I Tu Dinmun Telsuina
By VzSiam

Politics kichi khawng ka bangkhem kiveina le ahikei a, ka navaaknalam leng ahikei a, ka khuak in leng a baan thahahkei. Gam leh nam it khat tuh hisam in ka kikoih a, himahleh leikhiat hon sawm le uh bel crore bangzah ka man diam thei ke'ng. Crore le kimanzou hetlou lai mai di eive. A sum geentaklouh mi'n thaulawng khatvei hon lak leh leng lau a liing a gam itna teng pang singpulh vek ding le kihi maithei. Bangteng hileh, tu i buaina un akuakua lungsim lawngkha chiat ahihman in leh mi'n leng international politics hiam, economy hiam toh kisai khawng thu-lela thupi taktak a hong om chiang a siamna sang taktak neite bang in leng a theih ule hilou, a gintaak thu peuh uh kikum a BBC kho chiltui kaai zenzen a kihouhou peih uh ahihchiang in ei leng zeldim thubawl vive in tomchik houlim zual leng chi i sethouh ve.

A masapen in Pawlpi'n tup leh ngim kichian leh giltak nei a kum tampi ana pai i hita ua, i paitou zellai ding uhi. Himahleh tampite'n tua tup leh ngimte va kithei khollou hi. A thei tawmchikte'n bel tua a theihna ua a muanna uh nga ding ua, gammang kisa a theilou mipi hiaizah zouzaite'n muanna koi a ngata ding? Mipite' theih kheukhou a kuulna omlou leh tua bang pen ei a dia hoihlou zaw ding leng ahikha ding, himahleh a thei dia kilawm dawl teng beek in thei hileh tuh mipite hichi haamhaih vengvung tel khollou kha ding hi.

A thei dia kilawm dawl teng in thei ahih ua lehleng pichin zohhuai salou a lungkia tampi ki-om chihna hi leuleu zel hi. I tuppen gamla salua in tunai a a banghiam a kinzaw deuh a muh ding khat deih a lunggulh adiak in khangthakte' lak a om hileh kilawm in kilang hi. Huchia a lungkim ngellou pawl toh, a phunphun pawl toh, a gin-om mahmah toh i kalsuan chiilcheellai in hiai bang nawngkaina teng in hon lap a, i hamhaih ngial uhi.

I Bill gimneihte uh a hong gin tuung in i MLAte'n amau' thu a thu zeek pah mawkmawk ding un i gingtakei. Saupi poipha ding thil ahihman in amau leng heutu hi a atheihte uh kiang ah dongsam ding un ummohhuai hi. Huchia heutute'n, 'hichi khachi'n hih un,' a chih bang ua gamtang hikha ding uhi. Aziak bel amau thu liuliau a gamtang hile uh hichi bang vengvung nuai a kisiamtanna ding thu om mahmahlou a, mihing hisam ahihchiang ua kisiamtan louhnadan bang le thei lawsam ding un, mipite' deih bang a thupha tawi a kitawp sam ding un gintaakhuai hi. Tua lah huchilou a, deuleulou a, moh kisa hetlou ahih chiang un moh khuksak sawn ding a nei ua hinteh chih louh zeldim thubawl ding dang a omkei hi. A sawl tute lah thunei tabuang uh ahihchiang in amau a ding in tuh patauhna ding himhim a omkei hi. Huaiziak in pawlpi leh MLA kikaal ah kitanauna hoih mahmah a om chih kuamah haihvual ahi nawnkei.

I MLAte uh daih dide ziak a i tang ngalliamte uh a hong puuk phet chiang un a vaihawm dia kilawm mah i innpite uh hong kimukhawm khiukheu ua, ahoihtheipen ding in vai hon hawm uhi. Himahleh hiai vaihawm pen uh hoihlua hinapi in mipi' pomtheih vual ahikei a, huchi'n JAC kiguang in vaihawm masa phiat in vaithak hon hawm leuleu ua, huai leng hoihlaw zel himahleh mipite' naa ah thalkiat zel hi. Mipite kitongkhong mahmah. Hiai apan in tuh vaihawm masasa neem masa mawk ahihleh khetbuuk khat om hipeuhmah ding chi'n mipite'n lungliapna neita. Kua ahia khetbuuk a pang?

I MLAte lah kuuk e kaak e chithei ding leng omtalou uh, MDCte lah hi, mipi'n lah kitawp dia lam-en, zummoh leh kisuanna neilou bang a sep, amau lah deuleulou. Koi a bang chi? Huchia mipite tongkhong kisa a, luita khan bang lel hita ding i hi di maw chia mangbang tak a i om khiukheu lai in thuthak hong suak leuleu a, huai tuh mipite' deih bang hong hita ahihman in mipite tuh lungnuam kisa in mittui paak niuniau in kahnuih silsel geuh uhi.

Himahleh ke'n ka na lungnoplouh pih khat a om hi. '...other stake holder to work out amicable political objective...' chih ahi. JAC te'n leng pawlpite leh mipite kikal a thulaigen haksa a a, a khut uh silsiang maimah uh hizaw a de aw chih in om. A ziak bel hiai thuvualte'n thuneihna a patau hetloute' kiang mah a pekiik ahih chiang in mabaan bang ahong chi dia chih a hungaihhuai mahmah hi. Lungnoplouhna ding om ahi thahahkei, huchikhaleh, hichikhaleh, chia thil piangthei teng baan sui maimai i hizaw. Huai tuh hih ding him leng ahi mah a, a hichih leh hichi ding, a huchih leh huchi ding, chia lam chiteng a panlaak didan lepsa a i koih ding uh leng ahizaw mah.

Hiai apan i laihkhiat theih tuh, khatna ah, makaite pataulou takpi uh ahihleh hiai daante patauh huailou mah hi'n teh. Pawlpi in hiai daan a lauhhuailouh dingdan thei a, ahihkaleh a lehna ding lampi thei giugiau a, na awlmoh vetlou hi'n teh. Ahihkaleh amau' tup leh ngim kichiantak, a nai deuh leh a gamla deuh a muh ding nei ua, tua mipite' lunggulh vengvungte'n tuate nawngkai sak lel houh hizaw in teh. A nihna ah, sum leh pai ziak a a lauhhuaina bang leng lau zoulou uh houh hi'n teh!

Hiai a tung thu nihte leh tu tantan vaihawm dingdan kichian om theilou a a om nilouhna ziak in i pawlpite'n 'autonomous' i chihchihte khawng lunggulhlou khatkhat uh hi'n teh. A tung a thu nihte' lak a amasa pen' ziak ahih a, pawlpi'n tup leh ngim hoihtak ana nei giugiau a, hiai mipite' lunggulhte khawng in sunawngkaizaw ding ahihleh tuh den chiang a pawlpite'n a tup leh ngim uh ahon sepkhiat geih chiang un, 'Eh, Hichidan ahi maw! En ana mu mahmahlou i vele,' chi'n kipak kisa in i men phemphom geuh ding uhi. A masape'n ziak hilou a, anihna pen' ziak ahih ngeingei lelah den chia'n, 'Huailai in ana kihangsan deuhkha henla, a suaksuak suak chi'n ana nawk mai le zaw tua hichilou ding hi hang a,' chi'n lungkham kisa'n i men phemphom ding hi.

Huaiziak in mipte'n hiai a atung a thu nihte koipen hiam chih i theih uh kisam mahmah hi. A masa pen' ziak ahihleh bel i pawlpi nungthuap semsem in, sum leh pai tam semsem in vuk ni. A nihna pen' ziak ahihleh bel mipite'n i khosuahna ding mah uh i zon tiingteng uh ngai ding hi. Bangteng hileh heutu na nana in tuh ei sang in gam a itzaw thamtham ding a, a mi leh sa a itzaw ding a, hon zuak in hon khawng hialkei un teh chih tuh ginglel kawmkawm a i gintaak tinten ei ve!

A kua theihlouh thei le hikhang, a kua suutlouh suut le hikhang, hichia zeldim thubawl a i kikupte' ziak in kihuatna leh kinoplouhtuahna in neikei ni. I mabaan a i nam leh gam hon enkol ding kangthakte hichi bang a statemenship, diplomacy chihleh a dangdang kei sa na theihzawk thamte uh i sinsak zawkmah ding uh ahi. A bul a i gen bang in sapte le upa pipi leh laisiam pipi bang leng a zeldim thubawl peuh uh chiltui kaizen in a houlim zel na ve ua le chia amau enton a kineih hilim hang. Football lunglute'n a samtandan khawng uh a etton pahpah bang ua.