AUGUST 31, LUNGZIINNA MAW KIPUMKHATNA?
By: Hauzel Gou

Khovel ning chih a om Manipur singtangmite bil doh  August 31, 2015 zingsang ni suak kilawmtak in hon suahpih mah leh atumlam in zaw lungziin-mangbatna'n ka it kagam tuh atuam zaw ta hi. Khenkhatte di'n kipahna ni himahleh kei leh kagam a di'n zaw lungziin-mangbatna'n a dim zaw ta. Ki itthiikna khovel, huaihamna khovel, atamzawte'n atawmzawte suk chimit ut na lungsim gilou in mihingte lungtang ah chii a tuh zaw ta hi. Kakisaktheih pih mahmah pupa satsa gam, hichia mitte khut nuai a lut mai ding chih ka geel chia'ng in thuaksiam haksa kasa mahmah mai a, himahleh  hihtheih bangmah ka nei tuan kei hi. Ka hihtheih omsun zaw Amuanhuai gige kumpite Kumpi, toupate Toupa kiang a thumna a himai. Tuni'n igam-inam lungziinna itheichiat ua, i awlmoh chiat uhi. Himahleh, i awlmoh dante uh mailam nawtna ding awlmohna sang in, ki nengniam ut zawkna ngen in thu iki kum kheukhou uhi. Huaiziakin, hiai Bill 3 ki passed te gen sawm ka hi kei a, pankhawm apoimoh dan te gen in thukhitna i nei ding.

August 31, 2015 zingsang baihtak in kathou a, office ahun ngei in katung hi. WhatsApp group a message honglutte kaban sim zel a, ka om alem thei mahmah kei, dip-hawm simpi'n a ka om ni louh hi. Huchi'n a kal laklak a online zel in, message te ka ban sim zel a, mun tuamtuam a lawmte  UK, Delhi, Mumbai leh innlam (Lamka) apat ngaihdan kikum in message tuh khat-khit-khat in honglut zel a, a thugente un diip ahawm sak tuan mahmah hi. Hiai August 31 ni tuh kuapeuh in bildoh a kinei chiat ahi ding, ken le thuthak theih ut na lungsim in hon zou zaw ahi ngei ding a, ka online den sim hi. Huchia bildoh tak a ka om lai in, thakhat in lawmpa Jammang Guite message honglut kauh a ka et leh 'Bill ki passed ta' salah!! chih ahi maimah a kagingta thei nai kei hi. Lalboi Samte message honglut nawn a amanle kei mah bang a gingta nailou ahi ding, "Umang tatak hia"? hon chi nawn hi. Message honglut nawn ding kana ngak khinkhian lai in, Lianno Tombing heh law mahmah leh pawna lua zaw ahi ngei ding, 'minute 45 sung lel a a hiai bill ki pass'...chi'n hong hang zialzial (agente zaw gelh dah ni) hi. Ka ngaihtuahna ah i Minister/MLA te uh, hiaihun tawm chik sung a ui muk hen vabang maimah uh ahi chih muh theih in om hi. Hiai Bill 3 ki passed te'n tuh minute tamlou chik sung in, khovel pumpi a deng suak pah ngal a, hihtheih dang a om kei, mipi'n muang mahmah kawm a palai dia isawlte' uh tuh ut-le-utlou chilou a gensiatna athuak uh a ngai ta hi. Mipite atung ua lungkimlou leh thangpai law mahmah zaw ahi ding ua, kamsia zang a enghouna'n a dim ua tulai pau leh 'a paaple' a paw zou kei ding uh. Imuan mahmah te un, hon nelhsiah-le-zuausan a i om maimah ni un zaw mipi'n chillum valh haksa akisa mahmah hi! Chik chiah igam suahtakna ahon ngahpih ding ua aw chia lametna lianpi toh ina ngaklai un, lungziinna hon tuntu a suak zawta uhi. Kuamah dang mohsak ding ithei tuan kei a, miteng in amaute i mawhsa vek uhi. Mipi thangpaite om maimai thei nawnlou in, a inn nasan uh azan-zan in i haltum sak ngal uhi. Himahleh amaute tuh adai dide ua, tunitan in kuk-e-kak e chile a om het kei uhi. Hiai in tuh amau le hih theih dang bangmah a nei nawn kei uh chih a chiang hun tawk a, atup mawng uh hia chih bang ngaihtuahna hon pe thei hi. Hiai August 31 zaan tuh gam-le-nam ka it chi taktakte di'n (keile tel in) ihmut ahaksa mahmah ding in ka gingta.

SALPHATE zahna lianpi pekawm in, amaute' sisan athawn a iluan sak louh ding uh eite mohpuakna ahita hi. Tangvalte'n chin-le-ha suang a i gam liangvai humbit di'n kal suan in akipan khia ua, tuni tan in SALPHA 9 te'n igam a di'n a hinna tanpha uh ana pe ta uhi. Bangziak hiam ichih leh vaihawmtu' ding heutu mumal om louh ziak ahipen mai a, thauvui-thautang sialpi vuahthuak a, athuak mai uh a ngai hi. Hiai bang hun haksa tak a i om lai in, heutu' hoih gin om leh hangsan i poimoh ngei uh maw ! Mipite'n heutute' ah muanngamna om nawn lou, mipi sousangte khem daih haksa law mahmah ta in aphuk khakna teng uh baan phut in, i buai vengvung uhi. Imaban ding uh a lungdon huai mahmah mai a, gam-le-nam itna sang in sum-le-paai deihtakna te'n ilungsim uah mun aluah tamzaw ta hi. Mosi bang a pitu hoih-le-muanhuai inam in aki tasam law mahmah mai hi chih tutung ibuaina ua pat a chiang kilkel hi.

Mipite'n le mohpuakna lianpi inei ua, heutu leh mipi kal a kithuzak tuahna gina bangmah om ngei kei chih i mu hi. Huaiziakin, i makaite mawk zahtak mai lou a, a zattheih na teng a zang a, apoimoh hun a nungthuap siam dan ikizil uh le poimoh lua hi. A diklouhna uh om leh lauh bawl kawm a, agal a gense mailou in, amaute kiang vatun a thumna toh delh zui kiphamoh kha ding hi. Huaiziakin, suahtakna taktak i deih a leh mimal mal in i mohpuakna chiat thei in Pathian dongkawm in sem suah chiat sawm in kalsuan peuh mah lehang, itup uh mualsuah ngei ding hihang. Apoimoh masa penpen zaw bangdang hilou in pankhawmna (unity) ahi a, thauvui-thautang in suahtakna honpe kei ding. Pankhawm theih nang ahih phot leh piak-le-lak apoimoh dungzui a zat mai ding ahi.

Tutung ibuaina ah nute' panlakna thupi kasa mahmah mai, thilhoih mahmah ahi a adiak in sai-ip puansilh kawm a thumkhawmna neite kamuh chiang in nikhat tei Toupa'n igam uh hon damsak ngeiding ahi kachi ngam hi. Khovel a i om sung in, ei Christiante galvan thupipen tuh thumna ahi a, i Laisiangthou a Israelte le sai-ip puan silh kawm a kiniam khiak tak in Toupa a na buan zel ua huchi'n Toupa'n a gam uh a damsak zel hi. Nute panlakna tuh pasalte panlakna sangsang in, thupi zaw leh lungtun huaizaw a, nute'n zong igam hon itpih dan uh tutung in muhtheih in om hi. Nute thumna leh panlaknate ziak in i suakta ngeingei ding.

Nute'n igam-le-nam itna ziak a, a kahna aw te uh izak chiang in, lung hon khoih mahmah hi. 'Salpha hon mualliam san itate uh tuni'n hiai khovel ah hing ut lawlai sam hi ua, amau te vang a igam in damna hon tut lamen in, atung uah zahna lianpi pekawm in atung uah kipahthu i gen hi. Aw.....amaute'n honsam ua kanung uh hon thuap un aw chi uh hilou maw........!! Amaute nung bang chibang a thuap ding ihi ua? Igam singtanggam ei a ahi chia muangtak a i om lai in, thakhat in khahsuah ding dinmun ah i om ta uh ahi. Pathian sam in ngenthak mahmah ni hang! Toupa' kagam uah Nang vai hon hawnsak in chi'n thumna nei in panla thak leeng ut huai mahmah hi'.

Tuni'n unaute aw, kingaihtuah vengveng kawm in pan la thak chiat ni hang. Nang huaite....kou hiaite chih hun hinawn lou ahi .Ipau neuchik kibang lou omte ziak lel in kigawm ding haksa sak hun hinawn lou ahi. I pau neuchik tuam om te ziak lel in..... laizom, pa khat suan i hihlam uh kitheih moh bawl hun hinawn lou ahi. Tuabang ngaihdan dikloute tawpsan a panla thak in, pangkhawm chiat le ut huai mahmah hi. Hiaihun remchang takmai hong om ngei nawn lou ding ahi a; khasuah sawm hetlou in khekhat ah din sawm in panla thak nihang chi'n iki chial thakthak hi. Tupna asan leh kiakna le asang, chih dan deuh in State/UT hiam iphut tinten ding uh ahi. Tuabanah, facebook kakhoih thei e..ka bang e ..chia kipilsak mahmah te aw.. hichibang hun haksatak mai a heutu dia hong kipete gense nawn dah mahmah un aw, amaute a di'n kahih theih om sun bang ahi dia aw chi'n maute' adi'n thumsak zaw le hang, kipum khatna hong om thei ding hi. Huaibanah, singtangmite kipumkhatna suse thei ding thilte gen-leh-sak a neih hetlouh ding in iki chial thakthak hi. Hiaihun manphatak mai i khasuah leh ikhangsawnte' tan ding ngaihngam huailou law mahmah ahih ziak in panla thak chiat ni hang. Bangteng gen mah le Pathian mah zaw amasapen ding hive aw...thumna toh Toupa muang in pangzel le i suakta ngeingei ding hi. Ithumnate dawn a om in, nidang a pawl tuam (KNO/UPF & ATSUM) ineihte khekhat in dingkhawm theita uhi. Huaiziakin, hiai August 31 ni tuh LUNGZIINA himahleh singtangmite a dia KIPUMKHATNA ni hong mahmah hen ichi hi.