Zomi Constitution Dinkhiak Hun Ta
By Thangchinsut Hanghal
Zogam politics pen vangtahhuai takin pawlammi/namdangte' danbupi (Foreigners' Constitution) toh kum 100 val bang ana kitalkaih kha a,tun'in mahni gam leitang sung natan ah Zosuante tuh namdangte dan zangin i kivaipuak ua, Zogam simleivai ki-ukna dingin gamdang dan i kikopih uhi. Zogam South Eastern lampang Myanmarese Constitution i kikoppih a, Zogam South Western lampang ah Bangladeshi Constitution
koppih in Zogam North Western lampang ah Indian Constitution zangin hun sawt kuam tak Zogam Politics talkaih in om ta hi.
Hibanga Zomi te'n Pathian hon chiam i Zogam leitang sung mahmah a namdangte' dan i kikoppih mawk pen vangtahhuai mahmah a hihdan leh Foreigner's Constitution gahte hiaibang ahi:
i) Zogam/Zoland pen independent country khat hi thei lou (i gam leitang tunga thu nei zou lou)
ii) Mahni namdan ngei toh kivaihawm peoples republic nam hi thei lou (khawtang hinkhua kithunun zou lou)
iii) Namdang ngaihsanna kia toh Zosuan khang teng kidim (nam neuchik hidana kipumngaih ek mawk)
iv) Zoleigam leitang za pipi, a gamlei hoihna mun tata namdangte adia awnkhia, e'n a se teng tang kha ham ham lai (mi'n i malam ua hon khem ngam mawk)
v) Mahni a gam-le-nam vengbittu ding Defence forces nei lou, namdang defend forces dia Zogam tangval tampi kuan mang (inn gua hah lou, gamgua hah)
vi) Zomi nambilte lak ah namdang maipha zon kituhna uang. (khothang tong maipha zong kawma namdangte laka kihektuah ek ek)
vii) Siamna, pilna leh theihna neih tengteng namdangte' gam-le-nam adia tekkun donga va zang bei sipsip (huchi kawmpi nangawn 'saltang'ahih lam phawk ban lo mipil leh misiam, Zogam adia manna bei kitam)
vii) Mi' tu mi' tate'n khovel muha games tungtawna a gam-le-nam uh a pahtawi zuah lai un, eilawi pen bel namdangte' player dia ki-interview maimah (World Cup bang Zogam min mahmah zanga tel theih ahihlam phawk bun lou)
viii) Nampi a dinkhiakna dinga khopi gina leh suanhuai khat beek neih sam ngai ahihlam man lou, tuni tana singtang zoudawn kawma khota tampi taka kikhen neng nung lai (khopi nei lou nam, nam dingkhia omlou)
ix) Democracy leh Christianity kimelma ahihlam phawk louin democracy peuh deiha deih mawk (communalism jiaka Bible om ahihlam phawk lou)
x) Zosuante pen nam maban lungngaihhuai tak leh PANPIHTU sam keileh suakta zou lou ding ahihdan mimal chih lungsung ah generation by generation in puakgik hi den thei hi (pusa paihsa nam houh hi kha i ding uam?)
Bangtenghileh, Zogam politics paikhial pen tui bawsa luahkik theih louh banga bawlphat theihlouh hi louin i pil leh puahpha dinga kalsuan hun ahi ta hi. Huai dingin Zogam Thinkers, Zomi Writers, Zomi politicians, Zomi intellectuals, scholars, publics leaders, researchers leh tribe leaders, mipil leh misiam te'n kithujaktuah a, kihoukhawm a, kikumkhawm a, genkhawm, thumkhawm a Zogam Politics heek
dik ding Zogam Constitution taktak draft khiak hun mahmah ta hi. Mahni gam leitang natana aikawhan nachang zong thei lou khawpa nam mawl (uncivilised) lai i hi tel uhiam? Tu 21st century pen latest modern period ahi chih phawk a; a kul a, a ngai a, a poimoh a, a kisap leleng malak hun hi ta lou hiam? Jet Fighter zat a kul lezong zang thei dia mansa a om hun hi ta hilou hiam? Bangjiaka tuni tana namdangte' mei (tail) a pang lai lai i hi ua? Criminals (migiloute) tunga vaihawmtu dia Zo Ngeina Dan nep sa lua i ding uam? Mahni namdan pampaih a,namdangte' namdan zang Zomi kichi maimah ding maw?
Zomi Re-unification Organisation (ZRO) kibulphukhiak dan leh a tup-le-ngimte thupi mahmah hi. ZRO thiltup pipen deuhte nih taklang zual ta lehang:
1) i zoleigam India, Myanmar, Bangladesh chia namdangte a kihawmjak uh gawmkhawm thak a, Zogam/Zoland independent country neih ding.
2. Kimuhlouhna sawt jiaka pau-le-hama ana kihaih kha Zo minam tuamtuamte kianga Zosuan Zomi ngen i hihdan uh puankhiak leh khanvual pha dinga kizopkhawm thaksak ding
Zomi Council Election laia mipite' lungsima hong lut khat chu bangjiaka Zomi Top Leaders ding kitelna om sek napi, mipi te'n 'Right to vote' neilou mawk! Tribe leaders i telkhiakte uh bangjiaka 'nomination' ngen a pai mawk ahia? India, Zogam Election Commission zanga Zogam Government paipih hun ding ngaklahhuai mahmah ta hi.
Kuaman suak-le-sal in hong kei a, kuaman thagum in i zogamlei hong suhsak kei. Ei Zomi te'n i gam leh hunbittu ding Zomi Constitution i neih louh jiak ua namdangte' thunuaia kun dinga kipumpiak i hi ta uhi.
Mahni gam bawn humbit loua ut-le-daha namdangte' tuallenna dinga zangsak Zomi kichi ding maw? Zomi Zosuan ka hi chia Zogam zatdan (area) nangawn gen theilou Zomi kipumdim a, Zosuan ka hi chia Zo minam phazah, pau phazah leh Zomi population natan gen thei lou Zomi nungak leh tangval pumdim in mahni gamsung mahmah ah mikhual lampai i bang maimah uhi. Hiai pen bangdang jiak hilou in ZOMI CONSTITUTION neih louh jiak ahi hi.
Zogam simleivai pitu ding ZOMI CONSTITUTON dinkhia ni aw