United Sates of Americas (USA) President ding kitelna thu suizauna
By Revd. Hangpi Manlun

1. Thupatna.

Awle November 8, 2016, nin khawvel pumpi a gam khangtou pen, hausapen, thupi pen leh mite ngaisang mama, US president ding kitelna thu khu mizousie bildaw leh thei nuom mama thu khat ahi hi. Azieh ahileh tami president hing hiding penpen khu Pu Barack Obama tha heng ding ahiziehin, khawvel pumpi a lamkai thupi leh muonhuoi pen hing hiding ahiziehin ahi.

2. USA president hunsung leh hithei dingte.

A tangpi in USA ten a president leh vice-president dingte uh khu kumli dan in anatel jeljel ua, tualeh mikhat in term ni (kum 8) tan akijawm in a pangthei giep hi. Tualeh US president hithei ding mi khu kum 35 tan a upa ahiding a, tuabanah US gam sung a pieng ngei ahiding a, atawmpen a US gam sung a kum 14 teitei a teng mi jong hiding hi.

3. USA ah political party ni maimai a um hi.

A lam dang mama khat ahileh US-ten political party ni maimai anei ua, tuate ahileh i). Republican leh ii) Democratic party te a hi uhi. Ei India gam bang a autut leh a gual lellel in party tha amawh phuthei uh ahisih hi. Tutung US president ding kitelna ah tam atung a party-te khun candidate khat tuohtuoh anei ua, Republican presidential nominee ding in mi hausavot pu. Donald Trump kum 70 a upa in a party ticket uh anga hi. Tuaban ah Mike Pence in vice-president ding in a party ticket uh anga hi. Tualeh Democratic presidential candidate ding in pi. Hillary Clinton kum 69 a upa, ex-president nahisa pu. Bill Clinton jinu in jong a party ticket uh anga hi. Tim Kaine in vice-president ticket anga hi. Pi Hillary Clinton ang chin velvol mai leh vang US president numei masapen ahina lai ding hi. Tuaban ah kum kia January hasung in a result zousie uh jaw leh puonkhieh ahidang a, telching aum penpen in loupitahin 'White House' office khu January 20, 2017 chieng in a luata ding uhi. Mi puteh, pitehte nasat dan muthei in aum mai uhi.

4. Election campaign (Debate) anei dan uh isui ding uhi.

USA a presidential candidatete khu mipite mai ah atup angiemte uh ki-debate tua in, tuakhu mipiten ana en kilkel ua, koipen khu in igam president hina pawleh ahoi diai chi khu athugente uh tup-le-ngimte tungton in tena anei uhi. Tualeh nivei thum vei akinielna ua a, a thugenlahte uh tam tah um nan leh apoimaw zualte igen ding uhi.

4.i). Mimal hinkhuo leh hun peisa ahinate uh akiphou lang uhi.

5.i). Pu Donald Trump khu kum 2005 laivel a numeite lah a na gamtat na hoi lou video a kikhumte suhlat ahijiehin, ama juitu tam tah in lung kietna leh sa-ihna anei law uhi. A zieh ahileh Amakhu Soap a guest ahilaiin, numeite lah ah khun, ' na utut na bawlthei hi' mithupi leh minthang na hi leh na ut dandan in na umpithei chite leh hoilou tah ana um khahna' khun numei pangaite leh pasalte lungsim asuna mama hi. Tami video clip jiehin Republican a senior 33-te khun Trump a deilou thu uh agen ngal ua, tuate lah ah senator, Congress member, state governorte apang uhi.

Tambang a ham leh agamtatnate khu pi. Hillary Clinton in jong advantage a la aumdan leh gamtat dan chizat um asahthu agen belap hi. A langkhat lam ah Pu Trump in zong kisiemtan na ding debate anei masang uh dah kal khat ah press conference han in Numei thum Bill Clinton in nidang lai a President ahilai a hoilou tah an umpite ahi uh chiin gen in, amaute ';mihangsan' chin agen khum hi. Aman agenbe na a, Pu. Bill Clinton, pi Hillary Clinton pasal 'khelkhel a politician numeite lah a gamta khiel/suol aum lou thu agen khum hi'. Ahin pi Clinton in Trump in a pasal tungtang agen thu vang a dawng ut sih hi.

Tuaban ah Pi Clinton in Pu Trump khu kum sawmthum (30) sung numeite musit leh enghou chingtu hiin agen kia a, Florida a thugenna ah Clinton in stage tung ah Miss Universe lui Alicia Machado hankhie in, trump in tami nu khu a thautah jiehin 'Miss Piggy' chin ana han hi chin agen langta mai hi. Tualeh Machado in tam bang Trump in 'Miss Piggy' chi a musit tah ahat jieh kingai sie ann na ngawn a neh utlou thu agenbelap hi.

4.ii). Tualeh Pu Donald Trump in President ahingei ngei leh Hillary Clinton khu Secretary of State ahilai a 'private email server a jahte khu suikhieh na ding thu pieh a nei ding thu gen in, jail a khum ahiding thu jong' a gen hi. Pi Hillary Clinton in pu Trump thugen niel in zuau thu ahidan gen in, "Donald Trump bang mi huham leh dawtheilou igam lamkai ding ahilou khu vangphat huai chin" a gen be dai hi.

4.iii). Tuaban ah candidate nite khun Syria, Russia tungtangte ah jong akiniel ua, tuaban ah pu Trump in asumsuina akipat a tax a pieh hoi lou thute leh gam dang akipat ahing galtailutte lah alungsim puohdan dihloute jong gen in aum hi. Tualeh Trump in ' Bill Clinton in President ahilai in bangmapi ana bawl sih a, Middle East buoina leh ISIS-te tungtang ah bangma bawl tahtah lou in agen hi. Aman agenbe na ah ISIS-te khu gam 32 ah akithe jahta ua, bangdia tamte khu kamawpuohna achilou e" chite in ademthu agen hi. Aman president ahingei ngei leh "I gam ua patin radical Islamte leh phalna nei lou a US ahing pemlutte ka notkhi sieng ding' chite jong agen hi. Aman agenbe na ah President ka hichieng in tamte zousie akiheng lam dang veh ding hi achi hi Pu Trump in 'Pi Hillary Clinton khu US president hidingte lah ah nehguhna (corruption) ah akinamnoi nasa pen ahi chin a gen a, aman American healthcare kumton a ding in asusie sieng veh achi khum hi. Tuaziehin a campaignte jong Catholic leh Evangelicalte nuizatna buh ahileh hi' chin agen belap hi.

4.iv). Trump in African- Americante leh Hispanic_American communityte tungtang jong gen lang in, 'nouten bang e na jau ding uh, kei nang vote kai uh leh na hamsatnate uh kang siemtha sah ding a, gam hausa jong ihikia ding uh a, gam hausa hiding in gam gal muong ihi masah ding uh ahi a chi' hi.

4.v). Ni khat pu Trump lamkai in Cleveland ah rally aneina uah mipi 10,000-vel apang/jau uhi. Tuami hun ah Trump vice presidential nominee Mike Pence leh New York Mayor lui Rudy Guilian jong a vapang uhi. A thugen lai in ama suhbuai sawm a na ham leh kikou khumte aum ua, tuate khu Trump in, 'Clinton in ama campaign leh rally subuai ding a sum-le-pai a goite uh ahi chin gen in rally aneina mun uh nuasia ding in thu apie hi'.

4.vi) Trump in gamtatna video a kisuo khu ngaidam ngen in, ahin election jou chieng a court a heh a sawm thu jong a gen hi. A man a genbe na ah Obamacare chia kigen minthang Affordable Care Act khu nasatahin a soisel a, telching a um ngeingei leh Congress special session han a hehlamdang ding thu jong a gen hi.

4.vii). A ni tuoh un a ching ngeingei uh leh US gam pen economic din mun a khantou sah ding ban ah, pu Trump in ka chin leh 'mi 25 million te ading in sepna ka bawlsah ding' a chi hi. Pi Clinton in jong aching leh 'mihing 10 millionte sepna tha amusah ding thu agen' ve hi.

A debate jawtah un mipite lam akipatin candidate nite khu ahoina tuohtuoh uh khat tuohtuoh kigen sah ding in a ngen uhi. Pi Hillary Clinton in trump khu 'a tate pichinna lampi ah patat um ahi achilai in, Trump in ahi leh Clinton khu 'fighter' chin a gen a amanu khu a beidong ngai sih' achi kia hi. Tambang in ahoina lai tuohtuoh uh jong akigen pieh uhi.
5. US President Barack Obama in pi Hillary napitahin a gup thu apuong hi.

Mipi sang tampite khu Pu Obama thugen ngai ding in University of North Florida ah 3rd November in akikhawm uhi. Aman athugenna ah, "Kei khu ballot sung ah ka um sih na a, ahin tami ballot tungton in kum giet sung vingveng nna thupitah isem uhi. A genbena ah ja umna leh dihtatna tami ballot sung ah aum ban ah democracy jong aum hi. Tamte khu pi Hillary Clinton ading in advantage aum hi" achi hi.

Tuaban ah aman African Americante jong Pi Clinton vote ding in achiel hi. Tami nima in aman mun ni ah campaign jong a nei hi. Aman mimal tahin Pu Donald Trump khu, 'US president ding a chin lou dan leh a lungsim puoh dan jong commander-in-chief' ding in a ching sih' a chi benalai hi. Tuaban ah tami kitelna khu nidang a kitelnate toh a kibang sih a, Trump gamtat dan khu ajau huai mama hi' achi hi.

President Barack Obama in jong Trump in, 'Numeite musit in vawh leh ui chite in ahan jeljel chi in' a gen hi. Tami khun numei pangaite lungsim asuna sah mama hi.

6. US President election tungtang ah ngai dan tuomtuom kithethang hi. Tuate ahileh atangpi in:

6.i). Tami election subuoi ding in ISISten US a mun poimaw tuomtuomte bukapsawm uh chithu thang ziehin US gam pumpi patausah mama hi. Mangmu a kigen Glenda Jackson gen dan leh vision mudan in tami election pen kineithei lou ding a, tuachiin pu Obama in mawpuohna latou ding chi magen mawh hi.

6.ii) Ei lam ah jong mangmu pawl um kia leuleu in Nu meinu hing ching van in ahin galpi thumna tuntu hing hiding achi kia leuleu uhi.
7. Thukhum sin.

Awle tami US president ding kitelna tungtang apatin imukhiehthei uh ahileh min a lamkai ding atelchieng un a dutui dan uh leh, lamkai dingte jong min i hun nukhialamte jong suithei tan in ihoina leh hoilounate uh hing sui tinten uh ahidan muthei in aum a, tuaziehin koipouin ihinkhuo uah pilvan mama angaithu ang musah hi. Tualeh Pu Trump misietna atawmkim in gen ding hitalei, Numei tung ah anahi lai ajang hi. Tamkhu kampau leh umdan ahi. Pi Hillary Clinton minsietna ahi leh nehguhna corruption a angawna um khu ahi kia hi.Tamte gel ma khu khawvel a mizousie sietna leh buoipipen jong ahi hi.

Tualeh amawl huoi mama khat ahileh US president hielte jong amitmawnate uh naupang maw/ngawl kouin ana kikou sam uh hi e maw chi ang musah hi. Ei gamte ah jong ahoina laite uh copy thei in ahoulounate uh apat in pilvanna neithei lei chi khu ikijilsah nuom khat uh ahi. A kineilna uh apat in Pi Hillary Clinton khu guoljou ding a mitam jawten angai ua, ahin alangkhat lam ah Pu Trump jong kimuong mama in White House lam juon a kalsuon ka hi a, koiman ang kham jou sih ding a chita mai a, en vai koipen ang hatjaw uoi mah. Genkhel genval umte simtute kung ah ngaidam ka hing ngen hi.

(Note: Tam atung a thute khu Manipur Express, The Aizawl Post, Lamka Post, Eimi Times, Zogam Today, The Sangai Express, The People's Chronicles, The Imphal Free Press, Zomi Post, Zallen Banner leh adangdangte akipat kila ahi hi).