Niangbawi Aw, Niangbawi..!!
(Thudik Pansan A Kigelh )
Written By: K Lianthansang

Niangbawi in hon message a, " U Lian, ka Nu 'Dharna' tudek nawn a, n'ong hoh man diam? Ka naunu kia toh inn a omdek ka hi uh.." hon chi hi. Ke'n leng, " Na Pa koi a om eita Niang?" ka chih leh, " Ka Pa omna di chu na theihsa eivoi U Lian..." chi'n hon dawng kik pah hi. Amau unau vuak(kia), innsung a thawmhau taka om di ahihdan uh ka ngaihtuah chiangin hithei ka sa mahmah kei a; ka va hoh pah hi.

Amah ahihleh College a kai nawn kei. Anaunu Siami pen in Class – X sim lel hi. Ka va hoh nitak in leng, a naunu'n lai ana sim a, Niangbawi in puan ana nitak sawp hi. School naupang khenkhat in, " Lai simsim ngailou pi, School kaitheih nawn hun di natawm theihphak lah hilou a " a chih eu-au lai un; Siami in bel a lehkhabu mah tutpih ngitnget mai hi. Niangbawi' kiang a," Puansawp hahbawl nachia, nitak nungnung in na sawp tel a " ka chih leh, " Suun chianga lampi lai a va tut ngai zel inchin, suun a kisawpman ngeilou pi U Lian " chi'n hon dawng tiautiau hi. Huai ka chih hangin, atheilou ka hi zenzen kei; abuaidan bangkim ka theih lumletsa vek ahi.

Niangbawi ahihleh, kamsiam lua ahi het kei. Paukhe bukbuk sek a, achang in aheh bang kisa kha dekdek hi. 2010 kum pek apan ka lungsim mitkha a luaiden ahi a, nungak melhoihtak leng ahi hi. Himahleh, huai hunlai in Class – X simpan ahihman in, itna simthu akiang ah bangmah ka gen ngam taktak kei. Khatvei bel, hoihsa ka hihdan leh zi ding tanpha a leng deihhuaisa ka hihdan ka genkha zual hi. Ama'n leng " Mi 'Vote' guksak thei a ka om chiangin aw " hon chi a, ka ngaihtuah thakthak leh, ' ka piching hun chiang honna ngak in ' a chihnopna ahihdan ka khawnung theihkhiat hi.

Hunte hong paizel in, muntuam-gamtuam ah ka kikhen ua, kithuzakna lam leng deih abang kei. Kum khat sung ka kihou khaklouh hun uh leng a om a, ka lungsim un bel ka kiphawk zelzel sam uhi. Dawr nei ka hihman un ke'n huai ka ngak zel a, van hong lei omzou gige sim ahihman in, phone natawm ka khoih manlouh ni atam mahmah. Nitak khawng chiangin ahihleh, phone mah lawmbawl in, ka khoih zel hi. Facebook a chih telawi uh leng khoih zel in - ka lim diktak leng ka taklang dihdiah mai a, ka min diktak leng ka zumpih tuan kei. Thudik gentamlou in thudik simtam lehang, lim diktak koih ngamlouhna ding bangmah omlou ahihdan leng ka theichian mahmah hi.

Nitak khat, thuthk theinuam a 'facebook' ka hon (open) leh 'friend request' 11 bang ana om seuhsouh hi. Mi'n hon ngaina a, lawmta hihnuam ziaka ngetna (request) hon pelut nanana tuh ka thawn koih nuam kei. Huaiziakin, ka ban 'confirm' zungzung mai hi. Sawtlou nungin mi khat in hon message a, " damzel maw U Lian?" hon chi hi. Ke'n leng lamdang sasim kawm a, alim ka check leh, 2010 kum a itna simthu ka na leelpih khak ngei - Niangbawi ana himai mah a, " dam e, nangla damzel maw? Na vang ngei.." khawng ka chi zuauzuau hi.

Kal 2 mawngmawng ka ki-message nung un, " U Lian, nidang a ka kichiamna mangngilh nailou kei ve.." hon chi hi. Ke'n leng agennop pen mankhe pah ngal mah leng, " nang, tangval neita maw?" ka cih leh hong hehdek mawk a, " nei mawk lou e, ka pichin chiang tanpha a hon ngak didan a hon koihden inga, muangtaka om ka hi" hon chi hi. Kei leng kipakgu sim in, " achih leh, tua bang chih sawm e?" ka cih leh, " I kingai ta mai diam leh U Lian " hon ci a, ke'n leng midang ngailou (ngaih neilou) mah ka hihman in ka 'yes' suk pah ziau hi.

Niangbawi' te'n bel, neih-le-lam ah kuamah a eng kei uh. Amau' khom in nuam a sa mahmah mai uhi. Himahleh, a innsung uh a chidam tuan kei. Apa sepaih pension mahleh, zudawn a pension louh ziakin a innsung uah buaina neuhneuh tamthei mahmah hi. Amah lah kingaise baih mahmah mi ahih man in, achang in hon sulungkham thei mahmah mai a, ka ihmut theihlouh hun leng atam mahmah. Ke'n leng hihtheih tawp suah in, Bible a - 1 Korinth-te bung 13 pumpi khawng asim dingin ka khak zelzel hi.

Puansawp azoh phetin ka kiang ah hong tu a, bangmah genlou hial in dai dide nilouh hi. Awl a kiheiphei kawm in, " Bang chi e Niang..?" ka chih leh, " U Lian, no'n Bible chang khak-te thupi thei lua. Huchi tuka thupi, nang apan itna ka tan ziakin hampha ka kisa a, gen masak ding pen leng ka thei kei. Ke'n ka honna theisiam ngei kei a, n'on itna ngaihsaklou in k'on na hehsan khak gige man in, hon ngaidam in aw? Ka hinkhua na thei vek a, ka sianthouna leng ana mansuahta ka hihdan nangawn na thei vek.

Himahleh, n'on taisan ngeikei a, n'on iit lailai ziakin ka hampha lua U Lian " chi'n, khase takin hon gen hi. Ke'n leng kawiphei top in, a mittui ka nuulsak kawmin, " Niang, ke'n k'on itna sang a thupi leh lianzaw tham a Pathian in hon iit ahi. Lungkham-mangbang a om a, iit-tu ding bei na kisaklai in leng Pathian in hon iit gige a, ahon taisan ngei kei. Ke'n leng, huai itna lamdang ka theihsiam apan hon iit taktak theipan ka hi. Simlei ah kei adi'n zaw, nanglou ngal a om kei. Nang adia gin-om den ding ka hi. Nang kia na hi aw Niang, ka kinepna" ka chi a, amittui vung kilkel mahleh, kipahmel takin hon en a, kipahthu hon gen hi. Nitak lupdek chianga 'innkuan kikhopna' neizel ka hihman un, sawt ka omkei a – ka paisan pah hi.

Innlam zuan a ka pai leh, lampi kiang khawng ah ui atam mahmah mai ua, honna nam futfut pawl leng abei kei. Ui khahzan phallouh ahihdan 'thupuan' a omlam ka thei a, khahzan phal ahihdan 'thupuan' a omlam bel ka zakha ngei kei. Hiai ui telawi in hon kei mawk leh 'sihna' tuahtheih ahihman in, chimul thou sungsung hial in ka pai hi. Sih-le-hin ding natawm theihlouh himahleh innlam ka zuan teitei a, atawp in bel innlum damtakin ka tungthei hamham hi. Ui khawng bang leng, 'Duty' ding a hong kipat hial chiang un zaw, igam uh buailaw mahmah ahihdan achiang huntawk ta hi.

Ihmut sawmin, sambang zaalna laikhun beel mahleng, maimit siing a ihmut theih ngal ahi mawk kei. Niangbawi ka mitkha ah hong kilang a, hunlui khawng ngaihtuah khe dundun in lupna tung ah kei kia ka kihei tuahtuah hi. Kum 5 khawng a kikhai ka hihman un, ka naupang bawl a, ka thuhilh kha sek. Huai hun chiangin, " ka innkuan sungthu uh na theih sa ahi a, sommoh taak mah hi ung!. Unau pasal leng ka om kei ua, na utut hon genkhumlechin leng poi kei.." hon chi motmot sek hi. Ke'n bel simmohbawlna dan a ka thuhilh ahi zenzen kei a; ka itluat ziaka ka thuhilh a hi zaw hi. Himahleh, ama'n alehlam daih in ana kawikawi sek a, achang a kinak khak dekdek hun atam mahmah.

Ka gensa mahbang in, suun hunteng dawr a buaiden ka hihman in, ka gimthei mahmah hi. Achang a I message manlouh chiang bang in, hon hehsan pahpah sek a – lungkiat vungvung hun atamthei mahmah. Internet pack khawng hon ngen zel a, ka thunsak sek hi. Hun-awl neih sunsun a I message chiangin, hon dawngtan lauhlauh zel a, hon ngai taktak lou sak hun leng a bei kei. Hun pezoulou ka hihman in, ka kisuanglah thei mahmah a lah; hihtheih dang ka nei tuan kei zel hi. Lunggimna tampi ana thuak ahihman in, thil igen bang leng theihsiamna sangin ahilou lam daih a lak a thangsak mahmah hi.

Lungkiat hun tam mahleh, lam-etna toh ka kaal uh ka bawllem tou zelzel hi. Kei hun-awl neihlouh tuk a aman hun-awl ana haulua ahihman a, kituak ngeilou ka hihdan uh ka theih ziak in, a Laisiangthou simna di mun khawng ka kawkmuh zel hi. Neih-le-lam ah mi engkei mahle uh, innkuan kituak diamdiam a omte bel eng mahmah ding un ka gingta hi. Nitaklam khat, ka va hoh in leng apa'n zu ana kham a, anu ana vaw zialzial hi. Niangbawi leh Siami bel a nu' kiang ah ding dindeen mai ua, kidiik hithit uhi. Apa leng hang loiloi kawm a inn apan apawtkhiat nungin, a nuta un hehnep theih dandan in ka hehnem hi. Anu'n hon ngaina mahmah mai a, hou leng ka kihouthei mahmah uhi. Atanu' a di'a hon sitlouh phet hilou in, muang leng hon muang mahmah ahihdan tanpha hon gen zel hi.

Panpihngaite panpih thei dinga, Pathian in hunhoih hon bawlsak eive, chi'n ka hihtheih tawp ka suah zel hi. Mihing hihna ziakin iit deuhdeuh ihon sawm chiangin, buaina in hon tuamhoih deuhdeuh abat hun atam mahmah zel. Niangbawi ahihleh, alungsim munkhat kia ah apai giugeu mai a, thuhilh a haksa mahmah. Thuum kawm in, maban ka suan zel ua, bang chidan hiamhiam in hong vengthei zel hi. Anaunu' bangin gilpeng natna ( appendicitis) hon nei a, Damdawi Inn a aki-etkol sungteng uh ka hihtheih tawp suah in pan ka lak pih hi. Nitak chiangin ka va veh gige phial a, Damdawi poimawh tuamtuam bang leng aleituah a pang in ka va pe zel hi. Huchih hun in leng, apa un zu mah a buaipih den a; atanu a buaipih man ngeikei.

Amau lah achang in kingaise gawp ua, kithah khawng bang leng ana sawm sek uhi. Unau numei tuak ahih man un, anu'n khat veivei " tapa ka neihlouh zaw, ka vangse tel mai " chi ngutngut hial hi. Niangbawi in leng, alungbuai chiangin hon hilh pahpah sek a, hehnep theih dandan in ka hehnem zel hi. Zingkal khat, ka khanloh phet a phone ka-et leh, " U Lian, piangthak diktak-te amau leh amau kithah le uh...VANGAM akai di uam?" chi'n, Niangbawi in message ah honna dong hi. Ka muh phet in, ka chi khawng a liing zozen hi. Kindeuh in message ka gelh ngal a, " Niangbawi Aw, Niangbawi..!!. Piangthak diktak-te amau leh amau kithat ngeingei lou ding uh ahi. Huaiziakin, nang leng Piangthak diktak na hihleh, nang-le-nang a kithah (suicide) ding ana sawm nawn mahmah ke'n aw..? " chi'n ka dawng hi. Theisiam mahmah hidi'n ka gingta – huainung teng huchidan lam agenkha nawn kei.

Hun mualliamsa-te khawng ngaihtuah a ka omsung in, zaan dak 12:00 khawng bang ana gingtou velvol man hi. Niangbawi in mittui kai zoihzoih kawm a, ka itdan theisiamta ahihdan hon genlai khawng ka mitkha ah hong lang dundun a, kipahna in ka pumdim ta hi. Kei' itdan leh Pathian' itdan khawng bang leng ka theihsiamsak sa vek ahihman in, Niangbawi ka lungngaih law nawn kei. Piangthak diktak hingal a, mahni kithat kichi thil hithei ahihlouhdan tanpha theihsiam ahihtak manin, ka lung anuam mahmah mai a, ka ihmu ta hi.
0510 – Kakipak – 2015