KA KHUALZINNA
By Biak S. Tawmbing
Kum 2017 April kha ahi a, Jiribam a ka omlai un, innsung vai a thil sai ding om ziakin kei leh ka nu innlam(Lamka) zuan in Sumo service te Jiribam tawh Lamka kikal passanger pai ding tawm sim ahi dia driver te pai ut ngellou uhi. Mi bang zah hiam kihou khawm in innlam a hih di poimawh nei ngen a hoh dek ka hih man un, Sumo driver pa kiangah tuni apai di tawm mah leh nidang a bahara 700 na lak sek pen uh, tutung in tuh 900 kon pe ding ua i pai ding uh ka chih ua leh hong ut hi. A ut tak in van gari a guan meng in kou mi 5 hiam gari a lut in dak 9:00 am in ka kipan khe thei uhi.
Huai ni tuh nidang a innlam pai sek dan toh a kibang kei, lunggimna leh mangbatna lungsim tawng a om zaw ahi ngei ding a, gari sung ah kuamah le kihou tuah omlou in ka tu bebuk uhi. Huchia dai sip sip a ka tut lai in, kei le kei ka kingaihtuah a, Khawvel a neu apat a gentheina haksa lungkhamna mangbatna te tuak tou den inga lawm leh vual hon thei pha chiangin a haksatna a lungkhamna te uh hon tunna uh hi inga, bang chidan a le kei khelkhel tung ah haksatna kichi te hon tun ut diak, hon tun mun diak chihte ka ngaihtuahna ah hong lut in ka ki ngaihtuah ka ki ngaihtuah dedu hi. Ka ngaihtuah na huai hun lai in thil tampitak hong lut a himah leh ka gen seng kei ding. Huchia gari sung a kua mah theih louh in ka lungsim tawng a ki ngaihtuahna ka nei lai in. Ka lungsim ah heutupa Upa lianding laphuah kon muang veve chih la hong lut hi.
Tuni’n bangteng hongtung diing hiam
Zing chiang bang ni suak diam
Mailam hun bang hong chidiing hiam
Khatzong ken ka theilou, Toupa
Nang k’on muang hi
K’on muang veve, Toupa
Bangteng hongtung zong
Nang k’on muang hi
K’on muang veve, Toupa
Bang teng hongtung zong
Nang k’on muang veve
Honpi na mun ka theihlouh hang
Honpi Pa ken thei ing
Lunglau lou in ka zuizel diing
Nang k’on muang veve hi, Toupa
Nop hiam dah hiam ka tuah diingte
Nang theihpihlouh omlou
Kei thu hilou, Nang’ thu hihen
Pha na sak bang hongtung sak aw
Lawm leh vualte i hinkhua ah paina ding, zotna ding theilou, i malam a thil hongtung ding khat leng i theilouh lai in hon na theitu en a zihzeh a i theih phaklouh leh i phawk louh sek uh Pathian in hon thei gige ahi. hon phawk a hon taisan ngeikei chih a thak a thak in chiantak in ka thei hi.
Lamka nitak dak 6 vel in ka tungtou ua, ki hah khe khin tawldam a ka omlai takin ka theih ngeilouh number a kipan in call ka dong hi. En lah lungsim gimtak a ki om ahihman in ka houpih sau peih kei a, a omna mun uh ka dong a huai nungin zingchiang ka man chiah ka man chiah kong hoh di aw ka chi hi.
A zingchiangin ka hih di poimawh te uh khenkhat ka hih khin un, kei hon houpih pa a inn uah mu ding in ka va hoh hi. A nu leh pa ten leng hun awng tholtak mai hong pia in hoih tak in ka houlim thei uhi. Mi gam a om i sak sak uh ei gam mahmah a leng omta chih ka thei chian hi. Pasal hi zenpi a pasal dang ngai chih leng om ana hi maimah hi. Thil tuamtuam omdan te kidong in houlimna ka nei ua( ka houlimna te uh tuh kon gen dah mai ding)
Khawvel a lungkham a om i kichih lai in Pathian i ei sang a lungkham zaw mangbang zaw mi tampi ana om ahi chih ka va thei khe thakthak hi.