Mualnuam Ah I-Day Lopna Thubuai..!!
Written By: K Lianthansang

“ Kuapeuh genthei (mizawng) kahna a abil hum tuh amah leng akap dia, ngaihkhiak ahikei ding hi“ – Paunakte 21: 13

Inner Line Permit (ILP) demand (ngetna) ziakin Talpakte’n, Lamka leh Imphal kal kikawmtuahna  subuai vengvung mahle uh; Lamka leh Mualnuam kal kikawmtuahna zaw, lampi aa ‘buannawi’ loungal a sunawngkai thei di atam kei.  Huaiziakin, 14th August, 2015 ni’n Mualnuam ah Independence Day – 2015 lopna leh Thangboi Gangte, MCS, SDO/ Mualnuam’ khaveng (akhamul pawnungpen) bohsakna neihna ding ah hoh ka sawm tei hi.  Thanlon A/C MLA, Pu Vungzagin Valte leh Mualnuam SDO, Pu Thangboi Gangte’ huaihotna ziakin,  gari 30vel ah ka kihendim phetphut uhi.

Mi’n, ‘Manipur Timing’ chi’a ana gensek mahbang un, kou leng gelkholhna dak-chiam chet in ka kipankhe theikei uh. Official hi’n  ‘cial lou’ hitaleh, ahohnuam atamluat ziak in, zinglam dak 9:30 in ka kipankhethei hamham uhi. Kei tuanna ahihleh, ‘SUMO’ kichi telawi ahi. Amailam a kigelh theichian nawnkei mahleng, anunglam ah ‘Sialkal Express’ chih kigelh hi. Lamka leh Aizawl kawmtuah a tai gige ahihman in, lamhoihna leh hoihlouhna teng atheisuak phial. Huaiziakin, lampi hoihlouhna neuhneuh ah leng, ‘Sial’ bangmai a hat in hon ‘kal’ pih zel a, ‘Sialkal Express’ ahihna hon sulang zel hi.

Nidang-hundang a ka zintuahkhak chiangin, silhpuan piandang duang a baat leh foreign khutsuak kawlchiang  tawite omna teng ah, aneu-alian khentuam omlou in ka kumkhe sauhsauh zel uhi. Himahleh, tutung in huchibang a omkei. Huaini apan in, min (name) maimai in leng thil ahihtheihdan ka phawksuah semsem hi. Khaamkhawl a ka omchiang un, “ V Valte’ Team ” ka chisek ua, hon paisuaksak zel uhi.

Ka lungsim ah;  Christian hinkhua ah leng, haksatna leh lungkhamna ituah hun uh omtham a, eikia a zohvual hilou kisakna leng tamveipi kituak sek hi. Huaihun chiangin, “ Jesu – Hondampa’ nungzui muanhuai ka hi “ chi’n, I zuihpa uh minsuang in kalsuan leng, setan’ khemna thaang ah leng a ki-awk kei ding. Huaikia hilou in, hinkhua hon sunawngkaithei ‘kingaihsiatna (depression)’ chihte leng vaang deuh ding ahihdan khawng ka ngaihtuah kha thepthup hi. Ka gennuamtak bel; ‘ V Valte ‘ chih lel in, lamzangtak a hon paisak theihleh,  ‘ Jesu ‘ minsuang in kalsuan leng, lauh diing bangmah a omkei, ka chihnopna ahi.
‘Mual a-omleh guam om, melhoih a omleh melsia leng a om’ chih thudik ahih mahbang in, lampi hoihna leng a om a, asiatna leng a om. Buannawina vanglak, totna di mun nangawn buaihuai in, gari nunglam khawng ataal zaizai hun om mahleh, lampi hoihna-te nuam mahmah zel hi. Thil himhim tangtawn daih diing a-omkei. Himahleh, Zoudawn lamte’ hinna sigui bangmai ahihziak in, hong kibawl hunhun a, ‘tangtawn hihiallou, kumtawn bangzah hiam’ bek hon daihtheih ngei lam-etna lianpi neivek ka hipeuhmah ding ua, gari a ka tuanpih khenkhat in genkhak cheuhcheuh in nei naak uhi.

Gari tampi kizui ka hihman un, lamkal a siatna(gari sia) tuak leng tampi ka om ua, himahleh bawlhoih zel in mailam ka nawtthei zel uhi. Kou tuanna ahihleh, tulai pau in gen leng, ‘zei himai’. Acheetna sa, alampi teng a chilsuak dimdemsa ngen ahihman in, lamkal ah ‘nervous’ ziakin ka khawl khakei uhi. Gari khenkhat bel, lamhoihna ngen a taitaisa ahihman un hong ‘nervous’ sim ua, tui buahngai pawl bang leng a om veve. Hiaite ka muh chiangin, ‘ Zoudawn a haksatak a khangkhete mah lamzang uh a, neu apan khopilam khawng a nuamtak a khawsate’n haksatna atuahzek chiang ua, thuak haksa asak diakdan khawng uh toh ka mekmat kha thepthup hi. Huaiziak mah leng ahi dia, ka lungsim in,’ MLA dinga, Zoudawn ate’ haksatna tuahte anen-aham a theihpihtu mah, mipi’n kideih vek  hidi hitah e…’ ka chichi hi.

Lamkal a tuahsiatna leh vangsiatna tuak omlou in, Thuangtam khua dak 3:30vel in ka tung uhi. Kou tunhun gen ka hi a, MLA leh akaih zatamte bel huaihun in ana tungkhin thamta uh. Thuangtam Hanmual mun a, Cemetery Shed leh Store Room kituah bawl a om pen leng ana hong zou tham uhi. Thuangtam ZYA Hall ah, Hall meeting ana neih laitak uh ka lap hamham ua, Hall sung dim phitphet ahihman in kongpua ah ka om hi. Hall sung tanglou mipi tampi mahmah leng, apawlam ah ana om veve uhi.

Programme zat hun ah; SDO/ Mualnuam, Bialtu MLA, Chairman ( Zomi Council) chihte’ puan silhsak in om ua, Saliang leh lianglou leng piak in om uhi. Huailou in, 1960 kum a Thuangtam khua kisaat hun a ana telkha, tuni tan adamlai omsun khat omziak in, Hausapu’n puan silhsakna nei hi. Ban-ah, 1997 kum a miteng in khua ataihsan hun ua, khua ngak a ana pang ngitnget pasalpha khat omnawn a, huai leng puan silhsak in, pahtawina piak in om hi ( khosung vaihawmte kiang ah, ana awl piak mai un, chihdan a thilsai a omkei).

MLA Pu’n a thugenna ah, Cemetery Shed leh Store Room kituah honkhiat a ompen, hoihsa mahmah ahihdan gen masa hi. Thuangtam khua pen, ama’ bial adia khaw kipatna ahihman in ngaina diak a, IAY Scheme tungtawn a, Inntung khuhna dia langva hongpaite azatna di bangtak a zang ding in leng ngen hi. Huchi’a, IAY zang hoihpen khua ahih ngeingei ualeh, bialtu MDC toh pangkhawm a alopna di piak sawm ahihdan leng gentel bok hi. Athugen zohkuan in, School lamte a di’n Football leh Volleyball pia hi.

Ka kianga om, khawmi khenkhat in, “ Field toh leng hon pekhawm vanglak leh nak uthuai ee…” chi’a a gen vungvung uh ka zakha mialmial a, kimawlna mun dia lampilai peuh zangsek ahihdan uh leng ka khonung theih phiing hi. Thudang khat ka zaak nawn ahihleh, “ ADC nuaia Teacher dia laak a omte lawi leng, hong hohthei zenzen ua, kipahhuai. Himahleh, Solkal in naupangte laihilh dia chin (ching) ahina chi’a alaak uh ahihngal leh, midang semsaklou in hong seem kinken maile uh chu, khantouhna omzaw leh kilawm. A School leh naupang omlouhna khua hileh bel thutuam…” chih ahi leuleu. Gensau ngailou a theihsa hi.

Programme zohma deuh in, vanvuahtui a vualzawl in ka om uhi. Lamka apan aa paitou tengteng leh, Thuangtam khawzaang in, vuahzu selsel(tam chiahlou) nuai ah bawngsa leh voksa  in gilpi ka puahvah ua, gilmul bang kivang phimphiam hial abang. Gensau zeklai le’ng, Thuangtam khua inn tamlua ahikei. Inntuan thak leh a pemlut thak kigawm a inn 2 (1+1) chihlouh siah, IAY Scheme ziakin, a inntung uh paaksuak phihphiah hi. Inn 30 phalah mahle uh, akipiakzohna u’leh, akithutuahdan uh lamdang ka sa. Tawmchik ahihhang un, feltak in thil asai vaiveng zungzung ua, etton taak uh ka sa mahmah.

Hun in ngak neilou leh, khua muikuan ahihman in, Mualnuam lam ka kidelh huan souhsouh nawn uhi. Mualnuam gam ka tun un, vuah hong kipan nawn leuleu hi. Khosung lutna di mun ah paungaihna zanga mi pauging a kiza ngal a, ahihhang in mi muhdi ka neikei. Ka pang(side) lam gari tohlet hong in daakkhiak sawm leng lah, vuah in hon thehkawt kawp dia; hong louh alah, vuah in gari tohlet teng athehkawt ziak a bangmah kimuchian theilou zel. Atawp a, ‘Oil Pump’ koihna dia kibawlna lam a ka dakphei leh, tuipuan(aliante) kawm ah mi nih tu khinkhen ka galmuh hi. Gari khat ah midang bangzah hiam ataituah ua, paungaihna zangin thupuan bangbang hiam bawlkawm uhi.

Thil omdan ka theih thakthak leh; Khomual a honna dawnsawm ahihdan u’leh, vuahzuk ziaka taizaak vek hidan ahi uh. Himahleh, ZYA-te lunggel siamna ziakin, ZYA Hall lam ah Programme zat in om veve hi. Vuah azuk hang in, Hall a dimlah tuankei. Kongbul teng ah leng mipi dingdim phetphut mai ua, kongpawlam ah leng mi hunkhop om veve uhi. Khawvaak lai a tung himaizen le ung, khomual ah mipi bangzahta in atam phet diam aw….chih khawng hon ngaihtuahsak vungvung hi. Eh…lungsim a suak dandan gensuk mawk leng. Huai nitak a ka kikhopna uh Hall bangbang tuhun chiang tan in, MLA pu’n abialsung ah 12 lam bang tungkheta hidan a agen uh leng ka zakha.

Grace English School (GES) student te’n, a School uniform u’toh siamtak a ‘Welcome Song’ hon sa uh bang zaw, neulai phawksuahlouh nadan a omkei. Ka kianga-te’n, “ Zingkal apan form silh hita uh ahi, parade khawng le zilpih ua, vuah khawng le thuakpihkha om inteh….” Chi’a a gen uh ka zakha. Koulawi in, Thuangtam ah ann nekhin mahle ung, khosung mipi’n ann nelou a honna dawn uh hia, chibel ka theikei. Mualnuam tuailai mi 40 – 50 vel ding te’n, kiginkholhna omloupi’n (zangtalam di chih himahleh, vuahzukziak in amun kikhek phut a,  la dang kiging manlou uh) Lapawl hon sa ua, siam mahmah uhi.

Programme kipat taktak ma in, Hausa leh ZYA te’n atuamtuak in MLA pu leh vuahdelh cheuh, SDO pu puan silhsak uhi. Huai nitak in, Dr. R Sanga (Social Activist), Ngazam MDC , UZO/ GHQ President, Gangte Tribe Council aa President leh Zomi Council lam apan mi bangzah hiam leng mipilam nga in tu uhi. Mi tampi’n thugenna nei mahle uh, Pu Thangboi Gangte, SDO/ Mualnuam in, School naupangte hasotna dia, Robert Frost’ lavui gelh pansan a thu tamlou agen in lungsim hon khoih mahmah hi. Aban agenna khat a, “ Apoimoh masapen SDO/ Mualnuam hilou in; tuni a School naupang omkha te’n, SDO/Mualnuam a pantheihna dia, lai hoihtak a sim pen apoimoh pen ahi zaw…” chi’a, agen in Siamsin naupang tamtak thathousak mahmah hi’n ka thei.

MLA pu’n leng  thu saulua a genkei. Tunung chianga, Thanlon apan Mualnuam a Electric zawlsawnna dia, Sub-station khat koih a ompahta ding ahihdan leh, huai apan khawkiim mun tuamtuam a hawmzak theih  di ahihdan gen hi. SDO/ Mualnuam a dia, Zosuante mah deih a, Chief Minister’ kianga  Thangboi (amel amuhma nangawn a)  ngetthoh hial ahihdan leng gentelkha hi. Huai hongen apan in, I gam uh eimah in I etkol ua, kol leh vaiten hon etkaisak di uh phal mahmahlouh ahihdan, gentamlouh a theihngal in om hi.

Aban agenna ah; nidang in SDC (Hq.) Mualnuam chih in ana om a, SDC Building leng ana omngeita. Himahleh, Mou omloupi a mouvanken kipiak in omzia aneikei. Government in SDC building di hon bawlsak velvol mahleh, a luahtu di hon piaklouh ziakin, teenlouh leh zuunlouh in om a, tulpaan kaigawp in sepah hi. Tu’n ahihleh, I Mou ding un - Zosuan tangval feltak, Thangboi Gangte, MCS piak in I omta uhi. Amah numei hikei mahleh, tu’n eite hon kemtu leh enkoltu dinga piak I hihman un, Mouthak bangin ngai ni. Huaiban ah, a zualbaihna dingin a khaveng I bohsak ding ua (vasa bang in), kongkhak bul ah suktum leng kansak ni (ganhing bang in) chi’n, gentehna thu tamlou hon zang hi.

Ka ngaihtuahna ah, ‘ Mouvanken athupipen ahihlouh man in, tua didan mah hi e. Amou pen in ginomtak in na honsem phot peuhmah leh, Government in ‘A VANKEN’ di ngaihtuah zou mahmah na di ahi. Vanken chih phetlouh, Mualnuam SDO huamsunga khaw 18 omte a di’n, ‘VAN GOT’ leng hon nei khamohlou ding uh ahi.  Mi khenkhat in leng, a kiteen hun un Vanken bangmah a neipah sese kei uh. Ki-it taka hong kiteen nak u’leh, ta-le-nau aneihnung un leng Mouvanken kipiak theih a, Mouvangot leng kigot(kiguan) theih hiven’, chihkhawng ka na ngaihtuah kha duanduan hi. Huailou in, thugen (amin k’on gendah di) khat in, “ Ei le MLA kihi hen la, I MLA pu uh nasep lam ah delh in kinungdelh leh chih ka ut..” chi’a agen in, thiltampi genkha di’n ka thei hi.

Hun tawplam in, ZYA te’n giahna di ana sehkhen bangbang uh puankhiatna honnei ua, giahna di lemchanglou omte leng lungbuailou ding a thupuan honneih behlap sawnsawn un, alungpi ageldan uh sulang mahmah hi. Hall Meeting tawp in leng vuah atheu hoihkei. Himahleh, amun a omdet theih ahih mawklouh ziakin, mahni giahna di lam chiat kizuan seuhseuh hi. Zoudawn a inn leh lou neilai sam ka hihman un, ken leng ka innlam uh ka zuanpah vengveng hi. ZYA heutute’n ahihleh, giahna di tuamtuam ah, agiakdia asehte uh va bankhak ua, a felkei uh chihna di himhim a omkei.

Kou inn ngei ah leng mi 5 lam hong giak ua, ka lupkhit vek un, nitak dak 10 lam a gingta. Gari tuanna gimsim ka hingei dia, zingkal aak khuanlam leng ka za kei. Zing dak. 6: 00 vel in ka thou a, kihahsiang in field lam ka zuan ngal hi. Ka pa ahihleh, programme zatnadi mun, ‘public ground’ lam ana tungzou tham. Ka pa toh Dialkhai leh Mualnuam kikawmtuahna dia lampi kibawlthak tawn in kawltunglam ka vapha uhi. Hiai lampi kibawlthak ahihleh, MLA pu’ panlakna ziaka Pu Vungkhum Guite in nasepna lam a etkai dan hi’n ka thei. Nidang a kawl kenselak himahleh, gam leh nam it taktakte hong cheet chiang un zaw, bangmah in athuak kei. Khe a paitheihna hamham dia omlai, tu’n gari taithei ziahziah di dinmun in a omta.

Press leh Media lamte leng bangzah hiam omsa himahle uh, zingkal in atamzaw hong tung siausiau uhi. Huaikia ahikei, kawkiim-khawpaam apan in leng School naupang tampi mahmah hong hoh ua, programme a sulum tuan mahmah. SDO/ Mualnuam in ahuamkhak, khaw 18 sunga khaw hausate leng 15 lak vel hong telthei ua, nuamtuan mahmah hi. Huailou in, Nam heutute’n leng programme pichingsak tuan mahmah uhi.

Kum teng a Class – X leh Class – XII passed, mi 40val om gigena khua nanana ah chu, mi leng a kidaih mahmah. Parade Contingent bang 11 hial om venvon tel hi. Dak 9:00 ginma in, Contingent teng mansa diam in om ua, mipite leng field nawl hi’n asung ah hitaleh ki-om phengphung hi. Chief Guest Pu Thangboi Gangte MCS, SDO/BDO Mualnuam in, Parade Contingeng-te ‘inspection’ bawl a, India puanlap (flag) leng kaipalh hi. India puanlak kaihpalh ahihtoh kiton in, National Anthem lakaih in mutging khat hong kimuut vengveng hi. Huaikhit phet in, March past in zuingal a, Inspector SK Haomang, OC/ Thanlon PS in Chief Guest kithuahpih in, Contingent-te apan ‘salute’ la uhi.

Hiai hun ah; Thangboi Gangte, SDO/ Mualnuam in thu tam a genkei. India in zalenna ngah mahleh, SDO/ Mualnuam bial mipite’n, zawnna leh haksana tuamtuam apan zalenna I ngaih naikei uh, huaite apan zalenna ngah poimoh mahmah ahihden leng gentel kha hi.
Eh..Government Teacher-te’ ‘Attandence Record’ leng ama’ kianga submit teitei diing in leng ngen ngal hi. Pragramme hunsung in, Organisation tuamtuam leh School tuamtuam apan in Special Item tamkhoptak lahkhiat in om a, Zoudawn ate siamna leh thilhihtheihna in, Lamka zaang ate phalah tuanlou ahihdan hon ‘proved’ khe chetchet lel ua, mit tai mahmah hi.
Tuaban-ah, Socio Economic and Educational Trust (SEET) Chairman, Pu Dr. R Sanga in hun hon zang a; SEET project pulakna hon nei hi. Hiai project ah, SEET in 2016 apan School naupang asiam tungtuan mi 6 (Class – VII ah 3 + Class – VIII ah 3 ) kiang ah Scholarship piaksawm ahihdan hon gen hi. Naupang kuapeuhmah, hiai hamphatna leh panpihna tangtu hithei dinga panla chiat diing in leng hasuan ngal hi. Huai kawmkawm in, mi tamtak in a lunggulh uh ‘TUILIMLUI TUI’ hawmna leng hon neingal hi. Hiai Tuilim tui ahihleh, mi sidekkuan natawm in leng, “ ka sihma in hiai Tuilim tui dawnkhaman lai leng zaw, ka lungkim mahmah di hi a…” chihial khop a, alunguulh uh ahi. Miteng dawnsak hikei mahleh, mi 300vel in dawnkha diing un ka na hisap (ngaihtuah) hi.

Khawpi lam ah, tui sukvotna ding in Fridge kizang a, Mualnuam leh Zodawn khua tuamtuam ah bel, a-ommun a votsa mah kidawn khitkhit thei a, hampha khat chu kihimai. Tuilim tui omlou hita mawk leh leng, khawsung mun bangzah hiam ah, Syntex dim in Mineral Water kitung keihkuih hi. Lei angaikei, dawngaih zoh di vual leng ahikei bok. Huaiziakin, puansawpna leh kisilna  di khawng a leng Mineral Water kizang ziahziah lel dan ahi.

Bialtu MLA, Vungzagin Valte in leng thugenna hunsaulou zang hi. Aman agenna ah, khantouhna nasataka a omtheihna diing in, semtu kuapeuhmah in, liangtung a mohpuakna kibaat-te ahibangtak a sepkhiat poimoh masa ahihdan gen hi. Huaiban-ah, SDO/ Mualnuam huamsung a khua te’n, SDO/ Thanlon nuai a omlai sanga, hamphatna athuah a mutheita diing ihih ziak un, hampha I hihdan uh kiphawk ni, chi’n leng genbeh hi. Aban agenzelna ah, 1977 – 1988 vel apan in SDC (HQ) Mualnuam chih in ana omta. Huainung in, SDC Office building leh bangkim om mahleh, a enkaitu diing Mou (Officer) omlouh ziakin , a buildingte kisekhinta ahihdan leng genkha hi.

Mualnuam SDC(HQ) kum 37val ahihnung, 2013 apan in SDO dinga dopsang ahihtheihna dia pan langal in, tamveitak ( 7/8 vei) agelhthoh leh kam mahmah a gen ahihnung a, Manipur Chief Minister O. Ibobi’ deihsakna ziak liauliau a SDO/ Mualnuam piak a ompan ahihdan gen hi. Tu’n, kum 28 lel a naupang leh tangval feltak, Thangboi Gangte,  MCS in SDO/Mualnuam  Hq. len ding a August ni 3 apan Join-ta hi’n gen hi. Athu kia a hunsaklou in, SDO/ Mualnuam huamsung a khaw hausa-te puansan silhsak a, Parade contingent a paiteng leng sum leh kimawlna van tuamtuam piak behlap lai hi.

Office omnaikei mahleh, mou ginom mahmah kineikha ahihman in, Government in leng avanken di hon ngaihtuah fel ua, Vangot dan a leng thildang tuamtuam hon koihbeh ngei uh leng gintakhuai hi. Khosakna ah, akhosa diing mihing poimoh masa hi. Tua a-mi ding omta ahihman in; inntektak a khosa a, kikhualthei tak a omtheihna diing in, tenna ding poimoh kin mahmah hi. Belhtheih nana beel a, kikhual tak a khosaktheih dandan a khosaktouh ngal sawm ahihdan hongen sawnsawn in, lungnopna bukim hon pia abang hial.

Programme bei in, Bawng 4 leh Vok 1 apok a kihuan neekna mipi’n kinei ngal hi. Hiai ahihleh, Independence Day leh SDO/Mualnuam lopna dia, MLA pu’n hon thoh ahi. Ann ka neklai un lawmte khat in, “ Sang, ‘Sakmel Kim Ni’ chih thupi pansan in, tangthu hon gelh ve..?” hon chimawk a, lamdang ka sa zozen. Ken leng, “bang chidan in e…Sakmel Kim Ni..chihmawk..” ka chih leh, “ MLA pu honghoh di ziak a, Medical , Anganwadi , Solkal Sikulpu chihte lawi hong kim duamduam mai ua, huaiziak ahi. Medical lamte bel hundang in leng hongpai zelzel ua, adan om…” chi’n hon dawng hi.

Ka ngaihtuahna apaisau ngei mai. Bangtan hiam ka kingaihtuah nung in, “ I khua ua, Mobile Network toh kibang uh eive maw leh? Mang guihguih zel in, achaang a hoih a honghoih hun omzel..!!. Ahihhanga, ‘ Sakmel Kim Ni ’ va chih hial nadan omkei..?” ka chihleh, “ om mah kei dia….bangziak la, sakmel kim uh himah lou maw?” hon chi teitei hi. Ut in utkei leng genmai angaita. Akiang ah, “ Na innsung uh enkaitu na pa ahi. Himahleh, na innkuan kivakna ding uh sum zongin mundang ah hon omkhiatsan a, na nu’n noute hon enkol. Na pa’ sum lohsuahsa-te zang in na nu’n na unau un hon enkoltou a, na haksatna tuahte uh leng na pa’ sangin na nu’n a theihoih zawtham di. Ka gennop tak bel; tu’n mouthak neidek un la’n, kipaktak a na pa hongpai hizenpi, na nu’n moulopna hong uapkei mawk leh, ‘sakmel kim’ na chithei lailai diam? Na nu’ sang in, na innveng ua nupi khat in hon awlmoh zawmawk leh, bang ngaihdan na nei di? Na nu mudah zou hial di chin a, hon it taktak lou adia aw…khawng chi vungvung hial di na hi..” chihteng in ka dawng hi.

Ka lawmpan bangmah dang hon gennawn tuankei. Theisiam hidi’n ka koih top mai. Ka lungsim ah thiltuamtuam tampi ka ngaihtuah khawm leilui a, kuama’n lah hon phawkpih kei uh. Eite hon kem leh enkaitu di zaw, tawbou gik keihkuih hilou a, zang velhvelh mah I poimoh uh. Ahihhang in, innsung ngaihsak manlou zen a, thildang buaipihte zaw, a tate natawm un leng ngaina lawmlawm diing un ka gingta kei. Midangte nu peuh, ‘nu’ chi a sap nadan omlou ahihziak leh, ‘nu’ hihna tangsa paihkhiattheih himawklou ahihziak a, ‘nu’ dia pangthei hamham khenkhat, igam uah tampi om di’n ka gingta a, ka pawna velvul mawk ka chi.

Huaiteng kia ngaihtuah leng phave. Nidanglai in, thauvui-thautang in I kikaptuah ua, tuhun chiangin ahihleh; Football peuh in I kikaptuah theita ua, kipahhuailua chi ni. Ahihhang in, thilteng ah ahun omvek ahi chih thei ni. Teacher dia laak ihih leh, Teacher na I sem di ua ( School om liai nakleh), Tate enkoltu I hihleh, hoihtak in enkol ni. Tuhun a I tate I nelsiah leh, honglet chiang un anuai uah I kuun kha diing uh, chihkhawng ka ngaihtuah kimlaitak in, ka gari tuanna bang ua kigelh, “ Kuapeuh genthei (mizawng) kahna a abil hum tuh amah leng akap dia, ngaihkhiak ahikei ding hi “ chih, Paunakte 21: 13 aa kigelh hongsuak dundun mawk a, mak ka sa zozen.

Ka theihlouh kal in, ka ann ana bei a, himahleh ka vadoh nawn tuankei (ann duhtha leng suaklou top). Innlam a pai in ka kihahsiang a, vante guang in, Lamka lam zuan dia mansa in ka om ngal hi. Huchia’a ka omsung in, ka tuanna di gari hongpai hi. Nitaklam, dak 12: 07 vel hi’n ka thei, “ Mualnuam Ah I-Day Lopna Thubuai…” chi’a, mite gen vengvung dia ‘Thubuai’ nengchik leng omlou in Mualnuam ka nusia ua, nitak dak 6:00 vel in Lamka ka tungkik nawn uhi.

Laigelhtu’ Lungsung Pan:
Tulai khovel I et leh, “ Thubuai, Kithahna, Pimang, Pawngsual “ chihte lou in, kuamah’ lungsim abun nawnkei.  Huaiziak a, “bang thubuai om adia aw?” chikawm leh, theinuamtak a na simsuak teiteina ding ua, “ Thubuai “ chih kammal k’on zat chiitchiat ahi. Hiai ahihleh, “ Report “ bawlna dan ahikei a, keimah mimal a ka muh leh ngaihtuahkhak khenkhat k’on gelhkhiat lel ahi zaw. Kuamah genna tuam ahikei a, ana kipiakbawl teitei i-om u’leh, eimah thuthu hi.

2008 – Ka Kipak – 2015