US President Mr & Mrs. Barack Obama toh hun zatkhawmna
Written by Manthianching Guite

27/1/2015, Siri Fort Auditorium, New Delhi: United States of America President Mr. Barack Obama leh a zi Michelle Obama toh 27 January 2015 ni a hun zang khawm kha di chih ngaklah tak a ka na ngak guk giugiau ni a hongtung petmah hi. A thugen dak 11am chih himah leh kei leh ka lawmte (JNU student te) 7am vel in bus in ka kipan khia uhi. Amun Siri Fort Auditorium 7:30 am vel in ka tung uhi. Khua vot in zing baih lai mahmah hinapi in kua peuh kithalop ahi ding a security check na di line saupi petmah ah mi tampi ana ding dim khin uhi. Security check mun 3 vel a ahon neih zoh un auditorium sung ka lut thei ta uh hi. Hiai hun a chial khak leh hamphat na tang atam zaw student leh NGO'S te ahi uh hi. Dak 11am a President pa thugen ngai din mipi’n ngak lah tak a om in aki dak velvel a, kua te khawng chial a om kha a mithupi kua muh khak om thei de aw chi in aki om hi. Huchia mipi’n President pa ngaklah tak a aki om lai in tutna amasa zawn zuan a hong pai Mr. Kailash Satyarthi leh a innkuan te kipahpih in mipi’n khut beng in tutna mun chiat apat amah zah tak na in ki ding diamdiam hi (Mr.Kailash ahih leh Child Rights Activist, Nobel Peace Laureate).

Dak 11 am vel hong gingtak in President pa hong lut dek ta ahih man in na om na mun chiat a ana om kinken dingin nget na ahon nei uhi. Neha Buch, NGO Professional( sinsaktu nasem) in Mr and Mrs. Obama mipi te lak a pulakna nei dingin hamphat na piak in om hi. Mrs.Obama pulak masa in huchi in Mr.Obama hon pulak a mipi’n amau te zahtakna leh kipahna etsakna in tutna mun apat dingtou in khut beng in ana ki vaidawn hi. Mrs.Obama mipi te lak a ma vual a (construction workers apat innkuan khat toh tukhawm) hongtu a, President pa’n ahih leh amun hon luah hi. Mipi’n athugen ngai nuam in aki dai khipkhep a, mobile phone ging hiam or mi ki vial leh muh ding om lou hi. A thugen (sentence khat zoh teng phial) kal lak teng in mipi kipak in khut beng a, thu ahon gen nawn chiang in ki dai khipkhep zel hi. A thugen thulu, “India and America: The Future We can Build Together,” chih ahi. India leh America te hun paisa a kitanau dan hoih tak in tak lang masa a, America te India a dia pomoh ahih kawmkawm in India te’n leng America adia na thupi taktak sem uh ahi dan tak lang hi. India mi America a om te poimoh na tak lang a, Diaspora community tam pen India mi ahih dan gen hi. India adia nuclear energy hoih pen, tui siang pen, huih siang pen, technology hoih pen leh lou nei mite adia van zat hoih pen deih sak a huai dia partnership hoih tak hi a India leh US in maban a pan nasatak a lakhawm ding ahih dan gen hi.

India in thilhih theih na(potential) hau mahmah a akim le kiang a gamte toh ki tanauna ah role lian tak nei hin a abik tak a Asia Pacific gamte ah lemna leh muanna tun na di’n dinmun poimoh tak nei chi hi. Burma leh Sri-lanka gam a mipi zalenna(democracy) tungding ahih theih na dia India in panla di’n ngen a, US in India United Nation Security Council (UNSC) a permanent member hih theih na dia nung thuap (support) ahih dan gen hi. Khovel a lemna leh muanna om theih na dia US leh India in pan nasatak a la khawm di’ng ahih dan gen hi

President Obama in miteng kikim (rights to equal) ahih dan nasatak a gen in sahkhua zalenna poimoh leh ngai khawk mahmah ahih dan gen a India dan bupi a article 25 pan san in miteng in sah khua zalenna aneih na ding leh lem na leh muanna om theih na dia pan lak poimoh asak dan gen hi. Amah ngei leng sahkhua toh kisai a tamveipi question in om ta a aman ahih leh sah khua i chih Mahatma Gandhi in ana gen mah bang a huan(garden)khat sung apat pak(flowers) kilawm tak om khawm bang ahi chi hi. Lemna leh muanna khovel in adeih pen i lungsung(heart) apat hong kipan ahi chi hi.

 Chi le sa a ki deidan na pen koih mang a kikim(equally) tak a miteng in opportunity aneih ding uh ahi chi hi. India mipite’n Shah Rukh Khan, Mary Kom leh Milkha Singh te chi leh sa(racial) ziak hilou a, alohching na te uh ziak a akipahpih ding uh ahi chi hi. Amah US President in leng hun paisa a tamveipi (skin color ziak a) ki deidan na ana tuak ahih dan gen a hi. Amah mivom leh a pu (grandfather) hun paisa a British sepaih te ann huan tu apang himah le amah tuni a America President ahih dan leh, India Dan bu pi gelh tute lak a ana pang Dr. Ambedkar leng nam niam (untouchable caste) ahih dan gen a, singpi zuak (tea seller) tu Prime Minister (Narendra Modi) a neih i hih dan uh manghilh lou a chi-le-sa ziak a ki deidan(discrimination) na omlou a miteng in akikim a opportunity nei i hih dan uh manghilh louh ding chi hi.

Numei te dinmun (gender equality) dawp sang a numei te zalentak a aom ding uh chi hi. A zi Michelle amah hin khua a apoimoh dan nak tak in gen a (referring to her as a strong women), hiai India khopi a numei te’n zalentak leh muangtak a a om theih uh adeih sak dan leh apoimoh dan gen hi. Numei te dinmun ahoih chiang in nam khang tou a (Nations are more successful when their women are successful), numei te siamsinna poimoh dan leng gen hi.

Siamsinna a ngaih poimoh dan gen a, tuni a amah leh a zi siamsinna ziak a hiai tan tung ahih dan uh gen hi. Innkuan hoih tak leh khosa thei taka pat hilou ua scholarship te khawng ziak a hiai tan ana tung uh ahih dan gen hi. Siamsinna(Education) in kei leh ka zi ka khangthu ua mangngei nawnlou ding tua ka dinmun uh hon bawl khia ahi chi hi. Miteng in siamsinna akikim neih theih na dia panlak poimoh asak dan gen a, Vishal (naupang pasal a thugenna hun a hongtel a pa construction workers) in ka letchiang a sepaih a pang ut chi a atup a gen in kei tanu ( President pa tanu te Malia and Sasha) te tup le ngim te poimoh na zahzah ua poimoh ahih dan gen hi.

Thu poimoh tampi minute 40 vel agen zoh in athugen zou in mipi te lak a angaihnat na uh etsakna in chibai hawm in hon paisan ta uh hi.