Bangchidana David Toupa’ Mit a Khial Hihiam? (2 Samuel 11–12)
- Chingboi Phaipi

Thumapi
2 Sam 11:2–5 ah kumpi David in a galkapmi Uriah zi Bathsheba kisil lai mukha in, enlah in a luppih a, Bathsheba in nau hon paai chihthu kimu hi. Bathsheba in nau paai chih David in atheihin Uriah galmun a galkaaplai samkhia in a zi Bathsheba kianga lum dingin sawla, himahleh sawlzoulou hi (2 Sam 11:5–13). Huchihtakin, David in galkap heutu Joab houpihin, Uriah pen gal hatna pen mun a omsak dingin thu pia a, Joab in leng thupiaka ombangin hiha, huchiin Uriah tuh thahin a omta hi (2 Sam 11:14–17). Aban I simsuk leh, 2 Sam 11:27b ah David thilhih pen “Toupa’ mit a thilkhial ahi” chi in kigelh hi. I laisiangthou te ah lehdan tuamtuam in kilet a, a Hebru pau a gendan tak thumal mal in let lehang “Toupa’ mit ah thilkhial hih” (sappau in: “did evil in the eyes of the Lord”) ahi hi. Hiai tangthu akisutna tamzaw ah David hihkhelh bang (what?)—angkawmna maw, tualthahna maw—chih kisut a, himahleh hiai ah bel a thuk zaw in David bangchidana (how?) Toupa mitmuha khial ahi hiam chih en lehang chi ihi. Huai I sut na dingin David gamtatzia I en masa ding.

David Gamtatzia
2 Sam 11 hoihtaka I sim leh kumpi David in a thuneihna a zatdan kimu hi:
Kumpite kidou a a kuan hun un David kuanlou in Jerusalem ah om hi (11:1)
Numei kisil a galmuh in a sikhate vasam saka (pasal neisa, a galkapte khat zi ahi chih hilh a a omnung in leng), (11:4)
Numei tuh a luppih hi (11:4)
Numei in nau ahon paai in a galkap heutu Joab kiang ah numei’ pasal Uriah hon sawlkik ding in thu pia hi (11:6)
Uriah hongpai in a zi kianga va lum dingin thu pia hi (11:11)
Uriah a zi kianga lum dia a sawl zohlouh takin David in kidouna mun ah sawlkiik a, galkap heutu Joab kiangah Uriah sihsakna ding thu pia hi (11:15)
Tua atunga I et nate ah kumpi David in a thuneihna amah nopna ding, amah phattuamna dinga zang jiahjiah chih theih hi. Kumpi ahihna ah ama’ thu nial ngam/nial zou ding kuamah omlou hiding hi. Himahleh, 2 Sam 12 ah thil hong ki lumlet a, thuneihna ut dandan a zang David tuh mohpaih in hong omta hi.

David Mohpaihin Om
Siampu Nathan David kiangah hongpai in gentehna-tangthu hong gen hi:
Khuakhat ah mineizou mahmah, kel leh belam tampi nei khat oma, huan mi neizoulou, belamnou khat kia nei leng a om hi. A neizouloupa in a neihsunsun belamnou pen amah tanu banga deihthohtaka a kep hi a, a nekna kuang leh a dawnna nou akikoppih, a angluma a ihmutsak belamnou ahi hi. Nikhat mineizoupa’ inn ah khualzinmi hongtunga, mi neizoupa in ama’ neihsa kel leh belam tampite nei hinapi in a neiloupa’ neih sunsun belamnou va laksakin khualzinmi tuh an limtakin ana vaak hi (2 Sam 12:1-4).

Nathan’ gentehna-tangthu genna a mi neizouloupa’ gamtatzia a zak phet in kumpi David thangpai mahmah a, huai mi neizoupa lainatna bei a a gamtat jiaka sitaak ahi, chi a mohpaihin hong kikou khia a, huan belam aleh li a a ditding ahi chi behlap hi (2 Sam 12:5-6). Himahleh Nathan in huai mineizoupa tuh amah (David) ahi chi in phoulaak hi:

Huai mi tuh nang na hi. Toupa, Israelte Pathianin hichiin achi, “Israelte tunga kumpi dingin thau kahon nilha, Saul khut akipanin ka hon honkhia. Na pu’ inn kahon pia a, na pu’ numeite leng na ang ah kahon pia. Israel leh Judah ka hon pia a, huaiteng tawm ahihleh, ka hon behlap lai ding. Bangjiaka Toupa’ thu ngeingaihlou a, a mitmuha thilkhial hih na hia?” (2 Sam 12:7~9a).

Nathan in David bangchidana mohpaih thei ahihiam—dan (law) banga mohpaih ahidiam chih en masa ni. Angkawmna toh kisai dan te (laws) en masa ni. Lev 18:19—20 ah pasal in numei a sianglouh lai a luppihlouh ding chih leh a innveng’ zi a luppihlouh ding kichi hi. Lev 20:10 leh Deut 22:22 dungjui in leng David leh Bathsheba thah theih dinmun ahi uhi. Huan, Lev 24:17 leh Ex 21:12 ah tual that kuapeuh sihsak ding kichi hi. Tualthahna toh kisai dan (law) leng ana om mah hi. Num 35:20-21 ah leng kuapeuh in lungsim siatna (thah utna lungsim) toh midang khat a sual a, huai mi asih leh tualthat ahi a, sihsak ding ahi kichi hi. Hiai dante dungjui in David tuh sihsak taak ahi hi. Ahi a, huai hunlai in, dan leh thupiak ana om mahleh, bangchitukin ana zuikim uhiam chih kithei taktaklou a, laisiangthou siam tampi te’n tuhun a kihekna inn (court) ineih dan in na neilou ding ua, dan-le-thupiakte diktat taka ana zui dingun umlou uhi. Huai kia leng hilou in, kumpi hilhial ana hek ngam om taktak diam chih muanmoh huai hi. A thu kigelhdan hoihtaka I sim leh, Nathan in David kiang ah hiai/huai dan (law) bohsia na hi a, sihsak taak nahi chilou a, Toupa’n a poimoh khempeuh kimtaka a piak nunga Toupa’ mit a bangjiak a khial lai hiam chihteng genzaw hi (2 Sam 12:7-8). Hileh, dan bohsia a mohpaih ahihkei leh, David bangchidan a Toupa mit a thilkhial hihkha hiding hiam?

David Bangchidana Khial
Nathan in David a houpih khitin David ahihkhelhna kipuanga, huchi in Nathan in Toupa’ ngaihdamna thu puang jui pah hi (2 Sam 12:13). Ahihleh, Nathan thugen apan imuhtheih bel, David in dan kalha sihna taak khelhna hih hia chih sangmah in, Toupa’ mitmuha thil hihkhelh pen ngaikhawk zaw chihna suak hi. “Bang” hihkhial chih sangmah inleng “bangchidana” hihkhial chih pen ah Toupa lunglut zaw hi in muhtheih hi. Gentehna-tangthu ah mineizoupa in khualzinmi mai ah thilphal tak leh siam tak bangin nek le dawnte in ana vaak mahleh, adiktakin bel thil hoihlou/diklou tawpkhawk hiha minhoihna ana loh ahi hi—mi neizouloupa’ neih sunsun laksuh. Hiai mineizoupa pen tuh David genna ana hi hi. Aman tampi a neih laia, a thuneihna/thilhihtheihna zanga aneizoulouzaw tunga a gamtatdan, aman tampi nei hinazen pii a a neizoulou zaw a laksuha a amah nopbawlna dinga a zat natak ahi hi Toupa’ mitmuh a ahihkhelhna. Deut 17:14–20 ah kumpite duhaamlou ding leh midangte sanga lianzaw lua a kikoihlou ding a thuhilh himahle uh David bel gentehna-tangthu a mineizoupa bangin lainatna bei in ana gamtang khata hi.

David Lainatna Bei a Gamta
David angkawmna leh tualthahna te khelhna hitham mahleh, amah thuneihna leh utna zanga thuneihna tawilouzaw leh mineizoulouzaw tunga hehpihna bei a a gamtatdan pen Toupa’ mit siip mahmah hiding ahi hi. Gentehna-tangthu a genna a mineizoupa lainatna neilou a a gamtat bangin David leng amah ading kimtaka Toupa’n pia hinazenpi lainatna bei a Bathsheba leh a pasal Uriah tunga a gamtatna pen Toupa mitmuh a ahihkhelhna ahi hi.

2 Sam 12:6 a “lainatna bei” chi a kilet thumal pen a Hebrew ah lo-khamal hi a, “lo” pen “omlou, hilou, bei” (negative) genna hi a, “khamal” pen “lainatna, hehpihna” genna ahi hi. Mundang hiai thumal kizatna khenkhatte apan a thumal a thuukdan muhtheih hi. Deut 13:8 ah Pathianin Israelte kianga Pathian dang beding a ana kun (thuzoh sawm) omleh ngaikhia lou a, tuabanga akunte tungah lainatna neilou (=mulkimna bei) a that ding in gen hi. Mundang khat, Ex 2:6 ah Pharo tanu in naungek Mosi amuhin lainatna nei a, apa Pharo khut apat thah a omlouhna ding in ana hunkhia hi. Hiai thumal a kizatnate et in genna (quality) thuuktak nei, thilhihtheitak ahi: sihna tunthei, ahihkeileh sihna apan hunkhia thei, tuabang genna/quality nei thumal ahi hi. Athuvuaka “hehpihhuai na e” chihmai hilou in, lungsim tawng dengkha, nasep toh kizui lainatna (“pity” maimai hilou a “compassion”) genna ahi hi. I tangthu et ah, David in Nathan gentehna a mihausapa “lainatna bei a gamtang” a angoh pen amah ana hidaih hi. David pen kumpi hi a, mi sihsak theihna ding thuneihna tawi a, a sidingte hotkhiat theihna thuneihna leng tawi hi. Tuabang hihtheihna dinmun a om David in a thuneihna ana zangkhial a, Toupa mitmuhin a khial ahi hi.

En I zil theih bang a om a? Ei leng eikhom khom chiatah thuneihna kitawi chiat hi. I nampi tungah maw, saptuam tungah maw, ahihkeileh insung hi in lawmta kal ah hitaleh, a huapkhak neuchik sung hitaleh thuneihna I tawi chiatte bangchi in I zangkhia a? Toupa’ mita khial in I zangkha hia, eisanga thuneihna tawmzaw tawi, eisanga neizoulouzaw te tungah hehpihna, lainatna bei in I na zangkha hiam?