ZOGAM MASALA - iii
Written By : K.Lianthansang @ K Thansang Zomi

KHOVEL khantouhna hu (gas) in, ZOMI te le hon uuk khasam ta hi. Khovel khantouhna te eite a di'n siatna leh kiakniamna ahi dia o, chihtheih ton om zel abang mawk a hiven.!!. I kisui vengveng leh 'Lompai noinoi' te i hi uh chih ngaihtuahna neithei chiang te'n, i theih hoih mahmah uh ahi hi. Gamdang, ei sang a changkang zaw te, thil hihdan te muh leh zuih i thuah chetchet mai uhi. Himahleh, ahoihlam sang a, a selam kizui tamzaw adia aw, chihtheih hi.
 
Zomite Gam changkang lel-lel (India) sung a Gam changkang lou (Manipur) Simlam ah i teeng tangpi uhi. Eite' (adiak a daikilkal a mite) a di'n zaw Manipur a piankhak leh teenkhak, kisik huai i sak hun uh a tam mahmah ding hi. Dated 30-7-2013 a,Telangana State, India a State 29 na dia hong pian bang leng, ei a di'n kipahna khat ahi (Bethsaida Dil kitok bangmai ahihman in).Telangana State a om ta a, om taak (aphu uh) mah leng ahi. A population uh i et leh 3.5 Crores.! Chih hitel ve o..!  Ei Manipur a singtang mi Nam 33 tengkhawmte bangzah i pha di ua? Hiai i State thak gen uah MP-17, MLA seat-117 banah District-10 bang omzou hilhial hi. Manipur State toh ana bukkak mah dile? Telangana State in a buk zou mahmah mai ve maw? Huchi hileh, Manipur State apa'n State dang a pian di zaw......?

Zomi te'n i theih hoih mahmah uh, 'Tupna a sang leh kiakna a sang' chih ahi hi. Misual omlou pi a Jail bawl, zatna bei (a sung a omdi omlouh ziak in) a suak hi. Huai mahbang in, State leh bang 'Land-Land' hiam ngen le-le, a sung a vaihawm di dukdak a omkei leh,'Vokpi ma a suangmanpha paih' toh a kibang ding hi. Kei mimawl muhdan in, AHS (Autonomous Hill State) ah i tukhawm vek ding un ka gingta hi. Sangpi tum vel-val te le hiaimun hong tuk ua, Manipur a Tribe 33 omteng 'Tangtel siktan' bangmai a  kizialkhawm vit-vit in, AHS Demand a, 'Lounuak' bang in nuakkhawm diamdiam leng uthuai mahmah hi.
 
Khovel ah mihing a kibehlap hat mahmah a, second khat a naungek 5 (nga) piangzel ahi a chi uhi. Huai mahbang in, India inle Mihing tamlam ah,TOP-2 bang ana luah velvol a,TOP-1 a pang China, kum bangzah hiam nung chiah i makhalh ding chih misiamte gen a i theih uh ahi.Hiai thu ah,Zomite lungkhamna di a omkei, India government in 'Family Planning' hahgen mah leh i bil ua i lutsaklouh ding uh ahi (ei-le-ei i kivaihawm nuam u leh.!). Telangana State Population i genna ua pa'n in, i mitte uh hong vak leh chih i deih thusam ahi nawn hi.
I Zogam uh MUTPUAK (Balloon) bangmai in omta hi. Bang chidan in e? Mutpuak kichi i theihvek uh ahi a, naupang neu chik-chik te'n a paakta mahmah uhi. Mutpuak i mut chiang in muhtheih in khang lian pah hul-hul mai hi. Tua mahbang in, Zomite lak ah leng, Mutpuak bangmai a muhtheih a khan hul-hul na leh sum deihtakna chii ana kituh ta hi. Zan a bangmah hilou i sak te bang hong hauhsak hul-hul chiang un zaw, i lungsim ah 'Black' chih hong kilang dundun mai hi.

Zomite lak ah, Paite(Paite-Zomi chih di) kichi tribe khat ahi a, huaite paunak nalh mahmah khat ahihleh, 'Paite ki-eng-sawn' chih ahi.Thakhat thu a hauhsak utna ziak in, Assam gam ah mi bangzah in i hinna uh i va khawng ua le? Hiai i gen lailai in, 'Paite khonung pil' chih le ana omlai; himahleh i Sihnung a pilsawm i bang maimah uhi.! Bible in, Sum deihtak siatna (gilou) chiteng bul ahihdan hoihtak in hon na hilh hi (a bung-achang ka thei kei na a). I hinna uh pe-ngam khop a Sum deih minam i na hikha uhi. Christian ka hi va kichih-chih di le zumhuai ngoih-ngoih hun tam mahmah ta hi. Addict theih tuamtuam a tam a, Khamtheih kia hilou 'Chingpi ki (horn) khatnei te kap (shoot)' nasan in i gamsung hong buluh ta hi. Mikhat in, 'Chingpi kap kichi No.4 addict te sang a le lauhhuai zaw ahi' a chih, dik ahi dia aw ? ! ka chih vungvung hun tam mahmah mai hi. Dik le dik di'n ka gingta..!

I Zogam khopi tung uah, Muvanlai bang in i mitkhate uh lengsak den-den lehang bang i mudia? Bazar lai khawng a kimawlna thanghuai pipi kimawl tam i mu mahmah dia, Zuaktheih teng zuakna, Pathian Temple (Taksa pum) zuak bang leng hunkhop tak kimu phengphung di'n ka koih hi. Guta tamtak i muh ngei leng ka gingta nawn hi. Gambling lam gensau deuh le, Khamtheih tuamtuam te sang in ana lauhuai zawtham hi. Bang chidan in e? Gambling kimawlte'n kham chih anei ngeikei ua, zankho vak-vak in a kimawlthei uhi. A pung (gain) deuh-deuh ua leh lunglut deuh-deuh, a mang (loss) deuh-deuh ua leh thangpaih pan deuh-deuh ua, inngam (inn leh lou chaan) tamtak i omta uhi. A selam ngen a i lompai noi-noi sung uh Zogam a khangtou ngeikei ding hi.

Mi upa lam deuhte gen dan in, kum 10 hiam paisa in, i Zogam uah 'Lottery' ana kithang mahmah mai a, a saitute lah pung tuanlou,a va cut te lah pung tuanlou in om a, Nupa kikhen, inn 'banda' chih tanpha tam mahmah ahi chih a gen uh ka zakha ngei hi. Tua kia hileh phadawm deuh di, tuni tan a huai hunlai a sum abat uh, pezou (dinzou) nailou mi tamtak om uh ahi a chi uhi. A hoih peuhmah lenkip tinten in, a sia a i theih peuhmah uh 'Dustbin' sung tun tawmtawm le hoih ding hi. Tulai pau in gen le, 'A hoih peuhmah SAVE in, a sia peuhmah DELETE le i Nam leh i Gam khang hul-hul mai ding hi.

I Zogam neihsun uh a hoihlouhnate i gen tamta mahmah mai ua, a thu i zakmai un leng luak suakzou phial hi. Himahleh gen di bei dek mawklou ahi. I Zogam uh a hoihlouhna gen di abei dekkei leh chu I gam uh naksiat law mahmah ta ahi chihna ahi mai ding hi. I Zogam uh neuchik (mite theih a) himahleh, thu-le-la tam thei mahmah a, mit a muhtheih bang hileh, Suah-Tum-Mal-S­im (East-West-North-S­ouh) ah lengtuah vengvung ding a, akhenchiang a kiphukha pawl om ding in suangtuah (imagine) theih hi.

Zomite 100% (Za-ah-za) Christian i kichi uhi. Thukdeuh a i ngaihtuah leh I maiphaw (mask) lel dia 'Christianity' zang i hi kha di uam chih kivel hun mahmah ta hi. Form fill-up na teng a bang Religion kichihna mun ah, 'Christianity' i chi vek uhi. Ei Christian i kichihchih lai un, Unau Talpak (Meitei) te'n ' Jesu leh Jesu kidou (Christian te mah kidou)' khawng hon chih hial chiang un zaw..!

Thukalzeh dan in: Christian i kichih un omzia neilou ahihdan houchik in gen zualle, Class-X Certifcate apan in na kum zah uh bangzah in na kheniam ua le? Pathian in hon awi diam? Piang zekai ut deuh na hi hia? Pathian in, a hun di chet a hon na piangsak ahi chih na thei hia? Na piankum na khen lamdang ziak a kaam muh di chihna hilou ahi (keitel in).

Huai banah, namdangte hon theihdan zumhuai mahmah nawn ahihleh 'Christian Cubic' chih ahi tel hi. Christian te'n sing-aat i zuak chiang ua bang 'Inchi Tape' zang i hi di uam a, Cubic ching ngei mahmah lou..! Tunung chiang in 'Christian Kg ' chih khawng le hong om dia, 'Christian Bawngsa (Lawisa hi zenpi, Bawngsa chi a i zuakte uh)', 'Christian Feet' chih te bang in leng mi'n hon thei ding uhi.

Huchi bang kawmkal ah, Music leh La (song) lam ah khanlohna leh minthanna tuamtuam i ngah ua, mite theihphak in i om uhi. Himahleh bangziak a, La leh Music siamte a huchi sih pahpah mawk uh ahi di ? Music leh Lasak ngeihlou (a damtheihna uh toh kituaklou) ahi diam?? Music leh Late'n damtheihna a huchi suksiat di'n i gingta kei a, huchi ahihleh bang pentak pawlah a hichi sihbaih thei i hi di ua? Hiai dawnna i muhna di'n, Pu-pa hun apa'n i lehsuithak zual ding.

Pu-le-Pate hunlai in, Zupi khawng teep in nuam ana sathei mahmah uhi. Zu a teep pen uh hong kham chiang un, khuang beng (tum) in Laam hon pan ua, kua zi, kua ta chih khenlou in hong laam ua, huai pentak nop a sakna tak uh leng ahi hi. Huchi ahihleh, Music leh Khamtheih lawmhoih mahmah ahi uh chihna himai lou di hia? Tulai vai adi'n en le, Lady Gaga theilou i om kholkei ding uhi. Hiainu thilgen banghiam i chihleh, 'Khamtheih ka hihlouh chiang in, normal tak in ka omthei kei a, la leng ka gelh (phuak) theikei hi' chi hilhial tel ahi.

Music leh Khamtheih a tuamtuak a i et leh a hoihna uh leh, hoihlouhna uh Suah leh Tum ahi mai uhi. Music pe'n hoih mahmah mai a, lungzuan hehnepna bang, Gam itna piangsak leh Pathian thugente ngial in music toh thugen hon thuah uh bang zaw..!! Music a hoih chih i gen kawmkawm in a kiangnai mahmah a sawkphak pah dia om, Khamtheih pen se mahmah zel hi. Music leh Khamtheih lawmhoih ahihdan uh, Inndongta vai in gen le, 'ZAWL' a kichi di ua, Tulai pau in gen le, 'BEST FRIEND' hi di un gintak huai mahmah hi. Stage a banghiam i perform dek chiang a i Nervous sekna pe'n, sukniamna ding a, Music leh Lasiam khenkhat in Khamtheih a zatziak ua hong kithuahthei mahmah uh hi di'n a gintakhuai mahmah hi.

Khamtheih chih i genkhak lailai un, ZU kichi genzek lehang. Zogam a zu i dawnte uh Puang khilkhel ahi chih amukha ngei teng in i thei mai ding uh. Zing leh Zan khenlou a zu dawnte adia kingaihtuah tham mahmah hi ding, bangzah hiam i gen ding. Hiai dotnate kidong masa ni: Zu in na damkum ding bangzah hon lak sak a? Kumkhat in Zu litre bangzah na dawn gai di? Huai te'n na sunglam ah natna bangzah a piangsak di? Kumkhat a Zu man in sum bangzah na seng di? Hiaite dwngthei vek maizen le zaw, ZU chih kammal i zak cia le, i luaksuak mai di hiven maw..! Hiaite i dawngtheih kei leh le, hiai ana thei tei in. UK Cancer Rasearch apa'n Sarah Lyness in, ' Zu in cancer chi 7 piangsak thei ahi' ana chi tel dan ahi..!!! Aman chi 7 piangsak a chihte hoihtak a filter hi zomah di hi a ! ! Eilam a slipper sia khawng toh kihuan a puang khilkhelte'n Cancer chi bangzah a piangsak tel dia aw ?

Khamtheih in zaw thil ahihthei khop mai. Khamtheih in Zomite a khutzat in hon neita hi. A huham mahmah mai a, hihngamlouh leng a neikei hi. Amah metna di ahihnak leh mi hinna lak bang leng poi salou dan ana hi mawk hi. Khamtheih zaw hon ne zawng tu, si-leh-nai luangsak tu leng ahi hi. Gensau zek lehang. Khamtheih in sappau thei hetlou bang leng sappau in pau sakmai ve o !! 'VETO POWER' i Zogam a hong zang Khamtheih ana hi maimah ve o. Khamtheih sal in tuailai melhoih taktak tamtak koltangta ua, Innkuan maban limchi taktak te Khamtheih in bangmahlou suah sek hi. Innkuan kituak taktak khawng bang leng Khamtheih in khenzak zou mai hi ve o !! Magic nei hial hia cihtheih hun tam mahmah mai hi. Khamtheih in bangbang I Zogam a di'n, 'Free Gift' hon bawlsak a chih aban ah i sunzom ding uh. Aban, “ZOGAM MASALA – IV” ah kikum nawn ni….!!