‘ITNA’ laikhak nunung (last ‘LOVE’ letter)
By jamin h vualnam
 
Khosiat/hoihlouh tawh bangmah leng kisem theilou ding ahih chiah chi’n Inn a TV en kawm a Bench tung a kalup zenzan leh ka ihmu kha zozen hi.Ka khanloh in electric gin-omtak a ahih ngeina dan mah in ana mitkhin nawn hi.Sana ka etleh sun dak 12 ana ging a,keileng kihah siang a Book Room/laibu zuakna vapha zualding chia kapawt khiak leh Gate/Kongpi ah post-man/dak-hawmpa toh kakituak phut ua,aman leng letter khat hon ensak a,hiai kua a nathei kha hia? chi’n piaktoh hon thuah hi.Kenleng ka et leh kei ading ana hi a,aw…kei ka hi,kakipak lua chih toh phel/hon kathuah ngal leh athu,’ITNA’ laikhak ahi chih katheih man in,innsung a lut thaknawn in ka room ah,bangthu bang la hiding hiam chih leh kuan koi apan a hong khak hi hiam chih thei ut a lupna tung a thallup sa a kasim leh:
Itluat leh Kakinepna U ZOMI,

Hunhoih leh manpha,chidamna leh nakiang a Itna thute,lungsim a vaibang thamden leh sun-nitum,zankhawsawt a maimit laukha a luaiden nahih dan gelh thei dia hon panpih leh vualzawl tu Pathian min kaphat masa hi.Nang vang leh ibiak Toupa panpihna te hang in dam in ka awm a,nang leng tuabang a awm sam dia kong lamet man in kipah huai leh lung dam huai kasa hi.Ka-it U Zomi,tulai a kapuak gik leh ka vei mahmah ikal simthu tamlou kong gen dia,hundang a nahih sek bang in,hehpih natawh hon nasimsuak sak a,hoihtak a hon ngaih khiak sak a,honthei siam di’n aneem ngiingei leh deihthawh tak a itna tawh kong ngen masa hi.

Theibang sen a mel kithei lou himah le hang,muhchil pan vang ngaih leh ann bang ka itt,na tongdam neem leh na-itna naubang kapom chim louh,nihgel lungtuak laitual le’ng a ngabang heikhawm,sabang takhawm a simthu khaubang sutkhawm houlung tuak in singdang englou mi zatam lai ah,Sian hawmsiam hi,loubang khual a machiang hon suanpih nih gel itna.U Zomi,ni-le-kha,hun-le-kumte hong kihei a,iki ngaihna leh itna ka’l-simthu leh hunte bang hongsawt ta a,kei adia nahoihna leh chitna,gin-omna leh nasiamna,loubang a nong khual dante mu a katheih chiang in kipak petmah ing.Mel-le-puam,hihtheihna leh chin-na,siamna leh pilna,hoihna leh suanding kinepna kei ah omlou hizong leh,apaalzaw,chinzaw leh suanding kinepna a lungtun huaizaw,etlah-huaizaw leh kingakna taak zaw singta zatam lai a,kei nong itt a,chi’bang nong te’l chitchiat kalung dam in kipahhuai kasa a,lehlam ah kisuan lah na in ka dimhi.Non panpihna,nahon duatna leh etkawl siamna liau liau a,a chinglou ching a honkoih,bukim leh mite lak a hong zahlak saklou nang mah nahi.Kong gensa bang in kei ah bang mah suanding a awmkei chih leng natheihsa ahi,neih-le-lam,pilna siamna,hoihna leh chitna himhim kaneih louh lai a le’ng hon itt-tu leh hehnemtu nang mah nahi.Lungkham mangbat katuah hun in,chimoh genthei leh liang vai a ka om hun in,kingaisia leh lam-et bei a ka awm chiang a hon khamuan leh hon hehnemtu,kei adia asak akhang a diang,azu-aham thuak a,gim-le-tawl khoksalou,kei a dia nathuak hun aleng maizum mailou leh gin-omtak a nong itt veve ziak in kakipak a,kong ittna leh ngaihna te lian in khang semsem hi.Nang bang a hoih leh chitna adim,ittna kiching leh muanhuai,lungpi gel leh zaidam,apaalzaw singdang te’n ahon lohnop lai ua,keibang leltak a dia nongpian sese,hampha leh vangpha kakisa a,huan zehzum lou leh musit mailou a keibang tualniam nong itt a nong ngaih khak sonson ziak in kipah thu asang penpen leh ittna thuk penpen in kong itt tontung hi.Tuaziak mah in mizatam lai ah nang vang in mipi katang tuam a,nopleng kasa a,kipah na in kadim hi.

Nang,kong itt a kong ngaih man in,chik mah in nathu kanial in kong manglou ngeikei a,ittna ziak mah in anuam ah hi’n,ahaksa ah hileh,nang ading ahih a nang lungkimna,nakipah nang ahih nak leh bang kim ah nang adia kimansa in ka-om gige hi.Chikmah hun in nang hon bawlsiat a,lungsim sia neilou leh suk mualphou ding lungsim in ka neikei a,huan sawm leng kasawm kei himhim hi.Nalung kimlouh nikhua,na nguai mahmah hun leh natha azoi ngoih ngoih nikhua in,hon kipahsak leh suk lungkim kasawm gige a,huchi bang a na awm khak ding kadeihlouh man in,kahih theih tawpkhawk leh kapanlak theih na zahzah in nang adi’n kong kiphah gige hi,huai leng ittna leh ngaihna ziak liauliau in.Naheh a nalungkimlouh a nong nuaksan ding kalauh man in,na ut hunhun in katung ah na-utdandan in kong gamta sak in kong kidawh a,nang adi’n kataksa tung tengteng it neilou in na-ut leh dah in naki mawlpih a,nalung akim chiang in,tua in keileng haksa sakawm pipi in kalung dam veve hi,aziak chu maw kong itt luat man in.Kasiangthouna natawm itzoulou leh kembit zoulou in nang ading,nalung kimnang ahih nakleh chi’n kong kiluikhe zelzel hi.Huchih hun chiang in nang,nalawm le vual,veng le pam,namdang,midangte lak ah kiphatsakna,chet-theihna,kihih sakna leh nuaisiahna in nonzang a,a khenchiang in nazumna liahkhuh ding leh na maitang leldi’n nong zang khasek hi.Himahleh huchih hun inleng kong itt ziak leh ngaihziak mah in,phunlou leh dai dide in kong lungkim louh santuan kei hi.Akhen chiang in kataksa enlah lua,hawmthawh leh kipahpih lua ihonsak chiah,Ui leh Ak bang mai in nong ganhing bawl zialzial a,kataksa tung ah vuakna leh zeepna maliam a kihem muhtheih ding in a om hi.Nna sa in haksa mahleh ka itt pen ka ngaih pen leh ka kinep-pe’n lungkimna ahih nakleh chin gentheihna te thuak mualsuah kasawm teitei nak hi.Tuakia lou leng,singpi noukhat,kuva haikhat,laizial tawnkhat,zu noukhat/nounih khong lel in,nang mah kamsung leh gilsung kia khual a,kei na itt leh na ngaih pe’n ading leng khual banlou leh lungsim a gelpha lou hial in ka taksa etlawmna leh limchitna,hoihnate tawmchik in nong khotsak/zuaksak thepthup zel hi.Apautheilou,lungkham theilou,hehthei lou,khasia a thangpai theilou zaw kihilou mah hiven maw…nang kong khual man leh nakipah nang ahihnak leh ka chih man lelhi.Kamel le puam,kamin leh kei mahmah zang in nang mimal leh na innsung hamphat naang kia in,vanzatdin zulhzautak,duh-amtak leh thanghuai tak in nongzang a,na phattuam pih petmah hi.Huchi pi inleng nang ading ahihnakleh chin,haksa,gentheih na leh zumhuai hun in kaki iip teitei a,diklou sakompi in kathuak teitei hi, Itna ngaihna leh lametna ziak mah in.

Himahleh,kadawh zawhman hia,kadaih dideziak hia,ka phunphun louh man leh ka migitman hia,ahih keileh ka haiman leh kamawl man,kei thulim louh ziak hizaw hia,aih keh na-ut le dah a nong soisak a,nong kimawlpih theih ziak hia,ka thei siamkei.Nanglou ngal chi’n tong nongkum a,na it-te tawh nongle’n sanzel..!..tuibang gawm a khawkhal aktui bang nonglak ut/nuam louh.Zulhzautak,duh-amtak leh huaiham tak in,nang mah nopsak nang leh hamphat nangkia zong in,singdang,paal dang Ui-huk bang a sukzuih touzuih in sim-le-mal,kawlgam vaigam ah naphe zualzual hilou maw.Kamsiam leh pilsiam tak a zuau thu leh kilomtak a gin-omlouhna tawh,na naknuai kamsiam in nong khem gige chih leng ka haih hetkei.Kei tung a noptaal a,ut leh dah a nong chalai nate deih khoplou leh lungkim zoulou nahi hia,ahih kei leh naduh zah leh deihzah a hon pekham zoulou kahi zohia leh?,huchi lomlom a thangtak leh zulhzau tak a nakhosak zelzul tel.?!!!.Muh masak muh nunung,adik le diklou,ahoih leh hoihlou natawm khual lou leh poi salou zen a,kei hon deihkhop lou a,a zawng ahau,aneu alian,midang sadang,khual lou a,amau te a hazaatna,deihgawhna leh duhgawlna tawh na suhsak/guksak a,na thangtat khum veu.Midang te’n leng nang bang a,it leh ngaih,kinepna leh duh thusam nei sam ua,hinkhua leh damsung ahithei tan a nopsakna leh khantouhna deih a,utchiat uh ahi chih na theihsa hilou maw?.Kei tung a na gamtat bangbang in nang tung ah midang hong gamtang le uh nakipak diam?Ahih kei leh tuabang in nasanggam te tung ah hongtung leh kipak leh nuamsa in na nuinui dia hia?Huchi komkom aleng,kong itt kong ngai chi’a zumhetlou a tong hong lel-lel ngam lai neita? bang achia hon khah khia a hong zalensak mailou neita?Kei leng nang bang a hinnna,sia le phathei a mihing khat kahi sam hilou maw?.Paukeina,poisakeina,bang mah gen ngeikei na chi’a hon nopneh nahi lel ve,itt itt itt…ngai ngai ngai nong chih ziak in akineih,ka taksa leh keimah vanzat a nong zat nopman lel in maw?...Kalungtang leh ka hinna,kana’kna leh katheihna,kamuhna leh kazakna te’n hoihlouhna bang mah neilou ua,nang asang mah a hoihzaw leh zat-theih zaw ahih mel kuan athei a?Haksa pileh zahlak pi a,genthei tak leh thuakzoutak a,Nong kibawl hoih theih a,nahindan,na gamtat leh na lungsim,na nnasep leh na nektaak zonna leh na taksa mahmah hong kilamdan ding lam-etna a phunlou paulou leh dai dinden a,thuak hamham kahi chih thei le teh.Na zulhzau nate,na thangtat nate,na zuau gengente,na nekguk takguk zelzelte,na awmdan leh na phiat velvul dante,na gin-omlouh nate,na duhgawl nate,na huaiham nate,mi nahazaat nate leh na nek leh na dawn te mahmah a nong kibawl/siamthak theih khak leh kachih man a,atheilou,amulou,azalou leh phawklou om a om kahi zaw chih theithak le teh.Kahoihna,ka et-lawmna,kalimchiitna,ka sianthouna te tawpkang leh negai dimdem a,kaguh kataang tep tum dimdem a,singdang palda’ng etlah nangteng hon nethep a nemual gaivek nahi chih theithak inla;huan huchibang a paaldang leh singdang ban ah,veng le pam,beh le phung,chi-le-sa,mipih khopih te dawnding leh nekding te haza a deihgawh leh suhsak a,zulhzau hinkhua leh thangtat a nahinkhua nazat nawn louh kong ngen petmah hi.

Huaiziakin,singdang/paaldang te’n zong kavang zubang lounuam a hong philphil/kunkun/eu-eu man un,ikal simthu guikhau bang a zam sau/suak theih nading leh,singdang paaldang englou leh taksuah a mawngsing bang kikawi a loubang itul khawm helhel theih nadia,ittna ziak a kong gen mah ahi.Hehpihtak in lungsim natna leh hehna a lalou a;kei nong itt a nong ngaih taktak a,guabang hing a anglai naubang kipawm kumkhua dia tembang nong deih taktak a,ka vang ningzu bang nong dawn kumkhua nop aleh;hong kisiam thak,kibawlthak a hindan thak a hong hing a hongkhosa ding in ittna mittui luang kom in ko’n-ngen.Tua kong nget na zaw atawpna leh ikal simthu guikhau bang a zamdet ding leh naamtem hiama sat tan-na,nang khut a kinga ahita.Hinkhua ngeimah zang a,zui a sabang nong tat veve leh nang adia,si/bei/mang kahi ta mai dia,kisik a,poi sa a,nong kisiam/bawl thak leh bel kahinna a awmsungteng nang adia mansa leh ever-ready kahi tontung aw…ka iitt ‘U ZOMI’.
Nang ngaihna leh ittna toh Tumbang vuai a,laikuang sawk a,laitual ton kumhua dia,hanlung chiam a,gentheihna leh haksatna namchin thuak a,zum le zah khual zoulou a duang vul gige, nang adia hing a nungta tontung kei’mah…
Nang adia gin-om leh duang vul….

“ZOGAM”