JAC-ATSUM apan ka lam etna leh MTFD hanthawnna:
By Cole Sonn

MLA kitawp ngam lou a, Mipi thu le lalou a, a mihinpih mi 9 te sihna tung a kampau khat mah leng nei lou , i mihing te uh, ngaihsak nawn dah phot ni. Amau leng kisiam tan ding un i gingkei a, nuamsa leh kipaak in sawt a laam tuan kei ding uh.Amau poimoh louh hun hong tung na ding ahi.Aminpih ngoihngoih te lau a, hiai I gam hon laksak leh deih goh a hon guuk doudou te lak a bit kisa te chu, bang a amau apan i lamet lai uh?

I Gam le nam toh kisai a i muan pente ichih te, Thautoi te himai phot ahi. Himahleh i buai taktak leh, muantaak bang chetlou maimah uh hile kilawm. Ei theih na leh muhphaak natan in a batlouh ziak leng ahi maithei. Khenkhat te deihkaih dan a, "amau ziak a Meitei ten hon ngamthoh lou ahi uh' chih bang le i gintaak utleh thil awmtak ahi. Hilele tutung ILP leh i movement paidan leh ILP heutute leh Meitei MLA khenkhat media a a kampau uh i zaak leh, Hon ngam thoh leh hon simmoh dan uh chiang mahmah thepthup. Huaiziak a amau kha SoO nuai a om hi unchin, ei deihbang a hon kithuahpih ngam ding hileule, hitheilou phot ta dih ahi chi in, chillum in valh ni. Mohsa sa nawn dah phot ni..
Huchi mah bang in, hiai atung a Khuampi nih i gente pangbel a mipil leh siam taktak, theihna thuukpipi nei, mahni ang masial leh gam le nam paulap a i society tok gige te bang le, gengen nawn dah phot ni. A guarantee abei chia ek kiak a hong ke nadi ahi uh.

Hiai teng khah nuse phot ni i lungsim ah.

Tua i et di ahih aleh, hiai ATSUM-JAC-MTFD trio ahi.
JAC bang leng, a leadership leh kipuakdan lungtung lou kitam mahmah chih adik ahi. Hileleng tu chiangchiang in mipin ki accept thei simsim ta in a lang. Hichi bang a public apan demand a sang lai a , Pawlptuamtuam, UG leh MLA te ban ah a Zomi leh Kuki leh Hmar sung na ngawn a pressure omvek ding chih i haihkei dia,huaikawm kal a Mipi voice kha a hithei bangpen a respect leh paipih toutou un kamu a , deihpen hikei mahle uh, Mipin unconditional support i piak nakle, hon taisan di un gingkei ni. Hon taisan na di ule omlou ahi. Mipi lak a mi khat mah ahihziak un.

ATSUM bangleng, Pu(L) VKL hunlai kha benchmark a i zat ziak( a lutheilou le ahi) a tua leadership te kha commitment pe ngam taktak lou ihi uh chih ithei. Ban ah, ATSUM bang nih hon phak uleh, a influence uh hong dau deuh abang. Himah leh tun ah Platform khat a om khawm in, JAC team te bang hon zui tuak uh chih ithei a, kipah huai. ILP issue leh tua i movement bang leng, amau hon vekkhiak ahih toh, a tawp tan hon pang ua, Govt kheemna a hon puuk louh uh i kinem a , kilametna lian mahmah hi. Adiak a Tribal tengteng kankhawm tu pen ahihziak in

A tawp nading in , hiai movement a khuam poimoh pen leh, mipi lamet leh muan pen a itheih, MTFD ahi. A ziak bel,a laisiam leh theihna tungtuan nei ahi kei ua, a pilpen le a hisam kei di uh, ban ah, amau sung aleng kituah louhna bang le om thei lotel sam ahi. Himah leh advantage nih aneih ua ka theih chu- Lamka a stakeholder tuamtuam, Etsakna a Zomi leh Kuki lam apan undue pressure , MLA te apan zolna bang , ahih keileh, koi kawmkawm hiam apan bang ana hih checheuh di direct a omlou hiphot ahi, huai kha nak poimoh lotel ahi clear and sound decision lak nadia- Huai ban ah, Delhi kha i movement toh kisai a thil hih diteng, mipoimoh leh official teng kimna himawk ahi. I deih te a kimna munpi himawk ahi. Huaiziak a a poimoh na ukha liandiak ahi. A forum member te bang leng, Mipi force hilou a amau le amau ki volunteer leh gam le nam iit ziak a a sepna uleh hihna uh compromise zen a hong ding khia ahi ua, tak leng a tak mahmah un muh theih hi tu tantan ah. Mipin kithuahpih le, kuamah influence theih ding hi phiangsan lou uh ahi. All they need is unstinted public support.

Tuni news ah ATSUM-JAC team te Delhi ah MTFD toh kithuah a future course of action ding kikum kawm ban ah,Centre a heutu tuamtuam toh kimu a thukhat saat ding in hong pai uh chih ithei a, banghiam khat hong om i gingta tinten ahi. Huai ban ah, team te a kiik nawn chiang ua, hiai a MTFD toh thu a kikup te uh Tribal area a pat khiak ding chih ahi a, positive huai mahmah kasa tu tadih in.
Huaiziak in lung ke mawk kei ni. Kipan dekpan ihi. Salpha te lungsim a thei gige kawm in. Nuten thuumna ah ma honkai unla, Gam le Nam makai ichih te bang le ana thei thou mah leng le, hiai ATSUM-JAC-MTFD te mahmah i thuumna ah ana lann khe leng chi ihi.

 School naupang teleng, i maban a i tup lohching chiang a na khuak uh kha kipoi moh mahmha ding ahihziak in , School ah lungsimtak toh lai hon sim nawn un. Papi chingkam te leng, I gam paidan kha a hi dimah ahi chi nawn lou in, na lawm, na Upa hihpih, na inkiim inkiang te kha , kikhekna poimoh dan ana chialpi ta un. Nungak -Tangval te bel, a poimoh dan zir a gamtang dia kiman sa a om gige ding hilel- Heutute thumang in.
Lungkiak na ding om zenzen lou ahi. Pangkhawm in kitaisan kei peuh mah leng. Lauhna toh gal idou leh zou ngeilou ding. Khut kilen helhel kawm a i nawk touh gige hong ngai ding ahi. Baihlam kenteh hilele a hithei thil ahi i phuut uh......