AKTA MANGKUAN KITUTU
By Pastor Rawna Kopsiam
Ak leh a neitu tanchin a kipan in i minam un bang zirkhiak theih i nei de aw. Singtang khua ah ak atam leh tawm pen thutuam hitaleh innchih in kivul chiat chih theih hi. Ak tanchin leh a neitu kar a thupiang hong om sek a pan in hiai paunak "Akta mangkuan kitutu" chih hong piang khia ahi ngei ding. Ak neitu kuapeuh in kideihthoh mahmah chiata, ittak in kikemchiat hi. A nou kaite akbawm ah kikoih tuam a, a piching dangte pen akgil ( ak inn lianpi a kibawl pen ) ah kikhum khawm zel hi. Alak uah kimuhdahna, ki-iplahna hong om chiang in a buk sung ua kikhum khawmte hong kitutu sek uhi. A kitu i chih chiang in a neuten tu hi hilou in a lian zawte, chethei, hat kisa leh cham kisa mahmahten a neu zawte tutu in a nek ding teng uh neksak vek chitchiat sek uhi.
Akgil tan hun chiang bang in a gilsung lam a na pang ven chin, a gilsung lut dingte lutsak thei lou in buai sak mahmah hi. A hangsan dawm zaw deuhten ahihleh ngimngim un, khat nih thum chi hi leh kilawm tak in thakhat in gilsung ah tailut zat zel uhi. A dawilawk zaw deuhte leh thanem zaw deuhte a gilsung a giak ngam lou in polam mun khat peuh a lemtan na na ah giak ding in kisa mai uhi. Khua hong mial pat chiang in ak neitu in Akgil kong va khak sek hi ven, huai chiang in polam a omte man in a gilsung ah khum lut teitei sek hi. A it leh deihsak luat ziak ahi. Polam ah giak mawk le uh zan khua hong mial chiang in melma sihal leh sangak ten a hong mat ua a nek mai ding uh lauh ziak ahi. Polam a omte huchi bang melma lauhuai tuak a om sek ziak un.
Zingkar hong hih chiang in akgil kong hong in polam ah ann kitah sek hi. Hiai hun chiang in a lian leh hat kisa deuhten a dangte ann nesak theilou in tutu sek uhi. Kitutu se lou in ann piak a om bangbang nekawm nainai le uh a neitu , a pu / a pi kipak mahmah ding hi. Hichi tak in kihaza kei mai le uh chih a pu / a pin deih mahmah hi. A vek un ne khawm dialdial le uh leng a nek gaih zawh louh ding uh a pun nei mahmah zaw hia. Hiai bang ngaihtuahna lah akten nei mahmah lou. Aw kitutu lou in ne khawm dialdial mai ve ua chi sek mahleh a neitu lungsim leh ngaihtuahna a omte ngaihtuah ban mahmah lou uhi.
Mikhat in hichi bang buaina tuak kha hi ven chin hichi'n gen hi. Zingkar khat ak ann ka tah leh a lak ua hat leh cham kisa deuhten a neu leh hat lou zawte tutu mawk uhi. A nek ding teng uh bang vatuh un ne sak thei mahmah lou uh. Na vek un ne khawm dialdial le uh chin leng na nek gaih zawh louh ding uh buhhum nei mah hi veng chih sek mahleng leng ka thu gen a bil ua leng lut mahmah lou. A tawp in ka ngaihtuahna ah hiai a hong om hi. Huai a dangte tutu, a nek dingteng uh va nek sak zelte kha ban mat a, suangpi tung a amuk uh a tat a vatat mai sak mai ding ka ngaihtuah hi. A hihkei leh lah akhet akhet lup zialzial ding in ka ngaihtuah hi. Ka akten a tung uah thangpai taktak leng ka thangpaihna thuak zou lou ding ahih uh ngaihtuahna nei mahmah le uh zaw hichi tel a gilou, huaiham, a dangte nek ding teng vanek sak chihte hihlou ding ua ka mitmei veng deuh ding uh hia chih ka ngaihtuah lai in hiai Bible chang ka lungsim ah hong ging khia hi.
Sam 90:11na " Kuan ahia na hehna thilhih theihdan theia nang mah kihtak ding dan bang a na hehna thei lou." Akte lamlam leng ngaihtuah thei nawn lou in i mi namte uh ka ngaihtuahna ah a hong lang dundun mai hi. I Biak Pathian i tung uah thangpai taktak leh a hehna, athangpaihna thilhih theihna thuak zou mahmah lou ding i hi uh chih ka mi namten a ngaihtuah ngei kei ua hia. I Pathian thangpaihna leh thilhih theihna apan i kihem khe zou mahmah ding ua hia? Pathian thangpaihna hong tung ding mulkim huai ding dan ngaihtuah ngei mahmah lou i hi ua hia ? Ngaihtuahna nei thei chiangte bek in ngaihtuah in nei in Pathian maipha zawng ni a kikhel ma in.
Nikhat apu deihdan bang a omloute tung ah a pu thangpaihna hong tung taktak mai chu athuak zou kei khop mai uh. A pu'n a tung ua chiang a khiak suk toh kitawn in a puk suk ziahziah mai uhi. "Bawngtal in a pu a theia, sabiltung in zong a pu ann piakna kuang thei hi. Ahihang Israelte'n thei lou uh" Isai 1:3. ( Ka minam Trbal miten leng thei siam sawm nai mahmah lou uhi.) "Siampite'n lah: Tangtawn Toupa koi a om ahia chia kan lou uhi. Dan saiten lah kei hon mu thei lou uh. Makaite ka tung a hel uh a .... Tua bang ahihman a noute mawhsakna hon nei hi'ng, na tate uh tate zong mawhtang sak lai ding hi'ng chi in Tangtawn Toupan phuang hi. Jer 2:8." " Nou tulai khang a mite aw Tangtawn Toupa thu ngaihtuah un ...... Banghanga ka miten ut uta vak dinga noplen ka hi uh, na kiang ah kong pai nawn kei ding uh chi uh ahia ?" Jer 2:31. "Vakengsangte na ngawn in a mah a dia hun sehte theia, Vahuiten a pem hun uh phawka thei uhi. Ahihanga ka miten Tangtawn Toupa ngiatte thei lou uhi. Jer 8:7." (Ka minam, Tribal miten zong Toupa ngiatte ngaihsak nai vet lou uhi.)
Ei sung a i kinaknak mawk leh manthat vai mahmah hi. Akta mang kuan kitutu i bat lel khak ding uh lau huai lua ahi. I biak Pathian hong chingtu, a hong kempa a lungkim kei leh Israelte bang a melma nawmvalh a om mai ding hun hong tung ding hi. Israelte nuaisiahtu ding Pathian in melma thahat Babylon kumpi Nebuchadnezzar a tun ding bang in, tu in leng Pathian mitel nam kichi ngal lah thu mangloute nuaisiah a genthei sak ding in Pathian mah in minam khat tung ding ding a kisa ahi kha ding kivel thak ni. Tribal omsate hamphatna leh neih leh lam tengteng lakmang sak ding in Tribal nam thak ( New Tribal ) khat tun ding a om dek thawm ging ngaih mahmah veh aw unau.
Hiai bang hun a na minamte hotdamna dinga Milian, milal, Nam heutu, Khotang makai, Mipil leh laisiam leh Saptuam makai dia hong om na hih mel kuan atheia. Hiai hun a bang mah himhim gen lou, sem khia lou a na om maimai leh den chiang in nang leh na Innkuante leng na suakta tuan kei hial ding uhi. Mipi lamte leng hiai bang hun poimoh tak a Heutu leh Makaite nung thuaptu dinga Pathian in na hinna hon hawisau sak lai ahih mel kuan a theia. Mitampi a sih zungzung lai ua nang sih hun a tung nailouh bang, nang tungtawna Pathian in i minam a ding thil hoih tak sepsuah ding planning bawl nei himai thei ahi. Nungthuaptu hilou a gensetu hiam, Amau kalh zawng a gamtang tang sek na hihleh zaw nang ziak in i vuallelh hun uh hong tung dinga, Nang leh na Innkuante / nou partyte leng i minamte toh na mangthang khawm thou thou ding uhi. Akta mang kuan kitutu chih paunak pen i minam in nawlkhin in Nampi khat suak ding kithu kim chih paunak in neita ni.
I minam pumpi / Trbal minamten Toupa i lungkim sak zawh leh Babylon kumpi thahat taka pan Israelte suakta sak ding a Persia Kumpi Cyrus atun ding bang in Toupan ei Tribal mite pitu ding a thaunilh Cyrus dang khat hon pia ding hi. Ka chihna in Toupan Cyrus ka thaunilh ahi chi hi ven. Israelten suahtakna a ngah kik na ding un kum 70 lut hi. Hiai Pathian hun seh Jawlnei Jeremia in saltan ma pek apan a na gen khawl khin hi. Manipur Tribal minamte a ding in hun seh bang tan a sawt ahi de aw. I nam pumpi un Toupa i lungkim sak hun uh ahi mai ding. Minamte tung a Pathian in Vaihawmna khut a ngak chiang in mimal khat leh nihte khelhna leng minam pumpi khelhna bang in a ngaihtuah a, huaiziak in nam pumpi in a gawt sek hi. Tua minam pumpi tun ding nawn na ding in mi khat leh nih khawng lel mah zang zel hi. Tulai kivaihawmna Democracy tawh, kilamdang lou hi unau. I minam a ding in mimal nang leh kei nang poimoh lua i hi. Nang leh kei ziak in i minam in thuak loh theia, Nang leh kei ziak mah in i minam in Pathian zahngaihna mu thei i hi. I Minamte a din bang na pia dia le ?. Thuakna leh manthatna maw ahihkei leh hamphatna? Nang gamtatna zil in Pathian in i minamte tung ah vaihawm ding hi. " Nam khatpeuh hi in kumpigam khatpeuh hitaleh lamtouh leh suankip ahi ding chi a hun dang khat peuha ka phuan a, tua nam in ka mitmuha thilgilou ahiha, ka thu a man kei leh ama' a dinga thil hoih hih ka sawm ka kikhel sak ding. Jeremia 18:9-10 ."
---------------------------------------------------------------------------------------------