TEAM TAMLUA HILOU I HI UH HIAM?
By: Hauzel Gou

Pathian in ipu-ipa' akipat gam kilawmtak mai hon piaksa a khosa hi napi, team i tamluat man ua lungmuangtak ale khosa ngamlou  i suak uhi. Nidanglai in sikha chih khawng lauh in kinei a, tun bel igam uh mihing mah kilauh tuahna gam i suaksak zawta uhi. Huchi dinmun ah mi giloute'n khovaklai lau in, mihoihte'n khomial hunte i lau zawta ua, mahni innsung na-ngawn ah  lungmuanna, khamuanna chihte om thei nawnlou hi. Huai team te'n hon thazoh lawding ua, denchia ut leh utlou a, hiai ka gam ahi chi'a  ka kisaktheihpih mahmah na munte pawtsan mai a kulkha ding chi’a laukawm a lungmuang theilou chiat hive hang aw ..! Ki muanmohna gam! Ki mullitna leh kihazat tuahna ngen a dim, pangpalek bang a tungnun kituh den team-te i hihtak mawk uh a dahhuai khat ahi. Team tuamtuam te'n lah aw...team khat ahihlam uh kithei hinazenpi'n lah pau-leh-ham neuchik kibatlouhna ziak lel in, team khat a kigawm ding haksa sachiat uh abang hi. I paunak in ‘sial ektam’ achih dan a, team tamlua hi napi, a zatna ding bei a team tam i suak uhi.

A hongtung ding FIFA World Cup 2018, Russia a om ding a qualifying kimawlna tulai in khovel gam tuamtuam ah pailel hi. Gam chih in amau gam adia team hoihpen khat bawlkhia in vualzoh teitei sawmchiat in hahpan thei mahmah uhi. Tuabang team-te sung ah vualzohna ut sang a mimal minthanna ding enzaw a,  player teng in goal khum a ut chiat chiang un kuamah zoh anei kei daih ding uh chih theihsa ahi. Mahni angma-sialna di chauh enlou a, gam a ding a ki thutuak tak a pankhawmdan siamte'n vualzohna thupitak hon ngahzel uhi. Tua World Cup adia kisakkholhna gam khenkhat in kimawlsiam tampi nei mahle uh team nih-le-thum bawl hilou in, team khat chauh ah om khawmvek uhi.

Ka neulai in, ka khua uh *SM ah skul kaitawp chiang in lawmte toh football ka kimawl sek uhi. Huaichiang in team sung ah pankhawm a poimohdante hon phoksak sek a, huchia pangkhawm siamte’n vualzohna ka ngahzel uhi. Kei pen a kimawlsiam hikei mahleng; lunglut tak zaw ka na hikha ding, nu-le-pa' te'n nitaklam ann huandia hon ngansiah uh himahleng, an-huan minhoih manlou chih phetlouh, huanlou a kana om khakni leeng om tham hi. Kimawl  ut-luat ziak a nu-le-pa thumanglou chu ka himai ve. Ka pa'n hon zeep sek a, tua ka ngaihtuah kikthak leh hai kisa'n ka kisik mahmah hi. Tua zodawn a ka omna uh SM pen mualvum a inn 60 vel omna khonuam mahmah ahi a, kho miite’  bang kithutuak  in thil bangkim ah ka ki panpih tuah siau-siau uhi. Khokim-khokiangte toh leeng ka kituak ua, a poimoh hun a bangkim kikawmtuah thei gige ka na hiden uhi. Ka pau zatte uh neu chikchik kibatlouhnate ziaka kituambawlna om hetlou in, ki thutuahna leh lungsim a team khat ka hihna uh hon musak diak ka sa hi. Kum teng a phavang awl-leen hunchiang in, khua khat teitei in tournament /function ki vaitun in nitak hunpen kipolhlimna  program leh sun hun ah football leh volley ball kidemna ki neisek hi. Khotuam-tuam apat team hunkhop ka hi ua, himahleh kina a kisual chih himhim a om lam ka thei ngei kei hi. Huai hunlai a bangziak a kinak/kisualna om ngeilou ade aw chih ka ngaihtuah chiangin kuapeuh lungsim tawng a team khat ka hih gige ziak uh ana hipen ding in ka gingta  hi. Taksa lam chauh hilou in, Christ ziak a unau khat a kihih dungzui in khalam ah leeng naakpi takin kisuk halh tuahna fellowship kinei khawm in pau chi tuamtuam in Pathian phat khawmna kinei theizel hi. Huaihun laikhawng i gam dinmun nuam leh thoveng mahmah hunlai a theih ahi a, lungmuanna leh kipahna kinei chiat a bang hi.

Hun hong paizel in, i gam ah muanna, bitna chihte hong vang hiaihiai in, namchih in ki huituam utna lungsim hon nei panpanta hi. Huchih dungzui in, i gentak, ka pianna vangkhua SM pen team-tuam phuh-utna leh mahni angma-sialna'n vaaivut a suah nungin tulpaan ana kaizouta hi. Tuni'n ken pawna in, a tanchin bang gen-nuamlai in kisaktheihpih mahmah lengle, a sakmin mahmah zong i gam sorkal in honna delete sakta uh ei voi !. Bangziak a ana deleted uh ahi de aw nachi maithei, huaizaw team tuam bawl utna ziak leltak ahi chi'n theisiam mai ni. Poi mahmah. SM khua pen khota neuchik himahleh asung a piangte’ Toupa'n vualzawl in officers leh Pathian mizat mahmah hunkhop om kamuhte ziak in ka kipahna a lian veve hi. Tua hunlai a khokim-khokiangte toh kituaktak leh nuamtak a ki omlai, team tuam bawl utna ziaklel in unau melhaih hun hongtung guih mawk hi. Tua i gen unau-melhaih hun 1997 kum ahi a, neukha chik i pau-leh-hamte kibat louhna ziak a ut-leh utlouh thu hilou a, team tuam a kikhen hong ngai maimah mawk hi.

Tua hun hong tun in taksa a team tuam a ka hong om uh hong ngai maita pen kuapeuh in vei in haksa kisa chiat mahleh a lohngaihna om tuanlou mawk hi. Huaihun apat laizom melma chu ka hong suakta ua, himahleh laizom ka hihna uh bei tuanlou in ka ki-itna uh leng bei tuanlou ahi ding a, koute hong su chimit dia hongkuante hong tun ma un tua a it-huai SM vangkhua pawtsan dia thu pedi’n hong khualtai zozen uhi. Laizomte hon khualna thupi sa mahmah ing. Huchilou hi maizen leh mihing luang bangzahta kikham in sisan, naisan bangzah a luang phet diam ah…  Tua hunlai a hong khualtaipa (aminzaw gendah ni) tu'n  mukha ngei nawnkei mahleng, Pathian in a vualzawl din ka gingta tinten a, huai ding in le ka deihsak a, mavang in a khan kumkhua sawtsak hen aw chih ka thumna ahi.  

Igam-leh-nam, i-et vengveng leh, huai hun (unau melhaih) laipek apat a team tuam bawl kipan in, tunitan inle i sunzom touzel ua, i tam de-deuh zomah lai uhi. Himahleh team i bawlte uh lohchin naksa'ngin kiakniam lam i manoh de-deuh ua, team tamziak a lohching muhtheih ding i omtuan samkei uhi. Management lam siamte’n Indian Crab a chih uh dinmun ki tung himai hi. Suangtu’ kibang i hi ua, team tuamtuam a kikhen theilou himahle hang, namchih in team kineih chiat ding in entry fee sun i sawm chiat uhi. Himahleh, goal khum thei dia entry fee a sungzou team lah i om tuan sam kei ua, mahni angma-sialna ngen a dim in i phe vengvung uhi. Tua igen team khenkhat sung na-ngawn ah leeng team dang bawlsawn laitel i ve uai… I duh-am dan uh aw!! Team tamziak a vualzoh di hilehzaw, eilawi i nak vualzoh taak didan uh aw chih in om hi. Huchi’n team minbang a tuamchiat in i bawl teltul ua, himahleh isui-sui chia lah itupna uh goal kibang zel, team khat a om theidi hina zenpi atuam in i om chiat uhi. Huaiziaktak a team chih in entry fee i va sun dek chiang ua honna reject zel uh hilim ve aw. A team heutu’ di mahmah le a ut himhim pawl om ihidi-uam maw.....hichia team tuamtuam i bawl sawnsawn laitel uh. Ai'hkeh sum-le-pai etlahna lel a team tuam bawlkhiak a heutu hih ut lelte i hi di-uam aw chih in om hi. I gam ah team tamlua, pawl tuamtuam tamlua pen i gam  'land of presidents' chia kua hiam in chiamnuih a, a gen dik kasa thou vanglak hi.   

Tuchiang-chiang in zaw, a organizer-te’ mahmah inle buaihuai honsa gawpta ahi di ua aw ...chihsim in omta hi. Kihoupih ding maimai ale hon en nonlou ua, hon zekhem tum a ki ngengkhai sak hidi hitave uh aw chih in om hi. Huaikawm kalah, eilam ah le i bawlhoih masak ding uh tampi omkha ding a, ki pumkhatna, khe khat a dinkhwm masak kisam hi. I team paidan uh lah kibang, i goal khumna ding uh le kibang zomah lai, hile-le entry fee a tuam a sun ut chiat hitel i hihchiang ua hon approved nuamlou uh hidi hi ve uh aw. Huchia i goal khumna di uh kibangthou-thou ahihleh entry fee tuam piakziak a hon reject gige sang un, entry fee pekhawm in team khat ah omle goal kikhum baihzaw louding hiam? I ngaihtuah vengveng leh hiai team tuamtuam hong piankhiakna zaw bangdang hilouin, i pau a neuchik kibanglou omte ziak leltak hive aw !! Huaite ziakin a kuapeuh in mahni ki huituam utna lungsim nei in, team tuam bawl a goal khum i ut chiat uhi. I pau neuchik tuam omte ziak in laizom, pa khat suan i hihlam uh kithei zenpi kitheih mohbawl in i om chiat uhi.  Tuabang ngaihdan dikloute nusia a team khat a om in pangkhawm chiatle ut huai mahmah hi. Hichia team tuamtuam a i om laisungteng uh zaw, goal khum ngeilou ding hi hang. Tuni'n ki ngaihtuah vengveng in i goal khum theihlouhna ziak uh ‘team tamlua hilou ihi uh hiam?” chihte phawk thakni in team khat a om in, khekhat in din  sawm in panla thak nihang chi'n iki chial hi.

SM – Hiai pen Churachandpur Dist. Henglep Sub. Division sung a unau Thadou leh Vaiphei khuate’n a umkolh  uh SINGMUN khua ahi. Huaikim a Paite’ khua omsun sun ahi a, Unau-melhaih lai apat kiluah nawnlou ahi. Tu’n agam i MLA pa’ T.Manga in lei in khua muntuam ah sat uhi.~ laigelhtu