SUM Rs. 500 & 1,000 SI TOH KISAI MIPI THEIHTUAK TE
- Mumung Tonsing

Kei bilvaak louh ziak hia, Narendra Modi leh a khawnbawl Upa te thu imm siam ziak hia chih leng theih khen zohlouh khop in, India gamsung a mihing omte thil deih kibang mahmah te lak a thil nih Rs. 500 & 1,000 note omsa tengteng date 08/11/2016 nitak mit phiatkallou in ki thurual tak in hon mualliam duam uhi. Income Tax a awk khak ding lauzak a mahni sum neihsate Bank a le koih ngamlou mi hausa tampi ten Date 07/11/2016 nitak in bang mang(dream) khong a mangmat di uah-aw chih khong lungsim a hong suak hi.

India gamsung ah black money kichi tam petmah hi. Black Money kici sum vom(black) hi mawk lou in, ahoupen leh i theihsiam pen dia gen in, Dan(law) phallouh/theihpihlouh a sum muh, mahni sepkhiak hilou a sum muhte ahi. Etsakna: Golhgukna leh nekguk sum te leng black money ahi. India sorkar in hun sawtpek a kipan in Black Money India sung ah tam petmah om ahi chih tei ua, himahleh bangmah sem khe lou uhi. Narendra Modi government hong om a kipan in India kivaihawmna a kikhekna liantak hongom hi. Modi Government in hiai black money omte dansuah(legalized) sawm in hehpihna hun hon hong hi. Hehpihna hun hongbei in sumlui Rs. 500 & 1,000 te hon sisak nawn leuleu hi. Sum si I chih chiangin, khut/innsung a sum neihsa tengteng Date 08/11/2016 nitak a kipan si/zatna di om nawnlou hi mawk lou ahi. Etsakna ding in innlam lai mi khat in a inn lamna a zat ding Rs. 1,00,000.00, Rs. 500 note ngen in a nei a, sorkar in Rs. 500 & 1,000 zat theih nawnlou ding hon chi uhi. Himahleh hiai innlam pa sum Rs. 1,00,000.00 pen zat theih nawnlouh dia mangthang/bial suak/zero suakvek chihna hi tuanlou ahi.

Reserve Bank of India in Rs. 500 & 1,000 sihna toh kisai in mipi theihdia poimoh bangteng ana suah ua, mipi theihtuak dotna leh dawnna om thei ana bawl te uh bangzah hiam i enkhom ding.

1. Bang ziak a hiai scheme hong om hiam?
India ah nisim in sumlem(fake note) pung hulhul hi. Mi tampite a ding in hiai sumlem te theihkhen haksa mahmah a, hiai sumlem te sorkar phallouh thilte sepna in kizang hi. Huaikia hilou in, thautawi/gal(terrorist) ten hahzat mahma uhi. India economy pen sum a kinga mahmah ahih man in, India sung a sumlem hawmzakna/zatna in ma asawn zel leh kum bangzah hiam nung chiang in India a ding in thil lauhuai omthei din gintakna liantak om hi. Huaiziak in hiai scheme hong kipankhia hi.

2. Hiai Scheme tup bang hi hiam?
Hiai scheme in atup tuh India gamsung a sum note om teng lak a, sum note Rs. 500 & 1,000 om tengteng lakkhom kik vek ding chih ahi. Huaiziak in hiai sumte RBI Office 19 te lak a khat peuhpeuh or Bank Branch khatpeuh or Head Post Office or Sub-Post Office ah azah(value) kibang in khek theih ding hi.

3. Sum khek hileng bangzah ka ngah kik dia?
Na khak na zah(azah) mah na ngak kik ding.

4. Avek in sum mahmah in ka lakik thei diam?
Lakik theilou ding. Mimal khat in Rs. 4,000 tan a lakik thei dia, Rs. 4,000 tunglam teng na bank account ah alut dia, huai zoh chiang in na lakik thei ding.

5. Bangziak a asum mah a lakik thei vek mailou di ka hia?
Hiai scheme in a phallouh ziak ahi.

6. Sum Rs. 4,000 ka zat din a kidaih kei a, bang ka loh dia?
Electronic Payment system tuamtuam Internet Banking, Mobile Wallets, IMPS, Credit/Debit Card tungtawn in na pe maiding.

7. Bank Account neilou hileng bang ka loh dia?
Document poimoh te tawi in chik laipeuh in bank account hon theih gige hi.

8. Jan-Dan Jojana account kia neileng bang ka loh dia?
JDY account nei ten leng a hih thei veve uh. Amau a ding in a poina om tuankei dia, himahleh JDY toh kisai a dan-leh-dun omte a zui veve ding uhi.

9. Ka sum te koi ah ka khek thei dia?
RBI Issue Office 19 te or Bank Branch or Regional Rural Bank or State Co-Operative Bank or UCBs or Head Post Office or Sub-Post Office ah na khek thei ding.

10. Kei bank account honna branch kia a khek theih di hiam?
Sum Rs. 4,000 tan khek ut te a ding in bank branch khatpeuh ahi thei ding a, himahleh ID Proof na tawi a ngai ding. Sum Rs. 4,000 tunglam na khek ut leh na bank account honna branch ahih kei leh bank account na neihna bank branch dang ah na khek a ngai ding.

Bank Account leng na neihlouh na bank a na khek utleh ID proof leh sum na koih utna bank account number na tawi a ngai ding. Huai ah internet tungtawn in hon khak sak mai ding uhi.

11. Ka account neih na hilou bank branch dang ah ka khek thei diam? Eg: SBI pearsonmun ah account na nei a, SBI Teddim Road ah ka khek thei diam?
Hi, na bank account neihna branch hilou himahleh huai bank a account na neih nakleh branch khatpeuh peuh ah na khek thei ding.

12. Bank Branch khat peuhpeuh bank account ka neihna leng hilou ah ka khek thei diam?
Hi na khek thei ding. Himahleh ID proof valid lai khat na tawi a ngai ding. Na sumtawi Rs. 4,000 tunglam ahih leh ID Proof khat leh Internet tungtawn a sum hon transfer lut sak na ding uh Bank Account khat na tawi a ngai ding.

13. Bank account ka neikei a, ka lawm leh tanau te bank account ka zatkop pih thei diam?
A hon phal nak uleh na zatsak thei ding. Himahleh amau lemsakna lai/evidence na tawi a ngai dia, na ID proof leng tawi a ngai ding.

14. Kei mimal a bank a ka hoh sese a ngai diam ahihkeileh midang ka sawl thei diam?
Mimal a na hoh tuh deih thusam ahi. Na hoh theih kei ding leh leng na mi sawl pa/nu a gelhthoh in sawl na hihna lai tawisak in. Huaichiang in aman leng a ID Proof khat tawi hen.

15. ATM ah ka la khe thei diam?
Rs. 500/1,000 sihna thu teng ziak in bank ten ATM hon bawling/bawlthak zek uh a ngai dia, hun a la zek lai ding. ATM a zat theih nawn chiang in a tampen in Rs. 2,000 tan nikhat in na la thei ding, November 18 tan. November 19 a kipan a limit Rs. 4,000 in hon supung ding uhi.

16. Cheque tungtawn in sum ka la khe thei diam?
Hi , withdrawal slip or cheque tungtawn in na la thei ding, nikhat in Rs. 10,000. Kalkhat in Rs. 20,000 tan kia a hithei ding, November 24 tan.

17. Cash Deposit Machine or Cash Recycler tungtawn in ka sum ka khek thei diam?
Hi, na khek thei ding.

18. NEFT/RTGS /IMPS/ Internet Banking / Mobile banking etc. ka zang thei diam?
Hi, na zang thei ding.

19. Bang chiktan sum khek theih ding ahia?
Devember 30, 2016 tan in na sum te na khek thei ding. (Note: bank hong kihong hunhun a bank a kineh zen a va ding pah ngai samlou ahi. December 30,2016 tan a khek ding ahih ziakin kin huai lo lou). December 30 tan a sum khek manlou te a ding in hunkhat hon a hi lai ding a, himahleh RBI office kia ah akhek theih ding. RBI in document tawi di a chihte tawi a ngai ding hi.

20. India ah ka omkei a, bang ka loh dia?
Na sum hon kheksak ding in midang na bank branch ah na sawl thei dia, himahleh nang phalna/sawlna lai a tawi ngai ding. Na misawl in valid ID Proof(Aadhaar Card, Driving License, Voter ID Card, Pass Port, NREGA Card, PAN Card, Identity Card Issued by Government Department, Public Sector Unit to its Staff) atawi ngai ding.

21. NRI kahi a, NRO account ka nei a, ka NRO account ah sum kha khek thei diam?
Hi, na NRO account ah na khek thei ding.

22. Foreign Tourist kahi a, sum note Rs. 500 & 1,000 ka nei a, bang ka loh dia?
Hiaithu asuah nung dakkal 72 sung in foreign exchange counter, airport ah Rs. 5000 tan na khek thei dia, himahleh na sumkhakna sa documents na tawi a ngai ding.

23. Damlouhna, khualzinna toh kisai in emergency ka nei a, bang ka loh dia?
Government Hospital, Government Bus, Train Ticket booking na ding leh flight ticket booking na ding in dakkal 72 tan na zang thei ding.

24. ID Proof bang teng khong hiding hiam?
Aadhaar Card, Driving License, Voter ID Card, Pass Port, NREGA Card, PAN Card, Identity Card Issued by Government Department, Public Sector Unit to its Staff te ahi uh.

25. Hiai scheme toh kisai theihbeh nop banghiam nei leng koi ah ka mu thei dia?
RBI website www.rbi.org.in ah na mu thei ding.

26. Haksatna or Buaina nei leng bang ka loh dia?
If I have a problem, whom should I approach?
RBI Control Room or Telephone Nos. 022 22602201/022 22602944 te thuzak in.

Theihtuak poimoh kasak te:
1. Zoudawn khua a omte a ding in khualzin a bahara seng a sum khekdia lamka a zinpah a ngai kasa tuankei. Kumtawp December kha chianga naupangte Christmas van ding lei dia azin hun chiang un khek theih lai ding hi. Last date December 30, 2016 ahi.

2. RBI in a sum khek theih didan tamkhop hon gen mah le uh Lamka khua a zat vek hi khin theilou maithei hi. Huaiziak in Bank Account na neihna branch mah zuan masa in. A hih theihlouh tawp in leng Bank Account na neihna Bank te, branch dang hileh leng huaite zuanin. Bank account na neih khak na "Bank" le hi kha mahmah lou na zot leh paulam ana om sese thei hi.

3. Sorkar panlakna ziak in sum Rs. 500 & 1,000 si dan in om mah leh nang neihzah value kibang gige ahi. Himahleh na sum kepte sum thak toh na khek ngai ding chihna lel ahi.

4. December 30, 2016 tan a khek ding chih ahih ziak in kin huai lotel lou ahi. Himahleh December 30 ma in khek/deposit ngeingei in.

5. Sum koihlut theih chih ziak in alom in koihlut ken, Income tax a awk theih gige ahi. Rs. 2,00,000.00 a pat atunglam khatveithu in bank account ah nikhat thu in koihlut ken, Income Tax ten lakh 2 a pan atunglam bank account a kikoih lut te hoihtak in enkai ding uhi.

6. Dawr/sumbuuk min a bank account(current account) na neih leh huai account zang in, phatuam zek maithei ahi. Hun paisa a na zat luat kholkei leh Transaction tamlua koih tuanken, hon muangmoh veve thei uhi.

7. Etsakna ding in Rs. 10 Lakhs na nei a, huaiteng na bank account ah khatvei thu a na deposit sang in, Nang bank account, na zi bank account, na tate bank account ah hawmzak vek in. Phatuam maithei ahi.

Diktat tak leh mahni neihsa ahi bangbang toh niteng hun zang a, duhamna leh mite hamphatna ding te leepgu tuntun mai lou a, immguk nei lou a lungkim tak khosak a nopdan leh Christian hinkhua a poimoh leh ahi dingmah ahihdan dan theisiam semsem din simtute Toupan hon vualzawl chiat hen. Theihna bukim zohlouh ziak a gelh diklouh/gelhval om leh simtu ten na hon ngaihsiam uh kon ngen a, detail www.rbi.org.in ah ana en jel mai un.