SUAI KAIH KHIT AHI TA
Pastor Rawna Kopsiam
Melmak singgam lei hi kei, tuunnu gamlei hen koltang luainam bang I sut zou diam. Selungtuak in ma bang pangkhawm ni. Tuan a pupa'n khau bang ahualsa gamlei hi. Ma hongpi zua nih thumte Kuki Inpi, Hmar innpui, Zomi Council zahna toh nungzuih zel ni. Simthu I hawmkhial zong zin hawmkhelh chi ni. Gamlei it vang in dougal kisuah kei ni. Den chiang I thil nget uh I lohchin chiang in dougal taktak hong lang na ve..Tua ding in kigaal thuam dan ding lunggel zaw ni. Sian in lumbang hong sung dinga lungtup mualsuah din takheh chin mabang pang chiatni.
Israelte a saltan na gam uah thah chimit ding in vaihawm khum in om uhi. Hiai thusawm pen Laigelh ah suai kaih ahita / Bill pass ahita chih a theih phet un bang thu hong om ale. Mordekai in a theihtak in a puansilhte a botkeka, sai ip puan silh in leivui a kibuaka, ngaihtak leh khasetak in a kap tuaituai hi. Juda mipite lak ah dahna a tung a, ann ngawl in, kaptuaituai in sai ip puan silh in leivui a kibuak uhi. Ei buaina toh kisai in en mah dih. Suaikhaih ahi ta, Bill pass ahita chih I zak phet un bang I hih tei ua le ?
Mordekai in kumpipa kiang ah ahaksatna thu uh va tun ding leh panpihna ngen ding in kumpinu Esther sawl hi. Amasa in kumpinu Esther in kumpipa kiang a vahoh mawk thil lauhuai ahihdan a na gen pih hi. Mordekai in bang chin a dawng kik ale. Kumpipa innsunga om na hihman lel a nang kia suakta ding in ki lamen ken. Hiai hun a na daih dide leh dengchiang in nang leh na pa innkawte leng na mangthang ding uh. Hiai bang hun a dia kumpinu hong hi na hihmel kuan a thei a. Hiai thugen in kumpinu Esther lungtang zou mahmah ahi ding, Dan bang zaw ahi kei na a, chihbel ka din mun leh hihna man suah theih phet lou a ka hinna na tawm man suah theih din mun ahi na a, ka man leh mang ka himai ding chi in kumpipa muh dan ding leh a gen khiat dan ding planning hoih tak in bawl hi.
Ni thum sung teng sun leh zan ann nelou ding in a mah leh Juda mipiten programme bawl uhi. Kumpipa kiang a naih ma un Pathian naih masa uhi. Eiloi in kua I naih masa ale ? A ni thum ni in kumpinu Esther in a kumpipuan silh in kumpipa va mu hi. Kumpipan a na that hia leh. That dek lou chi ua. A din mun leh hihna a mansuah hia leh . Mansuah dek lou chi ua. A mite a it luatna lam ah a din mun leh hihna mansuah ding a kisak le huchi lou hi veh aw. Pathian in a thumna uh leh a kahna uh za in humbit a, a din mun leh hihna mah len tou den hi. Toupa min phat in om hen. A tomlam in gen mai leng bang thu hong om ale. Kumpipan, kumpinu kiangah : Kumpinu Esther bang deihna hia ? Bang ngen nuam na hia ? Ka kumpi gam kimkhat na ngawn zong kon pia nuam a na chi hi. A nihvei na ding in Kumpinu Esther bang ahia na thumna ? Piak na hi ding. Bang ahia na nget ka kumpi gam kimkhat na ngawn phal ahi chi mai mah hi. A thil nget dek uh a nak louh chin dekpah uh e maw nget mama in le. Eilawi in hiai bang dawnna I mu di uam. I lohchin theihsam na ding un theih tawp in Pathian buan thak lai ni.
A thumveina ding in kumpipan Esther bang ahia na thumna? Piak na hi ding. Bang ahia na nget, ka kumpigam kimkhat nangawn phal ahi chi nawn hi. Esther in bang chin a dawng ale: Na mitmuh a deihsakna hon ngahsak na hiha, Kumpipa aw na deihlam ahihleh ka hinna hon hawi sak inla tuaban ah ka mite zong hinghawi in. Ahang bel kei leh ka mite hihman that a om ding in zuak ka hita uh. Sikhapa ding sikhanu ding lela zuak hile ung zaw bangmah gen lou a dai maimai ding hi ve ing, tu in lah mangthang ding ka hi ngal ua. Ka mite tunga siatna tung ding bangchin ken ka thuak zou mahmah dia. Ka innkawte hihman thatna bangchin ken ka en ngam mahmah dia. Esther hi a thil nget ah selfish hetlou in kei leh ka mite mah va chi miatmiat mai hi. Amah a di chauh va ngen lel leh leng hi theih lua di zaw hi a. Amite itna tel e maw, a din mun leh hihnate mansuah khak ding leng poisa hetlou mawk. A din mun leh hihnate leng khat lel leng mansuah dek lou zaw mah lai. Pathian min phat in om hen. Eilawiten I thil nget ding uh kha bang eita ? Mimal hamphatna ding maw ahih kei leh gam leh nam hamphat nang. Bang I va chi nget ale. Kei leh ka minamte leh ka gam uh mangthang ding ka hi uh, Manipur polam a hon hawlpawt sawm uh ahi I va chi tei miatmiat hia ?
Haman a mah thang bawl mah ah a awk khak bang a phaizang mite leng duhse lua akta kiloh khuh I chih bang deuh ua, Duham lua gamlianpi neih a sawm na lam ua neu chik chauh tang ding uhi. Thumna dawn a omta, Kumpipan tu in hoihna sak bangbang un Judate a ding in lai gelh unla, kumpipa suai nam na in nam un, hiai suai namna a kinam peuhmah kuamah phel theihlouh ahi. Kipchi na e. A thu gengente mah uh va gelh uh himah in teh maw Judate deihsak in a hong om ua. Eilawiten leng I gengente mah hilou hia maw I sepsuah sek uh kha. Mordekai bel kumpipa zawm a alian, a Juda pihten a zahtak uh leh tunget uh ahi, bang hang hiam chih leh aman a mite hoihna dinga nna sem a, Judate khempeuh angvan a thugen hi ven. Hiai bang leader I nei kha uh hia ? Ei singtang mite leader din leng deih huai na e maw.
Tua ka sepna a ka lut tung un ka training lai un ka heutute uh khat khel mahmah om hi. Ka hihkelh uh om hiam gawt theih nang point om hiam chih zawng in hong deuh gige hi. Kou leng ning lua ka hih chiang ua, ka ngaih tuah na masa uah chu, Heutu Lian zaw te kiang ah report bawl mai leng, tai ek le uh chih khawng kihisap kha sek hi. Amah tai ek le uh bel kou kipak mahmah ding in ahihang a mah heh mahmah ding hi. Thil a leh zawng a hong pai leh lah kou heh mahmah ding in amah kipak mahmah zel ding. Hiai bang hun ah alang nih tuak kipahsak theih chu haksa taka hi mihingte vaihawmna ah. Report sese lou in thumna I nei mai ding uh, Pathian in thil bang kim hihthei ahi chi in thumna ka nei thak uhi. A nung sawt lou in bang thu hong om a le. Ka kiang uah hong hoh in Pastor saheebte hoihtak in training hon bawl un, kei kha nih chhuti pai dek ka hi chi in hong kipak mahmah hi. Kou leng mikhelpa chhuti pai dek chi in ka kipak mahmah mai uhi. Ka kipak tuak uhi. Kha nih a chhuti sung in kou leng ka traing uh ka na zou man vek ua, Rank kibang ka hih tak man un ka tung uah siam mahmahta hi. Tutung I thil nget uh leng loh ching leng phaizang mite heh mahmah ding. Ei bel kipak mahmah ding. Lohching kei leng lah ei loi heh mahmah ding, Amau bel kipak mahmah zel ding. Bang chi leh I lungkim tuak thei di uam maw. Mihingte vaihawmna a chu haksatak ahi ding. Pathian a din bel thil hitheilou a om kei hi. Lemna kumpipa I Pathian kiang mah bel tinten leng bit huai pen hi.
Daniel in leng laigelh ahita, bill pass ahita chih a theih in bang a hih masa pen a le. A inn a pai in, Inndan tungnung ah kaltou a, Jerusalem lam nga tawhlette hong in, khukdin in nikhat in thumvei thum in Pathian kiang ah kipah thu a gen hi. Hiai bang kal lakah bang kipah thugen ding thei kha a mai diam maw. Eilawi in bill pass ahita chih I theih phet un bang I hih tei uale. Innsung a lut lou a tai pawt zaw mah hi ve hang aw maw. Daniel toh kisai bang thu hong om ale. Sakei baknei kulhsung ah paih lut in om hi. Thumna neih phatuam lou hia leh. Nak phattuam lua, sakeibakneiten bang mah a na loh thei lou uhi. Sakeibaknei kulhsung a tun ma a bang dia Pathian in Daniel panpih mai lou a di. Pathian thilhih theihna thupi tak a taklat ahih theih na ding ahi zaw. Lazar damlou leng damsak pah mawk leh chu damlou dam nawn chu ngeina dan mah ahi vele chih a om ding hi. Sih nunga hinsak kik pen Pathian thupina kilatna ahi zaw. Pathian thupina mu tei ding in lungkham mangbat thuak leng a poimoh hun tam mahmah sek hi. Daniel sakeibaknei kulh sung a paih lut tute mah in va hondam nawn uhi. Eilawite leng a kai khetute kha a kai luttu mah akipang thei zel thou hive aw maw. Hong pawt in chitute mah in lutsak thei zel hi ve hang aw maw. Joseph leng kokhuk a khetute a unaute mah eivoi a va kai khe nawn tute. Mipi hileh heutute hileh kuapeuh I kivel thak chiat ding uh deihna a gelh ahi. Toupa'n hon om pih chiat hen.
-----
This email address is being protected from spambots. You need JavaScript enabled to view it.