KA IT - KA NGAIH: ZOGAM NUAM
~ R. Sanga
Thumapi:
Ka pi ittak, Phalching Laingek, Mimbung khua, Mizoram in November 4, 2014 ni zinglam daak 03:30 am in leitung nuntakna haksatak nusia in lungzuan sial nawn lou diing in ataksa pen lei a siam ahih toh kiton in lei a kiik diing in Mimbung Haanmual ah November 5, 2014 ni in vuiliam in om hi. Hiai ni mah a aluang vuiliam ahihma a lapman diing hile’ng Mimbung khua ah ka hoh pelmoh diing hi. Himahleh, Imphal akipan aluang pen lap vual ahi kei hi.
January 09, 2015 ni in Zogam khawpite lak a etlawm leh minthang mahmah, Lamka Vangkhua ah giaklut diing in Imphal akipan ka Lawinu leh ka Naunu toh ka kuankhia uhi. Mimbung, Mizoram manoh in Lamka akipan zinglam daak 05:15 am agin toh kituak geih in Angels’ Place akipan ka lawmpa, Zampu Bolero a tuang in ka nu, Thuam toh Tipaimukh Road tawn in a phamsa, ka Pi Phalching gaal diing in ka kuankhia uhi.
Mizo National Front (MNF) in Independent sual a Mizo nungak-tangval tamtak in gam-le-nam itna ziak a leitung sihna tanpha thuak in Indian Army toh kidou a abuai vanglaitak uh kum 1969 in ‘Grouping’ chi in khua nih-le-thum munkhat a gawm in om hi. Lounasem thei dukdak leng om lou, miteng beidongtak leh buai vengvung mai, ‘Curfew’ mahmah lah tam lua, haksatna nasatak, gilkial-dangtaak a michih om hunlai ahi a; Mimbung khua ah ka Pu Damsing Laingek in ka Pu Lampiang Laingek & azi Pi Phalching kiang ah School kai diing in hon omsak hi.
Mimbung Khua:
Kum 1966 - 1970 kikal hunsung pen Mizoram buai sukpi in hon nuaikha ahihman in Mizo-Zomi nungak leh tangvalte mahni Inn lum a om ngam zong om lou; Manipur-Zogam huapsung khua tuamtuam ah kithehdalh in, khenkhatte Lamka khawpi ah, mi kimkhatte Singngat, Likhai, Mualnuam, Songtal, Umtal, Thanlon, etc., etc. ah pemlut zungzung mai uhi. Huai hunlai, kum 1969 pen ka hinkhua a diing a mangngilh theih het louh thil tampi aom hi. Tuate lak ah thilnih lel ka hon taklangh zual diing:
1. Mimbung khua ah kum 1969 in Class III zir in ka om a, ka it mahmah, Pu (L) Lampiang Laingek leh alawinu, Pi (L) Phalching (gil a gah goutan, numei khat leh pasal li anei uhi)-te nupa in asung ua piang bang geih a hon kepdan uh baan ah, hawmthohtak leh duat ngoihngoih a deihsakna chikim toh hon kepdan uh tunitan ka mangngilh thei kei a, chikmah in ka damsung nite in mangngilh chih himhim om lou diing hi. Pu Lampiang leh Pi Phalching zaidam petmah uh ahihman in kum khat vengveng a inn ua ka om sung in kamsia hiam, aw-saang hiam ahihke’h maigum a aom lam uh ka thei het kei hi.
2. Neek-le-dawn haksa lua ahihman in, santeen natna ka nei kha a, damsiang lou in tunitan santeen kumlui ka veiloh hi. Kei a diing a hiai kum 1969 pen chiamtehna hoihtak asuak zenhouh hi.
Tipaimukh Road:
Mimbung khua pen Sialkal Range a diing a apoimoh mahmah khua khat ahi. Grouping Centre zong ahilai hi. Lamka akipan via Thanlon tawn in Mimbung khua manoh in Bolero Gari in ka tai nilouh uhi. Tipaimukh Road mam hinhen zui in Gari zong kitat tuan bouhbouh chih leng om lou in Thanlon khua tan lampi hoih deuh mai zui in, abaan Dialkhai khua ka tungphei pah uhi. Dialkhai khua akipan Khawzawl Road, lamlian sial in BRTF nasemte abuai petmah mai ua; lampi mam hinhen Sinzawl khua atun kaal angaklahhuai takzet hi…!
Sinzawl khua akipan Mizoram gamgi lui, Tuivai tan lampi bel buannawi leh hawktui toh kizahzen ahihman in Gari tai man lou, atawl a tawlthoh mahbang in ka kikhin tittit uhi. Hiai lamlian pen Guite Road Minthang ahi hi.
Khawkawn Vangkhua:
Chikmah a khawvak ka muh ngei louh, ka muhpatna mun leh ka lam phumna mun-le-mual nitaklam daak 04:35 pm geih in Khawkawn khua ka tung uhi. Ka nupi-tapa, Rama Inn a lut masa in alawinu’n singpi lim deuh mai hon na dawnsak hi. Sawtpi khawlman lou in, Khawdungsei ah ka paisuak ngal ua; Mawite leh atanu naungek toh hon zui in Gari ah kineh deuh mai in Mimbung khua zaan daak 08:30 pm in ka tailut khongkhong uhi. Mawite pen ka Pu Sangkhum Laingek tanu upapen, (L) Phalching tunu ahi hi. Khawdungsei a pasal nei a om ahi hi.
Zogam Nuam:
Ka It - Ka Ngaih: Zogam Nuam, mual kitawi leh lui guamdung etlawm, sing-le-gua hing dipdip lampi a kipan galdot in, Zogam kilawmtak mai nung-le-ma ah etchim louh gam guate leh tangsam paak nalh taktak lamsiik ah hunkhop muh diing om hi. Tangsam paak muh chiang a bel sa neekna diing naita chi a kipahluat lai nite (i.e., naupan lai hun), hun lui ngaihna lungsim ngaihsutna ah hong suak a, lungzuanhuai bang ka sa thepthup hi.
Mimbung Vangkhua:
Mimbung khua ah Pu Dampau Guite toh hun sau lou ka houlim uhi. Amah pen Mimbung khua ah Ex. VCP ahih baan ah, mi poimohtak ahi. Pucca building hoih deuh mai anei bok hi. “Sialkal Range Development Council Inaugural Function January 20, 2015 ni a om diing ngaak ngal ve ua…” hon chih toh kiton in houlimna paitou zel in, Sinzawl leh Mimbung kikal a lampi (L) Pu Jelshyam Road via Tuivai Bridge Gari tai paisuak theih diing in abawl theihdan om lou diing adiam chihte gen in houlimna vantang nei in thu tuamtuam ka gen uhi. Mizoram ah bel Zodawn khuachih kivaihawmna pen Village Council in kivaipuak uhi. Tua ahihman in Village Council mohpuakna lian mahmah hihtuak hi. Lengteng Constituency MLA, Pu Rohlun Hauzel ahi a, Minister ahih baan ah, eimi lah hi bok, Paite kampau mahmah ahihna toh lametna saangtak neihtheih maileh kilawm chi in ka kikhen uhi.
Pu Dampau Inn
Sinzawl leh Mimbung kaal Lamlian
EBC Church Building
(L) Pi Phalching
Zogam Nuam: Sharon Paak Etlawm
Kum 1969 – 2015, kum 46 hunsung in nasatak a kikhekna om hi. Inn tampi ana kibehlap a, neekzonna leh niteng khawsakna toh kisai in mi kimkhatte a di’n Sumbuk bawl pen kivakna taktak diing in kingaknatham aching hi. Zohuan bawl zong ana om zek ua, amaute in zong neekzonna di’a kingakna ahithei achi uhi.
Imphal Kiiknawnna:
Zogam etlawmna leh manphatna mit ngei a mu in, lampi hoih leh hoih lou tawn in Guite Road zuisuak in Mimbung akipan Khawkawn ah giaklut in, January 13, 2015 ni in Imphal manoh in Sinzawl gam lamlian hoih lou zet mai zui in buannawi lak ah Gari taang dekdek, awl a kikhuk ngeingei zawzen in ka hong pai uhi. 
Mizoram - Tuivai leh Sinzawl kaal Guite Road
Zogam etlawm leh nuam lua hinapi in Lamlian pen gina lou phing ahihman in, abiktak in Guite Road tawn a, meiholbang a vom ngiingei tung a Gari a tai zanzan kaal ngaklahhuai petmah hi. Zodawn hauhsakna, Gammaang (Forest) leh leitung-leinuai hauhsakna Zomite in chikchiang a asun-a-zan chih himhim om lou a Guite Road zui a sumsinna tatsat lou a kivialleh hun hong tung diing hiam chih leh Zohuan hing dipdip, Pu Kapsang in Ngopa Singpi-Huan abawl bangbang a chikchiang a Zogam hong paallun diing hiam chi in Gari gimlaw mahmah ahihman in kahtamlou in khoisa huthut mai hi…!!
Pu Kapsang Singpi-Huan, Ngopa, Mizoram/Zogam
Pheiphung Khai Lou Tuanglam Zotsiam (Gari)
Zomi vontawi lelliang theite,
Khaubang chiahna Zotui tuanglam, zuun louh tulpan kai;
Giabang zuun diing tongdot lunmang, koi a sawlbang hei na hiam?
Tongdot lunmang selung khimbang ziing e.
Vaimang siamsil, Pheiphung khai lou tuanglam zotsiam,
Ka lailung khuambang luah a ami zata’n nun-nuam sawlbang heina;
Kei di’n na saang e, pheiphung hambang vai veng,
Tuanglam zot-na’ng mai mo’ng e.
Tuanglam sawlbang heina zuun louh tulpan kai zou e,
Sihbuan tuibang luang e, ami zata’n pheiphung khai lou daitui kaai nuai’h;
Kei di’n na e, ka guh-ka taang na e, na lua sa’ng e,
Sian aw huai aw, tuanglam thelnah kai nuai ah hambang vai ing e.
Ka it – Ka Ngaih: Zogam nuam lelliang sa’ng e,
Zuun louh tulpan kai nuai ah pheiphung khai lou a tuanglam zuan in;
Vaimang siamsil pheiphung khai lou zaitha patbang neem e,
Tuun leh zua aw koilam sawlbang hei na hiam? Zogam nuam tulpan kai zou e.
Lengteng Taang