ITNA DIKTAK ZIAK HI ZAW!
(Story based onPathian' Pahtak Innkuan)
By : Hauzel Gou

Hun-le-nite'n kuamahngak neilou inpai liam zel a, i it-le-ngaihte'n sihna hanmual lam hon zotsan chiang un, thawmhau kisa a lungngai vungvung ini om kha zel uhi. Leitung khosakna haksa takmaite ziak a maban sawn ut mah le-le sawn theilou a, gentheitak mai a hinkhua zang tampi i omding. Himahleh ithuak gimnate tengteng zaw Toupa'n ei adia alemgeelna ana hi zaw zel hi.

Innkuan gentheitak mai a hong kipan Thangpu aneulai in a nu-le-pa'n sihsanpah ua, tagah in hong omngal hi. Huchi'n apaneute'n hon kemtou in amau innsung mah ah, a hong khanglian hi.Anu-le-pa'n ata neihsun uh ahihman in it petmah ua, a damlai unhotdamna huangsung ah ana pilutta uhi.Pathian phawkmi ahih dungzui in, kong bangkim ah lohchinna hon ngahtou zel in,innsung khawsa haksatna ziak in laisimna lam ahbangtan mah tunglou in pawl 10 tanhon zou hamham a, huchi'n akhua ua mission skul ah teacher nna hon sem hi. Pathian biakna limsak zou gigemi ahih dungzui in, a saptuam sung uah le kizang mahmah khat ana hi a,nungak tampite'n Thangpu tuh tangval fel leh Pathian phawk ahih dungzui in apasal di un le a sit hetkei uhi.

Hun hongpaizel a, kiginni zaan thumna kikhop hiven; Thangpu le kikhawm in hiaibang in alungsim ahngaihtuahna hongpiang khia hi. Pathian in numei leh pasal kigawm a nupa hidia, tua nupate'n ta-le-nau nei a Khristian innkuan bawldia ana gente a honphawk khesak hi. Huchi'n thumna hon nei in 'Toupakei adia hoih ka koppih di Nang nathei a, Nangmah honphawk mi mah kadeih' hi. Huchibang mah in, keile Nang honphawk mi kahonghih a, Nangmah pahtak Innkuan konbawl khiak theihna ding un'chi'n thumna hon nei hi. Hiaibang a thumna neizel in, Pathian ah muanna nei in nikhat nichiang in Toupa'n kathumnate hon dawng ngei dingahi chihtea um hi.

Kum 2 zoh in, Thangpu' thumnate dawn a om ahi ngei ding a;nungak feltak Chingboi toh tuibang hong kigawmta uhi. Huchi'n Toupa' vualzawlnagil a gah goutan tanu hon nei in innkuan khat hon suangkheta uhi. Innnsung maitaamte bawl in, Pathian biakna ziing-le-nitak in hon neigige uhi. Amau nupa tuh Toupa' vualzawlna ziak a koppih hoih nei khatuak kisa in alungkim mahmah uhi. Pathian kia'h kipahthu agen khial ngeikei ua, khosakna haksatak mai a om himahle uh, innkuan kipak thei mahmah teahi uhi. Tate kep ding dan leh thil bangkim a kikum zel in nupa hinkhua a zang zel uhi. Mihingte lungsim a tuam dungzui in, akhenchiaha kisel khakni uh leeng ana om tham a, himahleh kingaidam tuahlou in zaan a ihmungeikei uhi. Huaibanah, atanu uh Toupa adia laan in; a thumsak gige ua, Pathian deihna bang a kem a hotdamna huangsung a pilut ding chihte amau mohpuakna ahi chihte thei in huai tuh a poimoh ngaihpen uh ahi gige hi.

Innkuan khosakna nopzawk deuh khak leh chi'n Thangpu-te innkuan in le zodawn taisan in Lamka khopihon naihtei sam uhi. Inn neizou nailou ahih chiang un, mi inn luah in hong khawsa panuhi. Huchi'n Thangpu le mi nasem a kilawh tawm in niteng in a peihliai aleh akuan gige a, Chingboi leeng ahun tamzawteah mehzuak in bazar ah tusek hi. Hunte hongpaizel in khosakna nawpzawk deuhna ding bang in Pathian kia'h thumna hon nei tou zel uhi. Zan khat tuh Thangpu ngaihtuahna ah....' ahilhtu ding omkei leh bangchi'n a zathei ding ua?' hiai Toupa' thupawt in alungsim hon khoih mahmah hi. Khovel a tangthupha zanailou hiaizah omlai a, amaute hilhtu ding nang leh kei mohpuakna ahi chihte alungsim ah om den hi. Huchi'n Pathian kiang ah hongthum a 'Toupa nagam nna semdia non muan leh keile honsawl in pilna siamna neilou himahleng Nang k'onmuang a Non ompih gige ding chih leng kathei hi'chi'n hong kilaan hi. Huaizaan tuh Pathian kiang a akipiakna a hong hita mai a, hun lem masapen a Pathian gamna semdia kuan di dinmun ahhong om ta hi. Huchi'n interview leh bangkim ah lohchinna hon ngah in, kum khat sung training masa di'n heutute'n atheisak ngal uhi. Hun sawtlou chik nung a sungkuante toh kikhen hong ngaidi dinmun ah hong omhi. Zi-le-ta nusia a gamlapi a omding chih a ngaihtuah chiang in haksa asa mahmah sam hi. Himahleh,kha mangthangtampi sihna hanmual a niteng a pailiam zungzungte amuh chiang in 'Toupa kei ka kuan ding' chi'n hong ki haanchiam thakthak hi. Gingtute adia i mohpuakna tuh tangthupha za nailoute zaksak a hotdamna huangsung a amaute pilut ding ahi chihte hon ngaihtuah khezel hi. Anupa un thumnate honnei zel ua, Toupa koute'n na hotdamna katangta uhi. Himahleh Nang hon theinailou kha mangthangte na tangthupha zasaktu di kou mohpuakna ahia, tua nna sem di'n kong kipia uhi. Nang na deihna bangbang in hon zang inla, ka leitung khosakna ding uh leeng Nang mah khut ah k'on nga uhi hon chita uhi.

Huchi'n Thangpu le Pathian nasem dia akuan ni ding ahong hita, azi damlou sim a om gige taihsan ding chih a ngaihtuah chiah haksa asa mahmah hi. A khutte uh kileen kawm in Pathian kiang a kikepsakna nei in hong zinkheta hi. Ni nihzohnung in, atraining na mun ding uh damtak inhongtungta hi.A innkuan pihte houpih theihna ding om sun tuh laithon ahimai a, atanchin laithon in hon hilhta hi. Huchi'n trainingbang honpan ngal a, kha khat lel paipan in azi ittak mai damlou a gim mahmah taahi chihte laithon apat hon thei pah hi. Alungsim ah kisikna khat om in,innlam ngaih vungvung na banghon neipahmawk hi. Setan nasepna ahi ngeiding a hiai khemna tuh zoh teitei ding ahi chia thumna nei in hong ki haanchiamthak zel hi. Azi ittak mai damzou nonlou di'a gintak ahi a, khitui-naptui toh thumna ah pang zel hi. Pathian kia'ng a thumna a neihlouh ngal hihtheih anei tuan kei a, Toupa nasep teelzaw ding kahi hiam ai'hkeh ka zi damlou a gimtak a om kemdia paikik ding chihte tuh alungsim ah om den hi. Pathian kia'ng thumna neizel in, Toupa Nang thuthu hizaw hen, Nang mah lemgeelna mah ah honpi zaw in chi'n thumna hon neizel hi. Hun sawtlou nung in, a zi ittak mai Chingboiinsihna hanmual ana zot santa hi.

Chingboi in a sihma deuh in a Uthang laithon hichi'n hon khak hi.

Ka it U Thang,
Pathian in ei adia a lemgeel leahizawta ding; Ana isep Toupa mangilh ngeilou in hongpang zel inla, hotdamna nei nailou sangtampitehotdamna huangsung ah honpi lut teitei in aw. Hiai ka laithon namuh chi'ah zaw, ka taksa pen lei a siam lei ah a kiknawn ding ahi chi'a Toupa thupiak bang in lei kawm ah a kiphum khinta ding hi. Hon it in hon ngaimah le'ng; mihingleh misi munkhat a omkhawm thei non lou uh a hihziak in leh hiai khovel ikhualzinna gam lel ahihman in ken ka khualzinna kana zou masa ding hi. Ana isep i Toupa kiang ah k'onna khawl tawldam santa ding a, tua mun ah Nang leh itanu ittak mai Kimbawi konna ngak ding hi. Noute adi'n tawlnga lou in anna isep Toupa kia'ng k'onna ngetsak gige ding aw. Sihna lou-ngal in honkhen keihen chi'a ithuchiamte zaw atangtung ahimaita ve maw... Uthang. I kitenma a 'Sihtanpha in aw' chi'a ki it-tuah tak a hun nuam tak izat lainite ka ngaihtuah khasek a himahleh keidi'n luankhi nulna lel a suakzawta hi. Atawpna pen di'n itanu deihthoh huaitakmai Kimbawi hoihtak in, Pathian deihna toh hon kem piching inla, a leitung hinkhua ding chauh hilou in atangtawn mun di le nang-le-kei mohpuak ahi chihte mangngilhlou in hotdamna huangsung ah honpi lut teitei in aw. Toupa'n na omna peuh ah hon kem gige in hon makaih gige hen aw.

Damtak in mangpha !

Nang hon it
Chingboi

Hiai bang laithon Thangpu'n amuh in lamdang leh thil hithei himhim di'n a koihkei hi. Akhenchiah amanglam bang sa in kingaihtuah vungvungkawm in khitui-naptui toh hun hon zang ngal hi. Vangsia kisa in atung a thiltungte theihsiam haksa asa mahmah mai hi. Zan ihmut chihte ama adi'n a om nawn kei a,zaan chiah zingkhua vak kal ngaklah in sunchiah zaan hun ding a ngaklahzel a, thawmhau kisa inkhitui in a pumtuam den mai hi. Azi ittak mai hiai khovel a mu ngeinonlou ding chihte hon ngaihtuah chia'ng in haksa asa petmah mai a,a luang bek mukha laileh chihte' bang ut mah leh ahithei nawn kei hi.Pathian kiang ah thumna neikawm zel in Toupa ka hinkhua Nang deihna bangbang hihen chi'n hong kilaan thak zaw ta hi. Huchi'n a heutute deihna bang in a innlam ua, vapai zual theihna hun apia ua, huchi'n innlam ah hongpaita hi. Lampi a hongpai lai in, khitui tampite'n abuakzel a, gari a atuanpih agei a tute'n lamdang sa in a en zel ua lah bangmah panpih theihna aneituan kei uhi. Inn damtak in hongtung a, atanu deihthoh huaitak mai bangmah theinailou pawm in khitui-naptui toh hun ahonzang a, akhenchiah ana kasep Pathian in hiaibang lawmlawm a gentheihna bangziak a hon tuaksak adia aw chi'a thei siam zoulou in mohsa ut phial bang hileh kilawm in setan nasepna'n atung ah kam aka gige hi. Huchi'n Pathian kiang ah kipahthu gen in, Toupa'n ka thuak ding aphal; A tung a vui thei ding vual kahi kei chihte ngaihsun in naakpitak in pan honla thak a hiaite tengteng zaw TOUPA' LEMGEELNA HI ZAW chihte hon ngaihtuah zaw ta hi.

Nitak a hong hi a,Thangpu' in azi ittak gaal a hongpai mipite amuh in kipahna'n adim a, leenkhawmna hun ah hiaibang in thugenna hon nei hi. "Tuni'a ka zi hon itpih a hiaimun a Pathian phatkhawm dia hong paite tengteng k'on muh in kipahna'n ka dim a navek ua tung ah kipahthu k'on gen masa hi. Khenkhatte'n hatsatna itung a, ahongtung chia'ng in vangsia tuanse kahi dia aw chihte ngaihtuah a neizel in, hon siamtu' Pathian vaihawmna theisiamlou in Amah tanpha bang mohsa ut bang in ki om zel hi. Ihinkhua a vangsia kisak ngawihngawih hun om in, hin leeng peih nawnlou a mahni kithat tampi igam uah om ta, a hong om zel lai ding. Hichia mahni kithat te' zaw Pathian in atung ua a vaihawmna theisiamlou ahi zaw uhi. Huaibanah mite sa'ng a hoih zaw kisakna ziak a vualzawlna bang dong ding ikisak lai in huchilou lam daih ah Pathian in itung ah vai hon hawmsak zel a, huaimah lah Toupa'n ei adia ana lemgeel sa ahizel hi. Pathian gamna isepna ah haksatna tawp khawk ituak ding a, huai hun chiang in Pathian vaihawmna theihsiam sawm in Pathian kia'h thumna toh pang in Toupa' Nang deih bangbang hihen chi thei zaw leng a ut huai hi.

Hotdam aiom uh a hamphat huaidan chihte hon gen zom zel a,'Ipu-ipa uapat dawi-le- kau bia a gamsa bang mai a hing a, kigal a, kilu tansak a kithat tuah a om zel namte ina hi uhi. Leitung hinkhua hichia beitou zel ding himah e chi'a ngaihdan nei a, tangtawn mun ding ngaihtuah phak ale nei ngeilou himhim a, kha mangthang ding te ihih lai un, tuipi gaal apat in Toupa'n a mi siangthoute hon sawl in a tangthupha hon za sakta hi. Toupa'n a itna nou ngingei toh Atapa Jesu Khrist eite tan dia hon sawl in, Amah isih sik in asi a eiten amah sihna ziak in hotdamna ingah thei uhi. Huailah ei gingtute'n idamsan uh lah ana hi ngal a, huchi'n tuni'n eite'n tangtawn hinna ina neitheita uhi.

--to be Cont'd.....