Khristmas…Huihkhi kei adia lunggimna lel maw na hih ding!
(Dedicated to my nephew and niece)
Written by Suanmang Phaipi
Khovel thupina leh etlawmna muding leh zang ding in Tuunnu sunggil pan in ka hongpiang khetei sam hi. Bangmah theilou leh anuam, ahaksa phok hetlou a ka hongpian khiat apan iitna lianpen leh deihsakna sangpen toh honna khoilian a, lawm leh vual phaklouh khak ding lau ngoihngoih a honna kem tawntung ka Tuun leh Zua iit te Khristmas chibai kon buk hi.
Nu, Pa hiai Khristmas mi tamtakte ading in lungnopna leh kipahna, huanah khenkhat leuleu ading in lah vanthak hoih taktak leh nalh taktak toh kizem a siamtu Pathian phat hun nuam ahi chih kenleng ka haih hetkei hi. Mi tamtakte’n anu leh apa khazaakna nuai-ah lungmuang tak in khovel ah hun azang ua, a duhduh uh leh adeihdeih uh lei in hun honzang uh zaw…! Akhamuan huai biik abang ngeimai. Pa, mite’n hiai hun in hiai “Ka Pa’n ahon leisak ahi, ahon puak ahi” chih paukamte khawng uh, kei a di’n zaw manglam abang hial hi. Himahleh, mite’n anu leh pate uh a suan mahmah bang un, kenleng ka hon suan mahmah na aneu biik tuan kei hi. Ka nopsak zawkna ding leh lawm leh vual ka phak theih samna ding a anuam leh a haksa leng khok salou a tuni dong nonna kepnate uh thupi leh manpha kasa a kei a ding in manghilh theih vual ahi kei hi.
Nu! Hunlui mual liamsate ka enkik zel a, inn kuan kimtak a hun izat khawm lai khong uh ka ngaihtuah vungvung zel a, dahluat ziak in ka biang ah khaamvual louh in mittuite hong luang zungzung zel hi. Nu! Ka Pa hon omlouhsan baihluat zaw ka ngihtuah chiang in poikasa petmah mai hi. Ka Pa kaihthoh theih thak himai zenleh zaw kaithou nuam natel ing e maw…. Himahleh, thil hitheivual ahi kei hi.
Nu! Ka Pa tellou a, amah omlouh lam leng kilang hetlou a, Pa dinmun tengteng la a, anuam ahaksa sialpi vuahthuak a kei ading liauliau a na thuakna leh pan nate thupi leh manpha kasa a nang bangbang khovel a nu hoih om ding in ka lam-en kei hi.
Nu! Khanvualte en ana sek ngei e maw…. Mi nu leh pate’n atate uh kipah theih na ding in, duhduh leh silh leh ten asuak thakthakte bang akipah na ding uh ahih nak leh lei khawksalou in sumseng ngam uhi. Huanah, khanvual phaklouh khak ding lau in College hoih penpen bang mite zotna gamdang leh mun tuamtuam ah apaisak zungzung lai un kei a di’n zaw hiaite lungsim aleng ngaihtuah phak ahi kei hi. Nu! Nangleng hiate na mit mahmah in na mu a nata hawm thohte tung ah mite hih bangbang in na hih tei utsaam chih ka haihkei hi. Himahleh, nu mite zaw inn kuan chawmtu ding nei ua, nupa a pangkhawm in atate uh enkol ua, nang zaw langbei na hi a maw. Hiaite pumpelh theih hi leh keisang mah in na ut zaw tham ding in ka gingta hi.
Nu! Khristmas huih khite hong nung hiauhiau non ta, achangchang in Khristmas bang leng tung ngeikei leh ka chih hun atam ngei mai. Mihing in hihtheih lah kinei tuan samlou a maw…. Mite’n van hoih pipi hong silh ding ua, hiai hun in kei leng siamtu Pathian phat ut sam mah leng mihing ka hihna ah mite lak a kihel bang kalin ngoihngoih mai hi. Pathian biak zaw silh leh te’n ziak ahi kei chih non thuhilh sek leng ka haih kei. Himahleh, tu chiang in khovel hong khantouh zil in neih leh lam, ki zepna hong thupi mahmah ta ahih man in ei daikilkal a mite ading in mit bangleng hah ngam huailou abang hi.
Nu! Hiaite kagen hang in nang hon sit leh hon musit kahi hetkei. Ka pian a pan inn kuan khosa haksatak a khangkhia ka hih na ah apuak dan ka siam mahmah hi. Nu aw, vual-en na mahmah lehleng, ka neih zohlouh pi zaw ka eng tuntun kei a, ka neih phaak tawp in ka lungkim hi.
Nu! Mite ading in meithai himahle chin, kei di’n zaw kalei Pathian leh ka Nu leh Pa na hi. Pathian, thumnate dong gige kiang ah tawplou in I thuum dia aman lem ahon sakpihleh damtakleh kipaktak in Khiristmas izang ding aw….
Khirstmas hong tung non ding zaw ka ngaihtuah chiang in ka ngaklah kei ngei mai e aw!!! Hiai hun in, mite’n anu leh pate uh ading in thilpiak thupi taktak leh manpha taktak te a hihsak ding ua kei ading in zaw hih theihvual ahi kei hi. Nu! Tuni dong kei ziak a na thuakna, na pannate thuk kik leh hihsak zoh kahon neihlouh man in hon ngaidam in aw…. Nu! Thilthupi tak hikei mahleh kei hih theih omsun leh kon piak theih omsun hiai ahi, Nu… Khristmas Chibai.
Nu! Kapa leng hiai hun hong tel theisam lai hileh uthuai hina maizen e maw…. Laa in inn kuan kim in Khristmas zangnuam laiveng achih pen tuni a kei dinmun a hong tung zaw puaksiam haksa kasa lua. Hiai Khristmas zaw kei ading in lung gimna lel maw ahih ding???
Nu ka Pa phawk gige na ding in hiai laa kahon gelh hi
Zua aw omlai veilou, tongdam sanglou a kha nakiat zaw laidip nalua e
Na von nih-thumte na khual vang a kha na kiat zaw.
Lung a ka gel chiang in ka sinlai gubang honzen e,
Zua aw nang tel lou in kua’n zing vai hawm ding hiam?
Ka tuun uh leh na von nih thumte’n na vang mubang hong ngailua ung,
Zua aw! Na baanzaal hong khak lai ve maw.
Kha na kiat ni in ka luanhi in tubing hon tum e,
Na von nih thumte hambang vailua ung.
Zua aw tung chiang thangvan ah dawnbang kituak ni aw,
Zua iit, pheiphung suankhawm non ni, haibang honna ngak in maw.
