'Back Subject' Hauhluat Khak Di Lauhuai Lua Eive...!!

Written By: K Lianthansang

School leh College kaikha ngei ngen hi di'n kon koihvek phot di. School leh College i kailai in Sinsaktu(teacher) neilou i om ualeh lamdangtak ahi di. Huaiban-ah, Teacher tuamtuam in amau siamna lam chiat Subject laa in sinlai naupang-te lai hilhzel uh chih i theihsa uh ahi nawn.

Huchia, Teacher tuamtuam in amau siamna lamchiat lai  ahilh chiang un, sinlaite'n le'ng phattuampih mahmah uhi. Huai ka chihna bel; Mathematics siamlou pi, Mathematics lam hilhska mawk leng a buaihuai ding(naupang teng subuai gai di ahi). Huaikia hilou in, Mathematics siam mahmah khat in Political Science leh Economic subject lam khawng le va buaipih leh ahun leh tha in chin leh zoulou ding hi.

Bangteng hileh; Mathematics subject teacher pa'n Mathematics subject lam ahilh hang in, a seppih Economic lam sinsak tu'n buaina nei leh bel a huhthei veve ding hi. Interview lai in, a chinna ding in bel a hihtheihlam agen a sekei. Himahleh atak gam ah a master na mah naupangte a sinsak hoih mahmah ding in ka um hi. Huchilou in sinsaktute gamtai zaak mawk le uh naupangten phattuampih lou ding ua, fail nengnung ding ua, huai subject ah khanglou in nungkik zawdaih ding uhi.

Tuamah bangin; Election vai ah candidate te'n lam tuamtuam ah siamna neichiat ding uhi. "Hiai pa'n Political Development lam ngaipoimoh lou hiale" chihtheih leng i nei maithei uh. Huchi'a Vote zonna ding a ama' hihsiamlouhna pi a gengen louh hang in alawm dang-te' lungtup nungthuap lou ding hipahlou hi. Amau' subject laak lam chiat mah buaipih uh henla, gamteng genkai lou in omle uh student ten a muangzaw di uam?

Economic subject la tu'n zaw, Political Science subject haksa samaithei hi(zilkha lou phot hiven). Huaiziak in azilkhaklouh lam kithei in, zilkhaklouh subject haksatdan a theihluat ziakin, Teacher dia interview hun ah a hihtheihlouh subject hihthei dan a agengen pen sianglou ding hi. Himahleh, English a kigelh nanana zaw, alawmte buaihun in a huhthei zek ding. Aseppih Political Science subject la tu',n sinlai naupangte extra class a laakpih hun in, Economic subject teacher in, a lai ahilhtheihlouh hang in hasotna thu bek genthei ding a, a lawmpa back-up thei veve ding hi.

Tua ahihman in, i master nalam chiat hoihtak a paipih in, mipite  lamkaih leng Economic Development ah leng mipite' mit keuh ding a, Political Development ah leng mipite mit keuh ding hi. Apoimoh lou khuuk-khaak omlou ahihman in, akiton a pai a, banglam peuh a kirual tak a om poimoh hi.

Political Development kia buaipih in, a penpen dan a i koih hang un, daikilkal a mi kuahiam in gilkial-dangtaak ana thuak thei ahihman in Economic Development lam leng poimoh veve hi. Political Development ah 100% hi in, Economic ah 20% himawk le'ng Economic lam a 'failed' kihi leulou ding a, maban suan a haksa giap ding.

Manipur University daan dungzui in; Student te'n 'Back Subject' aneih lai siah uh Mawk khahkhiat(degree mutheilou chini) lou uh hi'n ka thei(theihsual khak leh ngaihdam). Tua mahbang in, Khovel vai ah leng apoimohlou omkei a, Political Development lam kia in Zogam taanvaak lou ding a(Political Science Subject kia in Degree hon ngahsaklou ding a), Economic ah leng hat vekvuk kei mah leng i poimoh ngaih veve uh ngai hi(Economic Subject i laakkhak leh huai a leng i pass veve uh ngai hi).

Tuabang ahihman in, "Back Subject(Subject lohchin zohlouhna chini)" neilou ding in machiang suan ni.
Subject khat kia lunglut ziak a adangte I mualsuah zohlouh a, Zogam i taanvaak zohlouh ding uh lauhuai hi.

Laigelh-tu' Lungsung Pan:

Suun a leitung taanvaak ding in Pathian in Nisa(sun) honpia a, khovel mite pilvaanlouh ziak in tu'n leitung lumgawp in nisa zung(sun rays) bang leng khauhgawp hi. Tuabang mah in, Leitung khosakna ah Pathian in Solkal hon bawlsak a, Government nnasem khenkhat ginatlouh ziak in kineeksiatna in mizawngte sisan a tawpkang toptop hi.

Huaiziakin, Nisa zung(sun rays) apan kivenna ding leh thuaknopna ding in mi khenkhat in LUKHU(cap) khu ua; Government apan mizawngte sisan tawpkangte sukbeina ding in MIDIKTAT mah poimoh lawta hi. Kingaihtuah vengveng ni Sanggam.!! Back Subject Hauhluat Khak Di Lauhuai Lua Eive..!!

3005 - Ka Kipak - 2015