Lamka A Tualthattu' Kipuanna!!
( Real Life Incident )
Written By: K Lianthansang

" Zu dawnlouh theihlouh dia Lamka khawsung a ZU vial-hawm om hia " chihdan pian in, " Tual thahlouh theihlouh dia Lamka khawsung a TUALTHAHTHEIHNA PERMIT vial-hawm om hia?" chi'n kidong masa lehang; 'Pingpei' bangin i lu ( head ) uh i pei chiat ding uh. Ahi mah leng hi - hinna ei kibawl theih leng hilou kilaksak chih pen, Pathian in leng deihlou ahihdan i theihvek sa uh ahi. Kidouna hiam ah i langte ( gaalte) thatkha lehang bel, 'Tualthat' kihi theilou ding hi. 'Tual' i chih, ka theihkhelh kei leh, 'Khawtual' apan kilakhia ahi a - khawsungmi banah, chikhat-sakhat chihna leng ahi hi. Ginlelh thu hiam, muanmoh thu hiam khawng a kivuaklup leulou chihbang leng 'Tualthahna' in huamkha thei veve hi.

Paite pau a lai ana gelhsek - Kattie Mawite ( Kattie = KT = Khuptong ) in, ' SIANTHOUNA' kichi pansan a thu hoihtaka hon gelh ka simleh, ka lungsim ah atam zawsem hong lutbeh hi. Aman a gelhna ah - tep leh muan, nek-le-dawn, numei-pasal kal a sianthouna apoimohna hoihtak in hon gen hi. Banah, atawplam ah, huchibang a kibualkha nailoute'n sawm le sawm vetlou ding in chialna bawl hi. A thugelh hoihtak mai ka simzoh in, ' Lamka A Tualthattu' Kipuanna' chih kia ka lungsim ah a gingden maimah.

Mi khenkhat in, " Tangval lai a zineih mah uthuai ka sa " a chihsek uh, chiamnuih hidan a ka na koih nilouh leh; papi' nung tanpha a leng zi neihtheih lai ahihdan ka theihsuah tak in thutak ahihdan ka musuah phiing. Nidanglai in, 'Kitenna' kichi 'numei khat leh pasal khat kigawmna' chihna ana hi a, tulai in bel 'mi nih kigawmna' chihtheih di'n omta. Huai ziak mah leng ahi ding, " Ka zi numei ahi a. Zi dia zaw numei mah hoih ahi " chi a ana gen veu sek uh.

Chiamnuih hidan a i koih uh khenkhat bang atak suak ahihtak man in tuni a tualthattu' kipuanna kammal k'on gen ding pen leng phuahtawm hilou in atak mah ahi. Lamka khawpi i chih etmai in neu bang mahleh, Mumbai khawpi a thiltung khenkhat a phalah tuan kei. Hotel khawng ah leng sihna mulkimhuai tak a tungtheita. Kicheina hi'n kicheilouhna ( sapum a silh-le-teen bangmah baatlouhna) lam ah leng India khawpi tuamtuam a mite i phalah tuan kei uh.

Lamka Crime Detector ( LCD) kichi lohtak bei a sual thilhihte aguuk a dou dia bawlkhiat ahi a - kizoppih kuamah a nei kei (non-profit Organisation ahi). LCD in Lamka khawsung ah guta-lata bangzah hiam leng houpihna nei in a thilhih uh a tawpsan didan lampi uh kawkmuh theih dandan in kawkmuh zel hi. Guta a kipei atamzaw in Heroin ( No.4) a hihdeuh tangpi ua; Supply leng ahoih om mahmah. New Bazar ah zinglam dak.7:00 vel in leng supply hongpai zel ahihdan amau apan muhsuah ahi. Banah, phone tungtawn a kihousiatna tuamtuam leng aguk in LCD in suizel a, Saptuam a makai muanhuai mahmah khenkhat khawng tan ah sui mong leulou zel uhi ( a kipatna bulpi ban suitheih nawnlouh). Thuhilh ngai selou dia gintak khenkhat huchibang khawng a 'thaangtat' a, min diklou zang a gamtangte akisuisuahna apan in 'Tualthahna' toh kisai leng kikoihdap tuanlou hi (LCD in Office leh kivaipuakna tuam a nei kei. Sualna thiltung tuamtuamte amau hihtheihna tan a ana suisui lel ahi uh).

Tualthahna vai ah Nungak khat apan in mipi' theih dia poimoh tampi muhsuah a a-om man in huai thu hon gelhsawm ka hizaw. Min leh hihna banah, identity tuamtuam taklat a phattuamna omlouh ziakin taklat a kisawm kei. Nungak khat, pawlam et mai a leng mite' muantham ching, Pathian phatna lam a leng mite' nuai a hisamlou bangzah hiam leng 'Tualthahna' ah ana kigolhkha uhi. Huaite lak a khat in agenna ah, " Mite' theih a minsiat leh zahlak ka utlouh ziakin, aguk in tual ka na that ta. Niteng in Lamka khawpi ah tualthat mi 5 sanga tawmzaw lou om gige ahihdan leng ka lawmhoih mahmah - Nurse a sem khat in hon hilh ngei. Ke'n bel tualthat di'n thu ka pia a, a thattute' kiang ah Rs. 2500 ka pia. Nihvei tual ka na that kha ta. A lian zawdeuh that ding a 'permit' pe te'n bel Rs. 10,000 khawng le pe ding un ka gingta. Good Friday leh Easter Sunday zat hun a thugentute' tungtawn in ka kimusuah thak a, kisik in Pathian kiang ah ngaihdam ka ngenta. Inn a kei kia ka om chiang bang in, ' ka nau dam a nei hileng ' chi in a nuihmai di khawng ka mitkha in ka muzel. A khenchiang in, a kahging didan khawng ka za a, ' bawi..hon ngaidam in aw, hon ngaidam mahmah in aw bawi. K'on hehpihlua ' ka chizel. Pathian thangpaihna ka tunga hong tunma in ka kibawlhoih man a, ka kipak. Himahleh, a khawnung gu a na lua. Kei kia in leng ka daileng ngam kei a; achang in ka naungek sisa houpih dan in ka omsek. Ka diip khawng a kisai ging dutdut nai a, zaktheih di khop in angaih hial hi. Mulkimhuai lua eive..mulkimhuai lua " chi'n gen ngutngut mai hi.

A kipuanna tungtawn in thil tampi kitheisuah leuleu hi. Aman a genna ah, " Lamka khawpi neuchik himahleh a maimai kei. Teenage ( kum 13 - 19 ) kekal te lak ah uang diak hi'n ka thei. Naungek a neudeuh lai a 'Abortion' bawl te'n sum tawmchik seng mahle uh, kha tamsim aphak nung a i bawlsak leh sum tampi kiseng ahi. Ke'n leng ka bawlsak nanung pen in ka sung a naungek om ana lian lawman a, baihlam tak a zohtheih ahi kei. Ka va pai masak in damdawi khat in honna kap ua, a ninawn in ka vapai nawn hi. Damdawi hon kap uh thuaklah a ka sung a naungek ompen, mangbang tak a kikou kawm a kisat siangsiang ahi ngei ding a, a sihkuan in utlou sasa in lakhia uhi. Kidop chih a om kei, pau leng ka pau zou kei. Meiteite bang hile uh, ' ima ei sire' chihial di un ka gingta. Ka sisan ngoihngoih a piang that ka hi a, ka lungsim anuam thei kei. Nungak ka hi a, ka kisiamtan thei kei diak. Pathian a di'n ka kizang a, ka lungsim taktak in amah ka Phat ngei kei. Mite' muh a kilawm di tan kia ka na ngaihtuah kha sek. Tu'n bel a kikhek Nungak ka hita" chi'n hon gen hi.

" Ui in naungak tuah ", " Lui-guam ah naungek sisa a kipaih kimu" chi a, News khawng a i simsim telawi uh hiai khawng apan ana himaimah hi. Nupi nau paai a, ama' hinna adia lauhuai hiam ahihleh bel asiatna om in ka koih kei ( kei ngaihdan in). Himahleh, Nungak hingal a, 'Abortion' bawl kichi thil dik hingei lou ding hi. Nungak tampi'n Abortion a bawlzelna mun uh leng theihkhiat ahi a; a chang a, ni khat a 4 leh 5 bang om zel ahihdan leng kitheisuah hi. Huchibang a Abortion bawlte' hihna taklat a kisawm kei. Himahleh, gam leh nam banah, Pathian' deihlouhdan ahihlam thei napi a hih teitei a om leh, amau leh Pathian' kal (kar) hilel ding hi. LCD in bel, thil omdan kimusuahte hon kitaklang lel ahi a; kuahiam sukmualphou sawm kihilou ahi.

WARNING ( Kiginna Ding A Hilhkhawlna):
Nungaklai a Abortion bawl omtheih ziak tampite lak a khat ahihleh - Pasal ahi ( Pasal tellou naungek omsak baihlam hetlou di). Huai ziakin, Papi leh Tangval khenkhat leng suakta tuanlou ding i hihman un, hiai 'WARNING' ngaihsak ni. Huai tuh - Eklijiasti:11:9 a ana kigenkhinsa " Aw tangval, na tuailai in kipak in: na tuailai nite ah na lungtang in hon kipak sak hen, na lungtang lampite ah leh, na mitte muh in om in: himahleh hiai thilte tengteng ziak in Pathian in nang vaihawmnaa hon pi ding ahi chih thei in " chih ahi.

Laigelhtu' Lungsung Pan:

Hiai thugelh a thiltungte ( incidents) atak ngen ahi. Mi tampite lak ei pentak hiaibang 'tualthahna' a kigolhkha i hih zenzen leh tawpsan ni. Min leh munmin tamzaw taklat ahi kei a, huaite a poimohpen leng a hikei. Kizephawk geuguau a i om zenzen leh - kizephawk geuguau a i om nawnlouhna ding in ana kibawlgu hiau ni.

0904 - Ka Kipak - 2016