AMASA DINGTE MASASAK
- Singkhanmang Laingek aka Mamang Laingek, BSW

Kristian kichi ngen i hi ua, Sahkhua lam a i THULU a i zat “AMASA DINGTE MASASAK” i chihi thugin Laisiangthou pansan inleng agentheih ding a, khotang hinkhua a ding in leng zattheih hi. Sahkhovai a gending chileng gending tampi a omding a, huchi ahih toh kitonton in khovel kivaihawmna lam ah zong gending chileng tampi mahmah om ding a, huaiziak in tampitelak ah tamlou i thulu zang in mimal ngaihdan khovel kivaipuakna lam awlmohna ziak in gelhtheih dandan in gelh leng chi i hi.

Amasa dingte masasak i chihna ziak ahihleh bangdang hilou in, tulai a khovel vai a Heutu di’a kisate a diing bik (focus) a, geltheih dandan leh ngaihdan tamlou gennuam ihi.

Zo tate hinkhua ahaksa ahi chih haihvual ahi kei a, zodawn lam awlmoh in Student Organisation-te’n “Teach Zodawn” chi in tumalam in pan ahon la ua kalsuanna thupi ahihdan haihvual ahi kei hi. Zodawn a khosa valnou tamtak khutsiam leh nasep azu-ahaam thuak khawksalou a khosakna haksa ahihman in chitaktak in pang uhi. Migam a teng ahi a, huai toh kitonton in Heutute di’a telte’n bangtan in khosakna haksate i mi-le-sate ading in bang nna asem ua chi leng gending khutzung kaihtheihleh kilawm maimah hi! Khosakna ahaksat ziak mah in i gam hoihnate taisan in belhding neithei leh sum-le-pai tamlou neizekte Lamka zaang ah i pem luut zungzung mawk uhi!

Intum suangtate’n amasa dingte a masaksak chiang un innsung a ding in navakna tun hi. Huchi hilou a, amasa dingte masasak lou a, innsung Pa hingalte’n haksatna tamtak tuak uh ahi chih “tang tung a kho om seltheihlouh” chih bang in midangte mitmuh in chiang mahmah hi. Adik-atang a amasa dingte amasa a koihte mailam ah navakna in ngak hi...

Nisim 1st June 2015in thilkipahhuai leh chiamtehthamching tukum, kumdang banglou in, India khua leh tui hihna i neihna INDIA Dan Bupi dungzui in mahni mimal deihtelna in kitelna I nei ua, Khanlohna chikhat suak hi.Thil kipahhuai ahi i chilou theikei hi, Amasa ding i masak szsakna ziak ana hi leltak hi! Mipi ai-oh a telching a om na-na-na in mipi poimohnate thei kawm a nna honsem ding uh ahi chih achian hi.

Mimal zalenna chiimtak gel vengveng kawm a i thulu a i zat bang a mailam ah nna hon sem dingte’n a hon ngaihpoimoh mahmah uh i deihthusam ahi.Nidanglai chizenmah leng, neulai khawng a, MLA ding kituhna aom chiang in i langlamte ngaihsak louh ban ah gawtna dan in a thil kilawmloutak a nna ahonsep uh tu hun a, tua i khanloh toh kiton in a ching penpen in khentuam neilou a nna ahon sepngei uh i duhthusam ahi! Aziak ahihleh mipite’n KEI hon deih a hon tel uh ahi a ke’n leng amau (mipi) a ding leh i Gam a ding a sithunamzen a nna ka sep ding ahi achih ding uh ahi chi nuam a gen uang deuh i hi.

Heutu diing a telching a omten mipi theih leh zaak a sepsuah ding a agente uh haih lou in nasatak in pan hon lak ngei uh ilam en! A hang bel mipin ngaihtuahna chiimtak a ahoih ding chi a muangtak a ahon telching uh ahih dan manghilh lou in khentuam omhetlou in A chiing zaw sam-sam in hiai/huai in hon vote lou chi a nelhsiah chihte I Khanloh toh kitonton in beita hen chi ihi. Deih leh muangtak a ahon tel uh ahi chih ikitheih moh bawl a mahni hamphatna diing lel a nna ahon sep uh a ginhuai kei, a ziak thil chiamteh tham ching mimal zalenna a i vote manpha ipiak ziak in, A ching zaw samsam in khentuam neilou a nna ahon sep ding uh, mipi mai a sepsuah ding chi a achiamte kia hilou thil dangdang ah leh a honsep suah ngei uh ilamen hi! Mipin kei hon deih a hontel ching ahih man in ken ka mipi te adding in bang ka semthei a chih ngaihtuah ding ahi.

Economics lam siamte’n “human wants are unlimited” a chih bang un, a haute’n leng atamzaw sem deih, nekzonna nuam deuh leh a sangzaw sem deih…Asangzaw lam delh ding mah ahi.Pasian phatna Laa a“A sangzaw lam ka delh tawntung” chih pen khalam hinkhua toh kisai deuh himahleh khovelvai ah leng a zattheih a, huchi kawmkal ah adik-atang a a sawngzaw lam i delh ding hun lawta ahi sangam!

Tutung a telching a hong omten sangzawlam mipite ading a nna ahon sep uh ideih uh leh ilamet ahi, Khovel ah thil tengteng ah Electronics Company ten a sangzawlam delh tawntung in product te uh Mobile, Television leh a dangdang akha akha phial in a product khempeuh te uh upgrade tou ziahziah mai uh hi! Kitaitehna sangmahmah a siamsinna lam a leng kitaitehna a saang mahmah a, Chi zen mah leng Pawl sawm (Cl-X) 2000 kum in ka zou a, tua hun lai in, siamsinna lam ah Cl-XII cut off mark aomkei a, Siamsina school ei utna munmun ah Admission kibawl thei hi; Himahleh tun Higher Secondary hoihdeuh I deih leh a tawmpen in 70% bang mu ngai mawk hi!

Nam tuantual sapsap ah leng Manipur ading in Khopi nihna ah ipang uh, Himahleh I niteng poimohte (basic needs) Electric (Power), Tui, leh Zodawn lam ah Lampite khantouhna ahong om theih taktak na ding in hiai teng beek kiningching a ahong om masiah Khantouhlam manoh naak sang in kiakniamna lam nawtzaw suah theih ahi chih thei kawm in Bialtu MLA/Minister ten pan nasatak a hon lak uh haibang ngaklah huai mahmah hi!Pan a la kei uh chihna a hikei a tuasangmah in honpibawl laile uh chi i hi.

Tua toh kiton in siamsinna asang deuhdeuh  toh kiton in Nam-le-Chi ah leng kitaitehna lamchi tuamtuam ah kitaitehna nasa mahmah ta hi! Politics vai ah leng Hetu Diplomacy siam zaw penpen tuitum chihna ahong suak a; Phaizang om Talpaakte nasan in Lamka ah gam bang nei mawk!! Tua ahih man in Heutu ding a ahong ching penpen in, igente bang chin I Gama a pat in ikituan khe sak thei dia chih, gel vengveng kawm a Heutu hong hiditen, Amasa dingte hon masa sak le uh thil hoih ahi ding hi. Nidang deuh 90’s lai bang in Talpakten Churachandpur mi Ka hi ichih chiang in bangtan hiam a ahon huphur uh, tua toh kitonton in Sorkal nna semte lou ngal minautangte bang in phak ngam din a koih kei uhi. Himahleh tu chiang-chiang in NEW BAZAR kia hilou in New Lamka tantan ah bang dawr, Workshop etc,. hon hong ngam mawk uhi; Nidang in Kuuk-kaak-e le chingam lou in Talpak pau siangset in Kholai bang a chiimtak huai zen dikhop oin pau kangkang ngam mawk uhi, hiai te’ bang chi bang a panla di?? Imphal a amau pau naltak a pautheilou te’ bang HAO MACHA chih itan tawk suak mawk!! Ngaihtuah thamching ahi; ei hoih hawmna pen Amau Naam piching zaw leh siamsinna ah ana saang zawte ahih ziak un a luungsim put uh theikawm kieukiau kawm a I Heutu dia iteelten chiimtak a ngaih tuah a, tu sang mah a Khang hongpai sawn na dingte ah tua bang a inn tektak I tuu-le-Ta tethuak ding ngaih ngam huai hetlou chauh lou in ima ban diing uh…

2001 in Khodungsei (Mizoram) ah Ka Papi tapa Upa pen in zi aneih di ziak in Guite Road tawn in ka pai ua, Lampi hoih lua in I lu (head) bang in Gari tuung bang bangzah vei hiam kiphutou  zetzet mai hi, nuam mahmah tellou ahi! Tuivai Lei (Bridge) I hon kan a Lampi kikhe geih! Dum kiekiai mai, Lampi vantungbung lam manoh di bang khop in tou mah leh lampi ahoih ziak in Gari tai henhen mai hi, tua kia lou in lam nawl a Bike khawng ana khawl mawk maksak na a dim! Khodungsei ka tuun phet in Ka Nupi ka dot leh Bike a loukuan uh ahi ahon chi a! ka ngaihtuahna ah, Aw bang hang a hichitel a kikhetel ihi hiam chih in lungsim tawng a hondot hi!  
 Kuate hiam chihdanleh, tuailai tunglai in Ki Gos nasa mahmah zaw ahi ding a (tua Gos lou chihna hituanlou in). Laisiangthou a valnou Timothi bang deuh in! Unau melhaih kipatmadeuh 1996 December in Guite Kual ah kei toh sim in mi nga (5) Pasian thu gen in ka va kuan ua, Tipaimukh Lampi (NH 150) lam tawn in Thanlon zuan in Lamka apat zinglam dak 06:00 a.m. vel in kakipan khia ua, khomial in Thanlon ka tung uhi. Thanlon apat Guite Kual a Bukpi Phailian, Songtal, Mualnuam, Sialbu, Ngalzang, hiai teng khe in khatvei mawng mawng khe a pai ka tupdan uh ahih ziak in, kipai tung vek hi! Hiai ka hon genna ziak ahihleh “Zunlouh Zogam” zaw ana hipetmah ahih dan ahon theichian sak mahmah dan eiveh!. Tuailai tunglai ahihman in kithei hoih mahmah hi. Himahleh tuchiang in bel Bukpi tan bang nipilai a khomial ma tham in tuntheihta hi. Bialtu heutute’n nna ahiding bang leh amasa dingte ahon masaksak ziak uh ahi chih theihtheih hi. Gensau zek lai leng, i basic needs-te uh lak ah power (electric), lampi (road connection) leh school, hiaite tua sangmah in hong hoihzaw leh.Thil hitheilou omlou hi; tupna a om naknakleh! Talpakte’n Smart City din Bishnupur suahsak sawm ua, himahleh ei a ding in bel huai lamlamleng genphak hinailou phot. Ei ading in bel hiai atung a i gen teng hong hoih peuhmah phot henlan awlawl a adangte hong piang mai ding ahi.

Zogam nuam huihkhi siang nawsia a Lamka zaang a haksatak a nek-le-tak zon saang in hoihzaw di lametna ziak in Pupa satsa  Zogam taisan in Lamka ikiben souhsouh ua, huai leng sum-le-pai neizek nekzonna kibulphuh na ding tamlou ban ah belh  ding tanau hoih leh inn buldeuhte ki hi lel zaw mah. Sian in ahon piak Zogamnuam ah thil manpha tampitak om ahih dan kei mimaltak in ka thei a, huaite Khaw hausaten chiimtak a gelvengveg a, tua igen Thilmanpha tampipetmah om ahih man in lam chituamtuam ah I gam leh leitang hon enlah igentak ten ahon enlah mahmah uh ahih dan chiang mahmah a, lam chituamtuam a hong tentheihna diing uh ngaihtuah in nasatak a panla uh ahih dan kichiang mahmah! huai ziak mah in Suangtu kibangte kituahna lampi zui ding in heututen pan a ahon lakpen uh mipi in theisiam kawm a kithuahpih ding ahi, Heutu hita zawng in amau hihtheihna tan in abatlouh te, MLA/Minister tan in abatlouh uh a om leh MP tandong a tua sangmah a pan nasatak a laak hun lawta ahi chih theih chet ding ahi hi. Heututen mopuakna aneih uh toh kitonton in mipin le kithuahpih kiphamoh ahih dantheih siam mahmah ding ahi, Scientist tamtak keimimal in kakitheihpih leh kithuah pihten I gam ah flora and fauna leh medicinal plant tampi petmah om ahi chih theih ding ahi. Tuaziak mah a thil hitheiloupi talpakte’n i gam hon etlahsak mahmah uh ahi chih thei Medicinal plant tampitak om ahihdan ahon hilh ua, tua kia lou in India gamsung a Scientist kitheihpih ten, hiai /huai hiai natna ding a hoih chi ziahziah maid an uhi! Tua I gen thei kawmkawm a, panlak hun lawta!Huai ziak in tuate haih lou in panla hita leng Pupa satsa Zogamnuam hong pallun lou ding chithei lailai ding idiam? Mailam a I tu-leh Ta ten ahamphat pihtheih na ding ua imohpuak na chiat semsuah ding ahi chih theina zenpi in kitheih louhsak ahun nawn kei hi!

Huai ziak in I basic needs te Lampi hoih ding, tua ahih man in I Gam zuun uttak tak ten hoihtak a kikawm tuahna ahoih kei leh thilhoih gengen mah leng “Vailak zunthak” toh kibang lel ding hi! Ki kawmtuahna hong hoih peuhmah leh ZODAWN a teng imi isa ten Hamphat pih mahmah ding ahihdan thei kawm in Pawlpi heutu hin Bial sung a Heututen nasa zawsem a pan ahonlak ngei uh I alamen hi.80’s lai in “Helicopter a zawngtah loh ding” chih chi bang ana kizapha phazen sam in thilhithei did an a anakingaihtuah zezen danahi! Helicopter in zawngtah valou hial kei zong in  Tuma a Sialkal Taang a Mizoram Chief Minister Pu Lalthan hawl a, bang  a I makai te autna munmun uh amau mohpuakna munte ua le private a Helicopter a zang ngeikei diing uh chih kuan ichithei tuan a ahia? I Gam hausakna zangphatuam leng singdang kua I engtuan dia??
    
Huaitoh kiton in nekzonna leng tua sangmah in  I Gam ah neek piang law mahmah ding ahih dan chiang mahmah a imaban ah a sangmah a nektak zonna ah haksatna tampite hon dawng zangkhai mamahmah ding ahih ban ah    European gam neu chikchikte a Ropeway omte khawng bang leng pianna vangkhua Zogam nuam a om thei lou ding hi tuanlou hi. Mailam ah zodawn ah, singtangpa nekzonna khampiang nawnlou ahihdan haih vual ahi nawnkei, huai ziak in Amasa dingte masasak lehang Zunlouh Zogam hong pallun ding hi..

Nisim 26th May 2014 in British-te opkhumna nuung a India in  Zalenna ngah nuung a a15na ding in Pu Narendra Modi in India hon makaih hi. Khovelvai a ding a chiamteh thamching Pu Narendra Modi in Oath a laak ni in, India melma lian mahmah lak a khat Pakistan Prime minister Nawaz Sharif leh gam dangdang apat milian tuamtuam in leng va uap uhi. Hiai i gen zenzenna ziak ahihleh Modi leh akaih zatamte’n North East puah phat ding, Look East Policy dungzui in nasatak in pan honla uhi. Hun sawtlou nung in Rail ngei leng Manipur ah honglut ding a, tua huntak chiang in Lamka khua a vai mahajon tulel a omte (muhsitna hilou in) akeep lel hi ding ua, amaute ban ah Business Tycoon tamtak hong lut zungzung ding uhi. Huai hun chiang in eite’n koilam i nga ding ua? I gam sung mah a namdangte’ suak a pangding in i kiphal ngal di’a hia Unau?? kingaih tuah thak mahmah ni? Pu Modi in amasa ding masasak in, nisim August 28, 2014 in PRADHAN MANTRI JAN DHAN YOJANA kichi India a khua-leh-tui hihna neite a ding in BASIC BANKING ACCOUNT hon vek ding ban ah, tuahsia tuak mizawngte ading in Bank Account neitaphot’ten Insurance ban ah sum chengkhat lel leng omlou a Bank Account nei ten overdraft Rs.5,000/- lak theih, nektak zonna lam a haksate’ ading liauliau a abawl ahi hi. Tua kia hilou in  Aadhar Card nei khempeuh tengteng a ding in RuPay Debit Card nuai ah insurance cover Rs.1 lakh tan zalzou thei ding in tualniamte a ding in ahon bawksak a, hiai bang Pu Modi tupguhna leh amasa ding a masaksak ziak ahi I chilou theikei hi.

Tu ban khang nih hong pai leh Singtangpa lou bawlna (Jhuming Cultivation) ah khampiang nawn lou ahihman in i gam leh leitang bang chin aphatuam in i zangthei ding ua? Heutu di’a telching a omte’n mipi a di’a teel ahih uh dungzui in amaute’n kawkmuh a a makaih ding uh ahi.

Pu Modi in Look East Policy hon semsuah taktak ding ahih ziak in Talpakte’n nasatak in panla panta uhi. Nidang in Imphal (Phai) ah Hotel thupi lua omlou hi. Talpakte nasatak a kisingsa in Hotel 3 Star tan bangzahhiam hon bawl khia uhi. Tua ahihman in i gamsung mah a mi sal a om ding in i kiphal ngal di’a hia? I Gam a leitang a nektheih louh ahihman in bangchi in pan i la thei a? Khosakna nuamzaw deuh a om theihna ding in zodawn a omte’n bangchi in pan ila ding uale? Pupa satsa Zogam ah thil hihtheih tampi om hi. Etsakna ding in Farm leh thil dangdang, I gam a piang haichi leh thil dangdang gamdang a i sepsuahte pekhethei ding khop in bangchi in pan i la di’a tua igen teng ahi theilou omlou ahih dan chiantak inthei thakthak ni. Paite Khonung pil chih iloh hun ding ahong tun nawnlou lai in!

Ahih leh bang chibang a panlak di? Igam Leitang ahoih ahihdan igenta,  Leitang pen a nek anek theihlouh ahih ziak in bang chibang in pan I ladia chih kingaih tuah hunlaitak ahi chih thei le hang! Kho hausa (Chief) te bang in lungsim kihong tak a ahong om ding uh iduhthu sam ahi, A hitheilou dingpi duhthusam gengen sang in thil hithei dingte duhthu sam genzawk ding ahi Unau…!Farming bang bawl leng I gam leitang in atam zaw kingeihlouh na neilou hi! Nahtang huan bang, sing leei bang leh adangdang, huan ah hun sawtlou chik in Behiang bang Economic center hong suak ding ahihna a imu laite khanloh hun mahmah ahi.

Central lam a pat a nasatak a phut ahih dungzui in Moreh Economic Hub Center sang mah igentak Behiang hong hoih zaw ding hi lunkituaktak a nna isep khawm nakleh nakleh! Tua ding in Tua ahih man in nasatak a panlak hun lawta! Sum hau Mahajon te bang in Lamka Khopi bang ah Hotel 3 star tan beek nih/thum bang hong le uh Foreigner te bang i product la ding in ahong tuung theihna ding in nasatak in panla thei le hang ei a ding in, Pu Modi in puahphat ut ahih toh kitonton in South East Asia lam bang ah I product te nuamtak a supply thei ding ihi. Tu hun taksalam a khanlohna hun ahi chih thei ni…