"Huan, tamvei pi a sat khit un suangkulh ah a khum ua, a vengpa kiangah bittaka ven ding a chi bikbek uhi. Huchitela thu a piak jiak un aman tuh tanna sungnung jaw ah a khuma, a khe uh singkol a bunsak hi. Himahleh, jan lai in , Pathian kiangah Paula leh Sila a thum ua, la asa ua, hentaten a ngaikhia ua (Nasepte 16:23-25).

'Jesu neih hinna nuam kipahna thuguk hi, ka kha ah muanna hon pia, Jesu neih kia ki pah na' chi'n la in ki sa jel hi Jesu nei taktak te jo et mai in leeng theihtheih na khat om hi. Aomdan, kampau uh leh gamtat dan un leeng muh theih in kilang hi. Sa-mi christian te ahih leh bang chibang in hong ki limchiin le uh leeng 'kituui' thei vak lou hi(ki tuui-etsak na din, lasak lam a tuui mahmah).

Saptuam a buaina a om khak chiang in leeng Jesu kris saptuam lubuk a I koih zoh louh deuh ziak hi di in ngaihtuah huai hi. A hih kei leh sa-mi christian(ngia belam vun silh) ngen khawng in vai I hawm zia uh hi ding in ngaihsut huai.

I gam uh 'Christian gam' kichi ngal a bangziak a gen leh sak ding hichi tel a tam hiam? Chih mi kuapeuh in i ngaih tuah uh ahi. Jesu Kris nei taktak lou deuh i hi ding uam? Chih bang ki dot sim maimah in om hi.Ei gam a Christian a hong lut na kum 100 val ta hi. I gam kumpi(Manipur sorkar) te hon diktat louh luat uh kum 50 leeng pai nailou ding hi. A kum ka thei nawn kei, a ni ahih leh Missionary Day ahi. Zingkal ka thoh in ka kiang a laibu lui deuh khat, tangthupha hong lut dan laibu ka sim hi(2010, Tuailai khawmpi lai a pu Lalthanghlun bawl pen ahikei. Huai ma pek a kibawl ahi) Sim nuam leh lunglut huai ka sa mahmah a, ann ne lou zen a sim suak ding ka chihleh bangtan hiam ka sim nung in ka heh tha a suak lua a, ann ka neksan daih mai ve. Bang ziak a huchi zen a heh ka hi hiam? Saptuam leh NEIGM ki vaihawm dan ka sim khak ziak ahi. Bang kigelh mahmah ahia le?

Sum thu a buaina ana om hi maimah aka hia huai hun lai a leeng. Gam kumpi ki vaihawm dan thei sau lou ihih man in hiai kum lak vel in sorkar ki vaihawm dan thei kei mah leng, diktat mahmah uh jo ahi laiding(kingship leng ahi maithei) ka laibu gen tua kei kiang a om louh man in a gelh tu, a kum etc ka hon gelh thei kei, ka inn uah a book a om lai ding.

Awle, I gen ut pen ahih leh NEIGM hi lou ahi. Pathian thu(Bible) zilkha ka hih louh ziak in a dik, a tang theikei mah leng, tulai a Lamka i buaipih uh CT scan mang toh kisai news tuamtuam ka sim khak te apan, Fb group a discussion te a pan in kei ngaihdan leh ka lungsim a Pathian thu hong kilang te kon gelh khawm bialbual ding.Bangteng hi leh ka thil sim khak te taklang zual phot ni.

Lamka Damdawi inn CT Scan vanzat tuamtuam mang

LAMKA, April 12 : Lamka a district hospital ah hun sawtpi paisa apan a koih a om, CT scan machine toh kisai, tukum in zat in om pan hi. Hiai CT Scan toh kisai in a concern department lam in nasatak in buaipih ua, himahleh a zat nung uh sawtlou in a van te mang hi.CT Scan van mang toh kisai Dr.P.Nengzadou, Medical Superintendent, District Hospitalin a gen dan in, Damdawinn a CT Scan van tuamtuam te amang hun thei chiang hi kei mahle uh, apaisa April 8 vel ahih a gin thu uh gen in, a van mangte, Endoscopy Monitor, CT Scan Monitor, Dry Cell battery 7 leh Keyboard 1 hidan in gen hi. CT Scan room sung lut na dia thagum suahna sulnung bangmah omlou hidan in gen uhi. Hiai toh kisai in Medical superintendent in Police ah report bawl ngal hidan in gen hi.(zogamonline.com)

LAMKA, April 16 : Kallui paita a District Hospital apan CT Scan van kigu mang toh kisai in tuni’n huai Hospital a Mediacl Supt.Dr. P. Nengzadou in ngetna leh theihsakna thusuah khat bawl hi.Aman hiai thusuah ah, Hospital a hun sawtlou paipan a zatpat a om CT Scan vanzat, damlou etna a poimoh mahmah a part(Monitor leh Battery) te kum tamtak ngaihtuah ahihnung a haksa pi a neihzoh a omkhakhat lel paipan a gukmang a omna poisak thu gen in, hiai vanzat pen CT Scan dang a, bulh a zat hiam ahih kei leh thildang a dia zat theih mailou ding ahihdan taklang kawm in maban ah neih nawn zoh maimai hilou ding ahihdan leng gen a, hiai vanzat gukkhiak a omna pen ei leh ei kibawltawm vangtahna lianpi ahihdan hilchetna bawl hi.Hiai van mang toh kisai in -Agutuin vapekikding leh huchi bangangam kei leh leng muhkik ahihtheihna dia phone tungtawn hiam a atheihsak leh atungtang=bangmah gen omlou a vensak hidi’n gen a, Midang huai van kigukhia aomna leh muhtheihnading hilh thei omleh amau kiang a kipahman piak hidi’n ngetnaleng bawl hi….(Zogamonline.com)

CT Scan vanzat mang toh kisai in police in muanmoh mi 3 maninkem lel uhi.Mat a om mi 3 te ahih leh,Vangkholal, 68, X-Ray technician s/o (L) Thongzakham of L.Phainuam Village, M.Pauzagin,50, Peon, S/o (L) Vungtual of V.Munhoih of New lamka leh,Mrs. Kungrokim, 37, X-Ray technician W/o Genkhosiam ofPengjang village te hi ua, tuni in CJM mai ah din sak in om uhi.(Zogamonline.com)

CT Scan toh kisai mi 1 mat beh

LAMKA April 18: District Hospital a CT Scan vanzat tuamtuam gukmangthu ah zan nitak in Police in Hospital a Grade IV sem Lianzamung (47) s/o (L) Sangkhum of Medical Compound vaman khia in hiaithu toh kisai a Police in muanmoh a matkhiak mi 4 pahta uhi.Mat a om Lianzamung ahihleh tuni’n CJM court ah dinsak in om a, Court in zan a mat a om mi 3 toh Police Custody ah April 20 tan omding in order suah hi.April 16 a police in office staff mi3 a matte ahihleh X-Ray technician Vangkholal (68) s/o(L) Thongzakham of L. Phainom Village, X-Ray technician mah Kungrokim (37) w/o Genkhosiam of Pengjang Village leh peon M.Pauzagin (50) s/o (L) Vungtual of New Lamka Vengnuam hi uhi.(Zogamonline.com)

District Hospital a vanzat poimoh mah mah, CT Scan van zat guk mang a om toh kisai a Police in thudot ding chi a mat a om mi 4,Vangkholal, 68, X-Ray technician s/o (L) Thongzakham ofL.Phainuam Village, M.Pauzagin,50, Peon, S/o (L) Vungtual of V.Munhoih of New lamka, Mrs.Kungrokim, 37, X-Ray technician W/o Genkhosiam of Pengjang village leh Lianzamung, 47,Grade IV S/o (L) Sangkhum of Medical Compound te tuni in CJM mai ah dinsak in om nawn ua, amaute tuni’n CJM in bail in khahkhia hi.(Zogamonline.com)

Hiai thu teng ka sim zoh chiang in mat a om te GUTA taktak uh hia, hilou? Chih sorkar lampang ah leeng chiang zoulou di bang hi.Zogam.com fb group khawng ah leeng mipil, misiam tampi ten hiai toh kisai in ngaihdan tampi hon gelh te uh ka sim zel hi. Bang ziak a CMO/MS te interrogation ding a sap a omlou uh hiam staff te muanmoh ziak a mat a aom lai ua?

I mi pih, I sa pih te hinna/damna di le hi maithei en va guk mang sak chih ki awi zou taktak I hi na di uam? I gam uah a tangpi a et in guta taktak te man i som leh ki man khe teitei hi. Ahih leh tua i dinmun uh, mat ngam louh ziak hia, mat zoh louh ziak? Chih theih ding in ommah bang hi. Mi khat le nih phattuam di ziak a mat louh ahih zenzen leh jo poi petmah ding. Etsak na din, a sung a sem te or BABUJI circle te hi kha zenzen le uh jo damlou a lunggim tak a om te huh di te, damlou te gawt tu a pang kha ding uh hi. Pathian vaihawm na mai ah a gen di uh tawm mahmah ding maw?

A sung a sem te I muanmoh dek chia lah mat a om sunsun te le khah a om jel uh.Awle i lateel leh I Bible chang tel te ka ngaihtuah chiang in, muanmoh mi 4, mat a om te taan inn a aom lai un, amau diktat jiak a om kha uh hi ta leh, nui hiauhiau in taan inn ah Sawltak Paula leh a lawmte bang in Pathian phat thei ding uhi. Sawltak Paula ten leeng Toupa Jesu Kris muchian taktak ahih ziak un taan inn ah lungkham hetlou in Pathian phat uhi. Hiai mat a om mi 4 ten leeng amau dikna ahih leh Paula te bang in taan in ah Pathian thupina pe thei ding un ngaihsun hang.

A tawpna ding in, hiai case toh kisai in bang ziak a muanmoh mi 4 mat te kia gen a om a, tu lel a sorkar a alian pen(damtheih na lam ah) pu Phungzathang min genkhak hilou hiam? Thei kha nailou ahi diam? A theihkei leh bang ziak a MS in hilh lou? A theih leh bang ziak a kumpi pu'ntutan ngaih sak lou?? MS/CMO ten hilh lou ahih uh leh a sepna uhresponsible zoulou deuh ahi di uam? Pu Phungzathang a pat Lamka Police station ah pressure hong lut leh jo thil hon kilang kuau din ka lamen.Tulai pau leh, 'a riau' khat om ahi zo diam?

AUTHOR  NOTE:

Hiai article, news leh fb group ka sim khak te a pat ka ngaihdan ka gelh ahi a,case/situation/circumstances khat peuh ah reference ding a zat phal ahi kei. A zang om leh author in moh a po kha kei ding.Pathian thu siangthou, theih louh ziak a mihing deih dan a ka kaihkawi khak leh Pathian in hon ngaidam hen chih ka thumna ahi.