Churachandpur To Lamka
By Joy Tonsing 
Pupa satsa a sakmin Lamka chi a i kisaktheihpih mahmah, simthu leh zaila toh i oih chimtheihlouh uh, Manipur solkal in Meitei lengpa min tam a Churachandpur chia hon kheksak a pona lou i om uh a gintak huaikei. Lamka chi a official tak a kheksak ding chih ngaihdan leng tamveipi akigenta, panlakna leng ana omta himahleh tunitan in i khengzou naikei uh. Lamka khua i chih 1930s lai vel a Pu Zenhang in Zenhang Lamka leh Pu Phungkhothang Guite in Hiangtam Lamka chih ana saat uh ahi. Himahleh solkal in i deihlouhpi un a min diklou Churachandpur hon chihsak in tuni tanpha in huai min a kizang denlai hi.
Churachandpur amin diktak Lamka a khek na’ng in panlakna tuamtuam ana omtate lak ah All Paite Students’ Union (APSU) te panlaknate enthak zual ni. Phamsa Pu Vungkholian makaihna nuai ah APSU in Manipur Chief Minister Pu Rishang Keishing kiang ah 27/10/1982 in Churachandpur hon thaimang sak unla “LAMKA hon chihsak ta un” chi’n ana ngen uhi. Pu Rishang in leng diksa in Pu K.V. Singh (huai hunlai a DC) kiang ah comment bawl din thu ana pia hi. Lamka College Students’ Union a General Secretary, Zomi Sangnaupang Pawlpi leh Lamka khopi sung a hausa 7 te (i) Hiangtam Lamka (ii) Bijangloubuk (iii) Bungmual (iv) Tuibuang (v) Chiengkonpang (vi) Phailian leh (vii) Headquarter ten a dikmah ahi chin DC kiang ah lai pia uhi. Nget a om bang in DC in leng hoihtak in comment bawl a, himahleh huai hunlai a Agriculture Minister Pu Ngurdinglien in ana dal bikbek ziak in Manipur solkal in 1/8/1983 in Churachandpur pen Lamka a khek lemsa lou chi’n order suah hi.
Hiai nung in Pu Phungzathang Tonsing kiang ah 29/8/85 in memorandum piak in om a, Pu Dongzakai, Municipal Board President kiang ah 18/12/86 a piak ahih ban ah Municipal Board in leng meeting dt 18/12/86 mah in Churachandpur pen diklou mah ahi, Lamka in hon kheksak un chi’n resolution ana pass uhi. Huai bohzuina in Manipur Governer Pu Gen K.V.Krishna Rao (retd.) kiang ah meeting proceeding copy toh memorandum ana pe lut ua, Chief Minister kiang ah 9/4/1987 in memorandum ana penawn uhi. (Source: Lamka Vangkhua-E.Vungkholian. SSPP Annual Magazine 1987). Himahleh lohching zoulou uh ahi ngei ding a tunitan in Churachandpur mah chih in omlai veve hi. Huainung in leng panlakna tuamtuam ana om zel sam mahleh thupitak a panlakna taktak ana om nawnlou hi. Tuni in ei khangthakte’n bangchibang in panla leng a hoihdia chih ngaihtuah tham ching mahmah hi.
Hoih in hoihkei leh, deih in deihkei le (eilam inchu kideih lotel) MDC election bang kizouta. Result leng puankhiak hita a Chairman din ei Zomi sung aleng Paite kampau mahmah Pu Langkhanpau Guite hong hizomah. Amah khangthak, laisiam “young blood” leh Pawlpi tuamtuam a ana kipei eksa ban ah mi tamtakte theihdan a mi chitak leh ginom chih hizomah. Hiai Churachandpur pen Lamka a kheng na ding toh kisai in amah mimal mahmah in leng interest hon lak i kinem hi. Ama makaih na nuai ah MDC ten pan hon la ngal le uh deihhuai isa a, phattuam pen ding in leng a gintak huai. Amau te i MLA te toh mipi ai-oh ahihna uah mipite aw, mipite deih te genkhe ding a i neihte uh, muang mahmah a mipite chauh le hi zezen lou heututen a telkhiakte ahihman un hiai thu hon ngai poimoh leh uh chih deihhuai petmah.
MDC te’n resolution khat hon la pah uhenla Manipur Govt. ah Churachandpur pen Lamka a khek di’n hon phutou ngal uhenla, i District a MLA leh Minister i neihte adiak in ei Zomi chi a kiminloh teng bek in ana gum zomah le uh. Opposition a MLA i neihten huai bohzui na in Assembly Session chiang bang in House ah question ban ah a thu ana raise thithe uhenla, Minister uh Pu Phungzathang inleng amah capacity in cabinet meeting ah ana polut leh. Huaiban ah innlam a student organization i neih ZSF le CDSU pangkhawm in solkal ah ngetna ana nei uhenla, a poimoh dungzui in kiphinna tuamtuam anatoh ana pang ding ua, Delhi tualpi mahmah a leng Phualpi Solkal ah pan ana la ding in Delhi khopi a I mi-isate kiminsa ding un a gintak huai.
MDC te thu Manipur solkal in a ngaihsak keileh MDC teng hong kitawp di uh, by-election hong om ngai di, huaiteng mah telching thak nawn di. I nget ngeite mah ngen tou zel ding. Ministerpu bang le a political rival Pu Hangkhanlian lah Thanlon lam a kisuanta, tua Pu Langkhanpau Guite lah MDC kaita, Chairman hong hizomah, 2012 election ah chu Ministerpu adin eimi vote in nuamtak in a chingta di’n a gintakhuai. Huaiziak a Rengkai lamte mitmei a ven ngai nawnlou. Ama a eimi toh hoihtak a a kituh seklai ua chu Rengkai vote 3,000-4,000 kikal bang om ahihchiang a a chinna dias vote hiaizah omna a nawlkhin theih vual hilou a political survival nadia. Paite/Zomi-centric deuh issue te ah chu tangtak a hong pang ngamlou mah leng ahidi. AIR Paite link language toh kisai a a panlakna i mangngilh kei ua, a tung a kipahthu i gen kawmkawm un hiai thu bang le va genpih le honna lunglut pih dia, i lohching kei ding uh kua a chi ngam? Amahmah inle 2003 kum a Lamka Post 2nd Anniversary lopna ah ana gentak hiven, ana mangngilh ta ahih lele va remind thak le maw. Aman le kum hiaitan politics a ana kipeina ah a legacy dia deih kha maithei eive. Mipi apat pressure omlou pi a i politician te a kuakua hitaleh hong kipei hehu ding un gingta kei ni. Government inle mipi apat nohna omloupi a ana hihkhial kha kahi uh na khomin uh Lamka in i khekta di uh hong chi zenzen lou ding ahi. Huaiziak in mipi lam apat panlakna banghiam hong om ngai hive aw, mipi in panlak theih nang a heutute hong kipat uh ngai ana hizel.
Hiai toh kisai in i kiim i kiang a unau Zomi kichilouten hon kipahpihlou hiphetlou in dal theihna lam chiteng ah hon dal sawm zomah ding uh. Huaichu theihsa. Zomi sung a omte nam tuamtuam te’n bel hon support din un koih phot peuhmah le, a theihsiam kei uleh leng theihsiamsak i mohpuakna. Min hon dal khaleh chihman a i pupa satsa, a sakmin Lamka, amin diktak a kheng na dia ei khangthakte’n panla ngamlou tel ding ihi ding uam? Tuhun a pan i laak ngamkei lechu Lamka, Lamka le chihchih nawnlouh a Churachandpur chihkha kipaktak a pom di hitamai lou di hia? Hiai a tung a panlak didan kigente bel i gendan a hong paithei zungzung hetlou ding chih theihsa ahi. Himahleh panla loupi in bangchi’n i lohching ngei ding ua. A thu a gengen hun hinawnlou. Panlak hun hita. Tu ahun laitak ahi, hiai hun i mansuah uleh nidang chiang in a haksa dedeuh ding. Aziakchu ADC i opkhum zohlai uh, senior Minister i neih lailai uh ban ah amah adia namdang mitmei et ngailou a eimi vote chauh a chinzoh dilai tak, 2012 election bang hong nai hiaihiai zomah lai, bargaining power i neih hoih laitak uh hikhamoh lou di eive.
***This article was first published in Zogam.com on Friday, 02 July 2010