JAAN MANG BANG KI HENGNA
By Ginneithang Taithul

Zosalpha hangsan mi kuoten(nine) ih gamlei a lungjinna leh khahlawna lam dang hing tungsah a, a tuullou sisan luongten michin lungsim phawng hi. Zaitha, patbang, nem jouhial a, lungjin huoi leh I gam na ngawn a thu neilou leh neelsia ihina uh hing phoh sah hi. Pupa saatsa Zogam lei a, singkhual mibang in a jaal ua, lungjing lam-et bei Zosuante ihna hing langsah hi. Pupa sisan luongna, pupa satsa Zogamlei a sing khuol kaita chi uh. Phamta Kamkei bang hang, Zogal nasat, Pupa'n banglung a geel diei maw?! Zota lunggel siamten, lunggel tuibang sung khawm in, Zolei taangbang jundi vawi un. I khangsim thu meibang jingta e.

Leitung kangthu (history) I sim leh ki hengna (changes) lamdang tahtah na tung ahi daan muthei in um hi. Social, economy leh political revolution khu munchin gam chin a tung leng a. Mihing hinkhaw sung a nundaan ki ningteel na leh siltha bawl uttna,chep uttna in top nii neilou ahi man in tuoten ki hengna hing tutleng hi. Gam khangtou leh nuam mama ichi American, Russia, Britain, France, China etcte a dinmun uh,a tunna ding un, bangtan thuoh gimna na leh genthei jatam thuoh ding-uh amah chite gen leh suutguol hilou hi. Tuote suut ding hilei sauseng ding ahiman in I sutsawm pen jong hituan lou hi.

I gam social, economy leh politics hui nundaan leh peijieh ett in maban lam-ettna tawm mama hi. Tuojieh hi ding hiven "People Revolution" theikhawl lou leh gintat huoiloupi'n I gam (Lamka) a hingtung phut mawh hi. Tambang siltung pen a lamdang hilou in kum 1000 vaal bangpei nuo in gam khangtouten na thuoh jouta uhi. Tambang revolution khu meddle east Asia gam tunaisawng in tung a,tunjong buoi vengvung nalai uhi. Mihingten, ki muonlelna leh bit kisahlouna ang nei chiang in heelna kipan a, tuo mipi heelna pen mimal khat-le-nii in nang gual hi mawh lou hi. Heelna beitheina um sunchu kihengna leh mipi aw jahpieh a, thu (word) khu, hiamngamna (violence) toh jawding hilou in, thu (word) toh jawding na hileng hi.

I gam (Manipur) taisan in states tuamtuam a, neh-le-tah, sum-le-pai tuoleh hindaan khawsah nuamjaw ding suina in khanglai tamtah kalsuan in khawsa hi. Nuoisiena, simmawna, enggawt leh kilungsim bawl nate thuoh hamham in mite nuoi ana sem ua, Pianna vangkhuo lumnggul leh ngai ngutngut a, hasatah a hinkhuo mang hunkhoppi um hi. Numei khattang, vabang tuallen theina hilou a, khenkhat bang kisual( rape) hi. Inn lumkheel a nuam leh lungmunna umlou hinna jenpi ei-le-ei kibawl in hasat na kiguong mawh hang. I gam kheel a weather, climate nuam leh nehtui na India sung a umlou hi chileng ki genkhial khawl lou maithei ka hihi?!

Bang pap (curse) puo mawh idiei, miten a pupa satsa gamlei a nunuam laitual leng ua, mite junsa gam a khuoijuu luong khu dugaw a kaal isuan mai uh! I gam nasan a, Lungmuon lou leh jalen theilou a ih up valong uh. I gam a jaanmang bang khahlawna hingtung pen, lamkaiten panlah a siam uhleh jalenna leh I gam damna hi ding a, ngaisah lou a, ki chouna leh ki enggot na a, I lah unchu lung jinna leh sinkhamna I maban uh ahi. Leitung a ki hengna umna ding chiang in tambang "people revolution" na umjeel mawng hi. Tuo kihengna lawchinna ding khu mimal khut a kinga a, pan ilah siamlou un chu tuobang revolution angtung kiana ding khang khat bang hingla kia maithei hi. Kihengna lamdang leh thupha hingtung na ding in Siansiang a um a, Siandeina bang a lamkaiten pan anglah ding uh I deisah hi. Politics ka ning kiteel, I gam politics a ka lunglut sih ichi maithei nanleh politics a iki songsoloi in chu maban bing ahimai hi. A thuoh ding midang hilou in eima ki hihi. Tunia politically stable ihi inchu I innlum a jalen taah in I teng ding a, tuolou in khang vangsi kihi tou nalai ding bang hi

Zomi/Kuki political maban ding I ngaisut leh mangbat huoi mama sam hi. Manipur a um Naga kichite khang tangthu I sutleh khuo (village) leh khuo (village) ham (dialogue) ki theilou leh tual gaal a kidoute na hi uhi. Nanleh Politics bawl eimite sang in bang uhi, Manipur a Chief Minister term thum bang ana tute a hi uhi. Meiteite population, politics leh economy a joulou himhim ding ahi daan uh thei uh ahingei ding Greater Nagaland ding in nasatah in panlaa ua, State neisa Naga beel in politics sai uh ahiman in miten a thu uh ngai uhi. Nanleh Manipur a um Zosuanten Mizo pomlou in Kuki/Zomi bang kichi in movement ihpan uhi. Bangteng gen leijong Manipur apat Autonomous/States mutheina ding in population, economy leh politics a strong ngai ahi chichu genguallou in I theichiet uh. Manipur Zosuante a ding in vang Manipur Tribal unity a umtheilou vetding leh Mizo toh pankhawm lou upai umlou hi. Lamkai muonhuoi ten pan hingla in, Janmang bang kihengna lamdih a, hangssan tah in hingpui uhleh utt huoi mama sam hi. Tun ibawl khiel unchu,khangkhat daiding a, I bawl fuh uhleh I khangdai ding ahiman in.Kipah-ing.