NAHKHOK
By Ginneihthang Guite

Nahkhok kichi vasa neu mahmah, mihingte' ading a phattuamna omlou phial a akingaihsun, asa lah nektham lou khop a vasa neu, zing nisuah kuan a ahaam chiang aleng aw hoih leh lungkhoih ale haam theilou, vasa dang aw hoih leh lungkuai tampite' haam suse thei phet, a aw ging in mualkuam zoulei thawn zou le hisam lou, Emmau lampi dai leh thawmhauhuai takmai a mi nih apai lai ua, lamkiang sawlbawk kawm apan thakhat a lengkhia a, mi a thawmhausak theiphet dia bang lam-etna toh hiai vasa neuchik, min ngaihnat huai pu leng hisamlou Nahkhok kichi Pathian in ana siam adia aw chih ngaihtuah himhim dih..... Bang chi'n na ngaihtuah ale....? Zatna bei, hingman suk heh, hiai leitung ah poimohna khatle neikei chi in na ngaihtuah kha ding hi. Amah pen pianken neuna toh piang ahihman in a tanchin suttham ding omlou phial hi a, pilna lam ah leng etton taak ahihna theih leh gen in omlou hi. Ahihhang in hiai vasa neu mahmah Nahkhok kichi mihingte' adia sinsaktu hi ding a  Pathian in ana siam ahihlam na mangngilhlouh hoih ding hi. Hiai vasa neuchik khat in sinsakna tampi hon pethei ahihlam na ngaihtuah kha ngei hia? Hiai beh leh phung neilou, mi masa Adam in ganhingte’ amin ding uh a phuahlai aleng a mangngilh dektak Nahkhok kichi apan kei' zoudawn Kamsan tuimawl leh Maiteh khuak a kana ngaihtuah khiak thu tamlou taklang ni.

Vasa namkimte'n amau leh amau kihumbitna ding, huihpi vuahpi apan kivenna ding in Bu sep chiat uhi. Hiai Nahkhok inleng bangmah ngaihsutna neilou a lung hin a hing maiding a i ngaihtuah lai in a mailam ding khualna in bu honsep hi. Vuahzu daikai, huihpi vuahpi leh melma dougal zatam lak apan bitna ding leh a kihumbitna ding in gamla pipi apan singteh keu leh alum theithei ding thilte tomkhawm in singkung sangpen leh muanhuai pen le teellou in munkeen diaiduai leh sing lian apou louhna pawnlak a Nahke sing hiangzam ah hon sekhawm hi. A baihlam ding in akiang a nahkhaal teh khawng, bilkuang tehkeu khawng leh tangsam paak khawng tomkhawm zok leh zoubaih ding hina pi in,a kim akiang a omlou Taak tehkeu khawng tomkhawm in mun gamla pipi ah lengkual doidoi se hi. Pianken pilna neilou ahih mahbang in, ama tha hatlouh kitheilou in, kei hon panpih ding in kapi Vakhute, ka ni Pengpalepte omna ve ua chi leng hikha ding hi. Ahih hang in amah panpih ding in a tha hatzaw leh muanhuaizaw Vakhute, Pengpalepte'n a kinep bang un panpihlou ua, a bu tomsa natawm mupite, va-akte'n suksiat sak lezong khawk ana sak chi hetlou uhi. Panpihtu tasam leh beidong kisa sasa in, keimah tha mahmah a lam ding, tu leh ta kaneih chiang a amaute khual a nna ka hahsep dan hon theihchiang ua thupi taka pahtawi a ka om a, ka tate' vang a nuamsa leh lungkim taka ka omtheihna ding in chilungsim kawm in amuanhuai zaw vasa dangte leh ama kibatpih ngoihngoih Nahkhok dangte natawm chiallou hi. Kho-ul tampi seng in hahpan in pang a, a chang in a tate khang a genthei dia kikoih in thanem vungvung sek hi. Ahihhang in a zan zalmang doh-aite san in,ta kaneih chiang a hiaibang gimthuaknate keikia a thuak mailou ding ing a, ka tate toh ka inn ding uh lam ding ing a, ka damlouh hitan ni a ka taten nek-le-tak hon ngaihtuah di ua, keipen innlum a tawldam taka om hiuhiau theita ding chih a ngaihtuah chiang in a kho-ul kai zungzungte phawklou in atha hat semsem hi. Huchibang thute a ngaihtuah chiang in ni khat thu a zou ding, nitak chiang a ka gim ka tawlna tengteng mangngilh a, vakhute, va-akte’ panpih ngailou a ka bawlsa ka inn a nuamtak a ihmu ding chi in tha-ittak leh kuhkal tak in sem hi. Ahih hang in ama ading in phalbi ni tomlua hia, ahih keileh a thahatna in zou zoulou hia, nikhat thu in a butom zou zoulou hi. Nitak khua hongmial in,a zohna chiangchiang bel ding in abu lam honzuan a,nuam in nuamkei taleh, a thagim mahmah ziak leng hikha ding hi, imut nuamtak a imu in zingkal bang nidang teng sang in thouhak zaw hi. Himahleh ka gimlua chilou in zan a, asep maban zom ding in hong kuankhe nawn a, a inn lamna apan simlam Taaklei zaang kichihna, gamsa lian leh vasa tamtakte’ gamtatna lam ah hong kuankhia hi. Vasa dangte’n amau nektawm di zong a buaitak a, aphiat vengvung lai un aman a maban d khualna toh nekdi natawm leng zong manlou phialphial hi. Mittang ke lezong tawm manlou ding khop in hahpan hi. Ama hahpan' lam chiding-sadang ten theihpihlou ua, tulkung leek a tuang Mupi bang in houh amat ding dan leh apian apan a tanlouh a chin sau ziamzuamte a, aphuai gawp dingdan leh asa lum vitvit lai nek phiauphiau ding dan kia ngaihtuah in chiltui kai zen in ana hisap den hi. Tulsing dawn a lungzuan zatam sial a tuang leng hisam lou, a baihsa ann nekna ding om hiam chi a, etlouhna lamlam khawng hisap doidoi mupi in matsawm in hong kisata hi. A hehpih huai Nahkhok in amah matsawm a lungsim sautak ana suangtuah khin mupi om ahihlam theilou hi. Huai mupi in Amau gamtatna zel Taaklei zaang sak a khota naupangte' thangkam a vasa awk a neksak zelte, miksi lungvei khat nekkhak ziak a khosikpi vei a zawngkhal gawp Baibek sa anekte kisuanlahna khatleng neilou ahi ngei ding a, mahni thatang hatna toh kuhkal tak a nnasem Nahkhok sa neksom in mat sawmta hi. Mailam hinkhua ding sautak hisap kawm a lunglawp taka butom a, sing kahiang khat apan a kahiang dang boh a lengtuah zelhzelh, lungkim mel taka la sakawm hauhau a, la khat asak sung aleng laa dang a lungsim a honglut a, a lasak bang khek zihzeh huai Nahkhok in a mailam ah amah man ding in Mupi ana om chih a phawkkei tel... Ma hon sawn zel in, apam a Mupi’ tuanna singhiang ngat chik khat ahon boh a, amah man ding a pan ana khohsa dimdiam Mupi in hun lemtang a la in huai vasa neuchik khat hon boh a, galmat dingdan leh galte apan kiven dingdan kizillou tuak himahle uh amau gel kal ah siamtu Pathian in vaihawm ahi ngei ding a, vangphat huai tak in nahkhok hong suakta hi. Hehpihna bei Mupi in huai vasa neuchik khat amat zohlouh ziakin thangpai kisa in munkhat ah tu ngeunguau maimah a, a hehpih huai Nahkhok in leng Mupi’ tung a hihkhelh nei hi dia kingaihsun in a hun paisate sut kikkik mahleh amohna ding mukhe zoulou hi. Mohna neilou Nahkhok in, Mupi’ gamtatna haihuai sa tuntun ahi ngei ding a, a kihehnep theihna omsun tuh ittu ding Pathian in ahon piak a, suan-le-pak neithei dia ka chikhahtheihna ahon bawlhoihsak leh amah(Mupi) douzou d zah ta kanei dia, khatveitei phuba kala himhim di chi in lam-etna gamlapi khat in hong kihehnem thei hi. Huchi bang lauhna leh dipkuatna thupi tak tuak mahleh Nahkhok ading in a nnasep kholsan theihvual ahi kei a, tupguhna leh lam-etna liantak neikawm in hon sunzom teitei a, nitaklam nitum kuan in hon zou thei khongkhong hi. Gilkial dangtak thuak kawmkawm banah sihtheihna mun apan leng lungke mailou a asepgah thupitak ziakin a kipahna in nehnou sak a, kahnuih themtham hi. Khua ahong mial a, gim leh tawl a nnasem ahihziak in huai nahkhok in nitak chia lengla neih ding le lunggulh zoulou ahi ngei ding a, lumpah in ihmu sukpah hi.

Zan ihmut kham taka a ihmut nung in zingkhua vak ding kawlmong lam hong vak hiihiaita hi. Amah leng ihmu thei nawnlou ahi ngei ding a,a bu apan alu hon dawkkhesak in suahlam nga in abu tungah alu nga pheuphau hi. Sawtlou huchia hun hon zatzoh in ni hongsuak a, akiim apaam apan vasa dangte hongthoukhia in phatna la kilawm taktakte amau saktheih dandan leh amau siamdan bangchiat in hon awikhia uhi. Nahkhok leng abu apan hong thoukhia in a inn lamna singkung dawn lam a kaltou in zaila ngaihnop huaitak hon awikhia hi. Asak a Tuakkhial sing kawm a giak Nahkhok Tal in a zaila sak hon zakchiang in lungleng kisa in na ngai deda phot zezen hi. Namdang leh pautuam apan zaila hong kisa hilou a, ama chipih nungak khangdawng melhoih hunphet khat in asak himawk ahihman in alung khoih mahmah in lunglen huai honsa hi. Maitai tak leh kipezou takin akiang vanaih suk a, kamsiam theihtawp in va houpih ngeingai hi. Huchia hun honzat sung un ni hong sangtouta ahihman in koilam hiam a neek zong a pawt hong ngaita hi. Nahkhok Tal in zong a lawmnu’ gamtat khoheite a et chiang in a lunglai kuai in ngaina mahmah hi. A ngaihtuahna a genkhiaklouh hang in, hiai ka lawmnu pibawl ding ing a, neek ding ann lim kamuh chiang a amah toh nekhawm ding ing a, lungnou thau leh limchi kamuh chiang a zong ka nih ua nekhawm ding, kei ading a, asinlai dawngkot mun a awnlai leh kazi ding a pi ding, ta le nau nei a innkuan piching khat bawl ding chih khawng ngaihtuah in simnuih heuhau kha ding hi. Ahih hang in kawlgit bang a keelpatei lelap chihte toh piangkhawmlou ahih man in bangmah gen ngam tuanlou hi. Nahkhok Nungak in lah a lawmpa'n ana gukngaih giugiau ahihlam theibunblou hi. Innsung khual a maban ding saupi lam-etna toh a gamtat khohei a ettontham ching a, anungta nungak khat ahih man in halh vekvuk lou a, aw nem leh mi tunga kamsiam zat chihte a ama mizia ahihman in huaiteng mah in Nahkhok Tal' lungtang ana la mahmah hi. A genkhiak louh hang in Nahkhok Tal in a itna tengteng pia in a zi ding in deih a, suahlam gamhoih leh nek-le-tak kichinna mun a tangval melhoih khat in ava tuhkhiak khak ding khawng guklauh thei mahmah hi. Huchia Nahkhok Tal inleng a lungsim a dimlet a itna thu Nahkhok Nungak’ kiang ah hon gen kheta hi.

Nikhat hiai lawmta te'n pawn lak, singkung lian leh belh ding gina omlouhna mun a ann zong a avak koikoi lai un vuahpi hongzu in huihpi hongnung a, Khiangsing hawm khat ah vuah leh huihte' thehkhaklouh ding in kibu uhi. Nahkhok Tal in zong hun lemtang hichibang om a tua ka itna thu kagen keileh tang zoulou kha ding hi'ng chih ngaihtuah ahihman in a lawmnu lam ah kiinphei a, a lawmnu'n votsa in liing kenken taleh amah a kho-ul nel in buak huthut zel hi. Lawm vot nasa lua a kon kawi ding aw chi in a kha langkhat in kawiphei hi. Kamsiam takin a gennop thute hon gen a, a lawmnu'n zong huchibang a alawmpa'n kamsiam taka a houpihlam zakha nailou ahihman in a chihtakna langsak in hoihtak ana ngai deda hi. Nahkhok Nungak in zong aw va chihpah guih ding kilawm salou deuh ahi ngei ding a, kong kingaihtuah zek phot dia, nitak chiah hong hohthak ve maw U..... chita hi. A lungsim in bel ki-amen sukpah henla, keikia a tagah mival bang a ka khosak det zong hithei kei, teek nung vuai nung a mouthak chih lah kilawm kei, thak ut leng zong kuaman hon deih nawnkei leh hoihken teh chi hi. Vuah hongtheu a, a ann zonna ua pan gilvah taka ann a nekzoh un inn lam zuan in hongpai ua, inn a tunnung uh sawtlou in khua hongmialta hi.

Nitak khomial nuai ah Nahkhok Tal in a lawmnu’ kamchiam subuching ding in kilawp takin hoh hon sawmta hi. Khomial nung dakkal khat leng ngak zoulou in a lawmnu kiang hoh dingin hong kuankhia a, a lawmnu'n zong lam-etna toh ana ngak ahihman in mansa diam in na om hi. Sun a vuahpi athuak lai ua kekkia leh van ging khawng alauh dan gen in Nahkhok Nungak nui lahlah in, a lawmpan a kepdan khawng kipaklua ahihman in kamsiam takin kipahthu gen hi. Zingchiang koilam a kuankhia a, koilam a nek zong ding chih khawng a genkhit un Nahkhok tal pai ding in hong kisa a, hong dingkhia hi. A lawmnun tulai ding in khou mahleh dingkhe man ahihman in va tutkik hial ding kisuanglah deuh ahi dia, a lawmnu kiang tawn sese in kongkhak lam manoh in paiphei hi. A lawmnu'n tulai in chi a ana baankaih ding khawng kineem mawk hi. Himahleh kizahtak tuah ahihman un huchi naipah samlou uhi. Nahkhok Nungak in a inn kongtan uh vakha in, tomkha chik sung in thu poimohpen, a lawmpa' itna naubang sang ahihthu hilh hi. Kipak lua ahi ngei ding ua, khut kilen kawm in kipahthu tamlou leh sawtlou sung kimuam uhi. Huchi’n Nahkhok Tal a innlam zuan in pai a, lampi ah nuih kawm hauhau leh lasak khawng thuah in lungkimna bukim toh inn tung hi. Nungak khat ziaka kipahna hichibang piangthei ahih mawkleh nungak tampi neihtuak ei a chihlouh pen Nahkhok Nungak’ a dingin hamphat huai zawlai kha dingin um ing.

Kum leh khate hong kivei in, a ki-itna uh lah niteng in thakzel ahihman in Nahkhok Tal in a lawmnu kitenpih ding in lunggulhta a, kiten ding thu kuppih dingin thu khat hon sat hi. Ni khat a gam kuankhiakna uh zanglei dohtam tung a sabang atat lai un Nahkhok Tal in a lungsim leh ngaihtuahnate hon genkhia a, lem na hon sakpih a, na kimanzoh leh kazi ding in ka hon pi ding chi hi. Bangmah dang genbeh nawnkei lezong a nungaknu’n lem salua ahihlam theilou ahihman in lem asakpihlouh khak ding laulua in hichi’n hon genzom hi, nang toh kiteng ding hang a, gim leh tawl na kisakni a nek zong a hon kuansaklou ding ing a, ken na gilvahna ding ann lim mehlim hon puak ding, sa lim mahmah lungnou leh khuainoute kamuh chiang a nang ading a honpuak ding ing a, na chii dam dingin hongthau eu-au ding na hi chi sawnsawn hi. Hiaiteng khawng azak chiang in Nahkhok nungak kipaklua in nehnou sim mahmah a, himahleh kidek teitei in kidekzou hi. Kipahna a dim nungaknu’n zong gen ding tam theilou ahi ngei ding a, U aw…. Nang na kiman nak leh keibel hihtheihlouhna di bangmah omkei chi hi. Kipaklua ahihman un nidang teng sangin leng kizahtak zawkna khat hongpiang in, a ki-ettuah khak chiang ua zong midang amu ding om chih le hilou na pi zumbawl in hak deudau maimah uhi. Khanvual hau leh mite’ theihtham hilou ahih man un hiai tegel ading in vaisai a baihlamna khat om hi ding hiven, a kiten ding ni uleh kha ding hong kikum ua, pawltak lai, leitung mihing te’n buh-le-bal a lakzoh chiang ua din hong thukim thei uhi. Hun hongpai zel in, lou nnasemte’n a kumkhat sepgah uh lou a piang buh-le-bal a lakzoh dingkuan tak uh hita a, huai hunlaitak pen a lungzuang thei mahmah Vakhu leh Pengpalepte’n zong a gilvahna ding khop uh ann mu gige a, zanchiang a lungzuan sial manlou hial a ihmut limtak a, a imut hun uh ahi hi. Nek-le-tak a muhnop di laitak, gim-le-tawl a nek zon konkon a ngaihlouh di laitak in a hunchiam uh ni leh khate hongchingta a, mite’ theih a thupi taka kiten sawmlou ahihman un nitak chianga vapi hiau theih dia mansa a om din Nahkhok Tal in a nungaknu vaikhak hi. Ni hongtum in khua hongmial a, vanlam I ettouh chiang a vuk lampi hong kimuhtheih tak in Nahkhok Tal in azi ding pi di’n a nungaknu’ kiang honzuan hi. Huchi’n nitak sawtma, a kim apam ua uphok/ukeng ham zuazuate’ daihma in damsung a zi leh pasal a kinei ding in Nahkhok Nungak in a pasal ding a ateel, a itpen kiang zuan in kizuikhia uhi. Huchi’n amau gel nupa nuamsa leh khanvual englou khat hongsuak uhi.

Hun bangtan hiam nungin Nahkhok pi in naunei ding, nau pai, asung a amau batpih asiam, anu mel apa mel sun ding naungek om ahi chih atheih un kipak mahmah uhi. A lungsim suangtuahnate uh paisau zungzung in, ta I neih chiang a ei hon it hon kem ding ua, hon vak ta ding uh, nek-le-tak zonna lam a tua sang a kiningching zaw leh baihlam zaw a nek muta ding chihte suangtuah in kipahna leh lam-etna lianpi toh khosata uhi. Nahkhok pi bang in houh, ka tate honglet chiang ua, kei hon matsawm huai mupi chinsau ziamzuam ka muhkhak leh ka tate samkhawm ding ing a, huai mupi hehpihna leh zahngaihna neilou alu tuksak ding ing a, ka tate’n a nungzang, aphei leh a awm khawng hon tu ding ua, kou leng amah hehpihna bei a thatzou ding chih khawng a ngaihtuah chiang in a taneih ding kal ngaklah mahmah hi. A sung a om a tate hong khang hiaihiai in atui a thakkhiak theih ding in hong pichingta uh ahihman in Nahkhok pi zong a inn ua lupna tung ah honglum hi. Tui tha ding in hong kisa a, pan theihtawp a pang in ki-ing kukuih mahleh thakhezou tuanlou hi. Atawp in ngawng dok gawkgawk zen a pang in, mit gau zen a tha hon lakthak leh thakhat thu in asung apan a tamasa uh hong piantheihna ding tui hon thakhia hi. Ni khat a tui khatzel tha in nithum sung in tui thum hon thakhia hi. Hiai a tui thum teng lak ah ta masa pianna ding, a tui masa a thakkhiak lai in adangte sang in a kipahna leh kinepna lianzaw tham hi. Itlua pakta lua ahihman in zutzut in velvel hi. Atui dangte toh a letdan, a bemdan leh a melpuak bangkim kibang vek hinapi in a kipahna khitui in a tak khumkhumna in gial bialbual zou a, a dangte toh kibanglou in theihkhen baihlam mahmah hi. Huchi’n atui sunga om naungekte’n anu’ chilum poimoh uh ahihman in a nu’n a tung uah opkhum in vak khiaksan ngamlou hi. A nu’ chilum poimohlou a, amau leh amau a hong keuhthei mai ding hile uh leng anu’ un itlua ahih man in vasa dangte’n ana suktap khak ding a launa toh, thankik khawng in ana tuahkhiak khak ding a lauhluat man in vakkhiatsan ngamlou ding hi. Ni bangzah hiam a opkhum nung in huai atui thumte hong keuh ta hon neita uhi.
Ta hon neih chiang in anu’n a gilkial chiang ua a piak ding nawi neilou ahihman in a ann ding uh a zonsak hong ngaita hi. Ama nek ding leh a tate’ nek ding ann zong in Nahkhok nupi hong buai mahmah a, alim amuh chiang in a tate’ ading in puak hi. Lungnou theigah a gawng leh limchilou zawdeuhte amuh chiang in aman ne a, a limchi teng a tate’ a ding in puakzel hi. Abu a tunchiang in a tate gilkial in kamka siausiau geuh uh ahihman in ama ading in gimlua tawllua chih om theilou hi. Gimluat sang in kipahna in dimzaw a, amuk a atuah ann, a tate’ kamsung a amop ding chiang in nou masa zel hi. Ann lim a puakte a tate apiak dek chiang in zong a piang masa pen kiang ah, hi bawi hiai ne inla, hong lian mengmeng in chi hi. A tate akeuh hun kibang, a letdan uh kikim ahihhang in aman a piang masa pen leh a neupen haihlou hi. Ann a piak chiangin zong a upa pen ah pan in aneupen tan ah hawmsiam in hawmsuk hi. Hiai Nahkhok nupi in a tate a itdan kikim abat hang in a ta upa pen gawng phinphen in muksawi diidei taleh itzawkna khat nei in a dangte’ theihlouhkal in duattuam se hi. Bangziak in, hong let chia atha hong hat dia, lauhhuai omna mun ah; bawi hong panpih in chi leng hon hunkhe zou pen ding chih ngaihsun ahih man in.

A tate hong khanglian in amul uh hong poukimta a, anu bang a lengthei di’n a kha’ uh hongtung in amau leh amau a nek kizonthei ding in a tha uh hong hatta hi. Anun a tate kiang ah, bawite ka nung honzui unla, ann lim tampi omna thei ka hi, huailam ah nekdi zong in iva kuan ding uh aw chi in makaih hi. Ni bangzah hiam ann lim taktak anu’n amau adia a hawite a neksak nung in a tate hong khanglian hiaihiai ua, amuan mahbang in ata upa pen hong liantuam se in, anu’ kinepna tangtung ding hong bangta hi. Ahihhang in a lungsim leh khoheidante anute’ atoh hong kidang in, hong gitlouh gamtat se hi. Huaitan ah leng anu’ kinepna lian semsem lai hi. Kha bangzah hiam nungin hong piching vekta ua, anu’n deihsak tuambik ziaka ann lim taktak apiakte’ ziak hia, ahihkei leh ama taksa let ziak a annkam limtuamse hia, a ta upapen in sa kia hon duh in hong gongthak mahmah hi. Nidang a theigah leh lungnou khawng ann dia aset himahleh tuni chiang in huaite hon simtham nawnlou a, sa amat zohlouh ni in ama taksa mahmah nektheih hileh ne ut khop in hong duhgawl in hong gilou mawkta hi. Nikhat a gilkial mahmah ahihman in nek di dang omlou, anute’ nek bangbang lah duh nawnlou ahihman in a kianga om anu leh a sanggamte’ sa ngoihngoih duh in a chil hong phulta hi. A bu a innkuan kimtak a aom lai un hichi’n hon ngaihtuah a, ka sanggamte lah khangdawng lai, thahat hunphet ahihchiang un neksawm leng amau kei hon sual di ua, zoukei kha leng sihloh theih hi a, ka taklam a om kanu chile lah, atha hatnawnlou ahihman in zou di ing a, himahleh kei hon suangtu hingal a…..chi in lungngai dedu hi. A gitlouh lungtang in amah thuzoh zouzaw a hi ngei dia, anu’ lam nga in enphei gelgawlta hi. Anu’n zong hihkhelh khat houh nei hive ning aw chi a kisuanglah taka nuailam en a, akun diudeu lai in ata upa pen in a dek ah tuphei mawkta hi. Anu’n laulua ahihman in bangmah gentam ngamlou in abu apan hong lengkhia a, lung-am kawm pi in leng duaiduai hi. Anung ah ata in delh in kinoh mahmah zomah hi. Singkung khat boh in anu’n alu khuat vulvul a, ahihhang in ata in hehpihlou in a bohna mun ah vapai in vatu nawn hi. Anu’n, Bawi, nalua eive bang hon lohsawm na maizen a chi in aw ling deldel in houpih ta leh dawng ning bang ning chilou in ensal gemgom maimah hi. Anu’ sihtheihna ding alu leh mun tuamtuam atuksak chiang in anu’n zong bitna ding zong in leng koikoi a, alen sungin a ngaihtuahna ah, “na piantung a kon itdante, ann lim kamuh nang kon piakte, nonglet chianga lauhuai katuah leh hon hunkhe dia kon muanpen na hihdante thei lechin zaw maw bawi, ka teek chianga nang’ ka ann di non zonsak di ka kilam-et luat hi a maw, tunlah kasa mahmah duh in non delhzui tamai a chihte ngaihtuah in a khitui pulh zungzung hi. A taksa tung a vuak sidupnate leh a lungtang natnate’ ziakin lengzou nawnlou in anu leitual ah kia a, mulkimna bei in ata in alu leh a mit khawng tuksak gawpgawp hi. A mit apan puaknatna khitui leh naa sakna sisan kai zungzungte’ ziakin ata’ lungtang ah mulkimna bangmah om tuanlou hi. Anu kitung mahleh a hatna in zou nawnlou a, si ut mahleh a taksa a sisan lum omlai ahihman in ama thu in sitheilou hi. A lungtang in a tunga ata’ thilhihte thei mahleh bawi aw hon huchih nawnken chi a, akhou ding in akam leh a taksa in hatna nei nawnlou a, sialpi vuahthuak in thuak maita hi. Anu laitat nailou hinapi in aphei leh a awmsa khawng laikhia in ata in anu’ sa ne a, anu’n thaukzou nawnlou in hehpihhuai takin laitatta hi. Hiaibang a amah suangtu anu’ taksa mahmah ne a poisakna neilou vasa in, anu-le-pa’ phung leh taang tang zoulou in MUSI kichi hi.

Mite' sang a nuamsa zaw a, lawm-le-vual laka khanvual englou a hinkhua azat theihna ding ua pan ana la, kho-ul kai niuniau a gimthuakna chiteng ana pal anu' gentheihnate hiai Musi in kitheihmohbawl hi. Anu' kinepna leh lungsim suangtuahnate tangtun lou in Anu' a ding in khitui luanna, gimthaukna leh sihna tanpha tun hi. Hiai mi huham Musi, a khanpih lawm-le-vual lak ah bangchi din na ngaihtuah a? Vualtung vabang a tuangsam diam unau?
Hiaibang a mulkimna bei a Musi’ gamtatdan vasa dangte’n a theih chiang un lau mahmah ua, mulkim huai sa uh ahihman in atu leh tate kiang ah kihilhpilna in nei uhi. Huaite lak ah gammang sing lian pipi apouna, singkung sang taktak a tamna mun ah Vaphual nupa in a tanchin uh na zakha ahihman in a tate kiang ah gen ua, a tate’n a thugente uh ngaikhia in limsak uhi. Huai ziakin khangsawn vaphualte ki-it phadiak uh ahihman in, vaphual nupa laka khat asih leh, a silou pen zong vanlaizawl apan lengsuk in leitual kidenna a, asi masa pen’ nungzui in amah leng si kichi hi.

Hiaibang a, ana kihilhpil thei VAPHUAL-te’ ki-itna thupi kisa in ei ZOMI-te’n I minam kichiamtehna ding in VAPHUAL LU kizang hi…..

Lungsim a chiamteh thamching thuvual khat ahihtheihna dia Tangthu PHUAHTAWM.
Beita.

By: Ginneihthang Guite
This email address is being protected from spambots. You need JavaScript enabled to view it.