Nunu Ka Papa Tawh Mangpha Aw..!!
Written By : K.Lianthansang @ K Thansang Zomi
Nunu leh Papa aw, zanlam deuh in Nute’ Ni leh Pate’ Ni (Mother’s Day & Father’s Day) chih-te hongtung a, himahleh na kiang uah ‘KIPAHTHU(?)’ kamkhat lel hongen di’n leng HATNA kaneikei..!!. Mi tampi te’n a nu leh pa-te’ uh kiang ah a IIT leh NGAIHNA thu uh banah, atung ua a KIPAHTHU uh agen chiat uh chih kahaihkei. Ken kamkhat lel leng nakiang ua KIPAHTHU(?) kongen ‘THEIHLOUH’ ziak in hon ngaidam un aw Nu leh Pa aw..?
Nunu, na muhphak dia ka Papa a omlai leh hiaithu nanih un ana simkhawm teitei un aw..?
Nunu leh Papa aw, Valentine’s Day ( 14th February) ni a nathil hih uh natheilai uhia..? Huaini in ‘Tuisik’ apan ‘Mihing’ hiding in ka hong kisiam panpan a, Pathian thilsiam kilawm taktak te muh kilam-en in aguk in kakipak mahmah hi. Nunu ei, nitaak khat ka Papa’n, “sum bangzah bei di a…?” chi a hon dot kana za mialmial a, ka lungsim in “Ka papa’n, hoihtak leh chidamtak a ka piang a, mite ka phakzoh saam nadia damdawi ka poimawh bangkim, ka nu’ tungtawn a honpiak sawm eive…” chi’n kana kipaak mahmah hi.
Na kihouna uh avek a ana za keive nunu leh papa aw…!! Ka nu’n, kapkawm a ka hinna dia thu hon ngetsak ngutngut lai a, nang bang simthu ana geelkha nahiam pa aw..? Sum leh pai zaw apoimawh zahzah sengzou in, nadeih zahzah neizou mah niteh pa aw, ahihhang in kei hinna pen sum tampi sang a manpha zaw ahihlam na hamhaih khak zual ziak in poi kasa..!!.
Kei maw papa, Pathian in a chituam liuliau a honsiam eive. Nang leng midangte tawh nakibatna uh a omkei ding. Pathian zaw, tulai pau in gen leng, ‘Designer’ siamtak ana hi a, khawvel ah mihing simsenglouh ana bawlkhiat te a chituam ngenngen in ana bawl hi. Na gingta hia papa..? Na gintaak keileh hiai ana ngaihtuah mah. Bio-metric lem (lim) na kilaak lai in, na KHUTPI MAI leh NA MITTANG hon laa uh hilou maw..? Huchi ahihleh, na KHUTPI leh MITTANG te lel leng midang a tawh kibanglou chihna hipah ahi. Kon haibawlna ahikei papa, ‘kei leng huchibang mah a Pathian in ‘Unique’ a honna bawl hisam hi a, tunitan a pammaih honsa nailou nahi hiam’ chih kon dotnuam ziak lel ahi zaw…!!
Nunu, nang leng hiai tungtang ah na suakta tuankei..!! Ka papa’n banglou teng geel mahleh, nang gilsung a om kahih man in, nang phalna nengchik leng tellou a zaw amah vuak in thil bangmah hihthei tuanlou di hi a maw..!!. Na lungsim khat in zaw, kei hinna ding na ngaihtuah chih kathei. Himahleh a lehlam ah, MINSIATNA in hon pumtuam di ahi chih na ngaihtuah man lel a kei kasih ding phal nahi. Ka papa leng tua bang ahi bok. MINSIATNA sang a kei HINNA na nawlkhiin zawk man un poi kasa. ‘A pianglou ngai a kap omlou’ chi nahi maithei uh, huai chi nahih taak ualeh leng, Pencil bawl te’n a monglam a RUBBER athuah bang un, nou leng thil hihkhelh khak leh chi’n kivenna dia VANZAT beek neile uchin zaw, ken Doctor-te khutlum thuak sese lou mai di hi’ng a maw…!!
Nunu aw, May 11 leh June 15 nite (2014) a, Nute’ Ni leh Pate’ Ni te’ na gilsung a nuamtaka zang dia zaw ki gingta hi’ng a..!!. May ni Sawm (10th May, 2014) ni a, ka papa tawh Doctor kiang a nong hawhpih lai un bang simthu geel nahi uh hiam chih leng bangmah ka theikei. Kha thum (3 months) vel a naupang (naungek) himahleng, huaini a ka thiltuah bangbang zaw midang tuah di’n ka phal mahmah kei nunu leh papa aw..nalua eive..!!.
Doctor Pa’ inn a om chi a lungmuantak a ka omlai in, keilam man-oh in siikzum, a mong ka semsuam khat hongpai gulgul a, ‘hehpihna’ kichi kammal khawvel a omlou hia chihtheih di hial khop a mulkimna bei in hon dawt zialzial tamai hi. Ka khe leh khut tegel hon tehtan sak a,panpihna ngen in ka aw neihteng suah in kikou mah leng hon panpih tu di kuamah a omkei…!!
Huaihun chiah a zaw, ka nunu’n le thuakhaksa sathou eive maw papa..?? Ka lu leh pumte’ hon teh zaan hial chiang in zaw, ka aw leng asuakzou nawn mahmah kei. Doctor pa’n ka sapum te a neen-neen in hon kaipawt a, polythene sung ah hon guanglut ngal hi. Nunu leh papa aw, na mel beek uh sawtlou chik hon munuam saam zaw hi’ng a….kei a di’n muhna di hun a omkei. Kei adia ka tantawk zaw, polythene sung ahimai hi.
Polythene sung a nonthun uh hun leh hoih di hiven mzw…!! A khawnung a ui leh aak te’ neek dia guamkuak peuh a nonpaih tel uh zaw, hehpihna bei honsa kahi. Nunu leh Papa aw, guamkuak ah hon paai mahle uchin, kei zaw ‘GUAMKUAK HILOU IN, VANGAM HI KA PAINA LEH TUNNA DING’. Jesu Christ a misiangthou-te’ lakhawm ding a hong painawn chiang in, Vaan a Angel te’n honna vaidawn ding ua…..nuam leh kipaak tak in Toupa phat in tangtawn dong in omta ning.
Nunu leh papa aw, nou leng kei paina ding mun (Vangam) a nongpai theih saam ua, haankhuk hilou a meidil a napai louhna ding un, na thilhih uh kisiik in, tawpsan unla’n…Pathian kiang ah NGAIHDAM ngeen ve ua maw..? Ken zaw sawtpek apan in konna ngaidamta a, ka sapumte non teh zaan sak ziak ua Nute’ Ni leh Pate’ Ni te a ‘KIPAHTHU(?)’ kamkhat lel leng hongen theilou kahi. Hon geen nuam himawk leng leng hatna himhim kanei kei..!!. Nunu Ka Papa Tawh Mangpha Aw…..!!!.
3006 – KAKIPAK - 2014