LEMNA LEH MUANNA 2:MANIPUR CHAPTER
By Son Lal Singson

Bouruak gik tak toh O.Ibobi makaihna nuai Congress SPF government in mipi te muanna mansuah louh(reposed)tum in am-hai tak mai in Manipur vai hawm in pan theih na chi teng a pang a Ministry puk ding veng in nam tuam tuam te issue leh buai na te hih ven tum in lampi a lem thei di dan dan hon po suah zel sam mah le uh, (Namdang khat kipah na namdang khat heh na), buaina tak tak pen a suk veng zoh uh lam et huai non lou khop in State establishment institution/machinery te Constitutional provision tan su-ling (breakdown) ban pha dek dek in khau zang kol tak(loose thread) a ki luai gei gei mah bang uh,PR houh gamla khol non lou hia chin suangtuahna bang om thei liamluam hi,tu dinmun et in.

ILPS-Bills a gimneih huai(Anti-tribals Bills) tak thum te:

1.The Protection of Manipur People Bill, 2015' with base year 1951
2'The Manipur Land Revenue and Land Reforms (Seventh Amendment)2015
3. 'The Manipur Shops and Establishments (Second Amendment) Bill 2015,

zat(implement) ngei ngei dia Phaizang mi ten Kha nih val hial bang a phut un niteng hin dan su nongkai ban mah mah hi.Hiai Bill gimneih huai dan I lak uah Leh kha siam mah mah leh muh kholh na nei hun khop in patauh dak a khet lai un ngaihsak louh leh don louh in tummang hil hel.A Bill content te gen kon som kei,a sim theih liai leh a gelh theih liai teng in I sim sa leh ei mah taksa pumpi sang in le I theih zawk tak ding un um ing.

Salpha Luang kua(9) hial ki kham in,nidang a I ngaihdan uh ki banglou te,nam khat leh khat I ki muanmoh na te uh, election hun a gup ki bat louh ziak a i ki tuam bol na te a sisan ua I nul siang zoh kei leh ei leh ei ki tuisa buah a Talpak te khut nuai a om det ngai din gen lawk theih hi. Hici hun a I pan khom na uh I muh chiang in tha thoh huai in lung muan huai law tel...lungsim kim khat leh pil khel(cruel) tak a thu guk ki phum gu na tom mat bat louh dek a hon play talpak te pen in ei singtang mi te tung ah I hamphat na di uh leh I tan di uh ki lom India kivai hawmna bu pi(constitution) in hon piak te hon nawm valh sak gige te pen hun sot pi apat I theih sa uh hi na pi'n, I mipi ai-awih(representative) ten 'uk e, ak e' a chi ngam omlou a kum 50 val bang 'ma' hon kaih pih pih tel uh Talpak te chouh va siat tut theih vek lou in 'ei leh ei' kal ah a ki nang(obstacles)a om ziak ana hi lel hi.Ki zuak zuak mok I hih ciang a.

Facebook a Talpak te page khat 'Manipur times' leh 'Pan Manipur' ah khat vei tangmi leh phaizang te ki kal a issue om te comment leh debate type dan a ka lut khak na ah,'Nou phaizang mi ten, Kou Singtang mi te ham phat na di teng khak theih khak moh leh hon ne tai dim dem a, tanggam ah development fund centre apat hon pai sun sun te imphal a tangden(stuck) sak a na nek bang teng uh hon vompi sa hawm lel uh cin ua, tanggam mi ten na tung ua muanna hon nei lou mah kahi uh hun sawt pi a pan' cia ka comment leh, amau lak ah smart mah mah leh intellectual khat in hi cin hon replied hi, "Bang ziak a nou tanggam mi ten kou phaizang mi te a moh teng non khuk sak ut mok uh, Na representative te uh bang hih dia na neih uh hiam? Hill areas leh Tribal development fund hon pai te Hill Areas Committee(HAC) tawn a hon pai, nou tanggam mi te mah ahi a Chairman, amau lem sak na leh a consent uh om lou in phaizang mi ten kon suk khak sak thei kei uh, na representative te uh ki zuak lel a, a nek bang teng uh sa guh-bok teng na MDC te uh leh na UG te uh ki nek huan ua, kou phaizang mi te bang ziak a a moh hon khu sak sak di na hi uh hiam?".

Gen kik zok di ka thei kei pah.Ei I makai te un I theih louh kal ua hon na zuak zuak uh ana hi lel tak ahi.
Tua I pankhawm na pen uh hun lem a lak a political demand kician tak leh I tu-sawn khang-sawn te tan adia hoih ding muh kholhna nei kom a hiai talpak te khut nuai a pat I suahtak na di uh zawn ngai ta hi lou hiam? Bang ci zawn ding? India Dan bupi pansan mah a political goals bawl a, Manipur territorial integrity su se kha lou din demand bawl le,Centre hin talpak te hi ta leh a panna di uh leh hon soi sel na di uh pum pelh theih di dan om din I khuak uh suk hiam hun ta. UT/Sixth-Schedule/Alternative arrangements te tung ton in ki vai hawm leng talpak te gam gi a suk khak kei pouh leh hon nial na di uh a ziak tam het lou hi.

Mipi deihtel na(people's mandate) in I gamsung maban di bawl khe le hang,hon dou te khut apat in suahtak na di baih lam zaw din ka ging.Ei mipi ten le tu hun apat in sinlai a nei in, I angsung khual luat ziak a I thu neihna uh ahih kei leh I rights uh Election hun ciang in va ki zuak bei non lou in, saupi en kom in Makai ding muan huai bawl hun law ta hi.Tu lel a JAC Convenor leh member te pen Constituent Assembly toh a din mun uh ki kim thei phial in koih ing, a mau a ma phu tu leh I objectives te uh draft tu a hih sam ua leh mipi ten le voice ki nei thei a, advice bang le piak theih luat din hon ki organize uh hen la intellectual circle apat in le consultation bang hon bawl le uh mipi ten sih ngap a nung thuap ding cih pen tu leh tu a I dinmun ua dia I ki ngak na uh hi phot hin koih theih hi.Hun paisa a Election om ciang a I gup louh te pen JAC member te lak ah tel le bang zah hiam om in te, huai te khong ziak a makai te dem zeuh zeuh pawl bang le ki om a, huci bang lungsim put pen tu lel I dinmun ua dia masawnna hon tun tu a pang lou hial di, ki su thadah thei dia ki demna te topsan hun law ta. Tu I dinmun pen uh malai a MLA/MDC election hun a thil tung te pholh suah na di hun hi non lou in, tanggam mi te suahtak na di ahih lam phok chiat ni.Tu lel a JAC makai ten mipi deih na bang a hon pai pih zoh kei ua leh bel ei a mipi te mah in I khek khiak theih luat ahi, huchi lou a tu leh tu a a panla a kalbi suan pan liang liang ahi ua, a muan huai di uh leh a muan huai louh di uh judge masa lou in, mimal ki huat ziak khong a underestimate hiam deih louh thu va pong gen pen in a hoih lam a tam zaw hon tut ki lam en kei ni.Ki khenzak theih na dia pau kam hiam heutu te dem pen I manthat na di ua thil hon ki siam ahih khak ding patauh huai law tel ahi.

Maban a I kal suan na di uah, lampi I tot ding uh thil na mai ahi kei.I tup pen uh ngah na dia shortcut method chih te zat louh ahoih zaw.Ei lak, I thil lak dan te uh leh I tuppi pen uh lohchin na dia, ei sung mah mah a hon dal te ki theih moh bollou a skip hiam paikan a I om khak ua leh I dinmun lui uh toh a ki khiat na om tuan lou di bang hi. I lak a ei leh ei kal a I nampi tuppi pen phut na dia daltu(obstacle) te su veng lou a, ngam khat a I deih pen uh va boh masak in suicidal a hih khak di ki ven tuak lua in ka mu.

Kua peuh in I perception uh a hoih lou leh I political objective te hon dal thei di te pai khia in, mi chih in I man phat dan leh I poimoh chiat dan uh mangngilh lou in, ei a di mah ahi chi'n pom theih dan ki zil in I makai te nung thuap a, a chit louh na te uh a bawl dik tu di kua dang hi lou in "nang leh kei" I hi chih phok tek a lam etna toh pathian hat na muang kom in kal suan thei zel din pathian in hon om pih chiat hen.