VAKANG
By : Leon Guite

Vakang theilou i tam uh a gintak huai kei. A mulou te'n le tuilou lai khawng en lehang muvek di i hi uh. A mul uh ngou in etlawm mahmah ua, apianzia uh nalh in kilawm mahmah hi. A hon in gamta deuh ua, leitung ah khosa in kingainiam mah bangtak in lei a omte ne in, ahon in gamta noinoi sek uhi.

A mul uh ngou in etlawm mahmah a, tua in mihingte mittaina tun in et-et theih hi. Agamtat-khohei uh kilawn in a lampai ngei uh leng kilawm a, apolam et in bel gensiatna bei toh kibang hi. Ahihhang in a mul i hon boh khiak leh a taksa etlawm na di himhim a om kei. Vom nelnul in kihhuai mah bang hi. A mul ngou kilawn tak toh a kithuam lai in bel etlawm in deihthoh huai mahmah a, ahihhang in a hihna diktak ahong kilat chiang in bel a etlawmna teng bei in kihhuai suak maimah hi.

Awle, tua vakang bangbang mihingte tam hina e! Apolam et a kilawm leh dembei; Pathian mi mahmah a theih, ahihhang a sunglam et chia niin chiteng a dim Lamka ah Khristian kitam hina e chih in om hi. Khristian na awmphaw a zang in etlawm tak, khami tak bang in i khosa ua, biakinn ah mittui kai zen in ithum ua, ilaam ua, a khami pen bangmai in hinkhua i zang ua, kei a hoihpen, a chinpen ka hi chi hile kilawm in biakinn sung ah vangam first line ah tu di bangmai in i tu phenphan ua, i polam uh hon tuamtu zaw hoih mahmah, vuk bang a ngou sitset, va kang bang a etlawm i hi mah uhi. Ahi a, biakinn apan i hong pawt chiang in hon tuamtu, i khristian-na uh i suah khia ua, bang ahong kilang a le?

Ei sang a lianzaw chih omlou in ei pen alianpen, athunei pen mah bang in i om phenphan ua, hoihlou honsa a upa khat in ahon taihilh chiang in, NANG VAKSA LAH HILOU ING A, NANG NA HON GEN DI OMKEI, KA TUNG A THUNEI DIA KUA'N HON KOIH A? chi'n ina lehvuak sawm maimah ua, tuate Khristian hinkhua a zuih ding him a hi diam? Khristian i kichi ngam lai ding uhia? Naupang chik apan in khamtheih i hon khoihpan ta ua, tulel a khamtheih hih a buai, khotang in athuaklah pente kuate dang hilou in naupang kitangval sak te mah hilou hia? Nu-le-pate na tawm zah lou in insung bang ah i kitom ngam phenphan ua, innsung mite'n itna toh honna enlou hile uh bang i suak dia? Muhkhiak leh lohkhiak neilou in nu-le-pa' lamsa, muhsa koppih in i om ua, ahihziak in amau zahtak sang in gentheisak tu i suak uhi. Sunday school leh insung a naupang, kholak ah pichingte' hinkhua teng tawnsuak khin i tam mahmah uhi. Akhente innsung ah omdan hoihpen, thumang pen bang in i om ua, kholak i hong pawt chiang in vasa khahsuah mah bang in i leng daidai ua, khelhna khuk ah i lenglut ua, pawtzou nawnlou in tamtak in te'n hanmual ahon liamsan ua, i luangtung ah saptuam upate leh inkuanpihte zuau i gensak lai ua, vom dedulh, kihhuai mahmah te VAKANG bang in ahon thuam lailai uh.

Tuailai ah kihel in, lapawl sa in mittui kaizen in vanlam nga in i kap a, khotang ah kizang in mihoihpen, fel pen hihna bang kipahman i la ua, nu-le-pa tampite'n hiaizaw ka makpa ding/ ka mou ding un etlah huaina e ahon chi vungvung ua, a honthuamtu, a ngou in a etlawm mahmah ziak in mite' hon muhna ah, piangthak, omdan kilawm a gamta, hinkho siangthou zang leh mite' etton tak i hi uhi. Hon thua tu in ahon thuam zou tel mai. Ahi a, kuamah muhlouh kal a i omdan pen eive i mizia diktak ahih. Mite' muh in ahoihpen himahle hangle aguk a i gamtatna selguk vuallouh a honglang khe ding pen huphulh huai hi na e...! Hoih utna ziak a i nekte, lawmte toh kithuah chiang a i dawn a party na ah lu-le-taw phawk lou a i laam pih te, dainawl a i tangval/nungak te toh i hunzat gukte uh liahkhuh zou ding a omlai i hampha mahmah hi. Ahihziak in huaite kilat hun lah ahong tung dia, huai hunchiang in, i hihna diktak, mulbohsa VAKANG mah bang in i vomlam ahong kilang dia, lei tum in kap mah lehang le akikhel ahita ding hi. Vakang amul ziak maimai a amin ah akang atel bang a nangle ahon tuamtu ziak maimai a ahoih a kilang na hih khak ding kiveng inla, ki-enthak in sanggam aw, ahunlai ahi.

Khristian gam ah ka teng, khristian ka hi chi a pau phanphan te ihi ua, kuahiam in nang khristian hikei veteh aw... hon chi leh ka hi chi ut selua a heh gemgom maimah di ngen ihi uh. Ahihziak in i gamtat-khohei, omdan ah Khristian hihna a dawk na di mite'n ei ah khatmah mulou uh ahihman a khristian dia hon koih thei lou uh ahi zaw hi. Neekguk i siam ua, neekguk sum in inn hoih pipi, sang pipi i lam ua, i hinkhua un zaw van sukha dek veh aw... i gamtatdan uh leizuul ah a kivei ngongngong lai chih man thu. A hoihlou lam ah i changkang ua, mikhenkhat in Lamka ah Pathian chihlouh a kimvek a chih uh dik mahmah abang hi. Biakinn atam deuhdeuh leh kikhawm ding a vang deuhdeuh a, Biakinn kai te na-ngawn chitak leh lungluttak a biakinn kai muh ding a vangta, nungak-tangval ten biakinn ah Pathian toh kihou sang in lawmte toh kihouna, phone apan mundang a omte toh kihouna di'n i zang ua, kuamah in chihtakna toh biakna i nei nawn kei uh. Mite' theih in biakinn kai ihi ua, himahleh i lungsim uh biakinn apan mun gamlapi ah a vakthap gai hi. Mi theih in Vakang mul bang in i siangthou in i etlawm ua, himahleh i sunggil tak zaw vakang sa bang in a vom in a niin mahmah dedulh hi.

Politics i sai a, khantouhna sang in khat-le-khat kimelmakna ahon tunzaw hi. Namdang ten politics khanlohna leh khantouhna ding a azatlai un, e'n bel kihuatna, kithahna, kimelmakna leh niamkiakna'n i zang ua, Pathian' Belampu apangthei natawm in setan deihdan i zui zaw kha nak uhi. Pulpit ah Pathian thu gen in, kha tang mahbang in mittui luang zoihzoih kawm in thu i gen ua, polam i tun chiang in huaite mangngilh in sa dan a hin i teelzaw zel uh. Politics ziak in mipoimoh bangzah hinna i taan ta ua? Pathian hing neiloute nangawn in hamphatna leh khantouhna tampi politics tungtawn a a tanlai un eilawi politics sai in khat-le-khat melma a hon bawl hilou hia? Pulpit a i thugen te leh i zaakte hoihtak a zui in hinpih hile hang banghang a eilawi a dia vangsiatna hituan di ahia? Min a hamphatpih theih leh ei a din le hamphatna tampi om di hiveh aw... scheme tuamtuam hongpai te, mizawng leh daikilkal a mite tunding na ding a hongpai te ana laksak a ana negu a, gil liandeuh mai; gil a om thoukang natawm benglum pha lou di hial a mizawngte tan ding neksak mihausa, saptuam leh khotang a kizang bangzah i om dia? Mimuh in zahtak huai in diktattak a hing i bang ua, i thugente un meithai-tagah leh dai kilkal a mite phawk mah veh aw, ahihziak in atak a i sepsuah sawm chiang in eimah gil mah a tungsek a hiven. Min i dinmun hon zahtak ziak ua bangmah genlou a a daih dide ziak ua en amau te ut leh dah a neksiat di chihna hisam lou hi.

Apolam siangthou mahmah, ahihziak a a sunglam thanghuai gawp, niin gawp leh kihdak huai in i society uh a dimta. Papi sa nungak buaipih, nupi sa tangval dang ang a kual den, mahni innsung natawm enkai zoulou in bangch'n i gamsung uh, i society uh i enkai in i bawlhoih zou di ua? Tu'n i khelhna gah uh i lou panpan ta ua, i lou tou zel lai diing uhi. Tu hun a i tuah te sang a huaise zaw in i maban ah ahon ngak chih i mangngilh louh uh ka deih mahmah. Pathian lam-en a, kisiik a akiang i zot mateng zaw haksatna, beidotna, kial, leh adangdang nasa zawsem in ahon ngak ahi. Tu hun a i pil theih kei leh denchiah a zekai nung in i kap in i mau dia, tangte aw hon delh lum in chi in kikou mah lehang le a kikhel ahi ta ding. Tu hehpihna hun a i ngeingaih louh ua, apolam siangthouna kia buaipih a i sunglam niin pen nasa zawsem a i suknit leh akikhel nung chiang in, Toupa aw hon ngaidam in chi in sai-ip puan silh in sun-le-zan in thum in mau lehang le a dawnna i zak di omsun zaw A KIKHELTA chih ahih khak ding alauhuai mahmah hi.

Tuaziak in VAKANG bang mai a polam chauh a etlawm, mihoih bang a kilang mailou in i sunglam uh nitna te, botlohna te hahsiang in thathak la in panla thak ni, akikhel ma in, unau i gamsung, khotang, innsung sete bawlhoih na di'n nang mah siatna, hoihlouhna te bawlhoih masa in, nang napat kei leh kuan apan dia? GAMSUNG, KHOTANG LEH INNKUAN HOIHNA DIA DAWNNA OMSUN ZAW NANG NA HI. Vakang bang a polam chauh siangthou mailou in na sunglam le hon susiang ta in aw............!