Short term leh long term demand kikal i theihsiam uh poimoh
By Ginza Vualzong
Singtangmite kipumkhatna thupi i sa a, i kithutuahna uh chiamteh tham ching i sa ahi. Gim leh tawl khawk salou a pang Lamka numei pawlte panlakna gentham ching ka sa. I demand te uh khendan i siam kei uleh, tua kiphinna i bawl uh sawt hon daih (sustain) zoulou ding hi. A ziak nektawm zong tampi i om ua, den chiang in nekdi neilou taktak a i hong om chiang un, demand ngaihthupina hong om khollou ding ahi.
Khenkhat in UT leh State khong zing le thai a mupah di bang sapawl om ua, tua ziak in i demand te uh i theihsiam ua, short term demand leh long term demand kikal i theihsiam uh poimoh hi. Tunai zeka i muhpahtheih ding short term demand a nuai a te bang hi thei leh chih huai ka sa hi:
1. Bill 3 te paisuak saklouh ding.
2. Tualthattu Manipur Sepaihte matkhiak ding.
3. Thautang khah dia thupia commanding officer matkhiak ding.
4. Singtangmi MLAte ki tawp sak ding.
Separate Administration i chih chiang in UT/State chihna dan in ka ngaihtuah a, tu hehu a muhpah chi hilou in ka mu a, tua ziak in hiai pen long term demand ahi. UT/State i muh theihna ding in phualpi a mi poimoh ministerte convinced ahih uh ngai masa ding hi. Tua banah Manipur government in state boundary keklouhna ding in pan nasatak a hon lalai ding ahi a, meiteite toh nasatak a kinawk ngai lai ding ahi.
I short term demand te uh muhpah theihna dingin focus bawl in, huchi kawm in i long term demand uh tatlou in phu tou leng chi i hi. Short term demand te bang subuching thei in om leng bel, tawlkhat i kiphinna uh break laktheih ding in ka ngaihtuah hi.
Separate administration demand i mualsuahna ding in ei sung ah kituahna poimoh masapen hi. Zan lam a KNO heutupa thusuah khong leh Sadar Hills a rally placard teń mi lungsim a deng kha mahmah hi. Kuki deihlou tam a, Zomi deihlou leng tam hi - ahi a kikhenthei kihi lou zel hi. I pangkhawm kei uleh i movement un omzia neilou ding a, salpha 9 te sisan a thawn suak ding hi. UT/State demand na ding in government a kipan historical data poimoh ding ahih man in, khovel leh government in hon theihna Kuki pen vanzat (tool) a zang siam in, Zogam muhna ding in pan la thei leng bel hoih ka sa. Hiai ding in nam heutu te thakhat leh lungkhat a luankhawm uh poimoh mahmah ding a, tua ziakin joint meeting te a tamthei lam hon nei uh hen la, thupukna kichiantak hon nei le uh deih huai kasa. Hiai nam makaiten a thupukna uh pen a kuakua in zahtak a, pom chiat hileh deih huai hi, Huchi keileh mipite ki hamgaih gawp lam le ahi ta a, i kal ua kimuanmohna leh kitheihsiamlouhna huih te hong tam hiaihiai kha ding hi.