biak S. Tawmbing

Laigelhtu apan:

Hinkhua ah tuailai hun hong kipat apan Pathian kiangah na hinkhua laan khia in, Pathian in honpi taktak ding hi. Hiai tanchin in kei a dingin bang a gen a ahih keileh banglam ah kana phattuam pih thei dia chih ngaihtuah kawm in sim in. Sinlai bang na mu thei a?

Soson(Min khek) kichi tangval feltak khat in a tanchin hichiin hon gen hi.

Naupang chik ka hihlai in ka pa’n hon sihsan a, ka nu tawh ka u pa toh singtang khua khat ah khosa ka hi uhi. School kai ka tawp chiang un a khen chiangin ka u toh ka nu dawn a van puakpih dingin ka kuan zel ua, a khen chiangin ka u ann huan in ana panga kei kia a ka Nu dawn dia ka kuan hun leng om hi. Kiginni chianga skul ki suti sek hiven huchilou kal a lah ka nu lou kikuan pih man ngeilou ahih chiangin kou leng ka u toh ka khawl chiangun ka nu louna ka va sep pih zel uhi. Singtang a khangkhe lou tuailai tam tak om huai ten lou khodan buh tuh dan buh at dan theilou nu leh pa ei hon na kepna di ua a hahpan dan te uh theilou mi tampi tak om ding hia chih tu hun a ka ngaih chiangin nu leh pa haksat na thei pih lou tampi tak i om tak ziakun i gamsung leh i khotang leh saptuam a khang in lang mahleh a khandan dik zoulou ahi dia aw chih ngaihtuahna hon pia hi.

Ni khat ka nu toh ka u toh lou ka khawh lai un Ka Nu’n hichin hon chi hi ” Bawite na pa lah dam nawnlou a, banghiam tan bek non tun zawh na ding un lamka lam ah nang beek kon kaisak di uh aw, na u inn nang hon ompih hen la, a sep theihtheih kilawh na hiam bang hiam khat a zong dia, inn na luah ding ua ken nna kon sem dia meh di khawng leh a om bang bang in kon khak dia kong pha zel di hon chi hi” Ka nu bel mi mawl ahi himah leh kei leh ka u a dingin mi thupi ahi hi. Huchia hon gen kawmin mittui pak niuniau in ka nih un hon en a, Na kiang ua ka omlouh hun chiangin na Nu un kon itna chikmah chiangin na mangngilh kei ding uh hon chih behlap hi.

Hun leh ni, kum leh kha hong kivei zelin, Pathian hehpihna in Lamka ah ka u toh inn luah in ka u in a sep theih bangbang sem in kilawhna a muh chiangin kilawh in kuan zel a, a kuan louh chiangin ka inn kiang te uh auto heksak in huchi khawng kong khawsa tou uhi. School kong kai a, Lailam deihbang siam zou kei mah leng, mi nuai a om zaw ka hi sam kei, ka fel ziakin sinsaktu te deihsakna bang ka tang hi. Khawvel a nuam kasak mahmah tuh naupang lai leh high school kailai mahmah nuam ka sa hi. School ah mite deihsak lawmte ngaihnat ka hong hi sam hi. Mi hausa pipi te tate ka en a hiai ten gen theihna ki chi a tawn kha sam di ua aw chih bang ka ngaihtuah sek a, a kal lak in school ah break ka neih chiang un kei dia bang mun daide leh thawveng na mun ah kei kia va tu in hun ka zang zel hi. Pathian panpihna toh class X hon pass in Higher Secondary kon sun zom tou hi.

Suti ka neih chiangin innlam a ka nu huh dingin ka pai zel a, ka nu tawh hun nuam zangin innsung pai di dan kikum khawm zel in hunte ka zang tou uhi. A changin kuamah theih pihlou in haksatna leh beidotna te’n hon tuam zel mah leh Pathian i neih taktak leh zaw a lampi hon om zel ding hi.

Innkuan sungah haksatna te ziakin lungliaptak leh mangbang tak a om hun leng om ahi. Huai hun chiangin leng lunglel ken tuailai. Khattang na hei zong lenglel ken maaw hon it Tou Jesu na lungkhamna ah Amah( Pathian) kiang thumin na lung nuam ding hi.

Ittu di bang ka hon neisam a, ka inn sung ka en a, a hon it( ka ngaihzawng nu) te inn sung ka en kei a dingin ka tanvual louh ahi chih ka thei hi. kei tagah mi hausa leng hilou mi nuamsa leng hilou, nei leh lam a leng kuamah phazou ding leng ka hi kei. ka lawmnu hon itna hon khawtuahna thupi kasa hi. Kei inn haksa apan khangkhia ka hih manin ka lawmnu nu leh pa’n hon deihsak kei uhi.

Ken it in ngai mahmah leng leng nu leh pa hon deihlouh ka hihman in zankhat ka lupna tungah hichin ka ngaihtuah ta hi. ka lawmnu’n hon it in hon ngai lua ahi chih ka thei himah leh ka paisan ngai ahi chih ka ngaihtuah a thupukna ka la hi.

Ani nawnin a inn mahmah uah va hoh in hichin ka lawmnu kiangah hichin ka gen hi. Hon mangngilh in, hehpihtakin ka hon ngen ahi. Nang adingin ahoih zaw di hon it taktak na hih leh hon paisan in. chi in ka ngen hi.

Bang ziak a bang thu a bang chi dan a hiai thu hon gen mawk na hia hon chi hi. Bangmah a gen theikei ka mittang hon en a, ka it ahi chih zaw a haih kei bangmah ka gen thei nawn kei. Aman hichin khase tak kawm in hon dawng hi. Haksatna na tuah hunin kon paisan ka hon taisan kei ding. Thawmhau leh kuamah theih louh a lungkham taka na om ding ka hon phal kei itna ichih a haksa anuam aleng ki it teitei a Pathian min a thuak teitei ding te I hi. Pathian deihdan leng ahi. Hun nuam ah hitan I ki zuita a, Tua na haksatna kei a ding in theisiam haksa mahmah hi. Hiai bang haksatna thuakkhawm ding in tun om khawm kei mah lehang Pathian min in ka kiman ahi. hon chi hi. Hiai thu ka za ni tuh kei a dingin khawvel a ka damsung a ka kipahna pen khat tunitan in a hi hi.

Manphatna neilou non sitkei a
Ka hatlouhna thei in non thuhilh zel a
Ka chinat in kei din vansawltak na hi.
Gentheih,lungngaihna ka thuak in na hon khamuan zel.
Itna gin-om

Itna rosepak a paakkhiak hun ngak in,
Apaakngum lai semai ding na enkol a,
Nang din zan leh tuni akidang tuankei ding,
Na mel ah lametna vak azam den hi.

Mi a dingin thupi kei mahleh kei a dingin a thupipen te laka khat ahi mai.

Innkuan sung leh thil bangkim ah Haksatna lungkhamna mangbatna lungngaihna tawp tung mah lehang Pathian in zaw hon it in hon in hon taisai ngeilou hi.