OVERDOSE : OVERDEuh E(Oh Valdeuh e)…!!! By : K. Lianthansang @K Thansang Zomi

Nidanglai in (chi teutau le), “ Zouzaam paak I haal leh I mit sannuam “, “ I veilam khepi I suihkhak leh ki vangtah nuam “, “ Ukeng(Uphok) a ham leh Vuah zunuam(Vuah sam) “, “ Zite gailai a gul I thah leh I tate gul banga gialnuam uh ” chi dan a thudik hileh kilawm a kigen khenkhat om ve aw maw? Khenkhat ahihleh,” Oh, Valdeuh e” chi a I pomtheih hetlouh uh bang a om a, khenkhat I pom leh gintak mahmah uh bang leng a om sam hi. “ Ni asat leh vuah zuk’ di maban ahi “ chih khawng hi leh bel nial vuallouh thudik, nisa nuai a ‘Vainiliap’ lenkip tentan kawm a le itheih uh ahi.

Huchibang a gindan nei zekzek I omna kal uah, nikumlam(2013) May khabul lak vel in VUAHPI, HUIHPI LEH GIALPI kithuah in I tenna uh hon ‘balsialnuai’ cheuh a, inn tampi siat loh hithet hi. Huaihun in mi tampite’n, “ Gulpi man(that) omziak ahi “ chi uhi. Mi bangzah in hichibang gindan I nei ua chih zaw theikhang, ken bel gintak leh pom haksa kasa hi. Vuahpi, Gialpi, Huihpi chih phetlouh LEI leh VAN bawlpa’n ahun dia aseh hun a hongnung leh hong zu ahi zaw a, Gulpi Sih ziak a om chih himhim, DAWI leh KAU biakna toh kateh a, I gindan uh “Oh Valdeuh e” chih di’n hoih kasa mai. Indirect tak a Vuahtui leh huihpi te bawlpa’ Pathian thulaklou leh simmoh toh kibang I hi uh ka chi hi(?).

Gindan mak leh awm pi-pi tamtak in I gam uh hong buluh ta ua, mi tamtak le a hingmat ta uh chih ithei uhi. Tua te toh kizui mah in, technology lam ah I mit-te uh a keuh na sawt naikei mahleh gamdang te neih bangbang leh muh bangbang inei un, I mukhata ua, “ Kipah huai lua maw?” chih ngutngut di’n hoih hi.

Tutmun apan in I ut-ut uh I gen theita ua, I ut-ut uh I en ua, mi khenkhat ngaihdan bang dik isak kei ua(ei ngaihdan toh kituaklou om) leh gawlgui dawkzen in leh kidaam lou hial in I chisuk(comment) zialzial theita uhi. Nuam kisa mahmah mai mawle? Ngaihdan zaw gentheih mah hi, theihlouh-te le athei zawte kiang a dottheih louh chih le hituanlou a, India Dan Bupi in phalna pelou ahih zen kei leh Ngaihdan gentheih luat ahi(Fundamental Rights in bangbang huap adiam a, ken bel kathei kei..!! thei lengle thei kachi ngamkei di mipil tampi te lak ah..!!). Lungsim Vei(left) pai I om zekzek ua, I kampau te uh “ Oh Valdeuh e” chih di om zeuhzeuh abang..? Mi’n thutak agen, Chiamnuih na-na suah mawk leh zaw….?

Thildang daih ah tawmlut zual le, Numei Leh Pasal kal a thangtatna leh nuamtal utna te’n I gam uah, ‘Giah Phual” honbawl ua, hong innteek pan mahmah ban uah, tanau-laina tampi nei in, a Innsak-innkhang te thuzoh zou mahmah hi a theih ahi. A na zintun tu leh I gam a honglut na dia makai tu tampi te lak a tallang mahmah te: Kicheina uang khengval, Technology zatkhelhna leh Mahi ki thunun zohlouhna te ahi deuh uhi.

Hiai te apan khangthak te hotkhiat theih dan omkhak leh chihziak in, YPA General HQ in Numeite ‘Dress Code’ di honbawl ban uah, mun tuamtuam ah Duty di bang I kisep hial uhi. YPA te nasep ziak in, ‘Over Deuh’ a gamtatna adan hong om deuh a, huchibang a Dan zahtaklou a Overdeuh a omkha(Oh Valdeuh a omkha) leng Kop(Numei leh Pasal) tamtak matkhiat in ana omta ua, YPA te’n nahoih asepna tung uah Nu leh Pa tamtak kipak mahmah hi ua theih ahi( Khangthak atam zaw te’n bel aki pahpih kei uh chih le kathei bok).

Mi kuahiam, omdan hoihlou I mat chiang un, hoihtak in I thuhilh ua(?) kipah huailua. A nu leh Pa te uh kiang ah I pekhia ua, kipahhuai semsem. Counselling hoihtak poimoh ahi uh chih ithei ua, huai ah I ‘Pass dek geigei uh’ abang a, nuamdek panpan. Deihsakna ziak liauliau a, loh nei le hilou a pang kinken YPA te I phat mahmah uhi. Christian hindan tawisang’ na chikhat hi’n le kakoih.

Mihingte lungkimna bei chih mahtak, keile mihing kana hihsam ziak in, hiai tungtang ah kupbeh nop kanei cheuh sam hi. Ahoih in a phatuam pen di zaw chikhang, a se pen di le zaw chituan khang, himahleh “ Phulun’ pawt na di Leikha in a keihvang sak “ chih dan le om hiven, nengchik bek kakeih hem zoh khak leh chihziak lel hi. Mi kuahiam tasual( kithutuak tak a omdan kilawmlou, ‘Misualluih’ te bel hilou in) I mat chiang un, I Thuhilh ban ua a nu leh Pa-te uh kiang a I piakkhiat tan uh hunsak in, Press leh Media te tungtawn in a Min uh taklat hikei thei leh bang a chi dia?

Mi mat I neih leh bel, ‘Min Khek(minkhek chihziak a mite theih a khek ahihlam genlouh)’ a, matnei ihihdan uh taklang leng le Phatuam huntawk di’n kaging. “ Deihsak Overdeuh” chih bang le omthei ahih ban ah, mimat khak te maban di khualna liauliau in..!! Huchi hileh, “ Oh Valdeuh e” chih omlou deuh din gintak huai mawk ve aw. Mi kingaise deuh te ngial bang, Damdawi tampi ne(Overdose) a kithat thei ahih man un..!

Huchibang vingveng kal ah, thildang daih gen le, ‘a hau-te dikloutak a piak behlap(Side Income)’ in ana omnawn uhi. Khenkhat in, Side kia hun salou in, Front( Development Fund Nekguk) leh Back(Black a thil zuak)’ Income le nei uhi. Government’ buhpang(sum bawm) sawk te hi’n sawklou te hitaleh ‘Chance’ om liai in tuh, aneu-alian chih omlou in nektheih na di lam izong chiat uh abang(?).

Khamtheih tamnnek lawkha(Overdose) chih dan pian deuh in, “ Sazu maingal law-te le thaang ah awknuam uh “ chih ana om a, nekguk lam akhengval(maingal) lua a I om chiang un, ki thaang awk(Awkverdose) kha pahpah hi. Nekgukna kia hilou in, Assam gam a Kaziranga National Park a hinna va chaan te bang leng Overdeuh a gamtat ziak a than gawk uh ahi. Huaihun chiang in, mite’n Rs. 2 a honmuh lai uh ‘Zero’ in le hon munawnlou uhi. “ Oh Valdeuh e..” hon chi lel didan uh ahi.

Khamtheih tampi ne a si te’ “Overdose” a si ahi I chi ua, Deihsak khengval luat ziak hiam, duh-aam na ziak hiam in mite’n kingaihsiatna leh sihna tuak le uh “Overdeuh” ziak a si himai di uh ahi. Huaihun chiang a, akua-kua in, “ Oh Valdeuh e” ichih vungvung louhna di un Ngaihtuahna leh Paidan khekzek apoimoh diam chi a ka Ngaihdan mite muh dia hon ban ZUAK(Share) mai kahi.

0802 – KAKIPAK - 2014