A MINPU LEL A CHRISTIAN
By Biak S. Tawmbing.

Tuan a simthu sut leng maw tual I niam simthu, theih phaklouh selung mawlte I hi. Tung Pathian itna ziakin ei din khua a hong vak chia laa a I sak zel bangun, ei singtang mi tawmchikte Pathian hehpihna leh itna ziakin I gam a khristian sakhua honglut a I hampha mahmah hi. Huchi kawmkawm in singtangmite za a za Christian kichi himahle hang a tam zawte amin pu lel a Christian hi a, a sakhua zui maimai I hi dia aw chih ngaih tuahna honpe mahmah hi.

Christian kichi hina pi a, mimal chih te I ki et chiang khat leh khat ki ittuahna ki lainat tuahna omlou, angmasialna mahni a ding kia a buai, midangte ngaihsakna leh itna om zou nawnlou, thugelh leh thugen hoihtak tak te I sima, I za a, himahleh i mimal hinkhua ua ki zui tawm mahmah. Thugen leh thugelh hoih taktak I zak a I sim khakte, ei leh ei kibawlna di leh ei hinkhua a phattuam ding om hiam chih hi nawnlou mi a ding kia mi thuhilh na di kia a tamzaw in zangta. I hinkhua mimal chihte ki en thak ni Pathian in a pomtak biakna I pezou taktak diam I ki velna ding tam mahmah ahi.

Pathian lungtang tengteng a itna, lungsim tengteng leh I hatna tengteng a I itlouh ziakin, mi tamzaw te a minpu lel a Christian hinkhua kizanga sunglama takna ki neilou ahi, Pathian pomtak biakna pen program nalh taktak, lapawl siamtak a sak, kicheina hoih taktakte himasa hetlou ahi. Lapawl, biakinn sunga biakna progam hoih taktak te a hoih lou chilou I hi.

Bangteng hileh, hon siampa tung Pathian I lungsim, I lungtang tengteng, I hatna tengteng toh Pathian it in amah ading in kilankhia ni, Christian hinkhua diktak zuih haksa mahleh huai haksa sa kawm pipi a amah I Juihpa Khross puak puakpih kawm in zui in, amah a dingin in I lungsim, I lungtangte pe thak in kalsuan thakni.
Christian ka hi kichih mai pen a nuam a, himahleh a hinkhiak taktak pen a haksa mahmah ahi. Huai haksatna te hongtung hun chiangin I zuihpa en kawmin kalsuan zelni uh maw...