Lamka leh Kicheina~ K.Lianthansang @ K Thansang Zomi

Manipur a 'Second Town' chih hial a om Lamka (Zogam) khopi neuchik himahleh, Imphal khopi sang in kicheina lam ah sangzaw ahi diam chih sim in om hi. A hausa mah i hi di uam? Ahihkeileh, i neih sang ua sangzaw a kichei i hi di uam? Kicheina lam ah mite sang in i niam zaw kei hial uhi. Lamka khopi apan gamlalou, khopi nawl ah vak lecin, kicheidan ah mite sang a niamzaw, tuantual zaw tamtak na mu ding hi. Sang i kisak mahmah lai un, i niam mahmah na uh leng om hilou hiam?

I khoheidan uh niam mahmah sang in, a sang mahmah te a buaihuai zaw diam chih khovel pumpi a thiltungte i muh leh zak apan in angaih poimoh huai mahmah hi. ‘Nidanglai in, numeite khuk chiang mukha chu, anu-le-pa leh a ngaihzawngte uh chih louh omlou ahi’ ana chi uhi. Tuni chiang a kholak a numei pai khat peuhpeuh in a khuk uh a dawk kei leh kicheidan luilua leh mawllua bang a ngaihdan nei khenkhat om a bang sim mawk hi. Huaikia leng hilou in, tuni chiang in numeite'n a pheipi bul uh dawk phialphial in kicheita ua, et ding lah kihhuai, etlouh ding lah lamdang kisasim chih ding nungak nou tamtak Lamka kholai ah omta uhi.

Numeite Puannuai himhim a pasal a di kia a bawl ahi a, limchitak leh siangthou tak a, a kep zoh leh, apasal mi vangpha a hiding a, apasal mivangpha ahihleh amah leng mi vangpha himai ding ahi. Tawbou leh pheipi dawk hial a khekol tom teng a kholak hong vak hial chiang un zaw, a 'Speciality' uh bei toh kibang ahi mai a, midangte muhmuh sa zuut dia kisak khawng chu a uthuai na ding leng om nawnlou hi. Kithalawpna nei thouthou om ahih lelah, hun lemchang a omleh a khahsuah kei hial ding uh chih theihsa ahi(Rape a om himai uh). Muslim numeite toh kikhia hina hang e maw?

Khovel a gam lianpente lak a 7na, India in tulai a abuaipih mahmah 'Rape' ahi. Niteng in Delhi khopi ah hichibang case om gige sim a, hiai toh ki tuak ding dan tuamtuam leng bawl in ana omta hi. India vaihawmna innpi a buaisak zou mahmah a, Manipur leng hiai thu ah a suakta tuankei. Manipur chih phetlouh, I Zogam khopi uah leng hichibang a, Numeite bawlsiatna om zeuhzeuh hi. I theih manlouh a Inndongta level a sukveng leng tampi mahmah a om ding hi. Hiaite i Zogam khopi mahmah ua hong hichi maingal mawk uh bangziak ahi dia?

Aziak tampi a om ding a, himahleh, i kicheidante uh a ziak tampite lak a khat hiding in a gintak huai mahmah hi. Numei Sexy deuh mai a om tuh pasal a mute'n leng Sexy deuh mai a en uh ahi cih theihpah ding ahi. Hun lemchang a om liai in tuh khahsuah sawmlou ding hilai uhi. Huchi ahihziak in Rape toh kisai a neuchik bek a kiven theihna om khak leh, Nu-le-Pate'n i tate chiat uh kicheina ah pilvanpih poimoh mahmah hi.

Pasal in Numei’ lungsim ding a zon na tuh a kicheina ahi cih nu-le-pate'n theihsiamsak a, silh leh teen amau deihdante a khengvallua a om leh leng, leisak mailou in, a hoihlouh dante theisiamsak thei ding in panla zaw leng bang a chi dia? Numeite' kicheina ding leng a hunphet tamlua ahi. Nu-le-pate'n i tate van lei leh asilh utdante uh etkaipih in, “ Don’t tell me how to Dress, tell them not to Rape “ chih lungtang paikhesak ni. Huchi hileh, i gam siatna uh adan om zek diam chidan i hi. Nang la bang ngaihdan na nei a le??
2101 – KAKIPAK - 2014