Pawl VI kahon sim a, nidang a itna omdan kanatheih ngeilou himahleh lungsim a thawmhauna riau konnei ta a,nidang a kalawm pasalte toh kithuahlou hikei mahleng tukum intuh pasal kathuah chiang in kumdang banglou in kam agenkhiat theihlouh ahihziak a nop kasak na mahmah khat a om hi.Kalawm pasalte'n leng honthuah dan uh kumdang bang a honthuah loudeuh un kathei a,nidang a kakikaal ua ki zahtaakna om ngeilou tukum in hong om mawk a,akhenchiang in aheh huaiton tam mahleh a nopna tak a om veve hi.Kapa'n govt a sepna lianlou a muhthak ziak a kakhua uapan tua katenna District Head Quarter ua kum li kaphak kum a pem kahi ua,tu in khopi sung ah ka intek mah2 ta hi.

Huchin sikul lut ahong hun a,keibel lawm thuah nuamtak kahihziak in ka kithalawp mahmah a,ani masa pen in kakaipah hi.Lawm khenkhat te hongkai naikei mahle uh,mithak tamkhop ahong kai ua huaite kimel theihpih in nikhatni inleng lawm kahon neipah a nuam kasa mahmah hi.Nidang a numei pasal chih khentuam lou a thuahdan kibang a thuahthei himahleng tukum intuh pasalte maingal louhna tak kanei a kamuh utleh ka et ut teleng a mau honmuh in ka en ngamkei a ka guk et zel hi.

Numeite bel keiziak in a maingal pahvek phial ua,himahleh pasal lamte bel mithak ahih uh kithei in a maingal hetkei ua,kalungsim in kumdang bang hileng noulawi leeng honsu maingal tading hing a ka chilungsim hi.Nidang bang a maingal tak a houpih teitei sawm in pasal te tutna lam kava naih a zumhetlou bang a kibawl in khat kava houpih a...

Anungvual a kuamah toh akihoupih lam katheih louh khatkiang ah amin leh a hongkipat na kavadong a, a zumziak in amai hong san tuaituai kamu a huai in aziak katheih hetlouh in keileng hon suzum mahmah hi. Kamsiam hetlou in "Lalpu" ahonchi a,kakholui uapan ana hi a,tua a om na apa neute kouveng mah ana hi hi. Kuan lepai a kiton theiding kahih dan uh gending kachih leh zumziak in kachikhe ngamkei a, huchi in dak hong ging a assembly ding in katai pawt uhi.

Lalpu in lawm a polh lam kathei kei a niteng in amahkia in a om denphial hi. Aziak hiai ahi chih theihlouh in awlmoh natak kanei a,sunkhawl hun khawng a vapolh a maingal tak a koih ka ut mahmah a himahleh kumdang LUNBAWI ka hinawn kei a pasal zahtakna mahmah kanei hi.

Ka awlmohziak in avangkim in ka en gu khanak a huchih hun in manan leng hon na enkha theizel a ka zum theilua hi. Nidang a pasal toh kithuah mun leh kithuahpih nuamsa zaw in tua kahichih pen keile keileng lamdang kakisa hi.Kei maingal nawnlouh behlap in Lalpu a na zahkai zawmah a,kaki suanlahna ziak in hehpih mahleng ka ut bang in kahoupih ngamkei hi.

Huchin kha nih bang sikul kongkai chiang un Lalpu leng hng maingal deuhta a hidia sunkhawl chiangkhawng in hongpawt khesam zel a kana kipahpih gumawk hi.Kumkim bang kongkai chiang un kinel natak konnei ua zing sikul kuanhun in kiton theikholkei mah le ung kapai chiang un katon hun uh atamzaw ta a nuam kasa a kipahna tak kanei hi. Himahleh Lalpu in keihou pihna hondawn louhngal thutam agenkhe ngeikei hi. Innlam tuak zuan a kakikhen hun ua "Ulal mangpha" ka chih chiang in amai a san a hondawn na kaza ngeikhol kei hi. Himahleh nuam sakna tak in honpum buah hin kathei hi.

Kumkim khawlhun a hong tung a Lalpu a khua uah a pai a tulai te chih dan leh a guk in ka miss mahmah hi.Chik chiang in hong kik ding uam chih leh Sikul ka kaikhawm nawn hun a ka thuah dingdan khawng leh a houpih dingdan khawng ngaihtuah in ka hun tam zaw ka zang bei zel hi....

Ka kingaihtuah chiang in lamdang kisakna in ka dim hi.Ka houpihna lel hon dawng a kamsiam zang a hon houpih ngei lou Lalpu kalung sim a ahichi om lamdang hin kathei hi...A mel ka en a hichitel a hoih in ka theikei,kamsiam ziak a lungsim a ngaihtuah khazel chih le ahituan kei.Ngaizawng a chihte uh hidin leeng kagingta theikei..Mel hoihlua kasaklouh leh kamsiam kasak louh ngaaizawng ding in kaki gingta kei..

Himahleh ka ngaihtuahna tamzaw Lalpu in a luah den hi.Ngaihzawng nei ding in leng ka kikoih theinaikei, ki ngaite om dingdan leeng thei in ka kingaihtuah naikei,hina pi in Lalpu ka lungsim ah a om den hi.A khenchiang in Ngaihzawng deihhun bang kanei a huaihun in ka ngaihzawng ding ka ngaihtuah chiang in Lalpu ka ngaituah kha ngeikei hi...

Hun hongpai zel a Lalpu ka ngaihnatna a hong lian hiaihiai a,aman le hon ngaina mahmah ta in kathei a Sikul kaikuan ding in ka lampika uah hon nangak bawl in a na kizekai sakzel a keileng amah sang a ka tunbaih hun in huaimun ah ka kizekai sak deuh gige hi.Huchin kahong kithuah nel semsem ua Lalpu in a khen in hon chiamnuih theizelta a,midangtoh bang ka kidem tuah ua,nidang a zahkai mahmah Lalpu hong maingal tak in khovel a thuahnop pen a hong suak hi.Zingkal Sikul kuanding kiton in pailam ka kiton ua ka lampi uh nai kasa theimahmah uhi...

Pawl IX kahon sim hialchiang un nungak a simtheih kahong hihtaak man in a vangkim in kakhan vual leh keitung thamtham a te khawnghong helding in hongkuan theizel ua, a khenchiang in Lalpu leh ka class pihte uh leeng a hong hoh zelsam ua...Lalpu in leng hon angvan in hon duat mahmah in ka thei a nuam kasa thei mahmah hi....

Huchi in kikhenthei lou ding bangkhop in kong kithuah uhi...

Nitak ka lup chiang in Lalpu toh ka kithuahna te khawng uh ngaihtuah in ka hun kajang jel hi..Ka lawm leh ka khanvualte un kougel kingai in honthei ua,kou leng ki ngaituak mahmah in ka kithuah gige uhi...Ka lawm te uh kingai te sang in leng ka kithuah zaw uhi...Sikul kaikuan le pai kizui kia le hilou in a khen chiang in note copy ding bang in a mah honghoh a,akhen chiang in ken kava copy zel ban ah Pawtna ding ka neih chiang in Lalpu ka vazawn lou theikei...

Huchi tuk a kithuah himah le ung Lalpu in KON IT hon chihkhiat ngeilouh ziak in kalung a nuam theikei...A om dan in hon it chih kathei a kei omlouhna mun ah nuam a sakei a hon muhlouh chiang in a lung a leng a a thawmhau chih leng kathei.Himahleh Itna thu hon gen ngeikei a...Ka kithuah ua ki it tuaktak a ka om uh ki it khin a kikoih a hon genlou a hidiam..A hihkeileh itna piak ding a kei a a lungtung zoulou hia chih kia in kalung a luah a akhen chiang in patau in zan khovak phial in ka kingaihtuah zel hi.

Hon gen theihna ding lampi bawl mahleng Lalpu`n a theilou mah a bang gige hi...Nungak tuung,ka hoihna teng akilat hun ahihziak in kalteng phial in tangval a pan Itna laithon ka mu gige sam hi. A khente ngaihlouh ding a pam maih kasak a om tham a.akhente lah ngaih et a ka et theihlouh leng a om sam a himahleh Lalpu a ding a ka itna tengteng pekhin ka hihziak in kuamah kiang ah ka kitulut ngeikei hi. A khenchiang in kakam a dot mai kasawm zel a himah leh Numei ka hihna ziakleh a lungsim loulam ahihkhak ding kalauh ziak in ka dong ngam ngei kei hi...

Pawl IX kon sim ua nisuak sim in Lalpu in itna simthu hong lel ding in kinepna ngen toh zing kathou khe zel hi.Himah leh akam in hon gen ngeikei himhim a,a omdan leh hon etdan in tuh hon it petmah chih kathei hi....Himahleh ka muhlel a ahon itna kei a ding a muanding hia muanlouh ding chih katheih louh ziak in kalung amuang theikei hi. (Zutzop ding)Hon gen theihna ding lampi bawl mahleng Lalpu`n a theilou mah a bang gige hi...Nungak pan a ka hoihna teng a suah hun ahihziak in niteng phial in tangval a pan Itna laithon ka mu gige sam hi. A khente ngaihlouh ding a pam maih kasak a om tham a.akhente lah ngaih et a ka et theihlouh leng a om sam a himahleh Lalpu a ding a ka itna tengteng pekhin ka hihziak in kuamah kiang ah ka kitulut ngeikei hi.

Huchin kumtawp ekzam kahon zou ua,tuailai lai a ut mahmah picnic kahon sawm ua Lalpu toh hun nuamzat na ding ahihziak in kakilop mahmah hi. Kalung sim in lawmte kingaite omdan apan in Lalpu in hon itna thuhon genkhiat kalam en mahmah a kakilawpna a lehnih in alian hi.

Picnic na mun kahong tung ua nekbawl ding tuan omlou ahihman in kou Lalpu toh tuitawi in kapang ua lawmte khenkhat meh huan,annhuan,malta meh gawi leh akhente akim a chiam nuihbawl toh kou mah khomchiat un kuamah ka ki engtuan kei uhi.

Tuitawina gamla khol keimah leh midangte muhbatna ahihlouh ziak in itna thugen na ding in hunhoihtak kamu ua,Lalpu in hon gendia kakinep luatziak adiam ka hi het hut a,kapau khiak dekchiang in kagawl thelpian in ka aw a lingsim mawk hi. Lalpu honthei a "bang chi e" a honchilel a aban ka kinepna bangmah agen nawn hetkei zel hi.. Kaki ngaihtuah a dot mai ka ut a huchihial ding in kamai ngalzou keizel hi. Kaki hehnem zel a hon it mah,ki it khin dan a akingaih tuahziak a hon genthak nawn tuanlou ahi kaki chizel a himahleh kalung amuangzou kei..

Akhenchiang in midang ka ngaimai ding chi in hon gente lak a kadeihpen aw chi ding chi in laithon kagelh zel a atawpna ah Lalpu kangaihziak in pelou in kabot sevek zel hi. Itna thu hoihtaktak midang apan kamuhte Lalpu apan himahmah leh chih ka ut theipetmah hi..

Ann huante aman ma uh sepding omlou in singlim nuai ah Lalpu toh kavatu ua houlim in nuam kasa petmah hi. Lalpu in "lun, ka bil ek hon lakhe ve" ahon chi a aban hon sutzop ding kilam etna lianpi kaneihziak in kakipak gu mahmah hi. "eilak khiatsak na ut nak in" chia omzenei theitawp in kamelh a Lalpu zum in amaibang a hongsan zezen hi. Ka samkilh lakhia in kaphei tung a kingaisak in anuam theipen leh kasiam theihtawp suah in abil khem kalak khiatsak a,huaizoh in a tangsiat kasal sak lai a thutuamtuam houlim mah le ung ki itna thu gen kaneikei zel uhi..

Hun tomchik kasak sung in ann nekding honsawm ua ann ne in nitak vdo etna ding hall reserve sa lamzuan in kahong paikhia uhi. Lawmte'n tuni picnic zangnuam pen Lalpu toh Lunbawi chin hon chiamnuih nilouh ua Lalpu bel zumluat ziak in bangmah agen theikei a kentuh nopsatuan loudan in kakigen na a nuam kasalua hi.

Vdo hall kahongtung ua minih tutkhawm theihna ding ngen tutna ana om a kouleng Lalpu toh katukhawm ngal uhi. Akhenchiang in kakhut honlet sak a khut kilet nuam ahih dankathei khia hi. Bangtan hiam kahon etnung un Lalpu zuntha din avapawt khia a huaikal in kalawmte lak ua ana sinial deuhleh chiam nuihhat gige in mipi zak din "Lalpu,kon engbawl dia atutna konsuan ding" chi in kakiang ah hongtu a kana nohkhiat chiang in tu ut deuhdeuh in kanoh khezoukei hi. Kahehtha a suak a Lalpu in hon hehsan dinglauhna in ka om alemthei nawn him2 kei a,honglutna ding lamkia en in kadip a kaw zezen hi.

Huchin khomial lak ah Lalpu honglut tangei a atutna mun a mi natut lam mutheipah lou ahh man in kinemtak in hon naih a kou a sung a na omsaten amah kamuh theihziak un kana en demduam uhi. Hongtut dek tak leh ahon muhchiang kituak in mi anatu ahon mu a zumlua in a om dingdanle theilou zezen kamit in amangthei kei a kahehpih petmah hi. Lawmte belkipak in anui zaizai uhi.

Ka class uah Lalpu zahkaidan theilou ka omkei ua huaiziak in amaingal ten a engbawl ut diak uhi. Muntuam ah Lalpu ava tu a,amah kangaih tuahziak in ka fim et uh leng kamukei chih ding ahimai hi. Dak 10 lak in ka tawp ua kapai un kagintak mahbang in Lalpu in bangmah genkei mahleh a pau ut het louhdan in hall sung a thiltung alungkim keichih kathei a,alang khat ah kakisuanglah a alangkhat ah hon ngaihziak hi a katheih ziak in kakipak gusim zel hi.

Kouveng apaiding mi 7 kapha ua lawmten hontheisiam in anung uh kihal zek in kapai ua,Lalpu khut lenkawm in thil omdan khawng kagen a honthei siamdek pan chih ding in inn kahong tungdek mawk uhi. Kou in lampi apat paizek a ngaihziak in lawmten Lalpu in honkha heh chi uh ahihtoh kougel inkapai ua gending kakhonung theihkei thak zezen mawk hi. A tawp in "Ulal,non hehsan lawlai hia? Keiziak hilou a amah hongtu kanoh khiatzoh louh eive" ka chih leh "hehlou kahi" chihteng in hondawng a kakipah luatziak hia,thakhat in kakawi kha a kahih pentheilou in a muk ah katawp ek a,aman leng it tak in hon natawp thuk sam hi. Thakhat in kathil hih katheikhia a halhguih hileng kilawm in amah bang kasawn kha zezen a zumlua in mangpha lengkhak lou in innsung kalut san hi.

Zan ka ihmu theikei a kipahna leh lauhna in hon pumtuamtuak uhi. Ka itmahmah Lalpu ka tawp a amanle it tak mah a hon tawpthuk a katheih ziak in kaki pak petmah a,kangaih tuahsau a Lalpu in beven honsa lodia hon ngaikei de aw chihna in honsulau petmah hi. Kaki hehsantha asuak zezen a ahihziak alah katup mawng hilou a hihziak in "poikei" kakichi guzel hi.

Ekzam zou kipah huai mahleh Lalpu akhua ua paiding ahihman in poi kasa mah2 hi. Bangchidan in Lalpu mulou in ka omthei de aw chih kia kangaih tuah ahi gige hi. Niteng in Lalpu hong hoh kaki nem a gate hong gingteng Lalpu ahih khak kinem in ka engu gige a himahleh kinepna ngen a hiden hi.

Kal khat bang ahih nung inleng Lalpu melmuh ding a om ngeikei a,ka picnic nizan ua ka omdan hoihsalou a honheh san a thuah le honthuah ut nawn lou ding bang in kakoih a keilekei kihehsan in akhenchiang in ka pheikhawng kaki beng ek kha zezen hi.

Ka beven ziak hilou a kon itluat ziak ahi chia genlem thak ka ut mahmah a huchi din hun kamuhlouh kialeng hilou in agen nading ka ULal leng kamupha ban kei hi.

Huchia Lalpu mel mulou a kal khatbang ka om nung in a inn ua vakan kahon lung gulh ta a,nidang hileh vakan lel haksa kasak hetlouh hinapi in picnic nizan a kathil hihziak in zum in kazum mawk hi. Nipini khat kikhop ding paulam in zum a si omlou hiven chi in Lalpu kikhawm a tawnding paulam in kavatawn hi. A nuneu in "na uLal a paina sawt ta eive" hon na chi a,thakhat in kalung len in hom buah thoh abang hial hi.

Lungleng vungvung a hunzat ahaksat dan kathei hoihmahmah hi. Lalpu apan laithon muding bang in kakinem gige a kinepna lel in hun kazang bei gige hi. Miteng in Lalpu toh kingai a honkoih ziak un love letter kamuh leng ahong vangta mahmah hi. Ka kingaih tuahzel a ken it mahmah lengle amah apan itna thu kamkhat lezalou a ka ngakmai hih diklou hiding in kakikoih zel a ahihziak in Lalpu ka ngaihna ziak in hihdik kakichi thouthou hi.

Huchi in kum ahongpai a kakithuah ngei in kakithuah ua, mite muh in kingai petmah,kikhen thei nawnlou ding kahi ua, koubel kamit hah uleh ka omdan ua kaki itna uh kakisuk lat uh chih louh kam in itna thu kaki gen ngeikei uhi.

Pawl X ekzam ding ngak in ka om ua,avang kim in Lalpu a hong lengla zel hi. Nidang bang in amai ngal hetkei a zum pipi a honghoh mah abang gige hi. A ziak ding kathei zouhet kei a dot leng kadong ngamkei mwk hi. Ekzam nading nithum kia in asamta a nikhat tuh Lalpu amah kia in sun in ahong hoh a keileng kalaisim lai koih in kava tutpih hi. Huaini in azahkaina leh tampi in a kibehlap a aziakding kathei zoukei a kei kakileh suanlah hial hh. Nopsakna himhim neilou in kathei hi. Singpi limthei tawp a bawl in kadawn ua,sawt tulou in apai hi. Apaidek in maisan tuai2 in laithon a honpia a sanglesang hoihmanlou phial in kinung hei in ahon paisan hi. Nou le khawmlou in kalai thonsim ding in ka pindan ah kalut a..

Itpen leh ngaihpen Lun,

Amasa in nahehpihna ziak a hiai kalaithon non simsuaksak kahon ngen hi.

Kahon muhtung apan in kalungsim teng naluah a hon gen ut mahleng nang adia chitna nei kakisak louhziak in kahong gen ngam ngeikei hi.

Ahihziak in ka chitlouhna ten kon itna sudaizou lou ahihman in kei adia nalungsim pindan a awnlai leh nahehpihna kon ngen hi.

Nalunglou lam ahih leh gual lai ah nuihchiam in honglel ken aw Lun.

Nang hon it tawntung,

nang akinep

Lalpu

Midang in siamtak a itnathu hon gen tampi muta mahleng hiai tuk a kakipahna a om keiding. Hiailaidal tuk a hon sukipak a om keiding..kasimsuak zah veikathei sengkei,tomchik sung in enlou in katheisuak vek hi.

Thukpah ding ka ut a himah tangval in hon genpat na a kithuk pah lou a ki enkhephot chih paidan a kinei ahihman in leh ngakzek ka utziak in athukna ding kagelhsa kakem hoih hi.

Huaiban Lalpu in hom khaknwn hetkei a skul ah kimule ungle hon houpih ngamlou in ka omlouh nana zuan in kathei a,kituak khatei tei ding a ka omchiang unle amai san in kahoupihna kia a hondawng tan guihguih hi.

Hon ngaitaktak hilou ding in muan mohna neikei mahleng etkhiatna dan in "hiaitan kon ngak a non ngaihsak louhziak in midang kanangaita, chin kathuk hi. Kakinep bang a hon genzom ding ngak in niteng hun kahon zang a ngaklahna in hun konzang nawn hi.

Hunsawt tak kangak a laithon muhkikni lah omlou,Lalpu mel lah muhni omlou in hun konzang a gawtmun mah abang hi. Akhen chiang in ka etkhiak kakisik a,gelh thak a kon na ngai gige chih thak ka ut a ahihziak in kahuchih ngam keizel hi.

Result hongsuak a Lalpu in 2nd division in hon pass a ken 3rd in kazou hi.Nidang hileh alopna Lalpu toh neiding in kakikoih a tunbel kipahpihna kamkhat le kakipetuah kei uhi.

Nikhat laithon kamu a kasimleh...

Itluat Lun,

Nahun manphatak tomchik lel le tangtak kahikei na a nahehpih nalianpen in hiai kalai hon nasim suaksak lai in aw..

Katung a nahoihna,na hehpihna leh nasiam nate kanatheisiam kei a,keilungsim bang a nahon itziak in kana koihkha a poikasa lua hi.. Kaduh amziak in na katung a namihoih na hawmthoh in na itna leh na pumpi tan kon nasawm kha a keilekei kigawt kasuak hi.Lawmta bang a ikithuahna chiang ah nalungkim himaileng zaw tukhawng a anuam ahaksa thuak khawm a nuamtak a omding hihang a mw..

Kum hiaizah katung a nasiam natengteng chikmah chiang in kamang ngilh ngeikei ding a hiaileitung a kahin sung a kahun nuam pen ahi gige ding hi.. Natung a kingeksak tak a ka om lai nite sapkik theih himaileh ka chipetmah hi. Ahi alah kei duh am ziak a huchibang hunzang kha ngeinawn lou ding kahita hi. Lun bang chikmah chiang in naphei tungkham a namai en a ka ut ut kagen lai nite kamang ngilh ngeikei ding.. Khovel kilum let mah leh deihthoh tak a nontawp lai kamang ngilh ngeikei ding.. Ngai in kapmah leng sulhong heinawn lou ding a..ngai a kaplou theilah kahi ngal kei a...

Chitak tak a midang na ngaihdan nahon hilh in naasa mahleng na it toh khosa khawmding nahih ziak in kathuak a nuamzaw deuh hi. Na it toh hon sukbuai ka ut louhziak in hon it mahleng MANGPHA kon chimaiding aw Lun..

Itna tawplou a nang hon it

Lalpu

Naa kasalua,etkhiatna bawl khalou hileng chih ka ut thak petmah hi. Hon it lua ahihdan katheih sa,leh amah ziak a leitung hinkhua nop kanasak mahmah bangziak a enkhese kahia chi in kamit tui ahong luang zoihzoih hi..

Kum hiaizah itnathu hon gending ngak ing a tuahon gentak a bangziak a nakisathei kahia chi in keile keika kiham siat mah leng bangmah a phatuam nawn kei..

Lungsim tamkham a ka omlai in kalawm nu a hong hoh a Lalpu kolez kaidia khopi lamzuan dingtoh bus stand ah kakimu ua Lunbawi mangpha hon nakhak sak in honchi a hong gen kahi hong chi a kidek zoulou phial in kalungtang teipi a dawt mah abang a poisalou bangtak a om haksa kasa petmah hi.

Kalungsim in ULAL,KINEPNA LEL MAW KATAN MAI...! ka chilouthei kei hi..

Beita

.