LIA'NG DING IN ZODAWN LIANG SE!!
By: Hauzel Gou
Pathian in mihingte vualzawlna a honpiak dan ana ki bangkim kholkei; akhente neih-le-lam ah, akhente mel leh puam ah, akhente lah pilna-siamna, akhente lah lasak siam leh kong tuamtuam ah vualzawlna ahon pe chiat hi. Mihing ngaihtuahna dan in zaw, sum-leh-pai ana nei deuhte bang leitung a nuamsapen leh ana kipakse di' un i na koih sek hi. Himahleh huchi ana hikim kholkei a, mihingte'n haksatna leh buaina tuam chiat kinei vek hi. Huaiziakin, Pathian in i hihna tantan a vualzawlna honpiakte' ah lungkim dan kisin zaw le'ng, mi nuamsa ki hi khamohlou ding hi.
Hun-leh-ni te hongpai zel in, khovel khangtou leh kikheng zel te'n eilak leeng hon nokkha sam hi. Khosakna nopzawk deuh nading leh bitna lam-etna in i zodawn a khuate nusia in tuni in Lamka zaang naakpitak in iki denna uhi. Inn nei hi'n aneilou hitaleh, kiloh tawm a nekzon bang utzaw in Lamka zaang mah i chi chiat uh abangsim mok hi. Huchi in tuni chiang in Lamka zaang ah mahni inn nei a khosa sang’n mi inn luah a khosa bang itamzaw phial maithei di ua aw chih theih in om hi. I khopi neihsun uh Lamka ngei lah muhtheih in khangtou hulhul mai, inn thupi taktak toh gari lah neihvek di sa ihi di-uam ah mi inn luah a khosate' nangawn inle ki neisim chiat-ta hi. Hiaite'n koi a pat sum la uh adia aw chih theih di khop in, a hausa ngalte inn khawng bang nasa in thupi thei tel velvol ve aw…!!
Hiaite ziak sawnsawn khong mah a zodawn nutsiat utna lungsim michih phialin kinei ahidia aw chih in om hi. Nidang a i lou neihdan a neihna ding in lah igam ah louneih kingakna taak hinonlou, buh-le-baal deih bang in piang nonlou hi. Kum khat a ikham ding buh lel tak zong piang nonlou a theih a om ziak in Lamka zaang kidenna tamtak ki om kha ding hi. Haichi chindan i siam zohlouh ziak leh i gam a zat dingdan i siamzohlouh ziak le zaw hikha in teh. Malta leh zuaktheih haichi dangdangte lah deih bang in piang nonlou a i gam mahmah uh le sainou gawp in, haichi hoihna ding le vang lawta ana hi khamoh lou ding hi. Huaibanah a vaihawm dingte’n lah khua nusia-sia ahihman ua vaihawmna kitup leh mumal om nonlou hi a theih in om hi.
Zodawn a khosakna haksa gawpta ahihman in, i ngeina hoihte le ching leh sunzom theinawnloua a nam a le i ngeina hoihte mansuah gaita houh i hi de aw chihsim in om hi. Mimal in mahni a ding kia khual a nidang bang a khotang a ding ngaihtuahna tawmta ahihman a innsak - innkhang toh ankhing tuibuk, neih lamlam kikawm tuah dialdial chihte khong om nonlou phial hita hi. A neite'n innsak-innkhang kholh sang in zuak a sumsuah ki utzaw chiatta hileh kilawm hi. Hiai thu kon gelh lai-in ka lungsim ah, naupang chik ka hihlai a ka na tuah khak ka mangilh theih hetlouh hong kilang khat kon gen mok di.
A kum chiah zaw ka thei non kei, zodawn a khosa a ka omlai un, lou vaat hun kuantak in ka nu leh ka pa damlou lupna ngak in sawtpi hong omtuak laizang uhi. Lou vat bang hong hunta, damlouhna ziak a lou bang neizoulou di dinmun a om himahle ung, khosung mipi' hoihna ziak in lou lianpi mahmah ka khoh zohlouh di uh hon vaatsak ua huchin huai kum lou neithei kasuak uhi. Hichibang khotang a awlmoh leh ki it-tuah a panpih ngaite kipanpih tuah dialdial chih tuchia'ng in zodawn ah omkhawl nonlou ahi dia aw chih in omta hi. Huai kum in khopihten lou hon vatsak mahle uh, damlouhna ziakin lou ginatak a khoudi omlou ka hihman un akum nawn in chu neklehtak ka haksa petmah uhi. A chang in vaimin bang, atta pum huan bang anndia kasetni uh atam hi. Vaimim-buh bang ka huan munkhol un ka thei a, huai khong i nek leh lungsim khat chu lungkim theilou ahi ngei dia gilbang kial munse abang hi. Skul sunkhawl hunta ka lawmte teng uh, a inn chiat uah sun-ann nedin pai ua kou unau leeng inn ah ka pai zel sam na ua buhbel hawm vuak kava ki et siaksiak mailouh uh tuh hihdi avangtel mai!! Huai kum mah in innsak-innkhang kiang a va taitai kisuanlah huaigawpta ahi ngei di, aloutheilou a puktaw a kuan a hong ngaita hi. Kanu toh dum/ malta tun leh ankam lom peuh pua in khawkim-khawkiang ah puktaw in ka kuan sek zel uh chih naupang chik himahle'ng ka theihoih lawtel hi. A khente'n honna pia ua, akhente' lah ana kisathei pawlpawl bang leng ana beituan lou hi. Huailai a honna panpihte thupi uh kasa a, mi hehpihna neitak ahi uh chih kamu a Toupa'n aleh tampi'n a vualzawl ngei-ngei ding chih leng ka lam en bok hi. Amauzaw ei Paite kampau zangle ahisam kei ua unau Vaiphei leh Thadou kampau zangte khawng ana hi zaw uhi. Tulai in hichi bang puktaw a kua'n chih khawng om khawl nonlou adia aw chih in om hi.
Huchi kawmkal ah tuni a i zodawn a, i unaute kahna aw neukha i en sukdi:
“Kou zodawn a na unaute uh khosakna zaw haksa lua eive, kipaktak a hinkhua zatzaw baihlam ahi khol kei. Ziing a huandi kaikhawm, nitaklam a di koi a lak di adia aw chi'n lungkham tak in hinkhua ka zang zel uhi. Ihmut zaw ka tha uh tawlluat ziak ahikha diam ah, atamzaw Pathian ompihna hang in ka ihmu thei vanglak uhi. Himahleh koudi'n lunggimna zanmial bei ngeilou ding abangta!!
Damlouh hita'n kon tuaklai uh zaw, chih ngaihna theilou in ka nupa un kaki entuah maimah ua, chihmoh manin kinak phialphial in omsek zomah hi. Damlouh hita'n tuahni a vanaih theih pahpah ding khosung ah sorkal in damdoi inn honbawl sak sam mah leh ahon kemdite' melmuh phak din a om ngeikei uhi. Huaiziakin, dam ut ka hih chiang un, damdawi man ding sum-le-paai zontheihna teng a zong ding in kong kisata uhi. Louma' a piang haichi gah ka neih sunsunte uh zuak kawm ding chi'n Lamka zaang ah zin ut mah le ung, lam paina di man nangawnle ka nei zoukei lai uhi. Huaile kei chauh tuan man honla le uh phave, ka van puak man leng hon awl tuan lou lai uh eive aw. A mihing tellou a van amah a khualzinthei sa uh a diam ah..
Ka bahara di nangawn suktuah haksa kasaklai takin atamzaw in hon khang sak lai uh zaw zodawn khosakna haksa tak mai hon behlaptu ana hi sawn-sawn zel hi. Tu'n zaw a poimoh tenten louin, ka tanau laina phaizang a omte' nangawn toh le kimuh di haksa gawpta hi. Amau lah lampi hoihlouh paulam in zodawn phakdi himhim haksa sagawpta uh hi'n kathei hi. Lampi zaw hoih kei mah e, lamsak-lamkhang ah gari awn puk dekdek hial in a langlang ah hon kisawi pih in gimhuai petmah mai hi. Amau gen i zak leh bahara hon khangsak uh le khansak tuak mah bang zel veh aw, lampi se law mahmah ahih chia'ng a, gari khawng bang pammaih lua himaithei, lampi hoihlouh ziak a gari semun mahmah kha ding hiven. Lampi siatluat ziak a bahara khansak chile lah lampi hoihna dia thuneitu te'n ngaihsak tuanlou zel uh. Atawp azaw kou zodawn ate athuaktu kahi zel mai ve uah.. kou a dia tung gikna hon tun ana hi son-son suakzel mai hi.
Lia'ng ding in zodawnte ka liangse zel uh maw!!
Genta vanglak kon genbeh zek lai di. Koule maban ka et chiang un kou dinmun bang a ka tate uh a khosak ding uh ngaingam samlou in amau a ding a lametna omlai khakleh chi'n ka tate uh bang lai zilsak ka ut sam uhi. Siamsinna hoihzaw deuh ale kaisak zoulou ka hi uh chih theihsa ahi mai. Huchi himahleh solkar in, khua leh tui hihna neisam ka hihman un hon mangilh samlou uh ahi ding e, skul building hoih taktak bang hon lamsak sam hi. Huaikia leeng hilou in ka tate' uh laisiam ding hon deihsak lai zomah ahi ding ua, mipil leh laisiam pipi ka tate uh lai hilh di'n a guai nalai uhi. Sorkar mahmah thukhual in a gam mite it hina tel e. Himahleh zodawnte lia'ngse ka hi sawnsawn di uam ah, ka damlouhni khua ua hon kemdi leh ka tate uh lai hon hilhsak dia solkar in muangtak a honpiakte uh lah azi atate uh toh nuamtakin phaizang ngen ah khosa in om chiat tel ve uh aw! Seplouh gah nekna a gil uh nalou a, a chi uh le damdam mah hi’n teh, amaute' bang a omna saptuam sung khawng ua tallang pipi leng tampi om uh chih le ka na zakha sawnsawn lai ua, kipahpih huai chih di hia chih leng theizouta khang!!!
Kou zodawn a na unaute uh zaw hausa (chief) vaihawmna nuai a om diakle ka bang khol uhi. Bangbang hiam lungkim louhna ne-neuh neih ziak in Lamka zaang, a naih theithei in kong naih mai uh ngaita hi. Zodawn a kou kivaihawm khumdan zaw lungkim huai khol hetlou bang ana tamlua hikha maithei ding hi. Khasiatna'n la le khasiatna di ngen ahi dia, huaisa'ng Lamka zaang mah kon naihsam uh tuh kou adia thoveng ahi zaw din ka lamen uhi. Huaiziakin amaule hiai khawng, a ngaihtuah ngeisam di ua aw chih in om a, mipi omkei leh vaihawmtu' hihna dinmun luah theilou ding uh ahi chih a theih ua, mahni angsung di kia hilou a ka khosung mipi deih bang adia aw chia vaihawm siamna poimoh lua uh kasa uhi. Solomon in kumpi a hih tuunga a mohpuakna lian ahihlam tak thei a, a mipite tung a vaihawm a siamna dia Pathian kiang a pilna a nget thupi hina maizen e.. Amau, hausate zaw muhtheih in khang hulhul maive uh aw.
Mihingte' i buaina uh tuam chiat ahi ding, kou zodawn ate zaw nou phaizangte na buaina uh, ui (dog) buai in ka buai vetkei ua, copyrights thu inle kaki tauh-tauh samkei ua, mi kitengdi tengle gen sia-sia man dinle ka khosa sam kei uhi. Tua chauhle deih khoplou in mi nupa kikhen khate bang mohsa in gense man dinle ka om sam kei uhi. Hiai ne-neuhte khawng noutung ah le atung theikei ding kua a chi ngam? Facebook khawng bang ah fake ID zang in phaklouhte bang na ban dem-dem lai zomah uhi. Huaile deihkhop nailou lai in pawlpi khawng bang gensiatna di'n na zang zomah lai uh hi, alehlam ah kou zodawn ate ka lungsim uh siangthou zaw abang vanglak ka sa hi. Huaibanah, kou zodawn ate' zaw Pathian vualzawlna ziak in sum battheihna License (Government a sepna) ka neihlouh ziak mah uh adiam leiba huchipi in ka nei kholkei vanglak ua kipahhuai lehlam hi. Hauhsakna ziak a lungmuang tak a le ihmu theilou inle ka om sam kei ua, ka neihsa uh hon deihgoh a hon pimang di, hon that di chih khong lauhna nei inle ka omkei vet uhi. Ka nek di chauh uh le ka buaipih khoptek uh apha a, nou buaipihte buaipih man dia khosa vetlou hi ung. Nou buaipih toh kou buaipih zaw aki khaisam ve chih in om phet hi.
Atawpna di'n, kou dinmun le hon ngaihtuah sam din kon ngen uhi. Zodawn ah om himahle ung sumsenna di nou a bang in atamthou sam hi. Donpi-donke chih mahmah lah tamlawta ahih chia aneiloute adia mit hahna di vanglawta hi. Ahihtheih liai leh thil bangkim ah na hehpihna uh kinem kawm in kou zodawnte lia'ng ding a liangse kahi uh chih mangilh lou ding kon ngen uhi. Zawng thuakdi ngau kithuaksak sawm non dah hamham ni uh maw!!
U-leh-naute…”
LAIGELH-TU' LAIKUNG PAN: Hiai article mimal leh pawlpi kuahiam kawk tuam nei a gelh ahikei a, awlmoh luat ziak a gelhval ahihkeileh kuahiam khat lungsim kamkha a om khak zenzen leh ngaihsiam iki ngen hi.