MUSIC LEH KHAMTHEIH
Written by: K Lianthansang

Music leh khamtheih kitanau mahmh ahi ding a, Pi-le-pu te hunlai apan aleng ana kitanau sa ahi uhi. Laam ding a cihciang un,a zulup uh a pholh ua, aki tepkhel zihzeh ua,akhamchiang un khuang beng in 'Zangtalam' zel uhi. A khamhoih taktak ma uh lam taktak theilou uh ahi di uam chih sim in om hi. Kuazi-Kuata chih omlou a khuang beng a lasa a hong lamkhawm chiang un chu kham mahmah ta uh chihna ahi. Hiai in Khamtheih leh Music kitanau nai mahmah, kikhenthei di vual ahihlouh dan uh hon hilh hi.

English lasiam minthang mahmah, Lady-Gaga in, media te kiang a agenna ah, khamtheih hih ahihlam a iim hetkei a, khamtheih ziak a a ut bangtawk a la sathei ahih dan gen hi. Huaikia le
hilou in, ''La kagelh dekchiang in, full concentration kapiaktheihna ding in khamtheih kahih a, hiai kahihlouh chiang in kagelh theikei'' chi hial hi.

Lamka khopi ah leng hiai bangmah hiding in agintak huai hi. "Kum 20/30 paita a public stage a lasa leh lamthei,musician te khamtheih a kibuallou a tam hetkei uh'' a chi uhi. Tangvalnou, naupang chikchik, mipi mai a zum leh zah khuallou a honglam theihna ding un, amau a om Nervous system pen sukniam ngai ahih man in, hiai hihniamna ding in mahni kibawltawm theih di vual ahikei hi. Huaiziak in hiai Nervous System hihniamna ding in 'Nekcheuh, Kap cheuh, hih cheuh, tulaipau le Peg cheuh' a cihte uh ahi mai hi. A sia-le-pha theihna uh 'sense' khat ahih mangna ding un khamtheih khat peuhpeuh honzat ziak un, i lasiamte uh leh musician te tamtak, khawvel a muhphak nwnlouh di'n omta uhi.

Hiaite unau(Khamtheih leh Music), khat a huathuai mahmah a, khatpen lah adeihhuai mahmah hi. A deihhuai pen lah Khawvel a kumpi lianpen, Kumpi David in alungkham-mangbat chiang a akihehnep nadia azat ahi. Hiai in milungkham mangbang te a hehnemthei a, thadahte a thanuam sak a,lungsim sisate leng a halhsak thei mawk hi. Nungak-Tangval ki iitna lam ah leng aki hahzat mahmah nawn hi. Zawlla i cihte, kam a genkhiat ngamlouh, hoihtak a dohkan a pen toh tu kuun ngiitnget a hongki gelhkhia ahi a, huai kan a duhthusam huai zaw dang om nawn tuanlou abang
hial hi. Kikhopna khwng bang ah leng, Music toh thugen honthuah uh bangzaw,i lungsim hon zouthou eive. Hichi tuk ahi, Music phattuamna leh mi asukkhak na.

Khamtheih i cih inleng Music mahbang in thil hihtheih ahau mahmah nawn hi. Hihngamlouh cih himhim anei kei a, kuamah zahtak leng aneikei a,genngamlouh leng neilou in,hiai zaw a uanglua cihleng aneikei bok hi. Kamsiam hetlou bang leng hong kamsiam mai a,Sappau,Meiteipau,Vaipau cihte theilou nasan hongpauthei mawk uhi. Zuaugen leng poi salou in, mahni deih neihna ding ahih nakleh sihleng poi asakei hi. Khotang siatnading hi le leng hihngamlouh cihte a-omvet kei hi. Innsung ah Deihlouh anei kei a, khamtheih in mi inn compound a Vokan huanna bel khawng bangleng deihmai dan ahi. A tawp in tualthah tan leng poisalou in Power anei hi.

Tua ahih man in, tate etkolna ah, saptuam lak a kihelna ah,pwlpi tuamtuam a kihelna ah tate MUSIC
lam a, lunglut uh ahi cih itheih leh 'PITU' hoihdeuh a poimoh uh cih nu-le-pa te'n theih ngeingei ding
ahi. MUSIC asia ichi zenzen kei a, atung a igente sang inleng a hoih zawtham ding hi. Himahleh, a sanggampa KHAMTHEIH a kiangnai a zattheih pahpah dia, ki innteksak takmai a hong gamtang nuam a phe tettet ahi cih, Nu-le-Pa te'n i manglh louh uh deihhuai hi. Tate Music a lunglut ahih ualeh cu, taitai louh a, amaute Pitu ding ngaihtuah pah ahoih zaw ding hi.Hithei ngial hileh, Saptuam lak khawng a kihelpih a, Tuailai pawl a Music Department-te toh
kintak a line bawlpih pah hoih mahmah ding in agintak huai hi.