MDC Election 2015: Selection sa'ng Election mah awle !!!
By: Hauzel Gou
I gam leh nam i en a, puaknat huai i sa chiat uh abang hi. Himahleh bangmah hihtheih lah i nei tuansam kei uhi. Huchi kawmkal ah akua-kua, mahni angma-sialna ngen a dim hivekle kilawm bangmai in, i mihinpih dai kil-kal a gentheitak a khosa-te adi ngaihtuahna himhim neilou tampi ki om in kinek siatna khovel ah i dingta uhi. Tua phetle hilou in, i paunak in agen 'aakta mangkuan ki tutu' chihpen a hong dikna chiang omta adia aw chihtheih in om a; kou, nou chia' kihuituam utna lungsim neichiat hile kilawm abang mawkta hi.
Leitung kiheidan lamdang deuh-deuh, hun in kuamah ngakneilou in pailiam zungzung hi. Kumthak 2015 bang damtak a melmu in nuam i sa ua, i kipak chiat uh le abang hi. Himahleh khenkhat-te' di'n kumlui ah ki omlai hileh aw chi- in kumthak kipahpihlou i om tham di'n gintak huai hi. Himahleh tu kumthak ah i hong lut a, ut leh utlouh thu hilou a pension ladi bangleng tamtak i om chih i mu thei hi. Tua pension dingte chauh le hilou in khenkhat-te di'n ah ‘Ni aw na khawllai aw...kha aw na khawllai aw’ chih ut-huai vungvung khamawhlou ding hi. Huai chithei dingte bel i gam adia ipalai neihlelte ahihban uah imuan mahmah i MDC te ahi uhi. Amau leeng asep mabante uh lakloh takmai omte sepzom ut law mahmah laidi un gintak huai hi. Himahleh hun in kuamah ngak neilou ahihman in a term uh hong bei leulou ding abangta hi.
Tulel a palai ineih lelte uh a di'n kingaihtuah hun laitak hidin um ing. Hiai ka term sungin mipi adia phatuam bangteng kasem khe de aw chihte geel vengveng kawm a ka nnasep ah ka mipite' alungkim huntawk di ua aw chih amau leh amau a kidot uh poimawh kha ding hi. Tulel a i MDC-te uh en vengveng lehang a muanhuai un phat-huai thei mahmah chiat uhi. Abanah le amaute mah in honzom laile uh chih i duhthusam le ahi bok hi. Huaibanah, mipi'n le i phattuam pih chiat uh le ahi ngeiding Chief Guest ding bang in kizen sa'n naktak in izang ua, ahoihna chiang om mahleh hoihkhin khollou ding hi. Alehlam ah amau leeng, i gam-leh-nam adia le sit huai hetlou ngen ahihban uah pilna-siamna ah leeng muanhuai thei mahmah ngen ahi zomah lai uhi. Himahleh, sem ka hi a chihlai un dai kilkal a kua hiam khat ei pilvang zohlouh ziak a khase saktu suahtheih mawk hi. Huai kachihna bel, banghiam sorkal apat sanction neuhneuh hongpaite piakdia kilawm mahmah lah piak khaklouh vengbing hiam a heutu khenkhat mahni angma-sialna ziak a om kha ding in um ing. Himahleh i MDC te ziakin i vengsungte puahthak a om in leh mipite'n kong tuamtuam ah hamphatna i ngah uh chih akilang hi.
Maban ah Pathian in lem honsak pih leh i palai di MDC i hon teldia, tu term thak ah palai a hong ching thak te'n igam ah bang thil atung a, singtangmite' i rights bang ahia, bang ‘Act’ in eite hon kankhawm a, phaizang leh singtang ah development bangzahta a kikhai ahia chihte atheihsa uh himahleh pan honlak thak uh poimoh petmah hi. Huaiziakin, Chief Guest lel hithei dite sang a gam-leh-nam adia sep taktak sawmte mah palai di'n deih huai zaw hi. I zodawn i en a abiik takin kikawm tuahna lamliante lungziin huai i sa chiat uhi. Huaiziakin kikawm tuahna lamlian pen development omna dia kalbi masa chile ki khial lawmlawm lou ding hi. Tuateng banah ikim- ikiang a talpakte'n hon op-khum ut lawtel uh ahi chihte theikawma pan naktak a hon lak uh deih huai petmah hi. Huai kon chihna bel tulai khovel huihnung i et vengveng leh, chi-le-kuang a kikhenna, gam leh leitang mahni a kineihtuam utna leh nam chih in mahni nam suahtakna dia panlakna a langlang ah om vingveng ahi chih haihvual ahikei hi. Inam sung political dinmunte telin, bangbang hiam ah movement tuamtuam tamsem hong omlai ding a mipite’n i palai ding ua i telkhiakte uh MP, MLA leh MDC te adi'n a mawhpuakna uh hong lian semsem zomah lai ding hi. Huaibanah, a poimawhna uh leng hong tam deuhdeuh laiding a, ikhovel mahni angma-sialna khovel a i omtak man in Pathian deihna toh mipite makaih siamna ki phamoh kha ding hi. Sum-leh-pai leh thuneih utna in i nam-leh-gam zuaksawm keile hang ut huai mahmah hi.
Mipite'n le pilvangtak a hiaizaw palai di'n chitna nei himah e chia' itel zawk uh poimoh kha ding hi. Hiaizaw kou tanau ahihban ah beh-leh-phung ahia chia telkhelh baihsam lawtham ding hi. Huaiziakin selection ideih keivet uh leh Pathian dongkawm in election mah i chih aleh beh-leh-phung a enloua, ka gam leh nam a dia kua muanhuai hiam chihte theih masak a i palai di itel poimoh kha ding hi. Tuakia le hilou in mipi'nle i palai' telkhiakte uh azatdan siamle hong ki phamoh kha ding hi. Banghiam thilhihna teng, video album honna leh function ne-neuh a sum-leh-pai lam-etnaziak lel in Chief Guest din chial nawn dahle, amaule koilak hiam adia development fund apat hon eukhiak uh leeng hikha maithei ding hi. Huaiziakin i nam suahtaak taktak i ut leh Pathian dongkawmin i palai di heutu hoih leh muanhuai mah ngen in, selection sang'n Toupa deihdan election mah ah awle !!!
LAIGELH-TU' LAIKUNG PAN: Hiai article mimal leh pawlpi kuahiam kawk tuam nei a gelh ahikei a, awlmoh luat ziak a gelhval ahihkeileh kuahiam khat lungsim kamkha a om khak zenzen leh ngaihsiam iki ngen hi.