I GAM AH LEMNA KUMPI PIANGSAK NI
By: Hauzel Gou

Tungnungpen ah Pathian thupi hen la, leitung a a kipahpih mahmah mihingte lakah LEMTHU leeng hen, a chi uhi. Luka. 2:14

Hun-le-nite hong pailiam zel in, kum bul January kha apat a kal laklak in i gam buainate' ziak in mangbat-lungngaihnate'n hon tuam zel mah leh tunitan dong Pathian' hehpihna, zahngaihnate tanglai in damtak in December kha bang i mu thei nawn uhi. Phalbi huihvot nung hiauhiau in, khua a hong votsim mahmah ta a, van a sian zaan in tuh 'zankhua dai zankhua siang' chih laate bang lungsim ah hong lang in tunglam i et chiah Pathian thilsiam aksi phe leplepte leh khavak kilawmtakte'n a siamtu' Pathian thupina a pezel uhi. Tuaphet hilou in gamlak leh innkim khawng ah i pi-le-pute'n MAS hunbi chi a ana chiamtehna uh tangsaam paak leh Khristmas paakte bang muh theih di'n hong om nawnta hi. Hichibang Pathian thilsiam aneu-aliante i muh chiang in thupi leh ngaihtuahna tampi hon pe thei zel hi. Leitung pumpi aletdan leh za-awng lianpite i ngaihtuah chiang in, eilawi luahna gam neuchik ahihdan hon musak a tuaphet hilou, mi a le simthamlouh namte himahle hang; Pathian' itna vang in, Khrist Jesu a tatna i na neita ua, huchi'n Khrist thupina i na ngah samta uhi. Kipahhuai lua maw! Himahleh hiaibang hamphatna hon petu i biak Pathian i tung ah a lungkim na dia aw chih in om a, i gam ah Lemna Kumpi piangsak zou nawnlou i bangta uhi.

Khristmas tuh kumkhat a ding a i nopbawlna thupipen uh ahih dungzui in, a nuamthei bangpen leh thupithei pen in i zang sek uhi. Hun paisa in, i saptuam heutute'n budget hon bawl ua salam leh khalam annkuang umkhawm sek in nuam i sa thei mahmah uhi. Hiai hun tuh tanau-lawmta kimuhkhawmna hun hoihpen in leeng kizang sek a, hun poimoh mahmah ahih ban ah nuam le kisa chiat hi. Himahleh kumdang bangloutak in tutung in i saptuam tam zaw in, salam-ankuang umkhawmlou a khalam-ankuang kia umkhawm i sawm uhi. Hiai in i gam ah Lemna Kumpi Jesu piangsak zou nawnlou i hih dan uh hon musak hi. I Toupa Jesu hong pianna khua Bethlehem tuh Lemna Kumpi hong pianna mun ding a Pathian in a sehkholh leh bangkim a na geel felsa na mun ahi. Hiai khua in tuh Pathian' a pat deihsakna lianpi ana tang a, a hampha mahmah uhi. Himahleh Bethlehem khote'n zaw, a hamphat dan uh bangmah ana thei kei ua, i hondampa Jesu mun ding ana awn kei uhi. Agam ua Lemna Kumpi hong piang ding tuh ngaihsak phak in ana nei kei ua, mun niampen gan annpiakna kuang ah ana sial maimah uhi. Tuni'n enleeng i hamphat dante theilou in, i gam ah Lemna Kumpi hong piang ding tuh theiphalou in mulkimna gam i suak sak zawta uhi. I gam ah muanna-bitna a om nawn kei, gimnei pipi a sihna tuak i tamta, a sihna ziak diktak theihzoh louh in unau bangzah hiamte'n sihna hanmual lam honna zotsan ta uhi. I gam in Lemna Kumpi kipoimoh law mahmah a, bangchi'n Lemna Kumpi i gam ah i piangsak nawn ding ua ....nang leh kei mohpuak ahi. Toupa kiang zuan thak in, i hihkhelhte uh thupha tawi in ngen thak in Lemna Kumpi Jesu i gam ah piangsak thak nawn le hilou hiam? I laisiangthou ah Lemna Kumpi Jesu apian in Bethlehem khote'n ngaihsak in nei kei mah le uh, ana limsak mahmah bang leng ana om a, amaute tuh vantung lam mite ana hi uhi. Bethlehem khonawl ah belamchingte kiang ah vansawltak in Lemna Kumpi Jesu hong pianna thukipah huai a va tun hi. Angel Gabriel leh van mite'n Toupa phat in "... A kipahpih mahmah mihingte lak ah LEMTHU leeng hen" (Lk. 2:14b) chi in Toupa ana bia uhi. Lemna Kumpi Jesu hong pian in, kilemna thupuak poimoh tak ana tun a, Bethlehem khua a naungek Jesu hong pian ziak in Pathian toh mihingte kal ah kilemna hong om thei hi. Mihingte i khelhna ziak a Eden huan a pat Pathian toh i kizopna ana kitankhinsa himahleh Jesu sisan tungtawn in Pathian toh i kizom kik thei nawn uhi.

Khaile unaute! ...tutung Khristmas in Jesu ziak a Pathian toh i kal a kilemna om ahihdan leh tua Lemna Kumpi Jesu hong piang tungtawn mah a eite lak a le, khat leh khat kilem a om ding i hihdan hong sinsak thak leh i chi hi. Hun paisa a i gam buainate ziak a kitheihsiam louhna om neuhneuhte tu Khristmas hun in i kal ah Jesu Lemna Kumpi tungtawn in Lemna hontun leh chih i deih hi. Huaibanah, i mimal hinkhua, i innsung, pawlpi, khotang leh i saptuam sung ah Jesu Lemna Kumpi hong piang henla "Aw Jesu tuni'n kou lungsim bawng inn sung ah hong piangthak nawn inla, ka gam uah Lemna Kumpi Nang hong hi in" chithei chiat in Lemna Kumpi i lak uah hong tung mahmah leh chih i deih hi. Amasapen in i gam damna di'n ei mimal chiat ah Lemna Kumpi tuh piangsak masa photphot lehang lemna-muanna hontun ngei ding. Huchi'n, Jesu Khrist Kumpi a nei a hinkho thak pan in, saptuam sung, pawlpi sung leh khotang hinkhuate ah Jesu Kumpi pen leh thunei pen hong hi ding a, huchi'n i lakah Khrist in Kumpi hihna tangta ding a, thil hong pai dik theita ding hi. Tuabang hi ding in Khristmas i zat ding tungtawn in Pathian in hon vualzawl chiat henla Lemna Kumpi i gam ah piangsak sawm ni hang.