NA LAK UA NAMDANG PATHIAN OMTE KOIH MANG UN

By H.Sinzalam

This email address is being protected from spambots. You need JavaScript enabled to view it.

Manipur tanggam mite mintuam tuam, pawl tuamtuam, kivaipuak dan tuam tuam leh kipi dan tuamtuam a I kipi a, tup-le-gim kibang deih kibang hinapi chibing dai liantak in gamgi khung a eimah lampi tuam chiat a pai in I na khosa uhi. Inkuan Unau laizom ihi chihbel I kihaih kei a, lungsimtak a kinaihna ding in ki-itna omlou in eimah aituam ding khuat in hun tampi ana mualliamta hi. Hiai hun sung in leng khekhat a pai a tup kibang a pailouh in kuamah I tupna gam I tung kei ding chih a theilou om kei mahleh I sisan a belh gamdang pathiante ziak in kigawmna ni suak ngei ding banglou hi.

Singtang mite lak a Naga pawlte bel in veng a Nagalandte toh gamkhat ah om khawm kei mahle uh Naga puanbuk nuai a teng in gampek kimat kha in teng ua, singtang mite lak ah lungmuanna khat in lungmuang uhi. Naga hilou Singtang mite bel Zosuan apan hong piang ngen pau kitheituah a tawndan kibang sahkhua kibang himahehang unau Naga te sang a I kikhen tuamna chi lian zaw in ei-le-ei kimullit tuah in I khosa uhi.

Pathian in hehpihna leh lainatna toh hon enkol a, dai kilkal a kuamah phawkbat louh a Pathian kiang a na ngen ngen a, thumna ana pang kuahiamte thumna dawn a om in Manipur gam leh mite humbit utna lungsim phaizang mite lak ah chituh in hong om hi. Hiai chituh taksuah a hih theihna ding in Solkal dan a zat ahong ngai a, Solkal dan ding peuhmah Danbawlna Inpi a thukimna lak masak a ngai hi. Hiai ding deihna ziak in Phaizang mite lak ah khanih sung phial helna leh nuakna a hong om nung in Solkal in Inpi a tukhawm in thupukna honla hi.

Hiai thupukna lak ahihtoh kiton Singtangmite lungsim a hon sukha mahmah in deihlou a kiphinna pan kawm in singtangmi heutu lubawk ten I palaite kiang toukou mahle uh mipi lamet na bang a paitalouh ahih man in mipi thangpaihna in I gam hon zelsuak hi. Lungzin huai leh mangbat huai tak a khosa in I singtang gam humna ding in unau mi 8 ten Lamka kholai ah a luang uh honpekhia uhi. Vangtah huaipi bangmah leh unau mi 8te sisan in Manipur singtangmite a hon samkhawm a, manohna kibang a I paitheihna ding a Pathian hon lampi sialsak ahi chi in ka pom hi.

Hiai unau te sisan a sapsuahte I hih dungzui in I kalsuan touhna ding ah I sisan a belhsa namdang Pathiante mah khemtu a hong hi ding a, huaite koihkhe lou in I kalsuan lohching lou ding a, simmoh sem in I om ding hi. Tuabang a I koihkhiak ding gamdang Pathian tampite lak ah :

Chibing/Paubing Pathian : Hiai te eimi hi kei ve aw, amaulamte hi deuh ve uh, eipawl kihichih deuh ni chih a bei phot ngai a , ei a I hih vek matan I kipalpukna ding suangpi ahi gige.

Election Pathian : Palai ding kitel thohna gam a tenglou gamte huai lungulh a kiphinna a neih lai un hiai bang kivaihawmna gam a tengte lak ah a gu hat mahmah a, damthei pahpah lou hi. Eite lak leng kei Paula pawl, Kei Kifa pawl chi a election a kipawl khenna leh kilang etna bei ngeilou hi. Hiai Pathian na I sep kawmkawm leh I unaut sisan gah ding a muihkhak ding lauhuai lua hi.

Semtam pen kisakna : Mihing a hongpiangta phot in a nam a ding a poimohna neitek hi. A mawlpen a haipen zatna beipen I chihleng a nambar ah pangkha hi. I tat zekchia mi hihsiatna I muhchiang in kinakna piang hi. A semtam pen, a sitam pen hih sawm a, mi sepkhak louhte muhtheih luat chidamna hilou hi. Kidouna phual a galsat a pangpa poimohna zahzah in table tung a galsat dingdan gelpa poimoh hi.Table tung a galsatpa a vualleh chiang in kidouna phual a galsatpa vuallel ahi chih mangngilh kei ni. Inlum a I ngaihtuahna te a taktak a sepkhiak pah zingzing theihlouh hun tampi om ahih man in nang bang sem e, nou bang hih e kichih chih tawpsan ngai hi.

Sum-le-pai a gin omlouhna : Pawlpi khat dinmun tehna sum-le-pai ahi a,pawlpi a ding a semtute’ ginomlohna ziak in pawlpi in minsiatloh in bahloh thei hi.Huai ziak in sum-le-pai a duhamna sang in Minhoihna masuan lehang, I kumpkhatna tou ding hi.

Hiai kipumkhatna suksiat sawm a panlate hong kipan nai kei ua, hong kipat chiang ua, a galvan hoih mahmah te uh a tung a I gente a hi. Hiaite louleng galvan hiamtamtak nei a hon dou ding ahih man un I lak a namdang Pathiante I koih khiak keileh zaw, I kimuktuk kha ding.

‘TOUPA AW BERLIN DAIPI KHETSIAT A OM BANG IN KA KIMELMAKNA DAIPI UH HON KHETSIAT SAK IN”